ᠨᠠᠴᠤᠭᠳᠣᠷᠵᠢ 1906 ᠣᠨ ᠤ 11 ᠰᠠᠷᠠ ᠶᠢᠨ 17 ᠳᠤ ᠬᠠᠭᠤᠴᠢᠨ ᠲᠦᠰᠢᠶᠡᠲᠦ ᠬᠠᠨ ᠠᠶᠢᠮᠠᠭ ᠤᠨ ᠳᠠᠷᠬᠠᠨ ᠴᠢᠨ ᠸᠠᠩ ᠤᠨ ᠬᠣᠰᠢᠭᠤ᠂ ᠡᠳᠦᠭᠡ ᠶᠢᠨ ᠲᠥᠪ ᠠᠶᠢᠮᠠᠭ ᠤᠨ ᠪᠠᠶᠠᠨᠳᠡᠯᠭᠡᠷ ᠰᠤᠮᠤ ᠶᠢᠨ ᠨᠤᠲᠤᠭ ᠬᠤᠨ ᠭᠠᠯᠠᠭᠤᠲᠠᠢ ᠭᠡᠳᠡᠭ ᠭᠠᠵᠠᠷ ᠲᠤ᠂ ᠶᠠᠳᠠᠭᠤ ᠲᠠᠶᠢᠵᠢ ᠶᠢᠨ ᠭᠡᠷ ᠪᠦᠯᠢ ᠳᠦ ᠲᠥᠷᠦᠵᠠᠢ᠃
ᠨᠠᠴᠤᠭᠳᠣᠷᠵᠢ ᠵᠥᠪᠯᠡᠯᠲᠦ ᠬᠣᠯᠪᠣᠭᠠᠲᠤ ᠤᠯᠤᠰ ᠪᠣᠯᠤᠨ ᠭᠧᠷᠮᠠᠨ ᠳᠤ ᠬᠡᠳᠦᠨ ᠵᠢᠯ ᠰᠤᠷᠤᠯᠴᠠᠵᠤ᠂ ᠥᠷᠥᠨᠡᠲᠦ ᠶᠢᠨ ᠰᠤᠶᠤᠯ ᠤᠨ ᠰᠢᠯᠢᠳᠡᠭ ᠥᠪ ᠰᠠᠩ ᠲᠠᠢ ᠭᠦᠨᠵᠡᠭᠡᠢ ᠲᠠᠨᠢᠯᠴᠠᠵᠠᠢ᠃ ᠨᠠᠴᠤᠭᠳᠣᠷᠵᠢ 《ᠤᠱᠠᠩᠳᠠᠷ》᠂ 《ᠰᠠᠨᠳᠣ ᠠᠮᠪᠠᠨ ᠤ ᠬᠠᠷᠭᠢᠰ ᠶᠠᠪᠤᠳᠠᠯ》 ᠵᠦᠵᠦᠭᠡ᠂ 《ᠤᠴᠢᠷ ᠲᠠᠢ ᠭᠤᠷᠪᠠᠨ ᠲᠣᠯᠣᠭᠠᠢ》 ᠳᠠᠭᠤᠷᠢ᠂ 《ᠮᠢᠨᠦ ᠨᠤᠲᠤᠭ》᠂ 《ᠣᠳᠣ》᠂ 《ᠣᠺᠲ᠋ᠶᠠᠪᠷᠢ》 ᠵᠡᠷᠭᠡ ᠣᠯᠠᠨ ᠠᠷᠪᠠᠨ ᠰᠢᠯᠦᠭ᠂ 《ᠬᠠᠭᠤᠴᠢᠨ ᠬᠦᠦ》᠂ 《ᠴᠠᠭᠠᠨ ᠰᠠᠷᠠ ᠪᠠ ᠬᠠᠷᠠ ᠨᠢᠯᠪᠤᠰᠤ》᠂ 《ᠬᠠᠷᠠᠩᠭᠤᠢ ᠬᠠᠳᠠ》 ᠵᠡᠷᠭᠡ ᠥᠭᠦᠯᠡᠯᠭᠡ ᠨᠦᠭᠦᠳ ᠢᠶᠡᠷ ᠢᠶᠡᠨ ᠠᠯᠳᠠᠷᠰᠢᠵᠠᠢ᠃
ᠨᠠᠴᠤᠭᠳᠣᠷᠵᠢ ᠣᠷᠣᠰ ᠤᠨ ᠪᠣᠯᠤᠨ ᠳᠡᠯᠡᠬᠡᠢ ᠶᠢᠨ ᠰᠣᠩᠭᠣᠮᠠᠯ ᠵᠣᠬᠢᠶᠠᠯ ᠤᠳ ᠲᠠᠢ ᠮᠣᠩᠭᠣᠯ ᠤᠩᠰᠢᠭᠴᠢᠳ ᠢ ᠠᠩᠬᠠ ᠲᠠᠨᠢᠯᠴᠠᠭᠤᠯᠵᠤ᠂ ᠫᠤᠱᠺᠢᠨ ᠦ 《ᠭᠢᠯᠪᠡᠷ ᠦᠨ ᠬᠠᠲᠤᠨ》᠂ 《ᠫᠤᠤᠳᠠᠯᠴᠠᠭᠰᠠᠨ ᠨᠢ》᠂ ᠡᠳᠠᠭᠠᠷ ᠠᠯᠯᠠᠨᠫᠣ 《ᠠᠯᠲᠠᠨ ᠴᠣᠬᠣ》 ᠭᠡᠬᠦ ᠮᠡᠲᠦ ᠬᠡᠳᠦᠨ ᠵᠣᠬᠢᠶᠠᠯ ᠤᠳ ᠢ ᠣᠷᠣᠰ᠂ ᠭᠧᠷᠮᠠᠨ ᠬᠡᠯᠡᠨ ᠡᠴᠡ ᠤᠶᠢᠭᠠ ᠦᠭᠡᠢ ᠠᠩᠬᠠ ᠣᠷᠴᠢᠭᠤᠯᠵᠠᠢ᠃
ᠨᠠᠴᠤᠭᠳᠣᠷᠵᠢ ᠶᠢᠨ ᠵᠣᠬᠢᠶᠠᠯ ᠤᠳ ᠨᠢ ᠭᠠᠳᠠᠭᠠᠳᠤ ᠶᠢᠨ ᠣᠯᠠᠨ ᠬᠡᠯᠡᠨ ᠪᠡᠷ ᠣᠷᠴᠢᠭᠤᠯᠤᠭᠳᠠᠭᠰᠠᠨ ᠡᠴᠡ ᠭᠠᠳᠠᠨᠠ᠂ ᠲᠡᠭᠦᠪᠦᠷᠢ ᠵᠣᠬᠢᠶᠠᠯ ᠨᠢ ᠣᠷᠣᠰ ᠬᠣᠯᠪᠣᠭᠠᠨ ᠤ ᠤᠯᠤᠰ᠂ ᠡᠨᠡᠳᠬᠡᠭ᠂ ᠭᠧᠷᠮᠠᠨ ᠵᠡᠷᠭᠡ ᠣᠯᠠᠨ ᠣᠷᠣᠨ ᠳᠤ ᠬᠡᠪᠯᠡᠭᠳᠡᠵᠡᠢ᠃
ᠳ᠂ ᠨᠠᠴᠤᠭᠳᠣᠷᠵᠢ ᠶᠢᠨ《ᠣᠳᠣ》 ᠬᠡᠮᠡᠬᠦ ᠰᠢᠯᠦᠭ
ᠬᠣᠯᠠᠬᠢ ᠭᠠᠵᠠᠷ ᠠᠴᠠ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠬᠤ ᠥᠩᠭᠡᠲᠦ ᠣᠳᠣ
ᠬᠢᠵᠠᠭᠠᠷ ᠦᠭᠡᠢ ᠣᠭᠲᠠᠷᠭᠤᠢ ᠶᠢᠨ ᠳᠤᠮᠳᠠ ᠵᠤᠭᠠᠯᠠᠭᠰᠠᠨ ᠣᠯᠠᠨ ᠤᠯᠠᠭᠠᠨ ᠣᠴᠢ ᠠ᠋
ᠨᠠᠷᠠᠲᠤ ᠶᠢᠷᠲᠢᠨᠴᠦ ᠶᠢᠨ ᠳᠣᠲᠣᠷᠠ ᠰᠠᠭᠤᠭᠠ ᠮᠠᠷᠱ ᠣᠳᠣ ᠠ᠋
ᠮᠠᠨ ᠤ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠴᠢᠮᠠ ᠲᠠᠢ ᠲᠠᠨᠢᠯᠴᠠᠬᠤ ᠶᠢ ᠬᠡᠳᠦᠶᠢᠨ ᠡᠴᠡ ᠬᠦᠰᠡᠪᠡ
ᠠᠯᠲᠠᠨ ᠰᠠᠶᠢᠬᠠᠨ ᠪᠡᠶᠡ ᠳᠡᠭᠡᠷᠡ ᠴᠢᠨᠢ ᠶᠠᠮᠠᠷ ᠬᠦ ᠡᠷᠳᠡᠨᠢ ᠣᠷᠣᠰᠢᠨᠠᠮ
ᠠᠭᠤᠯᠠ᠂ ᠤᠰᠤ᠂ ᠴᠡᠴᠡᠭ ᠮᠣᠳᠣ ᠴᠢᠨᠢ ᠶᠠᠭᠤ ᠪᠠᠷ ᠪᠦᠲᠦᠭᠰᠡᠨ ᠪᠤᠢ?
ᠮᠠᠨ ᠤ ᠶᠢᠷᠲᠢᠨᠴᠦ ᠰᠢᠭ ᠶᠠᠩᠵᠤ ᠶᠠᠩᠵᠤ ᠶᠢᠨ ᠶᠠᠭᠤᠮᠠ ᠬᠣᠯᠢᠯᠳᠤᠨ ᠪᠠᠶᠢᠨᠠ ᠤᠤ? ᠦᠭᠡᠢ ᠤᠤ?
ᠨᠡᠶᠢᠭᠡᠮ ᠵᠢᠷᠤᠮ ᠤᠨ ᠪᠠᠶᠢᠳᠠᠯ ᠴᠢᠮᠠ ᠳᠡᠭᠡᠷᠡ ᠲᠣᠭᠲᠠᠭᠰᠠᠨ ᠤᠤ? ᠦᠭᠡᠢ ᠤᠤ?
ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠭᠡᠳᠡᠭ ᠢ ᠴᠢ ᠮᠡᠳᠡᠨᠡ ᠦᠦ? ᠦᠭᠡᠢ ᠤᠤ?
ᠢᠨᠠᠭᠯᠠᠯ ᠠᠮᠠᠷᠠᠭᠯᠠᠯ ᠤᠨ ᠳᠥᠯᠥ ᠠᠯᠢ ᠵᠡᠷᠭᠡ ᠬᠤᠷᠴᠠ ᠪᠤᠢ?
ᠶᠠᠭᠤᠨ ᠳᠤ ᠮᠠᠨ ᠤ ᠶᠢᠷᠲᠢᠨᠴᠦ ᠳᠤ ᠵᠠᠬᠢᠶᠠ ᠦᠯᠦ ᠢᠯᠡᠭᠡᠨᠡ ᠴᠢ?
ᠡᠷᠳᠡᠮᠲᠦ ᠮᠠᠷᠱ ᠣᠳᠣ ᠠ᠋! ᠴᠢ ᠨᠢᠭᠡᠳ ᠨᠢᠭᠡ ᠪᠡᠷ ᠬᠠᠷᠠᠵᠤ ᠪᠠᠶᠢᠨᠠ᠃
ᠡᠨᠡᠬᠦ ᠳᠡᠯᠡᠬᠡᠢ ᠶᠢᠨ ᠲᠦᠮᠡᠨ ᠪᠠᠶᠢᠳᠠᠯ ᠢ ᠶᠠᠭᠤ ᠭᠡᠵᠦ ᠰᠣᠨᠢᠷᠬᠠᠨᠠ ᠴᠢ᠃
ᠣᠭᠲᠠᠷᠭᠤᠢ ᠶᠢᠨ ᠣᠷᠭᠢᠯ ᠤᠨ ᠣᠯᠠᠨ ᠡᠷᠳᠡᠮᠲᠡᠨ ᠴᠢᠮᠠᠢᠢ ᠬᠡᠳᠦᠶᠢᠨ ᠡᠴᠡ ᠰᠣᠨᠢᠷᠬᠠᠪᠠ᠃
ᠤᠷᠢᠳ ᠢᠶᠠᠷ ᠨᠡᠶᠢᠭᠡᠮ ᠵᠢᠷᠤᠮ ᠢ ᠪᠠᠶᠢᠭᠤᠯᠵᠤ᠂ ᠳᠠᠷᠠᠭ ᠠ ᠪᠠᠷ ᠴᠢᠮᠠ ᠲᠠᠢ ᠤᠷᠤᠭ ᠪᠣᠯᠤᠰᠤᠭᠠᠢ ᠭᠡᠨᠡ᠃.