ᠲᠤᠭᠤᠵᠢ
ᠤᠷᠤᠭᠤᠯ ᠰᠢᠭ ᠤᠯᠠᠪᠤᠷ ᠨᠠᠪᠴᠢ
ᠬᠠᠶᠢ᠍ᠷᠠ ᠰᠡᠳᠭᠢᠯ᠂ ᠭᠡᠷ ᠪᠦᠯᠢ ᠢ᠋ᠢᠨ ᠲᠤᠬᠠᠢ ᠥᠭᠦᠯᠡᠯᠬᠡ᠄ ᠤᠷᠤᠭᠤᠯ ᠰᠢᠭ ᠤᠯᠠᠪᠤᠷ ᠨᠠᠪᠴᠢ
2423
2021-10-23 15:23
发表于:内蒙古
ᠪᠢᠮᠪᠠ ᠶᠢᠨ ᠰᠠᠷᠠᠨᠲᠤᠶᠠᠭᠠ
ᠨᠠᠮᠤᠷ ᠣᠷᠣᠢ ᠶᠢᠨ ᠲᠡᠷᠡ ᠨᠢᠭᠡᠨ ᠡᠳᠦᠷ ᠬᠥᠯ ᠦᠨ ᠳᠣᠣᠭᠤᠷ ᠣᠷᠢᠶᠠᠴᠠᠯᠳᠤᠵᠤ ᠠᠭᠰᠠᠨ ᠬᠡᠷᠦᠮᠡᠯ ᠰᠠᠯᠬᠢᠨ ᠦᠵᠡᠭᠳᠡᠬᠦ ᠪᠡᠶᠡ᠂ ᠦᠯᠢᠶᠡᠬᠦ ᠬᠦᠴᠦᠲᠡᠢ ᠭᠡᠳᠡᠭ ᠢᠶᠡᠨ ᠮᠡᠳᠡᠷᠡᠭᠦᠯᠬᠦ ᠭᠡᠰᠡᠨ ᠰᠢᠭ ᠭᠠᠵᠠᠷ ᠲᠤ ᠤᠨᠠᠭᠰᠠᠨ ᠭᠠᠯ ᠰᠢᠷᠭᠠᠯ ᠨᠠᠪᠴᠢᠰ ᠢ ᠬᠠᠮᠤᠨ ᠠᠪᠴᠤ᠂ ᠬᠡᠶᠢᠰᠬᠡᠨ ᠬᠤᠶᠢᠯᠠᠷᠠᠭᠤᠯᠵᠤ᠂ ᠬᠡᠳᠦᠨ ᠲᠡᠰᠢ ᠨᠢ ᠰᠠᠴᠤᠯᠠᠨ ᠲᠣᠭᠯᠠᠭᠠᠳ ᠤᠳᠠᠯ ᠦᠭᠡᠢ ᠤᠶᠢᠳᠪᠠ ᠪᠣᠯᠤᠯᠲᠠᠢ ᠲᠡᠷᠲᠡᠭᠡᠬᠢ ᠮᠣᠳᠣᠨ ᠤ ᠰᠡᠭᠦᠳᠡᠷ ᠪᠠᠷᠠᠳᠠᠨ ᠴᠢᠮᠡᠭᠡ ᠠᠯᠳᠠᠷᠠᠪᠠ᠃ ᠴᠡᠴᠡᠷᠯᠢᠭ ᠦᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠡᠴᠡ ᠨᠠᠪᠴᠢᠰ ᠢᠶᠠᠷ ᠲᠣᠭᠯᠠᠬᠤ ᠰᠠᠯᠬᠢᠨ ᠤ ᠪᠦᠵᠢᠬᠦ ᠶᠢ ᠴᠢᠮᠡᠭᠡᠭᠦᠶᠢᠬᠡᠨ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠵᠢᠷᠭᠠᠯᠮᠠ ᠪᠦᠰᠡᠭᠦᠢ ᠶᠠᠭᠠᠬᠢᠭᠠᠳ ᠴᠤ ᠶᠤᠮ ᠠᠶᠠᠷᠬᠠᠨ ᠰᠠᠨᠠᠭᠠ ᠠᠯᠳᠠᠪᠠ᠃ ᠲᠡᠷᠡᠪᠡᠷ ᠭᠡᠨᠡᠳᠲᠡ ᠭᠤᠨᠢᠭᠯᠠᠳᠠᠭ᠂ ᠭᠤᠨᠢᠭ ᠲᠤ ᠳᠠᠷᠤᠭᠳᠠᠭᠰᠠᠨ ᠦᠶᠡ ᠳᠡᠬᠡᠨ ᠡᠨᠡ ᠯᠠ ᠴᠡᠴᠡᠷᠯᠢᠭ ᠲᠦ ᠢᠷᠡᠵᠦ ᠰᠠᠭᠤᠳᠠᠭ᠃ ᠦᠶᠡ ᠦᠶᠡᠬᠡᠨ ᠵᠢᠩᠳᠡᠭᠡᠳᠡᠭ ᠬᠤᠩᠭᠠᠷ ᠲᠤ ᠰᠢᠭᠢᠳᠦᠭᠰᠡᠨ ᠵᠢᠪᠠᠷ ᠰᠢᠭ ᠲᠡᠷᠡ ᠬᠦ ᠭᠤᠨᠢᠭ ᠢ ᠨᠢ ᠤᠷᠢᠳᠤ ᠰᠥᠨᠢ ᠶᠢᠨ ᠵᠡᠭᠦᠳᠦ ᠰᠡᠳᠡᠷᠡᠭᠡᠵᠦ ᠥᠭᠭᠦᠭᠰᠡᠨ ᠪᠠᠶᠢᠵᠤ ᠪᠣᠯᠬᠤ ᠶᠤᠮ᠃ ᠬᠣᠷᠸᠠ ᠳᠡᠯᠡᠬᠡᠢ ᠶᠢᠨ ᠨᠠᠮᠤᠷ ᠴᠠᠭ ᠭᠡᠳᠡᠭ ᠬᠦᠮᠦᠨ ᠦ ᠰᠡᠳᠬᠢᠯ ᠳᠦ ᠤᠬᠠᠭᠠᠷᠠᠯ ᠨᠡᠮᠡᠨ᠂ ᠢᠷᠡᠭᠰᠡᠨ ᠪᠦᠬᠦᠨ ᠪᠤᠴᠠᠵᠤ ᠪᠣᠯᠳᠠᠭ᠂ ᠤᠷᠭᠤᠭᠰᠠᠨ ᠪᠦᠬᠦᠨ ᠬᠠᠭᠳᠠᠷᠠᠵᠤ ᠪᠣᠯᠳᠠᠭ ᠢ ᠰᠠᠨᠠᠭᠤᠯᠤᠨ ᠬᠡᠯᠡᠳᠡᠭ ᠪᠣᠯᠬᠣᠷ ᠬᠦᠮᠦᠰ ᠮᠥᠩᠬᠡ ᠪᠤᠰᠤ ᠶᠢᠨ ᠱᠠᠩᠯᠠᠯ ᠢ ᠵᠢᠷᠦᠬᠡᠨ ᠳᠦ ᠪᠡᠨ ᠲᠡᠭᠡᠭᠡᠵᠦ ᠨᠠᠮᠤᠷ ᠢᠶᠠᠷ ᠭᠤᠨᠢᠭᠯᠠᠳᠠᠭ ᠴᠤ ᠶᠤᠮ ᠤᠤ᠃
ᠡᠳᠦᠭᠡ ᠭᠤᠴᠢᠨ ᠳᠣᠯᠣᠭᠠᠨ ᠤ ᠵᠢᠯ ᠨᠢ ᠣᠷᠣᠭᠰᠠᠨ ᠴᠤ ᠣᠷᠢ ᠭᠠᠭᠴᠠᠭᠠᠷ ᠶᠠᠪᠤᠭᠠ ᠪᠦᠰᠡᠭᠦᠢ ᠶᠢᠨ ᠬᠤᠪᠢ ᠳᠤ ᠶᠠᠭ ᠯᠠ ᠬᠠᠭᠳᠠᠷᠠᠵᠤ ᠪᠤᠢ ᠨᠠᠪᠴᠢᠰ ᠰᠢᠭ᠂ ᠪᠤᠴᠠᠵᠤ ᠪᠤᠢ ᠰᠢᠪᠠᠭᠤᠳ ᠰᠢᠭ᠂ ᠣᠷᠣᠵᠤ ᠪᠤᠢ ᠰᠡᠭᠦᠯᠴᠢ ᠶᠢᠨ ᠪᠣᠷᠣᠭᠠ ᠰᠢᠭ ᠠᠮᠢᠳᠤᠷᠠᠯ ᠤᠨ ᠬᠢ ᠨᠢ ᠠᠯᠲᠠᠨ ᠡᠳᠦᠷ ᠦᠳ ᠨᠢᠭᠡ ᠨᠢᠭᠡ ᠪᠡᠷ ᠪᠠᠷᠠᠭᠳᠠᠨ᠂ ᠲᠡᠷᠡ ᠲᠣᠭᠠ ᠪᠠᠷ ᠭᠣᠸᠠ ᠦᠵᠡᠰᠬᠦᠯᠡᠩ ᠨᠢ ᠰᠢᠪᠬᠠᠭᠳᠠᠵᠤ ᠪᠠᠶᠢᠬᠤ ᠰᠢᠭ ᠤᠶᠢᠲᠠᠢ ᠰᠠᠨᠠᠭᠳᠠᠨᠠ᠃ ᠶᠠᠭ ᠯᠠ ᠮᠣᠳᠣᠨ ᠠᠴᠠ ᠪᠠᠨ ᠲᠠᠰᠤᠷᠴᠤ ᠪᠤᠢ ᠡᠨᠡ ᠯᠠ ᠨᠠᠪᠴᠢᠰ ᠰᠢᠭ ᠡᠵᠡᠨ ᠡᠴᠡ ᠪᠡᠨ ᠪᠦᠳᠡᠭᠢᠷᠡᠨ ᠣᠳᠴᠤ ᠪᠤᠢ ᠭᠣᠸᠠ ᠦᠵᠡᠰᠬᠦᠯᠡᠩ ᠳᠦ ᠪᠡᠨ ᠬᠠᠷᠠᠮᠰᠠᠬᠤ ᠰᠡᠳᠬᠢᠯ ᠲᠡᠭᠡᠲᠡᠯᠡ ᠲᠥᠷᠥᠬᠦ ᠦᠭᠡᠢ ᠴᠤ᠂ ᠡᠨᠡ ᠯᠠ ᠬᠡᠪ ᠢᠶᠡᠷ ᠴᠠᠰᠢ ᠦᠷᠭᠦᠯᠵᠢᠯᠡᠬᠦ ᠠᠪᠠᠰᠤ ᠨᠠᠰᠤᠨ ᠲᠤᠷᠰᠢᠳᠠ ᠪᠠᠨ ᠣᠷᠢ ᠭᠠᠭᠴᠠ ᠪᠠᠷ ᠠᠮᠢᠳᠤᠷᠠᠭᠰᠠᠭᠠᠷ ᠳᠠᠭᠤᠰᠤᠨᠠ ᠭᠡᠳᠡᠭ ᠢᠶᠡᠨ ᠯᠠ ᠬᠠᠲᠠᠭᠤ ᠤᠬᠠᠭᠠᠷᠠᠵᠤ ᠪᠠᠶᠢᠪᠠ᠃ ᠠᠮᠢᠳᠤᠷᠠᠯ ᠶᠠᠮᠠᠷ ᠰᠠᠨᠠᠭᠰᠠᠨ ᠠᠴᠠ ᠪᠣᠯᠬᠤ ᠪᠢᠰᠢ ᠳ᠋ᠡ᠃ ᠦᠶᠡ ᠶᠢᠨ ᠪᠦᠰᠡᠭᠦᠶᠢᠴᠦᠳ ᠭᠡᠷ ᠣᠷᠣᠨ᠂ ᠦᠷᠡ ᠬᠡᠦᠬᠡᠳ᠂ ᠬᠠᠨᠢ ᠢᠵᠢᠯᠢ ᠲᠡᠢ ᠪᠣᠯᠵᠤ ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠤᠨ ᠵᠢᠷᠭᠠᠯ ᠵᠣᠪᠠᠯᠠᠩ ᠢ ᠬᠠᠨᠲᠠᠯᠠ ᠡᠳ᠋ᠯᠡᠵᠦ ᠶᠠᠪᠤᠬᠤ ᠳᠤ ᠵᠢᠷᠭᠠᠯᠮᠠ ᠶᠢ ᠯᠠ ᠣᠷᠢ ᠭᠠᠭᠴᠠ ᠪᠠᠷ ᠢ ᠨᠢ《 ᠵᠢᠷᠭᠠᠭ 》 ᠭᠡᠳ ᠦᠯᠡᠳᠡᠭᠡᠴᠢᠬᠡᠭᠰᠡᠨ ᠶᠤᠮ ᠰᠢᠭ ᠨᠡᠷᠡ ᠨᠢ ᠬᠦᠷᠲᠡᠯᠡ ᠵᠢᠷᠭᠠᠯᠮᠠ᠃ ᠭᠡᠬᠦ ᠳᠦ ᠪᠡᠨ ᠭᠠᠭᠴᠠᠭᠠᠷ ᠲᠤᠭᠤᠯᠬᠤ ᠡᠨᠡ ᠵᠢᠷᠭᠠᠯ ᠲᠡᠶᠢᠮᠦ ᠰᠠᠶᠢᠬᠠᠨ ᠵᠦᠢᠯ ᠪᠢᠰᠢ ᠭᠡᠳᠡᠭ ᠢ ᠪᠦᠰᠡᠭᠦᠢ ᠴᠠᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠬᠦ ᠲᠤᠰᠤᠮ ᠮᠡᠳᠡᠷᠡᠭᠰᠡᠭᠡᠷ᠂ ᠵᠢᠷᠦᠬᠡᠨ ᠳᠦ ᠪᠡᠨ ᠭᠤᠨᠢᠭᠯᠠᠭᠰᠠᠭᠠᠷ ᠯᠠ ᠶᠠᠪᠤᠭᠰᠠᠨ ᠶᠤᠮ᠃
ᠬᠥᠯ ᠦᠨ ᠳᠣᠣᠭᠤᠷ ᠣᠷᠢᠶᠠᠴᠠᠯᠳᠤᠬᠤ ᠨᠠᠪᠴᠢᠰ ᠤᠨ ᠳᠤᠮᠳᠠ ᠠᠴᠠ ᠤᠷᠤᠭᠤᠯ ᠰᠢᠭ ᠤᠯᠠᠪᠤᠷ ᠰᠢᠷᠠ ᠨᠠᠪᠴᠢ ᠶᠢ ᠬᠠᠷᠠᠮᠠᠭᠴᠠ ᠪᠠᠨ ᠪᠦᠰᠡᠭᠦᠢ ᠲᠡᠭᠦᠨ ᠢ ᠠᠪᠤᠭᠠᠳ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠠᠶᠠᠷᠬᠠᠨ ᠲᠠᠯᠪᠢᠪᠠ᠃ ᠬᠠᠳᠠᠵᠤ ᠠᠮᠵᠢᠭᠠ ᠦᠭᠡᠢ ᠰᠢᠭᠦᠰᠦᠯᠢᠭ ᠰᠤᠳᠠᠯ ᠤᠳ ᠨᠢ ᠡᠭᠡᠭᠡ ᠯᠠ ᠰᠤᠳᠠᠰᠤ ᠮᠡᠲᠦ᠂ ᠨᠠᠷᠠᠨ ᠤ ᠰᠠᠴᠤᠷᠠᠭ ᠮᠡᠲᠦ ᠣᠯᠠᠨ ᠵᠦᠭ ᠲᠦ ᠪᠡᠨ ᠰᠠᠯᠠᠭᠠᠯᠠᠭᠰᠠᠨ ᠡᠨᠡ ᠨᠠᠪᠴᠢ ᠴᠡᠴᠡᠷᠯᠢᠭ ᠢᠶᠡᠷ ᠳᠦᠭᠦᠷᠡᠩ ᠤᠨᠠᠵᠤ ᠬᠠᠭᠳᠠᠷᠠᠭᠰᠠᠨ ᠨᠠᠪᠴᠢᠰ ᠠᠴᠠ ᠠᠷᠠᠢ ᠯᠠ ᠥᠭᠡᠷᠡ᠂ ᠠᠷᠠᠢ ᠯᠠ ᠥᠩᠭᠡᠯᠢᠭ᠂ ᠠᠷᠠᠢ ᠯᠠ ᠳᠠᠯᠪᠠᠭᠠᠷ ᠬᠠᠷᠠᠭᠳᠠᠨᠠ᠃ ᠪᠦᠰᠡᠭᠦᠢ ᠮᠥᠨᠥᠬᠢ ᠨᠠᠪᠴᠢ ᠶᠢ ᠬᠠᠷᠠᠵᠤ ᠰᠠᠭᠤᠬᠤ ᠳᠤ ᠪᠠᠨ ᠥᠴᠥᠭᠡᠳᠦᠷ ᠦᠨ ᠵᠡᠭᠦᠳᠦ ᠪᠡᠨ ᠡᠷᠭᠢᠨ ᠰᠠᠨᠠᠵᠠᠢ᠃ ᠲᠡᠷᠡ ᠵᠡᠭᠦᠳᠦᠨ ᠳᠦ ᠶᠠᠭ ᠡᠶᠢᠮᠦ ᠯᠠ ᠨᠠᠪᠴᠢᠨ ᠳᠡᠭᠡᠷᠡ ᠬᠡᠨ ᠨᠢᠭᠡᠨ ᠰᠢᠯᠦᠭ ᠪᠢᠴᠢᠵᠦ᠂ ᠪᠦᠰᠡᠭᠦᠢ ᠲᠡᠭᠦᠨ ᠢ ᠤᠩᠰᠢᠵᠤ ᠰᠠᠭᠤᠭᠰᠠᠨ᠃ ᠳᠥᠷᠪᠡᠨ ᠮᠥᠷ᠃ ᠣᠳᠣ ᠴᠤ ᠲᠡᠷᠡ ᠬᠦ ᠦᠰᠦᠭ ᠦᠳ ᠨᠢᠭᠡ ᠨᠢᠭᠡ ᠪᠡᠷ ᠰᠡᠳᠬᠢᠯ ᠳᠦ ᠨᠢ ᠤᠷᠭᠤᠨ ᠲᠣᠳᠣᠷᠠᠬᠤ ᠴᠤ ᠬᠣᠯᠪᠤᠭᠠᠳ ᠰᠠᠨᠠᠬᠤ ᠭᠡᠬᠦ ᠪᠡᠷ ᠡᠪᠯᠡᠵᠦ ᠥᠭᠭᠦ ᠦᠭᠡᠢ ᠵᠣᠪᠠᠭᠠᠨᠠ᠃ ᠬᠠᠶᠢᠷᠠ ᠶᠢᠨ ᠰᠢᠯᠦᠭ ᠯᠠ ᠪᠠᠶᠢᠭᠰᠠᠨ᠃ ᠡᠨᠡ ᠯᠠ ᠳᠥᠷᠪᠡᠬᠡᠨ ᠮᠥᠷ ᠢ ᠡᠪᠯᠡᠭᠦᠯᠵᠦ ᠰᠠᠨᠠᠬᠤ ᠭᠡᠵᠦ ᠠᠷᠭᠠ ᠪᠠᠨ ᠪᠠᠷᠠᠬᠤ ᠳᠤ ᠪᠠᠨ ᠠᠬᠢᠭᠠᠳ ᠯᠠ ᠭᠤᠨᠢᠭ ᠢᠶᠠᠨ ᠨᠥᠮᠥᠷᠬᠦ ᠪᠡᠷ ᠡᠨᠡ ᠴᠡᠴᠡᠷᠯᠢᠭ ᠲᠦ ᠢᠷᠡᠭᠰᠡᠨ ᠬᠡᠷᠡᠭ᠃ ᠲᠡᠷᠡ ᠨᠠᠪᠴᠢ᠂ ᠡᠰᠡᠪᠡᠯ ᠲᠡᠭᠦᠨ ᠲᠡᠢ ᠲᠥᠰᠲᠡᠢ ᠨᠠᠪᠴᠢ ᠠᠯᠠᠭᠠᠨ ᠳᠡᠭᠡᠷᠡ ᠨᠢ ᠪᠠᠶᠢᠭᠠ ᠴᠤ ᠰᠢᠯᠦᠭ ᠢ ᠰᠠᠨᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠶᠠᠭᠠᠬᠢᠭᠠᠳ ᠴᠤ ᠶᠤᠮ ᠵᠡᠭᠦᠳᠦ ᠵᠥᠩ ᠢᠶᠡᠷ ᠨᠢ ᠳᠠᠮᠵᠢᠭᠤᠯᠤᠨ ᠬᠡᠨ ᠨᠢᠭᠡᠨ ᠲᠡᠭᠦᠨ ᠳᠦ ᠲᠡᠷᠡ ᠬᠦ ᠰᠢᠯᠦᠭ ᠢ ᠢᠯᠡᠭᠡᠭᠰᠡᠨ ᠶᠤᠮ ᠰᠢᠭ ᠰᠠᠨᠠᠭᠳᠠᠬᠤ ᠳᠤ ᠨᠠᠰᠤᠨ ᠲᠤᠷᠰᠢᠳᠠ ᠪᠠᠨ ᠬᠦᠯᠢᠶᠡᠵᠦ ᠪᠠᠶᠢᠭᠠ ᠬᠠᠶᠢᠷᠠ ᠶᠢᠨ ᠬᠢ ᠨᠢ ᠡᠵᠡᠨ ᠮᠥᠨ ᠭᠡᠵᠦ ᠢᠲᠡᠭᠡᠵᠡᠢ᠃
ᠪᠦᠰᠡᠭᠦᠢ ᠡᠶᠢᠨ ᠤᠳᠠᠭᠠᠨ ᠰᠠᠭᠤᠭᠠᠳ ᠨᠠᠪᠴᠢ᠂ ᠬᠠᠶᠢᠷᠠ᠂ ᠵᠢᠷᠦᠬᠡᠨ ᠳᠡᠭᠡᠷᠡ ᠮᠢᠨᠢ ᠁ ᠭᠡᠰᠡᠨ ᠦᠭᠡᠰ ᠡᠴᠡ ᠥᠭᠡᠷᠡ ᠶᠢ ᠰᠠᠨᠠᠭᠰᠠᠨ ᠦᠭᠡᠢ᠃ ᠤᠯᠠᠪᠤᠷ ᠰᠢᠷᠭᠠᠯ ᠨᠠᠷᠠᠨ ᠠᠭᠤᠯᠠᠰ ᠤᠨ ᠣᠷᠣᠢ ᠶᠢ ᠢᠯᠪᠢᠨ ᠳᠣᠭᠣᠭᠰᠢᠯᠠᠵᠤ ᠨᠠᠮᠤᠷ ᠤᠨ ᠴᠡᠴᠡᠷᠯᠢᠭ ᠲᠦ ᠤᠯᠠᠮ ᠰᠡᠷᠢᠭᠦᠦ ᠣᠷᠣᠬᠤ ᠳᠤ ᠪᠦᠰᠡᠭᠦᠢ ᠰᠠᠶ᠋ᠢ ᠵᠢᠩᠳᠡᠭᠰᠡᠨ ᠢᠶᠡᠨ ᠮᠡᠳᠡᠨ ᠰᠠᠭᠤᠳᠠᠯ ᠠᠴᠠ ᠪᠠᠨ ᠪᠣᠰᠬᠤ ᠳᠤ ᠪᠠᠨ ᠴᠦᠩᠬᠦ ᠡᠴᠡ ᠪᠡᠨ ᠬᠥᠮᠦᠰᠬᠡᠨ ᠦ ᠬᠠᠷᠠᠨᠳᠠ ᠭᠠᠷᠭᠠᠨ ᠨᠠᠪᠴᠢᠨ ᠳᠡᠭᠡᠷᠡ ᠤᠲᠠᠰᠤᠨ ᠤ ᠪᠠᠨ ᠳ᠋ᠤᠭᠠᠷ ᠢ ᠪᠢᠴᠢᠭᠡᠳ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠲᠡᠯᠡ ᠲᠦᠷᠦᠭᠦᠨ ᠮᠣᠳᠣᠨ ᠤ ᠰᠡᠭᠦᠳᠡᠷ ᠪᠠᠷᠠᠳᠠᠨ ᠵᠠᠮᠬᠠᠷᠠᠭᠰᠠᠨ ᠰᠠᠯᠬᠢᠨ ᠬᠠᠮᠢᠭᠠ ᠠᠴᠠ ᠴᠤ ᠶᠤᠮ ᠪᠤᠢ ᠢᠰᠬᠡᠷᠦᠨ ᠭᠠᠷᠴᠤ ᠢᠷᠡᠭᠡᠳ ᠪᠦᠰᠡᠭᠦᠢ ᠶᠢᠨ ᠭᠠᠷ ᠳᠡᠭᠡᠷᠡᠬᠢ ᠨᠠᠪᠴᠢ ᠶᠢ ᠬᠡᠶᠢᠰᠬᠡᠨ ᠠᠪᠴᠤ ᠣᠳᠪᠠ᠃ ᠤᠷᠤᠭᠤᠯ ᠰᠢᠭ ᠤᠯᠠᠪᠤᠷ ᠰᠢᠷᠭᠠᠯ ᠨᠠᠪᠴᠢ ᠨᠠᠮᠤᠷ ᠤᠨ ᠲᠠᠯᠠ ᠳᠤ ᠨᠢᠴᠦᠭᠦᠷᠡᠭᠰᠡᠨ ᠮᠣᠳᠣᠳ ᠤᠨ ᠳᠤᠮᠳᠠᠭᠤᠷ ᠬᠡᠶᠢᠰᠦᠨ ᠣᠳᠴᠤ᠂ ᠪᠦᠰᠡᠭᠦᠢ ᠭᠡᠷ ᠦᠨ ᠵᠦᠭ ᠠᠯᠬᠤᠪᠠ᠃
ᠨᠠᠪᠴᠢ ᠰᠠᠯᠬᠢ ᠬᠣᠶᠠᠷ ᠤᠷᠳᠤ ᠬᠣᠶᠢᠨᠠ ᠪᠠᠨ ᠣᠷᠣᠨ᠂ ᠬᠥᠭᠡᠭᠡᠴᠡᠯᠳᠦᠨ ᠲᠣᠭᠯᠠᠬᠤ ᠮᠡᠲᠦ᠂ ᠬᠥᠲᠦᠯᠦᠯᠴᠡᠨ ᠭᠦᠶᠦᠬᠦ ᠮᠡᠲᠦ᠂ ᠲᠡᠳᠡᠨ ᠢ ᠳᠠᠭᠠᠨ ᠦᠢ ᠣᠯᠠᠨ ᠨᠠᠪᠴᠢ ᠨᠠᠶᠢᠷᠠᠯ ᠬᠥᠭᠵᠢᠮ ᠦᠨ ᠠᠶᠠᠯᠭᠤᠨ ᠳᠤ ᠨᠠᠶᠢᠭᠤᠨ ᠭᠠᠩᠬᠤᠬᠤ ᠥᠬᠢᠳ ᠠᠳᠠᠯᠢ ᠬᠣᠲᠠ ᠶᠢᠨ ᠭᠤᠳᠤᠮᠵᠢ ᠤᠷᠤᠭᠤᠳᠠᠨ ᠬᠡᠶᠢᠰᠦᠭᠰᠡᠭᠡᠷ ᠦᠯᠡᠳᠡᠪᠡ᠃ ᠶᠠᠭᠠᠷᠠᠨ ᠠᠯᠬᠤᠬᠤ ᠬᠦᠮᠦᠰ ᠦᠨ ᠬᠥᠯ ᠦᠨ ᠳᠤᠮᠳᠠᠭᠤᠷ ᠰᠦᠯᠵᠢᠯᠳᠦᠨ᠂ ᠨᠣᠶᠢᠷᠮᠤᠭᠯᠠᠨ ᠳ᠋ᠤᠭᠠᠷᠯᠠᠬᠤ ᠮᠠᠰᠢᠨ ᠨᠤᠭᠤᠳ ᠤᠨ ᠳᠤᠭᠤᠢ ᠶᠢᠨ ᠳᠣᠣᠭᠤᠷ ᠬᠡᠢᠰᠦᠨ᠂ ᠵᠠᠮ ᠤᠨ ᠴᠠᠭᠳᠠᠭᠠ ᠶᠢᠨ ᠮᠠᠯᠠᠭᠠᠢ ᠶᠢᠨ ᠳᠡᠭᠡᠷᠡ ᠨᠢ ᠪᠠᠭᠤᠵᠤ᠂ ᠵᠠᠯᠬᠠᠭᠰᠠᠨ ᠪᠣᠯᠤᠯᠲᠠᠢ ᠲᠡᠨᠳᠡ ᠡᠴᠡ ᠪᠡᠨ ᠴᠠᠰᠢ ᠬᠡᠢᠰᠦᠨ ᠡᠬᠡ ᠶᠢᠨ ᠢᠶᠡᠨ ᠭᠠᠷ ᠠᠴᠠ ᠬᠥᠲᠥᠯᠦᠨ ᠰᠢᠬᠢᠷ ᠠᠳᠬᠤᠨ ᠶᠠᠪᠤᠭᠠ ᠬᠦᠦ ᠶᠢᠨ ᠰᠢᠯᠦᠰᠦᠨ ᠳᠦ ᠬᠠᠯᠲᠠᠷᠲᠤᠭᠰᠠᠨ ᠭᠠᠷ ᠳᠡᠭᠡᠷᠡ ᠪᠠᠭᠤᠵᠤ ᠠᠮᠲᠠ ᠶᠢ ᠨᠢ ᠲᠠᠮᠰᠢᠶᠠᠯᠠᠨ ᠳᠣᠯᠢᠶᠠᠬᠤ ᠮᠡᠲᠦ ᠠᠷᠴᠢᠨ ᠴᠠᠰᠢ ᠬᠡᠶᠢᠰᠪᠡ᠃ ᠭᠤᠳᠤᠮᠵᠢ ᠤᠷᠤᠭᠤᠳᠠᠨ ᠬᠡᠶᠢᠰᠬᠦ ᠭᠠᠯ ᠰᠢᠷᠭᠠᠯ ᠨᠠᠪᠴᠢᠰ ᠤᠨ ᠬᠤᠶᠢᠯᠠᠷᠠᠯ ᠣᠷᠣᠢ ᠨᠠᠮᠤᠷ ᠤᠨ ᠵᠢᠪᠡᠷᠭᠡᠨ ᠰᠠᠯᠬᠢ ᠲᠠᠢ ᠬᠠᠮᠲᠤ ᠣᠷᠴᠢᠯᠠᠩ ᠢ ᠨᠡᠩᠵᠢᠬᠦ ᠮᠡᠲᠦ ᠡᠶᠢᠨ ᠬᠡᠶᠢᠰᠴᠦ ᠶᠠᠪᠤᠬᠤ ᠳᠤ ᠨᠢ ᠵᠥᠭᠡᠯᠡᠨ ᠪᠣᠷᠣᠭᠠ ᠰᠢᠪᠡᠷᠡᠨ ᠣᠷᠣᠵᠤ᠂ ᠪᠢᠴᠢᠭᠰᠡᠨ ᠳ᠋ᠤᠭᠠᠷ ᠢ ᠨᠢ ᠨᠣᠷᠭᠠᠨ ᠠᠷᠢᠯᠭᠠᠬᠤ ᠰᠢᠬᠠᠭᠰᠠᠨ ᠴᠤ ᠠᠮᠵᠢᠵᠤ ᠨᠢᠭᠡᠨ ᠮᠠᠰᠢᠨ ᠤ ᠤᠷᠢᠳᠤ ᠰᠠᠯᠬᠢᠨ ᠤ ᠰᠢᠯ ᠳᠡᠭᠡᠷᠡ ᠨᠠᠭᠠᠯᠳᠤᠨ ᠲᠣᠭᠲᠠᠪᠠ᠃
ᠶᠠᠭ ᠡᠨᠡ ᠭᠱᠠᠨ ᠳᠤ ᠶᠡᠬᠡ ᠬᠣᠲᠠ ᠶᠢᠨ ᠵᠠᠮ ᠳᠡᠭᠡᠷᠡ ᠬᠠᠮᠢᠭᠠᠰᠢ ᠪᠠᠨ ᠴᠤ ᠦᠭᠡᠢ ᠭᠠᠴᠠᠨ᠂ ᠬᠡᠨ ᠨᠢᠭᠡᠨ ᠲᠡᠢ ᠤᠲᠠᠰᠤ ᠪᠠᠷ ᠶᠠᠷᠢᠵᠤ ᠪᠠᠶᠢᠭᠰᠠᠨ ᠵᠢᠯᠣᠭᠣᠴᠢ ᠵᠠᠯᠠᠭᠤ ᠰᠠᠯᠬᠢᠨ ᠤ ᠰᠢᠯ ᠳᠡᠭᠡᠷᠡ ᠬᠡᠢᠰᠦᠨ ᠪᠠᠭᠤᠭᠰᠠᠨ ᠨᠠᠪᠴᠢ ᠶᠢ ᠠᠵᠢᠭ ᠦᠭᠡᠢ ᠬᠠᠷᠠᠭᠰᠠᠨ ᠢᠶᠠᠨ᠂ ᠠᠬᠢᠨ ᠯᠠᠪᠠᠬᠤ ᠳᠤ ᠪᠠᠨ ᠬᠥᠰᠢᠵᠦ ᠤᠷᠬᠢᠪᠠ᠃
ᠪᠠᠶᠠᠷ ᠡ ᠂ ᠬᠦᠶ᠋ᠢ ᠪᠠᠶᠠᠷ ᠡ᠂ ᠪᠠᠶᠢᠨᠠ ᠤᠤ︖ ᠬᠡᠮᠡᠨ ᠬᠠᠷᠢᠯᠴᠠᠭᠤᠷ ᠤᠨ ᠴᠠᠭᠠᠨᠠ ᠠᠴᠠ ᠬᠡᠨ ᠨᠢᠭᠡᠨ ᠦ ᠬᠣᠭᠣᠯᠠᠢ ᠰᠣᠨᠣᠰᠤᠭᠳᠠᠨᠠ᠃
ᠪᠢ ᠡᠷᠭᠢᠭᠡᠳ ᠵᠠᠯᠭᠠᠶᠠ ᠭᠡᠵᠦ ᠪᠠᠶᠠᠷ ᠬᠡᠯᠡᠭᠡᠳ ᠬᠠᠷᠢᠯᠴᠠᠭᠤᠷ ᠢᠶᠠᠨ ᠰᠠᠯᠭᠠᠵᠤ ᠮᠥᠨᠥᠬᠢ ᠨᠠᠪᠴᠢ ᠶᠢ ᠠᠩᠵᠠᠭᠠᠷᠠᠨ ᠬᠠᠷᠠᠪᠠᠯ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠲᠡᠭᠦᠨ ᠳᠡᠭᠡᠷᠡ ᠬᠡᠨ ᠨᠢᠭᠡᠨ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠪᠢᠴᠢᠭᠰᠡᠨ ᠪᠣᠯᠵᠤ ᠲᠠᠭᠠᠷᠠᠪᠠ᠃ ᠲᠣᠭᠠ ᠪᠢᠴᠢᠵᠡᠢ᠃ ᠲᠡᠭᠦᠰᠬᠡᠯ ᠨᠢ 8909 ᠭᠡᠰᠡᠨ ᠳᠥᠷᠪᠡᠨ ᠲᠣᠭᠠ ᠲᠣᠳᠣᠬᠠᠨ ᠦᠵᠡᠭᠳᠡᠬᠦ ᠳᠦ ᠯᠠᠪᠯᠠᠨ ᠰᠠᠶᠢᠨ ᠬᠠᠷᠠᠪᠠᠯ ᠡᠨᠡ ᠲᠣᠭᠠ ᠨᠤᠭᠤᠳ ᠶᠠᠮᠠᠷ ᠨᠢᠭᠡᠨ ᠤᠳᠬᠠ ᠤᠴᠢᠷ ᠢ ᠢᠯᠡᠷᠬᠡᠶᠢᠯᠡᠭᠡᠳ ᠪᠠᠶᠢᠭᠠ ᠴᠤ ᠶᠤᠮ ᠰᠢᠭ᠂ ᠡᠰᠡᠪᠡᠯ ᠳᠡᠩᠳᠡᠭᠦᠦ ᠲᠠᠨᠢᠯ᠂ ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ ᠤᠨ ᠲᠣᠳᠣ ᠭᠡᠭᠡᠨ ᠳᠤᠷᠠᠰᠤᠮᠵᠢ ᠶᠤᠮ ᠰᠢᠭ ᠰᠠᠨᠠᠭᠳᠠᠬᠤ ᠳᠤ ᠮᠠᠰᠢᠨ ᠠᠴᠠ ᠪᠠᠨ ᠪᠠᠭᠤᠵᠤ ᠰᠠᠯᠬᠢᠨ ᠤ ᠰᠢᠯ ᠳᠡᠭᠡᠷᠡ ᠲᠣᠭᠲᠠᠭᠰᠠᠨ ᠤᠯᠠᠪᠤᠷ ᠰᠢᠷᠭᠠᠯ ᠨᠠᠪᠴᠢ ᠶᠢ ᠠᠪᠤᠨ ᠪᠤᠴᠠᠵᠤ ᠮᠠᠰᠢᠨ ᠳᠤ ᠪᠠᠨ ᠰᠠᠭᠤᠪᠠ᠃ 《8909》 ᠬᠡᠮᠡᠨ ᠠᠮᠠᠨ ᠳᠤ ᠪᠠᠨ ᠦᠭᠡᠯᠡᠨ ᠰᠠᠭᠤᠭᠰᠠᠨ ᠢᠶᠠᠨ᠂ ᠮᠠᠭᠠᠳ ᠡᠭᠦᠨ ᠢ ᠪᠢᠴᠢᠭᠰᠡᠨ ᠬᠦᠮᠦᠨ ᠨᠢ ᠪᠠᠶᠠᠷ ᠢ ᠬᠣᠯᠠ ᠠᠴᠠ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠶᠢᠭᠠ ᠶᠤᠮ ᠰᠢᠭ ᠰᠠᠨᠠᠭᠳᠠᠨ ᠡᠷᠭᠢᠨ ᠲᠣᠭᠣᠷᠢᠨ ᠢ ᠬᠠᠷᠠᠭᠰᠠᠨ ᠴᠤ᠂ ᠪᠥᠭᠯᠡᠷᠡᠵᠦ ᠪᠤᠬᠢᠨᠢᠲᠤᠭᠰᠠᠨ ᠵᠢᠯᠣᠭᠣᠴᠢ ᠨᠠᠷ ᠠᠴᠠ ᠥᠭᠡᠷᠡ ᠵᠠᠯᠠᠭᠤ ᠡᠷᠡ ᠶᠢ ᠠᠩᠵᠠᠭᠠᠷᠠᠬᠤ ᠬᠦᠮᠦᠨ ᠪᠠᠶᠢᠭᠰᠠᠨ ᠦᠭᠡᠢ᠃ ᠨᠠᠪᠴᠢ ᠶᠢ ᠡᠷᠭᠢᠭᠦᠯᠵᠦ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠵᠤ ᠰᠠᠭᠤᠬᠤ ᠳᠤ ᠪᠠᠨ ᠯᠠ ᠰᠡᠳᠬᠢᠯ ᠵᠢᠷᠦᠬᠡᠨ ᠦ ᠬᠢ ᠨᠢ ᠭᠦᠨ ᠡᠴᠡ ᠬᠦᠨᠳᠦᠬᠡᠨ ᠳᠤᠷᠠᠰᠤᠮᠵᠢ ᠳᠡᠪᠡᠷᠡᠨ᠂ ᠠᠨᠢᠰᠬᠠ ᠨᠢ ᠴᠢᠭᠢᠭᠲᠦᠭᠡᠳ ᠢᠷᠡᠪᠡ᠃
ᠲᠦᠷᠦᠭᠦᠦ ᠨᠠᠮᠤᠷ ᠤᠨ ᠶᠠᠭ ᠡᠶᠢᠮᠦ ᠯᠠ ᠡᠳᠦᠷ᠂ ᠪᠦᠷ ᠶᠠᠭ ᠡᠶᠢᠮᠦ ᠨᠠᠪᠴᠢ ᠶᠢ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠨ ᠵᠣᠭᠰᠣᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠡᠷᠭᠢᠨ ᠰᠠᠨᠠᠭᠰᠠᠨ ᠬᠡᠷᠡᠭ᠃ ᠳᠦᠪ ᠳᠦᠭᠦᠷᠡᠩ ᠪᠠᠶᠢᠭᠰᠠᠨ ᠠᠵᠠ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠯ ᠤᠨ ᠬᠢ ᠨᠢ ᠳᠤᠮᠳᠠᠭᠤᠷ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠮᠡᠲᠦ ᠵᠦᠢᠯ ᠬᠠᠷᠪᠤᠨ ᠣᠷᠣᠵᠤ ᠢᠷᠡᠭᠡᠳ ᠬᠠᠶᠢᠷᠠᠲᠠᠢ ᠡᠬᠡᠨᠡᠷ ᠢ ᠨᠢ ᠠᠪᠴᠤ ᠣᠳᠤᠭᠰᠠᠨ ᠣᠰᠣᠯ ᠪᠣᠯᠤᠭᠰᠠᠨ ᠲᠡᠷᠡ ᠡᠳᠦᠷ ᠪᠠᠶᠠᠷᠠ ᠶᠢᠨ ᠠᠮᠢᠳᠤᠷᠠᠯ ᠤᠨ ᠬᠦᠨᠳᠦ ᠳᠤᠷᠠᠰᠤᠮᠵᠢ᠂ ᠰᠡᠳᠬᠢᠯ ᠵᠢᠷᠦᠬᠡᠨ ᠡᠴᠡ ᠨᠢ ᠰᠠᠯᠵᠤ ᠬᠠᠭᠠᠴᠠᠮᠠᠷ ᠦᠭᠡᠢ ᠭᠠᠭᠴᠠᠭᠠᠷᠳᠠᠯ ᠴᠥᠬᠥᠷᠡᠯ ᠢ ᠡᠭᠦᠷᠢᠳᠡ ᠠᠪᠴᠤ ᠢᠷᠡᠭᠰᠡᠨ ᠪᠢᠯᠡ᠃ ᠥᠨᠥᠳᠥᠷ ᠡᠷᠲᠡᠬᠡᠨ ᠬᠠᠷᠢᠭᠠᠳ ᠡᠬᠡᠨᠡᠷ ᠦᠨ ᠢᠶᠡᠨ ᠳᠤᠷᠠᠰᠬᠠᠯ ᠢ ᠬᠦᠨᠳᠦᠳᠭᠡᠬᠦ ᠤᠴᠢᠷ ᠲᠠᠢ ᠴᠤ᠂ ᠡᠨᠡ ᠶᠡᠬᠡ ᠲᠦᠭᠵᠢᠷᠡᠯ ᠢ ᠶᠠᠭᠠᠬᠢᠯᠲᠠᠢ᠃ ᠵᠢᠭᠦᠷ ᠲᠡᠢ ᠪᠣᠯ ᠨᠢᠰᠦᠭᠡᠳ ᠵᠠᠶᠢᠯᠠᠴᠢᠬᠠᠮᠠᠷ ᠵᠠᠮ ᠤᠨ ᠲᠦᠭᠵᠢᠷᠡᠯ ᠲᠡᠭᠦᠨ ᠢ ᠭᠤᠨᠢᠭ ᠤᠢᠳᠬᠠᠷ ᠲᠠᠢ ᠨᠢ ᠬᠠᠮᠲᠤ ᠵᠠᠮ ᠳᠡᠭᠡᠷᠡ ᠤᠶᠠᠨ ᠲᠣᠷᠭᠣᠭᠠᠵᠤ ᠪᠠᠶᠢᠭᠰᠠᠨ ᠨᠢ ᠶᠠᠮᠠᠷ ᠨᠢᠭᠡᠨ ᠤᠴᠢᠷ ᠲᠠᠢ ᠴᠤ ᠶᠤᠮ ᠰᠢᠭ᠃ ᠬᠠᠮᠤᠭ ᠤᠨ ᠰᠡᠭᠦᠯ ᠳᠦ ᠡᠬᠡᠨᠡᠷ ᠨᠢ ᠠᠷᠠᠶᠢᠬᠢᠨ ᠦᠭᠡ ᠡᠪᠯᠡᠭᠦᠯᠵᠦ 《 ᠨᠠᠮᠤᠷ ᠤᠨ ᠨᠠᠪᠴᠢ ᠰᠢᠭ ᠭᠠᠩᠳᠠᠵᠤ ᠶᠠᠪᠤᠯ ᠦᠭᠡᠢ ᠁ 》 ᠭᠡᠳ ᠭᠦᠢᠴᠡᠭᠡᠵᠦ ᠬᠡᠯᠡᠯ ᠦᠭᠡᠢ ᠠᠮᠠ ᠠᠩᠭᠠᠯᠵᠠᠭᠰᠠᠭᠠᠷ ᠮᠥᠩᠬᠡ ᠪᠤᠰᠤ ᠶᠢᠨ ᠣᠷᠴᠢᠯᠠᠩ ᠳᠤ ᠠᠭᠤᠰᠤᠭᠰᠠᠨ ᠪᠢᠯᠡ᠃
ᠡᠬᠡᠨᠡᠷ ᠦᠨ ᠣᠷᠣᠰᠢᠭᠤᠯᠭᠠ ᠪᠣᠯᠬᠤ ᠶᠢᠨ ᠡᠮᠦᠨᠡᠬᠢ ᠰᠥᠨᠢ᠂ ᠪᠦᠬᠦ ᠶᠠᠭᠤᠮᠠ ᠵᠠᠭᠤᠷᠠᠳᠤ ᠶᠢᠨ ᠭᠡᠳᠡᠭ ᠢ ᠤᠬᠠᠭᠠᠷᠠᠭᠰᠠᠨ ᠲᠡᠷᠡ ᠰᠥᠨᠢ ᠲᠠᠭᠲᠤᠨ ᠳᠡᠭᠡᠷᠡ ᠨᠢ ᠤᠨᠠᠭᠰᠠᠨ ᠨᠠᠪᠴᠢᠰ ᠠᠴᠠ ᠶᠠᠭ ᠡᠶᠢᠮᠦ ᠨᠠᠪᠴᠢ ᠰᠣᠩᠭᠣᠨ ᠠᠪᠴᠤ ᠲᠡᠭᠦᠨ ᠳᠡᠭᠡᠷᠡ ᠵᠠᠭᠤᠷᠠᠳᠤ ᠶᠢᠨ ᠣᠷᠴᠢᠯᠠᠩ ᠳᠤ ᠢᠷᠡᠭᠰᠡᠨ ᠦᠨᠡᠨ ᠬᠠᠶᠢᠷᠠ ᠶᠢᠨ ᠢᠶᠠᠨ ᠲᠤᠬᠠᠢ ᠳᠥᠷᠪᠡᠨ ᠮᠥᠷ ᠰᠢᠯᠦᠭ ᠪᠢᠴᠢᠭᠡᠳ ᠡᠩᠭᠡᠷ ᠦᠨ ᠬᠠᠯᠠᠭᠠᠰᠤᠨ ᠳᠤ ᠪᠠᠨ ᠬᠢᠵᠦ ᠪᠢᠯᠡ᠃ ᠥᠨᠦᠴᠢᠷᠡᠵᠦ ᠦᠯᠡᠳᠡᠭᠰᠡᠨ ᠬᠦᠦ ᠪᠡᠨ ᠲᠡᠪᠡᠷᠢᠨ ᠡᠬᠡᠨᠡᠷ ᠦᠨ ᠢᠶᠡᠨ ᠣᠷᠣᠰᠢᠭᠤᠯᠭᠠᠨ ᠳᠡᠭᠡᠷᠡ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠨ ᠵᠣᠭᠰᠣᠵᠤ ᠪᠠᠶᠢᠭᠰᠠᠨ ᠲᠡᠷᠡ ᠬᠦᠨᠳᠦ ᠡᠳᠦᠷ ᠬᠠᠮᠤᠭ ᠤᠨ ᠰᠡᠭᠦᠯ ᠳᠦ ᠡᠩᠭᠡᠷ ᠦᠨ ᠬᠠᠯᠠᠭᠠᠰᠤᠨ ᠠᠴᠠ ᠪᠠᠨ ᠲᠡᠷᠡ ᠬᠦ ᠨᠠᠪᠴᠢᠨ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠰᠢᠯᠦᠭ ᠢᠶᠡᠨ ᠭᠠᠷᠭᠠᠨ ᠱᠠᠷᠢᠯ ᠳᠡᠭᠡᠷᠡ ᠨᠢ ᠲᠠᠯᠪᠢᠭᠠᠳ ᠪᠤᠴᠠᠭᠰᠠᠨ ᠶᠤᠮ᠃
1 0