ᠢᠷᠠᠭᠤ ᠨᠠᠶᠢᠷᠠᠭ ᠭᠡᠳᠡᠭ ᠪᠣᠯ ᠨᠠᠳᠠ ᠰᠠᠶᠢᠬᠠᠨ ᠪᠥᠭᠡᠳ ᠬᠠᠮᠤᠭ ᠤᠨ ᠠᠷᠬᠠᠭᠰᠢᠭᠰᠠᠨ ᠡᠪᠡᠳᠴᠢᠨ
ᠮᠣᠩᠭᠣᠯ ᠤᠯᠤᠰ ᠤᠨ ᠰᠤᠶᠤᠯ ᠤᠨ ᠭᠠᠪᠢᠶᠠᠲᠤ ᠵᠢᠳᠬᠦᠯᠲᠡᠨ᠂ ᠲᠥᠷᠥ ᠶᠢᠨ ᠱᠠᠩᠨᠠᠯᠲᠤ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠠᠪᠤᠤ ᠶᠢᠨ ᡀᠠᠭᠸᠠᠰᠦ᠋ᠷᠦᠩ ᠲᠡᠢ ᠮᠠᠨ ᠤ ᠰᠤᠷᠪᠤᠯᠵᠢᠯᠠᠭᠴᠢ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠯᠠ᠃
3675
2017-08-04 15:01
发表于:内蒙古
ᠮᠣᠩᠭᠣᠯ ᠤᠯᠤᠰ ᠤᠨ ᠰᠤᠶᠤᠯ ᠤᠨ ᠭᠠᠪᠢᠶᠠᠲᠤ ᠵᠢᠳᠬᠦᠯᠲᠡᠨ᠂ ᠲᠥᠷᠥ ᠶᠢᠨ ᠱᠠᠩᠨᠠᠯᠲᠤ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠠᠪᠤᠤ ᠶᠢᠨ ᡀᠠᠭᠸᠠᠰᠦ᠋ᠷᠦᠩ ᠲᠡᠢ ᠮᠠᠨ ᠤ ᠰᠤᠷᠪᠤᠯᠵᠢᠯᠠᠭᠴᠢ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠯᠠ᠃
ᠪᠦᠲᠦᠭᠡᠵᠦ ᠲᠤᠭᠤᠷᠪᠢᠬᠤ ᠠᠴᠠ ᠪᠠᠨ ᠢᠯᠡᠭᠦᠦ ᠠᠯᠵᠢᠶᠠᠯ ᠢᠶᠠᠨ ᠲᠠᠶᠢᠯᠬᠤ ᠳᠤ ᠵᠤᠨ ᠬᠠᠮᠤᠭ ᠤᠨ ᠲᠣᠬᠢᠷᠠᠮᠵᠢ ᠲᠠᠢ ᠤᠯᠠᠷᠢᠯ᠃ ᠬᠠᠷᠢᠨ ᠲᠠᠨ ᠢ ᠠᠮᠠᠷᠠᠭᠠ ᠦᠭᠡᠢ ᠭᠡᠵᠦ ᠰᠣᠨᠣᠰᠤᠭᠰᠠᠨ᠃
ᠵᠤᠨ ᠴᠠᠭᠠᠭᠤᠷ ᠢᠶᠠᠨ ᠶᠡᠬᠡ ᠨᠠᠵᠠᠭᠠᠢ ᠤᠯᠠᠷᠢᠯ᠃ ᠨᠠᠳᠠ ᠨᠠᠷᠠᠨ ᠳᠤ ᠮᠠᠩᠰᠢᠭᠤᠷᠠᠭᠰᠠᠨ ᠲᠡᠨᠡᠭ ᠤᠯᠠᠷᠢᠯ ᠰᠢᠭ ᠰᠠᠨᠠᠭᠳᠠᠳᠠᠭ᠃ ᠲᠡᠭᠡᠭᠡᠳ ᠴᠤ ᠪᠢ ᠨᠠᠶᠢᠷ ᠨᠠᠭᠠᠳᠤᠮ ᠳᠤ ᠶᠠᠪᠤᠳᠠᠭ ᠦᠭᠡᠢ ᠪᠣᠯᠬᠣᠷ ᠤᠯᠠᠷᠢᠯ ᠤᠨ ᠰᠠᠶᠢᠬᠠᠨ ᠢ ᠭᠣᠶᠢᠳᠠ ᠮᠡᠳᠡᠷᠡᠬᠦ ᠦᠭᠡᠢ ᠥᠩᠭᠡᠷᠡᠭᠡᠵᠦ ᠪᠠᠶᠢᠨᠠ᠃ ᠪᠢ ᠠᠯᠢ ᠴᠤ ᠤᠯᠠᠷᠢᠯ ᠳᠤ ᠬᠡᠪ ᠦᠨ ᠠᠵᠢᠯᠯᠠᠳᠠᠭ᠃ ᠡᠨᠡ ᠵᠤᠨ 《 ᠾᠦᠩᠨᠦᠵᠢᠨ》 ᠭᠡᠳᠡᠭ ᠡᠮᠭᠡᠨᠢᠯᠳᠦ ᠳ᠋ᠷᠠᠮ ᠤᠨ ᠵᠦᠴᠦᠭᠡ ᠪᠢᠴᠢᠵᠦ ᠳᠠᠭᠤᠰᠬᠠᠯᠠ᠃ ᠥᠪᠡᠷ ᠦᠨ ᠢᠶᠡᠨ ᠲᠢᠶᠠᠲ᠋ᠷ ᠲᠤ ᠪᠠᠨ 《ᠡᠷᠲᠡᠨ ᠦ ᠳᠣᠮᠣᠭ》 ᠬᠡᠦᠬᠡᠯᠳᠡᠢ ᠶᠢᠨ ᠵᠦᠴᠦᠭᠡ ᠪᠢᠴᠢᠯᠡ᠃ ᠵᠠᠪᠰᠠᠷ ᠨᠢ ᠰᠢᠯᠦᠭ ᠢᠶᠡᠨ ᠲᠡᠷᠯᠡᠵᠦ ᠪᠠᠶᠢᠬᠤ ᠰᠢᠪ ᠳ᠋ᠡ᠃ 《ᠾᠢᠦᠩᠨᠦᠵᠢᠠ》 ᠮᠠᠨᠢ ᠢᠷᠡᠬᠦ ᠨᠠᠮᠤᠷ ᠲᠠᠶᠢᠰᠠᠨᠠ ᠠᠮᠢᠯᠠᠨᠠ᠃
ᠲᠠᠨ ᠤ ᠪᠦᠲᠦᠭᠡᠯ ᠳᠦ ᠡᠷᠲᠡᠨ ᠦ ᠳᠣᠮᠣᠭ᠂ ᠡᠨᠡᠷᠢᠯ ᠬᠠᠶᠢᠷᠠ ᠶᠢᠨ ᠰᠡᠳᠦᠪ ᠵᠣᠩᠬᠢᠯᠠᠳᠠᠭ᠃ ᠬᠠᠷᠢᠨ ᠴᠠᠭ ᠦᠶᠡ ᠶᠢᠨ ᠦᠵᠡᠭᠳᠡᠯ ᠲᠡᠷᠡ ᠪᠣᠯᠭᠠᠨ ᠲᠤᠰᠳᠠᠭ ᠦᠭᠡᠢ᠃
ᠢᠷᠠᠭᠤ ᠨᠠᠶᠢᠷᠠᠭᠴᠢ ᠬᠦᠮᠦᠨ ᠥᠪᠡᠷ ᠦᠨ ᠢᠶᠡᠨ ᠠᠮᠢᠳᠤᠷᠠᠵᠤ ᠪᠤᠢ ᠣᠨ ᠴᠠᠭ ᠤᠨ ᠭᠡᠷᠡᠴᠢ ᠪᠤᠶᠤ ᠳᠠᠭᠤᠴᠢ ᠪᠢᠰᠢ᠃ ᠪᠢᠳᠡ ᠰᠣᠴᠢᠶᠠᠯᠢᠰᠲ ᠷᠧᠶᠠᠯᠢᠰᠮ ᠤᠨ ᠦᠶᠡ ᠳᠦ ᠨᠡᠶᠢᠭᠡᠮ ᠢᠶᠡᠨ ᠳᠠᠭᠤᠯᠠᠶᠠ ᠭᠡᠵᠦ ᠪᠦᠲᠦᠭᠡᠵᠦ᠂ ᠲᠤᠭᠤᠷᠪᠢᠳᠠᠭ ᠪᠠᠶᠢᠭᠰᠠᠨ᠃ ᠦᠨᠡᠨ ᠳᠦ ᠪᠡᠨ ᠤᠷᠠᠨ ᠵᠣᠬᠢᠶᠠᠯ ᠳᠤ ᠪᠠᠨ ᠬᠦᠮᠦᠨ ᠪᠣᠯᠭᠠᠨ ᠮᠥᠩᠬᠡᠷᠡᠳᠡᠭ ᠦᠭᠡᠢ᠃ ᠬᠠᠷᠢᠨ ᠥᠪᠡᠷ ᠢ ᠪᠡᠨ ᠮᠥᠩᠬᠡᠷᠡᠬᠦ ᠶᠤᠮ ᠰᠢᠭ ᠰᠠᠨᠠᠵᠤ ᠮᠥᠩᠬᠡ ᠶᠢᠨ ᠰᠡᠳᠦᠪ ᠢ ᠪᠢᠴᠢᠬᠦ ᠶᠣᠰᠣᠲᠠᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠦᠮᠦᠨ ᠦ ᠤᠬᠠᠭᠠᠨ ᠢ᠂ ᠰᠡᠳᠬᠢᠯ ᠢ ᠳᠠᠭᠤᠯᠠᠬᠤ ᠶᠣᠰᠣᠲᠠᠢ᠃ ᠲᠡᠭᠡᠬᠦ ᠪᠡᠷ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠭᠡᠳᠡᠭ ᠴᠠᠭ ᠦᠶᠡ ᠶᠢᠨ ᠲᠤᠰᠬᠠᠯ ᠪᠢᠰᠢ᠂ ᠴᠠᠭ ᠦᠶᠡ ᠶᠢᠨ ᠲᠠᠶᠢᠯᠤᠨ ᠪᠢᠰᠢ᠂ ᠦᠨᠡᠯᠡᠭᠡ ᠪᠢᠰᠢ᠂ ᠴᠠᠭ ᠦᠶᠡ ᠳᠦ ᠦᠢᠯᠡᠴᠢᠯᠡᠳᠡᠭ ᠵᠠᠷᠤᠴᠠ ᠴᠤ ᠪᠢᠰᠢ᠃ ᠰᠡᠷᠡᠯ᠂ ᠮᠡᠳᠡᠷᠡᠮᠵᠢ᠂ ᠰᠡᠳᠬᠢᠯᠭᠡᠨ ᠦ ᠲᠣᠪᠴᠢᠯᠠᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠢᠷᠠᠭᠤ ᠦᠵᠡᠭᠳᠡᠯ ᠶᠤᠮ᠃
ᠲᠠᠨ ᠤ ᠬᠤᠪᠢ ᠳᠤ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠣᠨᠣᠯ ᠭᠡᠵᠦ ᠪᠠᠶᠢᠵᠤ ᠪᠣᠯᠬᠤ ᠤᠤ︖
ᠢᠷᠠᠭᠤ ᠨᠠᠶᠢᠷᠠᠭ ᠥᠪᠡᠷ ᠢᠶᠡᠨ ᠢᠵᠠᠭᠤᠷ ᠤᠨ ᠣᠨᠣᠯ ᠲᠠᠢ᠃ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠮᠤᠬᠤᠷᠳᠠᠭᠰᠠᠨ ᠨᠠᠶᠢᠷᠠᠭᠴᠢᠳ ᠤᠨ ᠡᠷᠢᠯ ᠦᠨ ᠠᠴᠢ ᠪᠠᠷ ᠣᠯᠳᠠᠭᠰᠠᠨ ᠣᠯᠠᠨ ᠤᠷᠤᠰᠬᠠᠯ ᠤᠳ ᠡᠨᠡ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠣᠨᠣᠯ ᠢ ᠰᠠᠲᠠᠭᠠᠷᠠᠭᠤᠯᠵᠤ ᠪᠠᠶᠢᠨᠠ᠃ ᠠᠯᠢᠪᠠ ᠶᠠᠭᠤᠮᠠ ᠢᠷᠡᠭᠡᠳᠦᠢ ᠳᠦ ᠵᠠᠬᠢᠷᠤᠭᠳᠠᠬᠤ ᠠᠴᠠ ᠭᠠᠳᠠᠨᠠ ᠡᠭᠦᠰᠬᠡᠯ ᠳᠦ ᠪᠡᠨ ᠵᠠᠬᠢᠷᠤᠭᠳᠠᠬᠤ ᠶᠣᠰᠣᠲᠠᠢ᠃ ᠢᠩᠭᠢᠵᠦ ᠦᠵᠡᠳᠡᠭ ᠢᠶᠡᠷ ᠢᠶᠡᠨ ᠪᠢ ᠬᠠᠭᠤᠴᠢᠨᠰᠠᠭ ᠪᠠᠶᠢᠵᠤ ᠮᠠᠭᠠᠳ ᠦᠭᠡᠢ᠃
《ᠦᠷᠡ ᠮᠣᠭᠠᠢ》 ᠳᠤᠤᠯᠢ ᠶᠢ ᠴᠥᠭᠡᠨ ᠦᠭᠡᠢ ᠬᠦᠮᠦᠨ ᠰᠢᠭᠦᠮᠵᠢᠯᠡᠭᠰᠡᠨ᠃ ᠢᠯᠠᠩᠭᠤᠶᠠ ᠭᠣᠸᠠ ᠵᠦᠢ ᠶᠢᠨ ᠲᠠᠯᠠ ᠠᠴᠠ ᠪᠠᠨ ᠵᠠᠷᠢᠮ ᠰᠤᠳᠤᠯᠤᠭᠠᠴᠢᠳ ᠤᠨ ᠠᠩᠬᠠᠷᠤᠯ ᠢ ᠲᠠᠲᠠᠭᠰᠠᠨ ᠪᠠᠶᠢᠬᠤ᠃
《ᠦᠷᠡ ᠮᠣᠭᠠᠢ》 ᠶᠢ ᠪᠢ ᠶᠠᠭᠠᠬᠢᠭᠠᠳ ᠴᠤ ᠶᠤᠮ ᠬᠡᠨ ᠳᠦ ᠴᠤ ᠰᠢᠭᠦᠮᠵᠢᠯᠡᠭᠦᠯᠦᠮᠡᠷ ᠦᠭᠡᠢ ᠰᠠᠨᠠᠭᠳᠠᠳᠠᠭ᠃ ᠬᠦᠮᠦᠨ ᠦ ᠲᠠᠷᠢᠬᠢᠨ ᠳᠣᠲᠣᠷᠠ ᠬᠤᠪᠢ ᠶᠢᠨ ᠣᠷᠭᠢᠯ ᠭᠡᠵᠦ ᠪᠠᠶᠢᠳᠠᠭ ᠪᠣᠯ 《ᠦᠷᠡ ᠮᠣᠭᠠᠢ》 ᠮᠢᠨᠦ ᠣᠷᠭᠢᠯ ᠪᠦᠲᠦᠭᠡᠯ ᠦᠨ ᠨᠢᠭᠡ᠃ ᠭᠣᠸᠠ ᠵᠦᠢ ᠦᠭᠡᠢ ᠮᠠᠭᠤᠬᠠᠢ ᠭᠡᠵᠦ ᠶᠡᠷᠦ ᠡᠴᠡ ᠪᠡᠨ ᠪᠠᠶᠢᠳᠠᠭ ᠦᠭᠡᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠪᠢ ᠮᠠᠭᠤᠬᠠᠢ ᠳᠤ ᠬᠦᠷᠲᠡᠯᠡ ᠭᠣᠸᠠ ᠰᠠᠶᠢᠬᠠᠨ ᠪᠤᠢ ᠭᠡᠳᠡᠭ ᠢ ᠪᠠᠲᠤᠯᠠᠬᠤ ᠭᠡᠵᠦ ᠪᠠᠶᠢᠨᠠ᠃ ᠠᠯᠢᠪᠠ ᠭᠠᠰᠢᠭᠤᠨ ᠦᠨᠡᠨ ᠭᠡᠳᠡᠭ ᠢᠷᠠᠭᠤ ᠰᠠᠶᠢᠬᠠᠨ ᠦᠭᠡᠢ ᠬᠠᠷᠠᠭᠳᠠᠵᠤ ᠪᠣᠯᠤᠨᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠦᠨᠡᠨ ᠭᠡᠳᠡᠭ ᠨᠢᠴᠦᠭᠦᠨ ᠪᠠᠶᠢᠳᠠᠭ᠃
ᠢᠷᠠᠭᠤ ᠨᠠᠶᠢᠷᠠᠭ ᠭᠡᠳᠡᠭ ᠲᠠᠨ ᠤ ᠳᠣᠲᠣᠭᠠᠳᠤ ᠰᠡᠳᠬᠢᠯ ᠦᠨ ᠭᠦᠨ ᠤᠬᠠᠭᠠᠨ᠂ ᠶᠢᠷᠲᠢᠨᠴᠦ ᠶᠢ ᠦᠵᠡᠬᠦ ᠦᠵᠡᠯ ᠶᠤᠮ ᠡ ᠳ᠋ᠠ︖
ᠲᠡᠶᠢᠮᠦ ᠯᠠ ᠶᠤᠮ ᠴᠢᠨᠢ᠃ ᠪᠢ ᠵᠣᠪᠠᠯᠠᠩ ᠵᠢᠷᠭᠠᠯ ᠢ᠂ ᠶᠡᠷᠦ ᠨᠢ ᠪᠦᠬᠦ ᠶᠠᠭᠤᠮᠠ ᠶᠢ ᠢᠷᠠᠭᠤ ᠨᠠᠶᠢᠷᠠᠭ ᠢᠶᠠᠷ ᠬᠠᠷᠠᠳᠠᠭ᠃ ᠢᠷᠠᠭᠤ ᠨᠠᠶᠢᠷᠠᠭ ᠭᠡᠳᠡᠭ ᠨᠠᠳᠠ ᠬᠠᠮᠤᠭ ᠤᠨ ᠰᠠᠶᠢᠬᠠᠨ ᠵᠦᠢᠯ ᠪᠥᠭᠡᠳ ᠬᠠᠮᠤᠭ ᠤᠨ ᠠᠷᠬᠠᠭᠰᠢᠭᠰᠠᠨ ᠡᠪᠡᠳᠴᠢᠨ᠃
ᠲᠡᠭᠡᠪᠡᠯ ᠲᠠᠨ ᠤ ᠬᠢ ᠪᠠᠷ ᠠᠮᠢᠳᠤᠷᠠᠯ ᠭᠡᠵᠦ ᠶᠠᠭᠤ ᠪᠤᠢ︖
ᠲᠠᠮᠤ᠂ ᠳ᠋ᠧᠪᠠᠵᠠᠨ ᠬᠣᠶᠠᠷ ᠢᠶᠠᠷ ᠨᠡᠶᠢᠯᠡᠭᠦᠯᠵᠦ ᠲᠠᠮᠤᠭᠰᠠᠨ ᠳᠡᠭᠦᠵᠢᠯᠡᠭᠦᠷ ᠦᠨ ᠣᠯᠣᠰᠣ᠃ ᠢᠩᠭᠢᠵᠦ ᠬᠡᠯᠡᠬᠦ ᠳᠦ ᠬᠠᠲᠠᠭᠤᠳᠠᠬᠤ ᠦᠭᠡᠢ᠃
ᠶᠠᠮᠠᠷ ᠤᠯᠠᠷᠢᠯ ᠢᠶᠠᠷ ᠥᠪᠡᠷ ᠢ ᠪᠡᠨ ᠲᠥᠰᠦᠭᠡᠯᠡᠳᠡᠭ ᠪᠤᠢ︖
ᠪᠢ ᠪᠣᠯ ᠨᠠᠮᠤᠷ᠃ ᠮᠢᠨᠦ ᠤᠬᠠᠮᠰᠠᠷ ᠤᠨ ᠵᠢᠮᠢᠰ ᠬᠠᠯᠢᠰᠤᠨ ᠳᠤ ᠪᠠᠨ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠵᠤ ᠨᠠᠮᠠ ᠶᠢ ᠭᠡᠵᠦ ᠲᠣᠭᠤᠭᠰᠠᠨ ᠬᠦᠮᠦᠨ ᠦ ᠠᠯᠠᠭᠠᠨ ᠳᠡᠭᠡᠷᠡ ᠤᠨᠠᠵᠤ᠂ ᠨᠠᠰᠤᠨ ᠤ ᠡᠷᠬᠡ ᠪᠡᠷ ᠠᠷᠭᠠ ᠪᠤᠶᠤ ᠡᠪᠦᠭᠡᠷᠡᠵᠦ᠂ ᠣᠯᠠᠨ ᠵᠤᠯᠵᠠᠭᠠᠨ ᠮᠣᠳᠣ ᠲᠣᠭᠣᠷᠢᠭᠤᠯᠤᠭᠰᠠᠨ ᠮᠣᠳᠣ ᠪᠣᠯᠤᠯᠠ ᠯᠠ ᠳ᠋ᠠ᠃ ᠭᠡᠬᠦ ᠳᠦ ᠪᠡᠨ ᠦᠵᠡᠬᠦ ᠬᠠᠪᠤᠷ ᠪᠣᠯᠭᠠᠨ ᠢᠶᠠᠨ ᠬᠦᠯᠢᠶᠡᠭᠰᠡᠨ ᠮᠣᠳᠣ ᠪᠠᠶᠢᠬᠤ ᠶᠢ ᠬᠦᠰᠡᠨᠡ᠃
ᠶᠡᠷᠦ ᠨᠢ ᠪᠠᠪᠤᠤ ᠶᠢᠨ ᡀᠠᠭᠸᠠᠰᠦ᠋ᠷᠦᠩ ᠭᠡᠵᠦ ᠬᠡᠨ ᠪᠤᠢ︖
ᡀᠠᠭᠸᠠᠰᠦ᠋ᠷᠦᠩ ᠭᠡᠳᠡᠭ ᠪᠡᠶᠡ ᠪᠡᠨ ᠲᠣᠭᠤᠭᠰᠠᠨ᠂ ᠡᠴᠦᠰ ᠲᠡᠬᠡᠨ ᠬᠦᠷᠦᠭᠰᠡᠨ ᠲᠤᠶᠢᠯᠰᠢᠷᠠᠭᠰᠠᠨ᠂ ᠵᠥᠷᠢᠭᠦᠳ ᠪᠣᠳᠠᠭᠠᠯᠢ ᠶᠤᠮ᠃ ᠪᠢ ᠰᠠᠶᠢᠨ ᠶᠠᠭᠤᠮᠠᠨ ᠳᠤ ᠪᠠᠨ ᠰᠠᠶᠢᠨ ᠰᠢᠭ ᠰᠠᠶᠢᠨ᠂ ᠮᠠᠭᠤ ᠳᠠᠭᠠᠨ ᠮᠠᠭᠤ ᠰᠢᠭ ᠮᠠᠭᠤ᠃ ᠡᠳᠦᠷ ᠲᠤᠲᠤᠮ ᠤᠨ ᠠᠮᠢᠳᠤᠷᠠᠯ ᠤᠨ ᠵᠣᠪᠠᠯᠠᠩ ᠬᠦᠮᠦᠨ ᠦ ᠮᠥᠨ ᠴᠢᠨᠠᠷ ᠢ ᠶᠡᠬᠡ ᠡᠪᠳᠡᠳᠡᠭ᠃ ᠲᠡᠷᠡ ᠨᠥᠯᠥᠭᠡᠯᠡᠭᠡᠳ ᠪᠢ ᠦᠨᠳᠦᠰᠦᠨ ᠴᠢᠨᠠᠷ ᠲᠤ ᠪᠠᠨ ᠬᠡᠷ ᠣᠶᠢᠷᠠᠬᠠᠨ ᠪᠠᠶᠢᠭᠠ ᠪᠢᠯᠡ ᠭᠡᠵᠦ ᠪᠣᠳᠣᠳᠠᠭ᠃ ᠥᠪᠡᠷ ᠢ ᠪᠡᠨ ᠰᠢᠨᠵᠢᠯᠡᠬᠦ ᠰᠢᠨᠵᠢᠯᠡᠭᠡᠨ ᠦ ᠬᠠᠷᠢᠭᠤ ᠲᠡᠶᠢᠮᠦ ᠰᠠᠶᠢᠨ ᠭᠠᠷᠬᠤ ᠦᠭᠡᠢ ᠪᠠᠶᠢᠨᠠ᠃ ᠬᠦᠮᠦᠰ ᠨᠠᠮᠠ ᠶᠢ ᠶᠠᠩᠵᠤ ᠶᠠᠩᠵᠤ ᠪᠠᠷ ᠦᠨᠡᠯᠡᠳᠡᠭ ᠪᠢᠵᠡ᠃ ᠲᠡᠷᠡ ᠪᠣᠯᠭᠠᠨ ᠰᠠᠷᠠ ᠲᠠᠢ ᠰᠥᠨᠢ ᠨᠣᠬᠠᠢ ᠬᠤᠴᠠᠬᠤ ᠶᠢᠨ ᠠᠳᠠᠯᠢ᠃
ᠬᠦᠮᠦᠨ ᠪᠦᠷᠢ ᠳᠦ ᠵᠢᠨᠳᠠ ᠭᠡᠵᠦ ᠪᠠᠶᠢᠬᠤ ᠶᠣᠰᠣᠲᠠᠢ ᠤᠤ︖
ᠨᠠᠳᠠ ᠲᠠᠢ ᠨᠢᠭᠡ ᠵᠢᠨᠳᠠ ᠳᠤ ᠠᠮᠢᠳᠤᠷᠠᠳᠠᠭ ᠬᠦᠮᠦᠰ ᠭᠡᠪᠡᠯ ᠮᠢᠨᠦ ᠬᠠᠨᠢ ᠦᠷᠡ ᠬᠡᠦᠬᠡᠳ ᠦᠳ᠃ ᠪᠢᠳᠡ ᠨᠢᠭᠡ ᠵᠢᠨᠳᠠᠨ ᠤ ᠬᠢ᠃ ᠪᠤᠰᠤᠳ ᠶᠠᠭᠤᠮᠠᠨ ᠳᠡᠭᠡᠷᠡ ᠪᠢ ᠵᠢᠨᠳᠠᠷᠬᠠᠳᠠᠭ ᠦᠭᠡᠢ᠃
ᠥᠨᠥᠳᠥᠷ ᠶᠠᠭᠤ ᠲᠠᠨ ᠤ ᠰᠡᠳᠬᠢᠯ ᠢ ᠢᠯᠡᠭᠦᠦ ᠡᠮᠵᠡᠭᠯᠡᠭᠦᠯᠵᠦ ᠪᠠᠶᠢᠨᠠ ᠪᠤᠢ︖
ᠳᠤᠲᠠᠭᠤ ᠳᠤᠯᠢᠮᠠᠭ ᠪᠠᠶᠢᠳᠠᠯ᠂ ᠬᠦᠮᠦᠰ ᠦᠨ ᠠᠷᠠᠨᠰᠢᠨ ᠤ ᠡᠪᠳᠡᠷᠡᠯ ᠮᠢᠨᠦ ᠭᠡᠷ ᠪᠦᠯᠢ ᠶᠢ ᠴᠤ ᠳᠠᠭᠠᠷᠢᠳᠠᠭ᠃ ᠲᠡᠭᠡᠬᠦ ᠪᠡᠷ ᠬᠡᠴᠡᠭᠦᠦ ᠯᠠ ᠪᠠᠶᠢᠨᠠ᠃ ᠠᠯᠳᠠᠷ ᠠᠴᠠ ᠥᠭᠡᠷᠡ ᠬᠥᠷᠥᠩᠭᠡ ᠨᠠᠳᠠ ᠠᠯᠠᠭᠠ᠃ ᠪᠤᠰᠤᠳ ᠠᠴᠠ ᠨᠢᠭᠡ ᠴᠤ ᠪᠣᠯᠪᠠ ᠶᠠᠭᠤᠮᠠ ᠪᠠᠷ ᠢᠯᠡᠭᠦᠦ ᠪᠠᠶᠢᠬᠤ ᠰᠠᠶᠢᠬᠠᠨ᠃ ᠮᠠᠨ ᠤ ᠨᠥᠬᠥᠴᠡᠯ ᠳᠦ ᠣᠶᠤᠨ ᠤ ᠢᠯᠡᠭᠦᠦ ᠳᠦ ᠠᠲᠠᠭᠠᠷᠬᠠᠬᠤ ᠪᠠᠨ ᠪᠣᠯᠢᠭᠠᠳ ᠮᠥᠩᠭᠥᠨ ᠳᠦ ᠠᠲᠠᠭᠠᠷᠬᠠᠳᠠᠭ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠨᠠ᠃ ᠮᠣᠩᠭᠣᠯ ᠤᠯᠤᠰ ᠲᠤ ᠪᠠᠶᠠᠨ ᠬᠦᠮᠦᠰ ᠪᠠᠶᠢᠬᠤ ᠶᠣᠰᠣᠲᠠᠢ᠃ ᠭᠡᠬᠦ ᠳᠦ ᠪᠡᠨ ᠭᠠᠭᠴᠠᠬᠠᠨ ᠣᠶᠤᠨ ᠤ ᠪᠠᠶᠠᠴᠤᠳ ᠲᠤ ᠦᠵᠡᠭᠦᠯᠬᠦ ᠬᠦᠨᠳᠦᠳᠬᠡᠯ ᠨᠢ ᠳᠤᠲᠠᠭᠳᠠᠵᠤ ᠪᠠᠶᠢᠨᠠ ᠤᠤ ᠳ᠋ᠠ ᠭᠡᠵᠦ ᠪᠣᠳᠣᠳᠠᠭ᠃ ᠮᠥᠩᠭᠥ ᠥᠪᠡᠷ ᠢᠶᠡᠨ ᠲᠡᠷᠡ ᠲᠡᠢ᠂ ᠲᠡᠷᠡ ᠦᠭᠡᠢ ᠬᠦᠮᠦᠰ ᠢ ᠲᠠᠲᠠᠵᠤ᠂ ᠠᠲᠠᠭᠠᠷᠬᠠᠯ ᠢ ᠨᠢ ᠴᠤᠭᠯᠠᠭᠤᠯᠳᠠᠭ ᠳᠣᠩ ᠲᠠᠢ ᠡᠳ᠋᠃ ᠭᠡᠲᠡᠯᠡ ᠣᠶᠤᠨ ᠤ ᠢᠯᠡᠭᠦᠦ ᠴᠢᠨᠠᠷ ᠲᠤ ᠬᠦᠮᠦᠰ ᠢᠩᠭᠢᠵᠦ ᠳᠣᠩᠲᠣᠬᠤ ᠦᠭᠡᠢ ᠪᠠᠶᠢᠨᠠ᠃ ᠡᠨᠡ ᠪᠣᠯ ᠪᠢᠳᠡ ᠦᠬᠦᠭᠰᠡᠨ ᠵᠢᠭᠠᠰᠤ ᠰᠢᠭ ᠲᠣᠯᠣᠭᠠᠢ ᠠᠴᠠ ᠪᠠᠨ ᠡᠬᠢᠯᠡᠵᠦ ᠢᠯᠵᠠᠷᠠᠵᠤ ᠪᠠᠶᠢᠭᠠ ᠶᠢᠨ ᠰᠢᠨᠵᠢ᠃
ᠮᠠᠰᠢ ᠥᠨᠳᠥᠷ ᠣᠶᠤᠨ ᠤ ᠴᠢᠳᠠᠪᠬᠢ ᠲᠠᠢ ᠬᠦᠮᠦᠰ ᠵᠣᠩᠬᠢᠯᠠᠯᠠ ᠭᠡᠬᠦ ᠳᠦ ᠡᠨᠡ ᠨᠢ ᠡᠷᠭᠢᠭᠡᠳ ᠶᠢᠷᠲᠢᠨᠴᠦ ᠶᠢᠨ ᠣᠷᠣᠰᠢᠨ ᠲᠣᠭᠲᠠᠨᠢᠬᠤᠢ ᠳᠤ ᠨᠦᠯᠦᠭᠡᠯᠡᠬᠦ ᠪᠣᠯᠪᠠ ᠤᠤ︖
ᠲᠡᠷᠡ ᠪᠠᠰᠠ ᠶᠡᠬᠡ ᠠᠶᠤᠯ ᠲᠠᠢ᠃ ᠡᠷᠲᠡᠨ ᠦ ᠰᠣᠶᠣᠯᠲᠤ ᠷᠣᠮᠠ ᠶᠢᠨ ᠮᠥᠬᠥᠯ ᠨᠢ ᠵᠢᠭᠳᠡ ᠤᠬᠠᠭᠠᠷᠠᠯ ᠠᠴᠠ ᠪᠣᠯᠤᠭᠰᠠᠨ ᠭᠡᠳᠡᠭ᠃ ᠣᠶᠤᠨ ᠤ ᠪᠠᠶᠠᠵᠢᠯᠲᠠ ᠬᠡᠷᠪᠡ ᠳᠡᠯᠡᠬᠡᠢ ᠳᠦ ᠪᠠᠭᠲᠠᠬᠤ ᠦᠭᠡᠢ ᠪᠣᠯ ᠪᠢᠳᠡ ᠣᠷᠣᠰᠢᠨ ᠲᠣᠭᠲᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ᠃ ᠵᠠᠩ ᠴᠢᠨᠠᠷ᠂ ᠤᠬᠠᠭᠠᠨ ᠤ ᠲᠡᠩᠴᠡᠭᠦᠦ ᠪᠠᠶᠢᠳᠠᠯ ᠭᠡᠳᠡᠭ ᠪᠣᠯ ᠠᠮᠢᠳᠤᠷᠠᠯ ᠢ ᠲᠣᠭᠲᠠᠭᠠᠳᠠᠭ ᠭᠠᠭᠴᠠ ᠬᠥᠰᠢᠭᠦᠷᠭᠡ᠃ ᠪᠢ ᠡᠭᠦᠨ ᠢ ᠬᠠᠳᠠᠭᠠᠯᠠᠬᠤ ᠲᠤᠬᠠᠢ ᠶᠠᠷᠢᠵᠤ ᠪᠠᠶᠢᠨᠠ᠃
ᠪᠦᠬᠦ ᠶᠠᠭᠤᠮᠠ ᠭᠤᠨᠳᠠᠭᠤ ᠪᠣᠯᠬᠣᠷ ᠲᠠ ᠰᠡᠳᠬᠢᠯ ᠢᠶᠡᠨ ᠶᠠᠭᠠᠬᠢᠵᠤ ᠲᠠᠶᠢᠪᠤᠰᠢᠷᠠᠭᠤᠯᠳᠠᠭ ᠪᠤᠢ︖
ᠬᠦᠮᠦᠨ ᠪᠣᠯᠭᠠᠨ ᠬᠡᠦᠬᠡᠳ ᠪᠠᠶᠢᠭᠰᠠᠨ᠂ ᠪᠡᠶᠡ ᠡᠴᠡ ᠨᠢ ᠰᠦ ᠦᠨᠦᠷᠲᠡᠵᠦ ᠪᠠᠶᠢᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠪᠠᠷ ᠲᠠᠶᠢᠳᠬᠤᠷᠠᠳᠠᠭ᠃
ᠲᠠᠨ ᠤ ᠶᠠᠷᠢᠶᠠ ᠶᠢ ᠰᠣᠨᠣᠰᠤᠭᠠᠳ ᠪᠠᠶᠢᠬᠤ ᠳᠤ ᠪᠠᠬᠠᠨ ᠭᠤᠲᠤᠷᠠᠩᠭᠢ ᠦᠵᠡᠯ ᠲᠡᠢ ᠬᠦᠮᠦᠨ ᠶᠤᠮ ᠤᠤ ᠳ᠋ᠠ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠪᠠᠶᠢᠬᠤ ᠶᠤᠮ︖
ᠥᠪᠡᠷ ᠢ ᠪᠡᠨ ᠶᠡᠬᠡ ᠤᠷᠤᠭᠤ ᠦᠵᠡᠯ ᠲᠡᠢ ᠭᠡᠵᠦ ᠪᠣᠳᠣᠳᠠᠭ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠪᠢ ᠬᠡᠵᠢᠶᠡ ᠴᠤ ᠥᠭᠡᠳᠡᠷᠡᠭ ᠦᠵᠡᠯ ᠲᠡᠢ ᠪᠠᠶᠢᠵᠤ ᠴᠢᠳᠠᠭᠠ ᠦᠭᠡᠢ᠃ ᠭᠡᠬᠦ ᠳᠦ ᠪᠡᠨ ᠮᠢᠨᠦ ᠤᠷᠤᠭᠤ ᠦᠵᠡᠯ ᠪᠣᠯ ᠵᠥᠪᠬᠡᠨ ᠬᠤᠪᠢ ᠶᠢᠨ ᠥᠮᠴᠢ ᠪᠣᠯᠬᠣᠷ ᠬᠠᠨᠢ ᠳᠦ ᠴᠤ ᠶᠤᠮ ᠤᠤ᠂ ᠦᠷᠡ ᠬᠡᠦᠬᠡᠳ ᠦᠳ ᠳᠡᠬᠡᠨ ᠬᠠᠷᠠᠭᠤᠯᠬᠤ ᠶᠢ ᠬᠦᠰᠡᠳᠡᠭ ᠦᠭᠡᠢ᠃
ᠮᠣᠩᠭᠣᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠢᠷᠡᠭᠡᠳᠦᠢ ᠶᠢ ᠬᠡᠷᠬᠢᠨ ᠬᠠᠷᠠᠵᠤ ᠪᠠᠶᠢᠨᠠ ᠪᠤᠢ︖
ᠢᠷᠠᠭᠤ ᠨᠠᠶᠢᠷᠠᠭ ᠭᠡᠳᠡᠭ ᠪᠣᠯ ᠮᠣᠷᠢ ᠲᠠᠢ ᠬᠦᠮᠦᠨ ᠲᠠᠰᠤᠷᠠᠳᠠᠭ ᠦᠭᠡᠢ ᠮᠣᠷᠢᠨ ᠤ ᠵᠡᠯᠡ ᠶᠤᠮ᠃ ᠲᠡᠳᠡ ᠨᠠᠶᠢᠷᠠᠭ ᠤᠨ ᠭᠡᠷ ᠲᠦ ᠣᠷᠣᠵᠤ ᠢᠷᠡᠳᠡᠭ᠂ ᠮᠣᠷᠢᠯᠠᠵᠠᠭᠠᠳᠠᠭ᠃ ᠭᠡᠬᠦ ᠳᠦ ᠪᠡᠨ ᠨᠠᠶᠢᠷᠠᠭ ᠤᠨ ᠥᠷᠭᠦᠭᠡᠨ ᠳᠦ ᠬᠣᠶᠢᠮᠣᠷ ᠭᠡᠵᠦ ᠪᠤᠢ᠂ ᠬᠠᠲᠠᠪᠴᠢ ᠴᠤ ᠪᠤᠢ᠂ ᠡᠵᠡᠨ ᠰᠠᠭᠤᠳᠠᠯ ᠭᠡᠵᠦ ᠪᠤᠢ᠃ ᠪᠠᠰᠠ ᠵᠣᠴᠢᠨ ᠤ ᠲᠠᠯᠠ ᠭᠡᠵᠦ ᠪᠤᠢ᠃ ᠡᠨᠡ ᠶᠡᠬᠡ ᠬᠥᠯᠲᠡᠢ ᠥᠷᠭᠥᠭᠡ ᠬᠦᠮᠦᠨ ᠢᠶᠡᠷ ᠲᠠᠰᠤᠷᠠᠨᠠ ᠭᠡᠵᠦ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠨᠠᠶᠢᠷᠠᠭ ᠢᠶᠠᠷ ᠲᠠᠰᠤᠷᠠᠬᠤ ᠦᠭᠡᠢ᠃ ᠪᠢ ᠮᠣᠩᠭᠣᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠢᠷᠡᠭᠡᠳᠦᠢ ᠶᠢ ᠶᠡᠬᠡ ᠥᠭᠡᠳᠡᠷᠡᠭ ᠢᠶᠡᠷ ᠬᠠᠷᠠᠵᠤ ᠪᠠᠶᠢᠨᠠ᠃
ᠲᠥᠷᠥ ᠲᠦᠰᠢᠯᠴᠡᠵᠦ ᠶᠠᠪᠤᠭᠰᠠᠨ ᠬᠦᠮᠦᠨ ᠦ ᠲᠠᠨᠢ ᠬᠤᠪᠢ ᠳᠤ ᠠᠰᠠᠭᠤᠬᠤ ᠵᠦᠢᠯ ᠪᠠᠶᠢᠨᠠ᠃ ᠲᠠᠨ ᠳᠤ ᠶᠠᠮᠠᠷ ᠬᠠᠤᠯᠢ ᠰᠠᠨᠠᠭᠠᠴᠢᠯᠠᠮᠠᠷ ᠰᠠᠨᠠᠭᠳᠠᠳᠠᠭ ᠪᠤᠢ︖
ᠪᠢ ᠬᠤᠪᠢ ᠳᠠᠭᠠᠨ ᠲᠥᠷᠥᠳᠦ ᠶᠣᠰᠣᠨ ᠤ ᠬᠠᠲᠠᠭᠤ ᠬᠠᠤᠯᠢ ᠰᠠᠨᠠᠭᠠᠴᠢᠯᠠᠮᠠᠷ ᠪᠠᠶᠢᠨᠠ᠃ ᠶᠣᠰᠣ ᠦᠭᠡᠢ᠂ ᠲᠤᠰᠠ ᠦᠭᠡᠢ ᠪᠣᠯᠤᠭᠰᠠᠨ ᠵᠠᠰᠠᠭᠯᠠᠯ ᠭᠡᠳᠡᠭ ᠪᠣᠯ ᠠᠷᠠᠳ ᠢ ᠰᠠᠮᠠᠭᠤᠷᠠᠭᠤᠯᠵᠤ᠂ ᠤᠯᠤᠰ ᠢ ᠬᠦᠴᠦ ᠦᠭᠡᠢ ᠪᠣᠯᠭᠠᠳᠠᠭ᠃ ᠠᠷᠠᠳ ᠲᠦᠮᠡᠨ ᠡᠵᠡᠨ ᠦᠭᠡᠢ ᠪᠠᠶᠢᠪᠠᠯ ᠬᠠᠮᠤᠭ ᠤᠨ ᠪᠦᠳᠦᠭᠦᠯᠢᠭ᠂ ᠣᠪᠤᠭ ᠠᠶᠢᠮᠠᠭ ᠤᠨ ᠪᠠᠶᠢᠭᠤᠯᠤᠯᠲᠠ ᠳᠤ ᠰᠢᠯᠵᠢᠨᠡ ᠭᠡᠰᠡᠨ ᠦᠭᠡ᠃ ᠲᠣᠪᠴᠢᠬᠠᠨ ᠳᠤ ᠪᠠᠨ ᠲᠡᠦᠬᠡ ᠶᠢᠨ ᠲᠣᠮᠣ ᠤᠬᠤᠷᠢᠯᠲᠠ ᠪᠣᠯᠤᠨᠠ᠃ ᠲᠤᠬᠠᠢ ᠶᠢᠨ ᠦᠶᠡ ᠳᠦ ᠪᠢᠳᠡ ᠬᠣᠬᠢᠷᠠᠨᠠ᠃ ᠭᠡᠯᠡ ᠴᠤ ᠠᠷᠠᠳ ᠲᠦᠮᠡᠨ ᠮᠥᠩᠬᠡ ᠶᠢᠨ ᠣᠶᠢᠯᠠᠭᠠᠯᠲᠠ᠂ ᠪᠣᠳᠠᠲᠤ ᠴᠢᠨᠠᠷ ᠤᠴᠢᠷ ᠠᠴᠠ ᠡᠭᠦᠨ ᠢ ᠭᠠᠲᠤᠯᠠᠨᠠ᠃ ᠭᠠᠭᠴᠠᠬᠦ ᠶᠡᠬᠡ ᠬᠣᠬᠢᠷᠠᠯ ᠲᠠᠢ ᠭᠠᠲᠤᠯᠤᠨᠠ᠃ ᠡᠭᠦᠨ ᠳᠦ ᠯᠠ ᠬᠠᠷᠠᠮᠰᠠᠭᠠᠳ ᠪᠠᠷᠠᠰᠢ ᠦᠭᠡᠢ᠃
ᠡᠶᠢᠮᠦ ᠦᠶᠡ ᠳᠦ ᠬᠡᠨ ᠬᠡᠨ ᠳᠦ ᠪᠡᠨ ᠪᠤᠷᠤᠭᠤ ᠶᠢ ᠲᠣᠬᠣᠭᠠᠳ ᠨᠡᠮᠡᠷᠢ ᠦᠭᠡᠢ ᠪᠠᠶᠢᠬᠤ ᠳ᠋ᠠ︖
ᠶᠠᠮᠠᠷ ᠴᠤ ᠲᠣᠬᠢᠶᠠᠯᠳᠤᠯ ᠳᠤ ᠠᠷᠠᠳ ᠲᠦᠮᠡᠨ ᠪᠤᠷᠤᠭᠤᠲᠠᠢ ᠪᠠᠶᠢᠳᠠᠭ ᠦᠭᠡᠢ᠃ ᠵᠥᠪ ᠢ ᠤᠯᠬᠤ ᠭᠡᠵᠦ ᠪᠤᠷᠤᠭᠤᠳᠠᠭᠰᠠᠨ ᠬᠦᠮᠦᠰ ᠯᠠ ᠪᠤᠷᠤᠭᠤ ᠲᠠᠢ᠃ ᠭᠡᠬᠦ ᠳᠦ ᠪᠡᠨ ᠠᠷᠠᠳ ᠲᠦᠮᠡᠨ ᠦ ᠳᠤᠭᠤᠯᠭᠠᠷᠲᠠᠢ᠂ ᠭᠡᠨᠡᠨ ᠰᠡᠳᠬᠢᠯ ᠦᠨ ᠪᠤᠷᠤᠭᠤ ᠭᠡᠵᠦ ᠪᠠᠶᠢᠵᠤ ᠪᠣᠯᠬᠤ ᠶᠤᠮ᠃ ᠲᠡᠭᠡᠬᠦᠯᠡᠷ ᠡᠳᠦᠷ ᠲᠤᠲᠤᠮ ᠲᠣᠬᠢᠶᠠᠯᠳᠤᠳᠠᠭ ᠡᠮᠵᠡᠭ ᠴᠡᠭ ᠢ ᠨᠢ ᠬᠥᠨᠳᠡᠵᠦ ᠶᠠᠷᠢᠬᠤ ᠳᠤ ᠦᠨᠡᠨ ᠶᠠᠭᠤᠮᠠ ᠶᠠᠷᠢᠯᠠ ᠭᠡᠵᠦ ᠣᠶᠢᠯᠠᠭᠠᠵᠤ ᠪᠠᠶᠢᠭᠠ᠃ ᠡᠨᠡ ᠨᠢ ᠠᠯᠢᠪᠠ ᠨᠢᠭᠡᠨ ᠵᠠᠯᠢ ᠲᠠᠢ ᠡᠲᠡᠭᠡᠳ ᠦᠳ ᠲᠦ ᠣᠶᠤᠨ ᠢᠶᠠᠨ ᠵᠠᠬᠢᠷᠤᠭᠤᠯᠵᠤ ᠪᠤᠢ ᠬᠡᠷᠡᠭ᠃ ᠲᠡᠭᠡᠬᠦᠯᠡᠷ ᠠᠷᠠᠳ ᠲᠦᠮᠡᠨ ᠭᠡᠨᠡᠨ ᠪᠠᠶᠢᠭᠠ ᠨᠢ ᠬᠠᠷᠠᠭᠳᠠᠵᠤ ᠪᠠᠶᠢᠨᠠ᠃
ᠡᠨᠡ ᠪᠠᠶᠢᠳᠠᠯ ᠢ ᠬᠡᠨ ᠣᠶᠢᠯᠠᠭᠠᠭᠤᠯᠬᠤ ᠪᠤᠢ︖
ᠶᠡᠷᠦ ᠨᠢ ᠬᠤᠪᠢ ᠬᠦᠮᠦᠨ ᠦ ᠤᠬᠠᠭᠠᠷᠠᠯ ᠥᠪᠡᠷ ᠡᠴᠡ ᠪᠡᠨ ᠭᠡᠭᠡᠷᠡᠳᠡᠭ᠃ ᠠᠷᠠᠳ ᠲᠦᠮᠡᠨ ᠴᠤ ᠲᠡᠷᠡ᠂ ᠲᠥᠷᠥ ᠶᠢᠨ ᠲᠦᠰᠢᠮᠡᠳ ᠦᠳ ᠴᠤ ᠲᠡᠷᠡ ᠥᠪᠡᠷ ᠡᠴᠡ ᠪᠡᠨ ᠭᠡᠭᠡᠷᠡᠬᠦ ᠶᠣᠰᠣᠲᠠᠢ᠃ ᠭᠡᠬᠦ ᠳᠦ ᠪᠡᠨ ᠶᠢᠷᠲᠢᠨᠴᠦ ᠶᠢᠨ ᠣᠶᠤᠨ ᠤᠬᠠᠭᠠᠷᠠᠯ᠂ ᠰᠡᠳᠬᠢᠯᠭᠡᠨ ᠦ ᠶᠡᠬᠡ ᠥᠪ ᠳᠣᠣᠷᠠ ᠰᠢᠦ᠃
ᠲᠠᠨ ᠤ ᠪᠠᠬᠠᠷᠬᠠᠯ︖
ᠪᠢ ᠨᠢᠭᠡ ᠶᠡᠬᠡ ᠴᠡᠯᠡᠶᠢᠭᠰᠡᠨ ᠲᠠᠯᠠ ᠤᠷᠤᠭᠤ ᠬᠣᠰᠢᠭᠤᠷᠠᠵᠤ ᠣᠷᠣᠭᠰᠠᠨ ᠳᠡᠨᠵᠢ ᠳᠡᠭᠡᠷᠡ ᠲᠦᠷᠦᠭᠰᠡᠨ ᠶᠤᠮ᠃ ᠲᠡᠷᠡ ᠶᠡᠬᠡ ᠲᠠᠯᠠ ᠰᠢᠭ ᠠᠵᠠ ᠵᠢᠷᠭᠠᠯ ᠤᠷᠤᠭᠤ ᠲᠡᠷᠡ ᠳᠡᠨᠵᠢ ᠰᠢᠭ ᠬᠣᠰᠢᠭᠤ ᠪᠠᠨ ᠳᠦᠷᠦᠵᠦ ᠠᠮᠢᠳᠤᠷᠠᠵᠤ ᠪᠠᠶᠢᠨᠠ ᠳ᠋ᠠ ᠭᠡᠵᠦ ᠣᠶᠢᠯᠠᠭᠠᠳᠠᠭ᠃ ᠡᠨᠡ ᠪᠣᠯ ᠬᠦᠮᠦᠨ ᠪᠣᠯᠤᠭᠰᠠᠨ ᠤ ᠪᠠᠬᠠᠷᠬᠠᠯ᠃ ᠲᠡᠷᠡ ᠲᠤᠰᠤᠮ ᠢᠶᠠᠨ ᠮᠣᠩᠭᠣᠯ ᠬᠦᠮᠦᠨ ᠪᠣᠯᠤᠭᠰᠠᠨ ᠤ ᠳᠡᠭᠡᠳᠦ ᠪᠠᠬᠠᠷᠬᠠᠯ ᠶᠤᠮ᠃
ᠵᠠᠷᠢᠮ ᠵᠣᠬᠢᠶᠠᠯ ᠤᠨ ᠬᠡᠯᠡᠯᠭᠡ ᠲᠠᠨᠢ ᠮᠠᠰᠢ ᠬᠠᠲᠠᠭᠤ ᠭᠡᠮᠡᠷ ᠰᠠᠨᠠᠭᠳᠠᠳᠠᠭ᠃ 《ᠦᠬᠦᠯ ᠮᠠᠨᠢ ᠢᠵᠢᠢ ᠳᠦ ᠪᠡᠨ ᠣᠴᠢᠬᠤ ᠲᠣᠮᠢᠯᠠᠯᠲᠠ ᠡ》 ᠭᠡᠬᠦ ᠵᠢᠱᠢᠶᠡ ᠲᠡᠢ᠃ ᠡᠭᠦᠨ ᠢ ᠪᠢᠴᠢᠬᠦ ᠳᠦ ᠬᠢᠷᠢ ᠶᠡᠬᠡ ᠡᠷᠴᠢᠮ ᠬᠦᠴᠦ ᠱᠠᠭᠠᠷᠳᠠᠭᠳᠠᠳᠠᠭ ᠪᠤᠢ︖
ᠶᠡᠬᠡ ᠪᠣᠳᠣᠭᠰᠠᠨ ᠤ ᠦᠷᠡ ᠳ᠋ᠦᠩ ᠶᠤᠮ ᠯᠠ ᠳ᠋ᠠ᠃ ᠪᠢ ᠬᠠᠷᠢᠴᠠᠩᠭᠤᠢ ᠰᠡᠳᠬᠢᠯ ᠦᠨ ᠬᠥᠳᠡᠯᠭᠡᠭᠡᠨ ᠪᠠᠭᠠ ᠲᠠᠢ᠃ ᠥᠪᠡᠷ ᠢᠶᠡᠨ ᠬᠥᠳᠡᠯᠭᠡᠭᠡᠨᠲᠡᠢ ᠪᠠᠶᠢᠭᠰᠠᠨ ᠠᠴᠠ ᠨᠠᠶᠢᠷᠠᠭ ᠮᠠᠨᠢ ᠬᠥᠳᠡᠯᠭᠡᠭᠡᠨᠲᠡᠢ ᠪᠠᠶᠢᠭᠠᠰᠠᠢ ᠭᠡᠵᠦ ᠪᠣᠳᠣᠳᠠᠭ᠃
ᠣᠷᠴᠢᠨ ᠦᠶᠡ ᠶᠢᠨ ᠡᠨᠡ ᠶᠡᠬᠡ ᠲᠧᠭᠨᠢᠭᠵᠢᠯᠲᠡ ᠶᠢ ᠳᠠᠭᠠᠭᠠᠳ ᠬᠦᠮᠦᠨ ᠦ ᠰᠡᠳᠬᠢᠯ ᠲᠡᠶᠢᠮᠦ ᠪᠣᠯᠬᠤ ᠶᠢ ᠦᠭᠡᠶᠢᠰᠬᠡᠬᠦ ᠶᠢᠨ ᠠᠷᠭᠠ ᠦᠭᠡᠢ᠃ ᠶᠠᠭᠠᠬᠢᠪᠠᠯ ᠲᠡᠰᠢ ᠨᠢ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠶᠢᠵᠤ ᠪᠣᠯᠬᠤ ᠪᠤᠢ︖
ᠬᠦᠮᠦᠨ ᠣᠶᠤᠨ ᠪᠣᠳᠣᠯ ᠢᠶᠠᠨ᠂ ᠠᠮᠢᠳᠤᠷᠠᠯ ᠢᠶᠠᠨ᠂ ᠬᠠᠶᠢᠷᠠ ᠰᠡᠳᠬᠢᠯ ᠢᠶᠡᠨ ᠵᠣᠪᠠᠯᠠᠩ ᠳᠤ ᠪᠤᠯᠢᠶᠠᠯᠭᠠᠵᠤ ᠪᠣᠯᠤᠨᠠ᠃ ᠬᠠᠷᠢᠨ ᠭᠠᠭᠴᠠᠬᠠᠨ ᠺᠣᠮᠫᠢᠶᠦ᠋ᠲ᠋ᠧᠷ ᠲᠦ ᠪᠤᠯᠢᠶᠠᠯᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠪᠢ ᠰᠠᠶ᠋ᠢᠬᠠᠨ ᠺᠣᠮᠫᠢᠶᠦ᠋ᠲ᠋ᠧᠷ ᠲᠡᠢ ᠰᠢᠲᠠᠷᠠ ᠨᠡᠭᠦᠵᠦ ᠦᠵᠡᠭᠰᠡᠨ᠃ ᠬᠣᠵᠢᠬᠤ ᠨᠢ ᠪᠤᠤ ᠬᠡᠯᠡ ᠲᠡᠩᠴᠡᠵᠦ ᠴᠢᠳᠠᠬᠤ ᠦᠭᠡᠢ ᠶᠤᠮ ᠪᠢᠯᠡ᠃ ᠲᠡᠭᠡᠬᠦ ᠪᠡᠷ ᠯᠠ ᠯᠠᠪ ᠮᠢᠨᠦ ᠰᠢᠲᠠᠷᠠ ᠲᠣᠭᠯᠠᠬᠤ ᠴᠢᠳᠠᠪᠤᠷᠢ ᠶᠢ ᠺᠣᠮᠫᠢᠶᠦ᠋ᠲ᠋ᠧᠷ ᠬᠡᠳᠦᠶᠢᠨᠡ ᠪᠤᠯᠢᠶᠠᠴᠢᠬᠠᠵᠠᠢ᠃ ᠡᠨᠡ ᠮᠡᠲᠦᠴᠢᠯᠡᠨ ᠢᠶᠡᠷ ᠪᠢ ᠬᠤᠪᠢ ᠳᠠᠭᠠᠨ ᠡᠵᠡᠯᠡᠭᠳᠡᠭᠰᠡᠭᠡᠷ ᠳᠠᠭᠤᠰᠬᠤ ᠶᠤᠮ ᠰᠢᠭ ᠪᠠᠶᠢᠨᠠ ᠯᠡ᠃ ᠲᠡᠭᠡᠬᠦᠯᠡᠷ ᠺᠣᠮᠫᠢᠶᠦ᠋ᠲ᠋ᠧᠷ ᠢ ᠦᠵᠡᠨ ᠶᠠᠳᠠᠵᠤ ᠪᠠᠶᠢᠨᠠ᠃
ᠵᠠ᠂ ᠪᠢᠳᠡᠨ ᠦ ᠶᠠᠷᠢᠯᠴᠠᠯᠭᠠ ᠥᠨᠳᠥᠷᠯᠡᠬᠦ ᠳᠥᠬᠦᠯᠡ᠃ ᠮᠡᠳᠡᠭᠡᠵᠢ ᠠᠰᠠᠭᠤᠭᠠ ᠦᠭᠡᠢ ᠣᠷᠬᠢᠭᠰᠠᠨ ᠵᠦᠢᠯ ᠣᠯᠠᠨ ᠪᠠᠶᠢᠭᠠ᠃
《ᠲᠠᠨ ᠤ ᠪᠡᠶᠡ ᠶᠠᠮᠠᠷ ᠪᠠᠶᠢᠨᠠ》 ᠭᠡᠵᠦ ᠠᠰᠠᠭᠤᠭᠠᠰᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠶᠢᠯᠠ᠃ ᠲᠠᠷᠢᠬᠢᠨ ᠤ ᠬᠢ ᠪᠠᠨ ᠠᠶᠠ ᠶᠢ ᠪᠡᠶᠡ ᠨᠢ ᠳᠠᠭᠠᠭᠠᠳᠠᠭ ᠦᠭᠡᠢ ᠶᠤᠮ ᠪᠠᠶᠢᠨᠠ᠃ ᠨᠢᠭᠡ ᠯᠠ ᠰᠢᠨᠵᠢᠯᠡᠭᠡ ᠬᠢᠯᠭᠡᠬᠦ ᠳᠦ ᠪᠦᠬᠦ ᠶᠠᠭᠤᠮᠠ ᠮᠠᠭᠤᠳᠠᠭᠰᠠᠨ ᠪᠠᠶᠢᠯᠠ᠃ ᠪᠣᠳᠣᠵᠤ ᠰᠡᠳᠭᠢᠭᠦ᠂ ᠪᠦᠲᠦᠭᠡᠬᠦ ᠶᠢᠨ ᠡᠰᠡᠷᠭᠦ ᠪᠡᠶᠡ ᠮᠠᠬᠠᠪᠣᠳ ᠣᠷᠣᠰᠢᠳᠠᠭ ᠶᠤᠮ ᠪᠠᠶᠢᠨᠠ᠃ ᠲᠡᠭᠡᠬᠦᠯᠡᠷ ᠬᠦᠮᠦᠨ ᠳᠦ ᠳᠠᠩᠴᠤ ᠪᠣᠭᠣᠨᠢ ᠨᠠᠰᠤ᠂ ᠬᠡᠪᠡᠷᠡᠭᠬᠡᠨ ᠪᠡᠶᠡ ᠵᠠᠶᠠᠭᠠᠵᠤ ᠳ᠋ᠡ᠃
ᠳ ∙ ᡀᠠᠪᠠᠳᠣᠷᠵᠢ᠃ ᠮᠣᠩᠭᠣᠯ ᠤᠨ ᠮᠡᠳᠡᠭᠡ᠃ 1999. №141
2 1