ᠲᠤᠭᠤᠵᠢ
ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠣᠴᠢᠷ ᠄ ᠲᠩᠷᠢ ᠳᠦ ᠬᠠᠯᠢᠭᠰᠠᠨ ᠪᠦᠷᠭᠦᠳ
ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠣᠴᠢᠷ ᠄ ᠲᠩᠷᠢ ᠳᠦ ᠬᠠᠯᠢᠭᠰᠠᠨ ᠪᠦᠷᠭᠦᠳ
4630
2018-09-10 11:27
发表于:内蒙古
ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠣᠴᠢᠷ ᠄ ᠲᠩᠷᠢ ᠳᠦ ᠬᠠᠯᠢᠭᠰᠠᠨ ᠪᠦᠷᠭᠦᠳ
᠁ ᠬᠠᠪᠬᠠ ᠵᠠᠩᠭᠤᠨ ᠳᠤ ᠣᠷᠣᠬᠤ ᠦᠭᠡᠢ᠂ ᠬᠥᠭᠡᠭᠡᠵᠦ ᠨᠠᠮᠨᠠᠬᠤ ᠭᠡᠬᠦ ᠪᠡᠷ ᠭᠦᠢᠴᠡᠭᠳᠡᠬᠦ ᠦᠭᠡᠢ᠂ ᠲᠣᠭᠣᠷᠢᠨ ᠪᠦᠰᠡᠯᠡᠵᠦ ᠣᠲᠣᠭᠠᠨ ᠳᠤ ᠣᠷᠣᠭᠤᠯᠪᠠᠴᠤ ᠣᠪᠰᠣᠭᠠ ᠰᠠᠮᠪᠠᠭᠠ ᠪᠠᠷ ᠮᠤᠯᠲᠤᠷᠠᠨ ᠭᠠᠷᠬᠤ᠂ ᠡᠯᠳᠡᠪ ᠤᠷᠠᠨ ᠠᠷᠭᠠ ᠵᠠᠯᠢ ᠮᠡᠬᠡ ᠬᠡᠷᠡᠭᠯᠡᠪᠡᠴᠦ ᠲᠡᠷᠡ ᠪᠦᠬᠦᠨ ᠢ ᠵᠥᠩ ᠰᠣᠪᠢᠨ ᠢᠶᠠᠷ ᠲᠠᠩᠳᠠᠨ ᠮᠡᠳᠡᠭᠡᠳ ᠵᠠᠶᠢᠯᠠᠨ ᠣᠳᠬᠤ᠂ ᠥᠰ ᠰᠠᠨᠠᠮᠠᠲᠠᠭᠠᠢ ᠴᠤ ᠡᠷᠡ ᠵᠣᠷᠢᠭᠲᠠᠢ ᠡᠴᠦᠰ ᠢᠶᠡᠨ ᠬᠦᠷᠲᠡᠯᠡ ᠥᠰᠲᠦ ᠳᠠᠶᠢᠰᠤᠨ ᠳᠤ ᠪᠠᠨ ᠦᠯᠦ ᠪᠠᠭᠤᠵᠤ ᠥᠭᠬᠦ ᠨᠠᠮᠳᠠᠭ ᠭᠤᠸᠠᠢ ᠶᠢᠨ ᠳᠤᠯᠠᠭᠠᠨᠬᠠᠶᠢᠷᠬᠠᠨ ᠤ ᠬᠥᠭᠰᠢᠨ ᠴᠢᠨᠣᠠ ᠮᠡᠲᠦ ᠠᠮᠢᠳᠤᠷᠠᠭᠰᠠᠨ ᠬᠥᠮᠥᠨ ᠦ ᠰᠡᠭᠦᠯᠴᠢ ᠶᠢᠨ ᠮᠥᠴᠡ ᠡᠮᠭᠡᠨᠢᠯᠲᠡᠢ ᠴᠤ ᠢᠷᠠᠭᠤ ᠠᠯᠳᠠᠷ ᠤᠨ ᠮᠥᠩᠬᠡ ᠶᠢᠨ ᠳᠠᠭᠤᠯᠠᠯ ᠪᠣᠯᠤᠨ ᠦᠯᠡᠳᠡᠵᠡᠢ ᠁
ᠲᠡᠷᠡᠯᠵᠢ ᠶᠢᠨ ᠵᠠᠭᠤᠨᠠᠮᠣᠳᠣᠨ ᠳᠤ ᠮᠠᠨᠵᠤ-ᠬᠢᠲᠠᠳ᠂ ᠬᠠᠯᠬᠠ᠂ ᠡᠮᠦᠨᠡᠲᠦ ᠮᠣᠩᠭᠣᠯ ᠤᠨ ᠦᠯᠡᠮᠵᠢ ᠶᠡᠬᠡ ᠴᠡᠷᠢᠭ ᠲᠡᠢ ᠣᠶᠢᠷᠠᠳ ᠤᠨ ᠳᠠᠶᠢᠴᠢᠳ ᠬᠦᠴᠦ ᠲᠡᠩᠴᠡᠪᠦᠷᠢ ᠦᠭᠡᠢ ᠲᠤᠯᠤᠭᠠᠨ ᠬᠢᠵᠦ ᠪᠠᠭᠠᠲᠤᠷᠯᠢᠭ ᠢᠶᠠᠷ ᠲᠤᠯᠤᠯᠳᠤᠭᠰᠠᠨ ᠪᠣᠯᠪᠠᠴᠤ ᠬᠦᠮᠦᠨ ᠦ ᠶᠡᠬᠡ᠂ ᠭᠠᠯᠲᠤ ᠵᠡᠪᠰᠡᠭ ᠦᠨ ᠬᠦᠴᠦ ᠳ᠋ᠤ ᠳᠡᠶᠢᠯᠳᠡᠨ ᠪᠤᠲᠠ ᠴᠣᠬᠢᠭᠤᠯᠤᠨ ᠰᠠᠷᠨᠢᠵᠤ ᠪᠠᠷᠠᠭᠤᠨ ᠲᠡᠰᠢ ᠮᠠᠴᠣᠭᠰᠠᠭᠠᠷ ᠠᠴᠠ ᠠᠭᠤᠯᠠ᠂ ᠠᠮᠲᠠᠲᠠᠢ ᠨᠠᠭᠤᠷ ᠬᠡᠮᠡᠬᠦ ᠭᠠᠵᠠᠷ ᠭᠠᠯᠳᠠᠨ ᠬᠠᠭᠠᠨ ᠴᠥᠭᠡᠨ ᠬᠡᠳᠦᠨ ᠬᠠᠷᠢᠶᠠᠲᠤ ᠠᠯᠪᠠᠲᠤ ᠨᠤᠭᠤᠳ᠂ ᠰᠢᠳᠠᠷ ᠨᠣᠶᠠᠳ ᠲᠣᠷᠭᠠᠨ ᠴᠡᠷᠢᠭ ᠦᠳ ᠦᠨ ᠬᠠᠮᠲᠤ ᠲᠦᠷ ᠪᠠᠭᠤᠷᠢ ᠰᠡᠯᠭᠦᠨ ᠪᠠᠭᠤᠭᠠᠳ ᠪᠠᠶᠢᠯᠠ᠃ ᠬᠦᠮᠦᠨ ᠮᠠᠯ ᠦᠭᠡᠢ ᠶᠠᠳᠠᠷᠠᠵᠤ ᠲᠤᠶᠢᠯᠳᠠᠨ᠂ ᠳᠠᠶᠢᠨ ᠳᠠᠶᠢᠵᠢᠨ ᠤ ᠬᠥᠯ ᠳᠦ ᠴᠥᠬᠥᠷᠡᠵᠦ ᠰᠢᠨᠠᠯᠤᠭᠰᠠᠨ ᠴᠤ ᠡᠵᠡᠨ ᠳᠦ ᠪᠡᠨ ᠦᠨᠡᠨᠴᠢ ᠶᠠᠪᠤᠭᠠ ᠠᠯᠪᠠᠲᠤ ᠨᠤᠭᠤᠳ ᠤᠨ ᠢᠶᠠᠨ ᠰᠠᠯᠬᠢᠨ ᠳᠤ ᠣᠩᠭᠣᠵᠤ ᠭᠠᠩᠳᠠᠭᠰᠠᠨ ᠳᠡᠪᠡᠯ ᠬᠤᠪᠴᠠᠰᠤ᠂ ᠬᠠᠪᠤᠷ ᠤᠨ ᠰᠠᠯᠬᠢᠨ ᠳᠤ ᠬᠣᠯᠴᠣᠷᠠᠭᠤᠲᠤᠭᠰᠠᠨ ᠨᠢᠭᠤᠷ ᠴᠢᠷᠠᠢ ᠶᠢ ᠬᠠᠷᠠᠭᠠᠳ ᠰᠡᠳᠬᠢᠯ ᠦᠨ ᠬᠢ ᠨᠢ ᠰᠢᠨᠠᠯᠭᠠ ᠤᠯᠠᠮ ᠶᠡᠬᠡᠰᠴᠦ᠂ ᠳᠠᠶᠢᠨ ᠳᠤ ᠢᠯᠠᠭᠳᠠᠭᠰᠠᠨ ᠬᠣᠷᠣᠰᠤᠯ᠂ ᠬᠠᠶᠢᠷᠠᠲᠤ ᠬᠠᠲᠤᠨ᠂ ᠤᠳᠤᠮ ᠵᠠᠯᠭᠠᠬᠤ ᠦᠷᠡ ᠪᠠᠨ ᠬᠥᠨᠦᠭᠡᠯᠭᠡᠭᠰᠡᠨ ᠭᠠᠰᠢᠭᠤᠨ ᠲᠠᠪᠢᠯᠠᠩ᠂ ᠠᠴᠢ ᠳᠡᠭᠦᠦ ᠳᠦ ᠪᠡᠨ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠪᠤᠯᠢᠶᠠᠯᠭᠠᠭᠰᠠᠨ ᠭᠣᠮᠣᠳᠠᠯ ᠴᠥᠬᠥᠷᠡᠯ ᠨᠢ ᠵᠢᠷᠦᠬᠡ ᠶᠢ ᠨᠢ ᠤᠷᠠᠬᠤ ᠮᠡᠲᠦ᠂ ᠴᠢᠬᠢ ᠨᠢ ᠱᠤᠤᠭᠢᠨ ᠨᠢᠳᠦ ᠨᠢ ᠪᠤᠯᠠᠩᠭᠢᠷᠲᠤᠭᠠᠳ ᠢᠷᠡᠵᠡᠢ᠃
ᠲᠡᠷᠡ ᠰᠥᠨᠢ ᠳᠦ ᠪᠡᠨ ᠨᠣᠶᠢᠷ ᠨᠢ ᠦᠯᠦ ᠬᠦᠷᠥᠨ ᠬᠠᠪᠤᠷ ᠤᠨ ᠰᠠᠯᠬᠢᠨ ᠳᠤ ᠵᠦᠯᠭᠦᠭᠳᠡᠭᠰᠡᠨ ᠰᠥᠨᠢ ᠶᠢᠨ ᠲᠩᠷᠢ ᠶᠢᠨ ᠣᠳᠣᠳ ᠢ ᠲᠣᠭᠣᠨᠣ ᠪᠠᠷ ᠬᠠᠷᠠᠨ ᠬᠡᠪᠲᠡᠬᠦ ᠳᠦ ᠪᠡᠨ ᠲᠡᠷᠡ ᠯᠠ ᠢᠷᠠᠶᠢᠭᠰᠠᠨ ᠣᠯᠠᠨ ᠣᠳᠣᠳ ᠰᠢᠭ ᠲᠦᠭ ᠲᠦᠮᠡᠨ ᠴᠡᠷᠢᠭ ᠢ ᠮᠠᠩᠯᠠᠶᠢᠯᠠᠨ ᠣᠶᠢᠷᠠ ᠬᠠᠪᠢ ᠶᠢᠨ ᠣᠯᠠᠨ ᠤᠯᠤᠰ ᠣᠷᠣᠨ ᠢ ᠡᠷᠬᠡᠰᠢᠶᠡᠯ ᠳᠦ ᠪᠡᠨ ᠣᠷᠣᠭᠤᠯᠵᠤ ᠂ ᠠᠰᠤᠷᠤ ᠲᠣᠮᠣ ᠭᠠᠵᠠᠷ ᠨᠤᠲᠤᠭ ᠲᠠᠢ ᠨᠡᠭᠦᠳᠡᠯᠴᠢᠳ ᠦᠨ ᠡᠵᠡᠨᠲᠦ ᠭᠦᠷᠦᠨ ᠪᠠᠶᠢᠭᠤᠯᠵᠤ ᠵᠥᠩᠭᠠᠷ ᠤᠨ ᠬᠠᠭᠠᠨ ᠭᠠᠯᠳᠠᠨ ᠪᠣᠱᠣᠭᠲᠣ ᠬᠡᠮᠡᠨ ᠮᠠᠨᠳᠤᠨ ᠪᠠᠳᠠᠷᠠᠵᠤ ᠶᠠᠪᠤᠭᠰᠠᠨ ᠨᠢ ᠰᠠᠶ᠋ᠢᠬᠠᠨ ᠮᠡᠲᠦ ᠪᠣᠯᠪᠠᠴᠤ ᠲᠡᠷᠡ ᠪᠦᠬᠦᠨ ᠣᠳᠣ ᠵᠡᠭᠦᠳᠦ ᠵᠡᠷᠭᠡᠯᠭᠡ ᠮᠡᠲᠦ ᠵᠠᠮᠬᠠᠷᠠᠵᠤ ᠶᠡᠷᠦᠳᠡ ᠶᠢᠨ ᠠᠭᠤᠯᠠ ᠶᠢᠨ ᠳᠡᠭᠡᠷᠡᠮᠴᠢᠨ᠂ ᠣᠷᠭᠣᠳᠠᠯ ᠪᠣᠰᠤᠭᠤᠯ ᠰᠢᠭ ᠬᠤᠪᠢ ᠵᠠᠶᠠᠭᠠ ᠨᠢ ᠬᠠᠴᠢᠨ ᠤᠷᠪᠠᠭᠤ ᠪᠠᠷ ᠡᠷᠭᠢᠵᠡᠢ᠃ ᠲᠡᠷᠡ ᠪᠡᠷ ᠬᠠᠷᠠ ᠪᠠᠭᠠ ᠨᠠᠰᠤᠨ ᠠᠴᠠ ᠬᠤᠪᠢᠯᠭᠠᠨ ᠳᠤ ᠡᠷᠭᠦᠮᠵᠢᠯᠡᠭᠳᠡᠨ ᠴᠠᠰᠤᠲᠤ ᠶᠢᠨ ᠣᠷᠣᠨ ᠢᠶᠠᠨ ᠬᠣᠷᠢ ᠭᠠᠷᠤᠢ ᠵᠢᠯ ᠪᠤᠷᠬᠠᠨ ᠤ ᠨᠣᠮ ᠪᠢᠰᠢᠯᠭᠠᠨ ᠥᠨᠳᠥᠷ ᠳᠡᠭᠡᠳᠦ ᠴᠣᠯᠨ ᠳᠤ ᠬᠦᠷᠦᠭᠰᠡᠨ ᠬᠤᠲᠤᠭᠲᠤ ᠶᠢᠨ ᠵᠢᠨᠳᠠ ᠲᠠᠢ ᠬᠥᠮᠥᠨ ᠲᠤᠯᠠ ᠰᠢᠭᠦᠳᠡᠷᠢ ᠶᠢᠨ ᠳᠤᠰᠤᠯ᠂ ᠤᠰᠤᠨ ᠤ ᠬᠥᠭᠡᠰᠦ᠂ ᠬᠣᠭᠣᠰᠣᠨ ᠴᠤᠤᠷᠢᠶᠠ᠂ ᠵᠡᠭᠦᠳᠦ ᠵᠡᠷᠭᠡᠯᠭᠡ ᠮᠡᠲᠦ ᠬᠣᠷᠸᠠ ᠶᠢᠨ ᠬᠠᠭᠤᠷᠮᠠᠭ ᠦᠵᠡᠭᠳᠡᠯ ᠢ ᠳᠠᠩᠴᠤ ᠰᠠᠶᠢᠨ ᠮᠡᠳᠡᠨᠡ᠃ ᠭᠠᠭᠴᠠᠬᠦ ᠬᠠᠯᠬᠠ ᠣᠶᠢᠷᠠᠳ ᠢ ᠨᠢᠭᠡᠳᠬᠡᠨ ᠮᠠᠨᠵᠤ ᠶᠢᠨ ᠡᠰᠡᠷᠭᠥ ᠲᠡᠮᠡᠴᠡᠬᠦ ᠭᠡᠰᠡᠨ ᠬᠠᠲᠠᠭᠤ ᠵᠣᠷᠢᠭ᠂ ᠰᠢᠢᠳᠮᠡᠭᠡᠢ ᠪᠣᠳᠣᠯ ᠨᠢ ᠤᠷᠪᠠᠭᠠᠴᠢ ᠨᠣᠶᠠᠳ ᠤᠨ ᠪᠠᠯᠠᠭ ᠢᠶᠠᠷ ᠦᠢᠯᠡᠰ ᠪᠤᠷᠤᠭᠤᠳᠠᠵᠤ ᠡᠶᠢᠨᠬᠦᠦ ᠮᠥᠬᠥᠨ ᠳᠤᠷᠤᠶᠢᠲᠠᠬᠤ ᠳᠡᠭᠡᠷᠡ ᠪᠡᠨ ᠲᠤᠯᠤᠭᠠᠳ ᠪᠠᠶᠢᠭᠠ ᠨᠢ ᠡᠨᠡ᠃ ᠲᠡᠷᠡ ᠪᠡᠷ ᠮᠠᠷᠭᠠᠰᠢ ᠥᠷᠯᠥᠭᠡᠨ ᠦ ᠮᠠᠨᠳᠤᠬᠤ ᠨᠠᠷᠠᠨ ᠢᠶᠠᠷ ᠬᠠᠷᠢᠶᠠᠲᠤ ᠠᠯᠪᠠᠲᠤ᠂ ᠲᠣᠷᠭᠠᠨ ᠴᠡᠷᠢᠭ ᠦᠳ᠂ ᠰᠢᠳᠠᠷ ᠨᠣᠶᠠᠳ ᠲᠤ ᠪᠠᠨ ᠬᠡᠯᠡᠬᠦ ᠦᠭᠡ ᠳᠣᠲᠣᠷᠠ ᠪᠠᠨ ᠡᠶᠢᠨᠬᠦᠦ ᠡᠪᠯᠡᠭᠦᠯᠦᠨ ᠪᠣᠳᠣᠪᠠ᠃
《ᠮᠢᠨᠦ ᠬᠠᠷᠢᠶᠠᠲᠤ ᠠᠯᠪᠠᠲᠤ᠂ ᠳᠠᠶᠢᠴᠢᠨ ᠴᠡᠷᠢᠭ ᠦᠳ᠂ ᠰᠢᠳᠠᠷ ᠨᠣᠶᠠᠳ ᠲᠠ ᠪᠦᠬᠦᠨ ᠳᠠᠶᠢᠨ ᠳᠠᠶᠢᠵᠢᠨ ᠤ ᠬᠥᠯ ᠳᠦ ᠶᠠᠳᠠᠷᠠᠵᠤ ᠵᠦᠳᠡᠷᠡᠬᠦ ᠶᠢᠨ ᠲᠤᠶᠢᠯ ᠢ ᠦᠵᠡᠪᠡ᠃ ᠮᠠᠨᠵᠤ ᠶᠢᠨ ᠡᠩᠬᠡ-ᠠᠮᠤᠭᠤᠯᠠᠩ ᠮᠢᠨᠦ ᠬᠠᠷᠠ ᠲᠣᠯᠣᠭᠠᠢ ᠶᠢ ᠠᠪᠬᠤ ᠠᠴᠠ ᠨᠠᠰᠢ ᠰᠠᠨᠠᠭᠠ ᠦᠯᠦ ᠠᠮᠠᠷᠠᠬᠤ ᠲᠤᠯᠠ ᠲᠠ ᠪᠦᠬᠦᠨ ᠦ ᠠᠮᠢ ᠨᠠᠰᠤ ᠶᠢ ᠳᠡᠮᠡᠢ ᠦᠷᠡᠭᠳᠡᠭᠦᠯᠬᠦ ᠶᠢ ᠦᠯᠦ ᠬᠦᠰᠡᠨᠡ᠃ ᠲᠡᠶᠢᠮᠦ ᠶᠢᠨ ᠤᠴᠢᠷ ᠮᠢᠨᠦ ᠪᠡᠶᠡ ᠥᠪᠡᠷ ᠦᠨ ᠬᠦᠰᠡᠯ ᠢᠶᠡᠷ ᠲᠩᠷᠢ ᠶᠢᠨ ᠣᠷᠣᠨ ᠳᠤ ᠣᠳᠬᠤ ᠶᠢ ᠬᠦᠰᠡᠪᠡ᠃ ᠰᠢᠳᠠᠷ ᠨᠣᠶᠠᠳ ᠲᠠ ᠪᠦᠬᠦᠨ ᠠᠯᠪᠠᠲᠤ ᠢᠷᠭᠡᠳ᠂ ᠴᠡᠷᠢᠭ ᠳᠠᠶᠢᠴᠢᠳ ᠢᠶᠠᠨ ᠳᠠᠭᠠᠭᠤᠯᠤᠨ ᠲᠥᠷᠥᠯᠬᠢ ᠣᠢᠷᠠᠳ ᠨᠤᠲᠤᠭ ᠢᠶᠠᠨ ᠵᠣᠷᠢᠨ ᠮᠢᠨᠦ ᠠᠴᠢ ᠳᠡᠭᠦᠦ ᠵᠡᠭᠦᠨᠭᠠᠷ ᠤᠨ ᠬᠠᠭᠠᠨ ᠰᠡᠸᠡᠩᠷᠠᠪᠳᠠᠨ ᠳᠤ ᠬᠦᠴᠦ ᠪᠡᠨ ᠥᠭᠲᠦᠭᠡᠢ᠃ ᠳᠠᠶᠢᠨ ᠤ ᠶᠡᠬᠡ ᠰᠦᠯᠳᠡ ᠬᠠᠷᠠᠯᠠᠭ ᠲᠤᠭ ᠢᠶᠠᠨ ᠪᠤᠤ ᠪᠥᠬᠥᠶᠢᠯᠭᠡ᠂ ᠨᠢᠳᠦᠨ ᠦ ᠴᠡᠴᠡᠭᠡᠢ ᠮᠡᠲᠦ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠲᠤᠭᠠᠢ᠃ ᠮᠢᠨᠦ ᠪᠠᠶᠢᠯᠳᠤᠭᠠᠨ ᠤ ᠬᠤᠶᠠᠭ ᠳᠤᠭᠤᠯᠠᠭᠠ᠂ ᠵᠡᠷ ᠵᠡᠪᠰᠡᠭ ᠰᠡᠯᠲᠡ ᠶᠢ ᠴᠠᠮᠪᠠᠭᠠᠷᠠᠪᠠ ᠠᠭᠤᠯᠠᠨ ᠳ᠋ᠤ ᠣᠩᠭᠣᠯᠠᠵᠤ᠂ ᠦᠶᠡ ᠶᠢᠨ ᠦᠶᠡ ᠳᠦ ᠰᠢᠲᠦᠨ ᠵᠠᠯᠪᠠᠷᠢᠵᠤ ᠶᠠᠪᠤᠪᠠᠰᠤ ᠨᠢᠭᠡᠨ ᠣᠨᠴᠠᠭᠠᠢ ᠪᠠᠭᠠᠲᠤᠷ ᠡᠷᠡ ᠲᠥᠷᠥᠨ ᠭᠠᠷᠴᠤ ᠬᠠᠷᠢ ᠳᠠᠶᠢᠰᠤᠨ ᠠᠴᠠ ᠭᠠᠵᠠᠷ ᠨᠤᠲᠤᠭ ᠢᠶᠠᠨ ᠡᠷᠭᠢᠭᠦᠯᠦᠨ ᠠᠪᠬᠤ ᠪᠣᠯᠤᠨᠠ ᠬᠡᠮᠡᠨ ᠰᠠᠬᠢᠭᠤᠰᠤ ᠮᠠᠨᠢ ᠨᠠᠳᠠ ᠳᠤ ᠰᠢᠪᠡᠨᠡᠪᠡ᠃ ᠮᠠᠨᠵᠤ ᠶᠢᠨ ᠡᠩᠬᠡ-ᠠᠮᠤᠭᠤᠯᠠᠩ ᠮᠢᠨᠦ ᠶᠠᠰᠤ ᠮᠢᠬᠠᠨ ᠳᠤ ᠰᠢᠨᠤᠵᠤ ᠥᠴᠢ ᠲᠥᠴᠢᠨᠡᠨ ᠯᠠᠩ ᠠᠯᠲᠠ ᠮᠥᠩᠭᠥ ᠠᠮᠠᠯᠠᠵᠤ ᠪᠤᠢ ᠤᠴᠢᠷ ᠪᠤᠷᠬᠠᠨ ᠤ ᠱᠠᠰᠢᠨ ᠤ ᠶᠣᠰᠣᠭᠠᠷ ᠴᠢᠨᠳᠠᠷᠯᠠᠨ ᠡᠪᠦᠭᠡ ᠳᠡᠭᠡᠳᠦᠰ ᠦᠨ ᠮᠢᠨᠢ ᠨᠤᠲᠤᠭ ᠤᠰᠤ᠂ ᠲᠥᠷᠦᠵᠥ ᠥᠰᠦᠭᠰᠡᠨ᠂ ᠨᠤᠲᠤᠭᠯᠠᠵᠤ ᠠᠮᠢᠳᠤᠷᠠᠭᠰᠠᠨ ᠠᠭᠤᠯᠠ ᠤᠰᠤᠨ ᠳᠤ ᠮᠢᠨᠢ ᠣᠷᠣᠰᠢᠶᠠᠭᠠᠷᠠᠢ᠃ ᠮᠢᠨᠦ ᠮᠢᠬᠠᠨ ᠪᠡᠶᠡ ᠬᠠᠯᠢᠨ ᠣᠳᠪᠠᠴᠤ ᠰᠦᠨᠡᠰᠦ ᠮᠢᠨᠢ ᠲᠩᠷᠢ ᠶᠢᠨ ᠣᠷᠣᠨ ᠳ᠋ᠤ ᠵᠠᠯᠠᠷᠠᠵᠤ ᠨᠥᠬᠥᠴᠡᠯ ᠰᠢᠯᠲᠠᠭᠠᠨ ᠪᠦᠷᠢᠯᠳᠦᠭᠰᠡᠨ ᠦᠶᠡ ᠳᠦ ᠣᠶᠢᠷᠠᠳ ᠨᠤᠲᠤᠭ ᠲᠤ ᠪᠠᠨ ᠡᠷᠭᠢᠨ ᠲᠥᠷᠥᠬᠦ ᠪᠣᠯᠤᠨᠠ᠃ ᠲᠡᠶᠢᠮᠦ ᠶᠢᠨ ᠤᠴᠢᠷ ᠲᠠ ᠪᠦᠬᠦᠨ ᠬᠣᠶᠢᠨᠠ ᠠᠴᠠ ᠮᠢᠨᠢ ᠭᠠᠰᠢᠭᠤᠳᠠᠨ ᠬᠠᠷᠠᠮᠰᠠᠬᠤ ᠶᠢᠨ ᠬᠡᠷᠡᠭ ᠦᠭᠡᠢ᠂ ᠮᠠᠨᠢ ᠢᠷᠦᠭᠡᠯ ᠢᠶᠡᠨ ᠤᠩᠰᠢᠵᠤ᠂ ᠰᠥ᠋ ᠪᠡᠨ ᠡᠷᠭᠦᠨ ᠦᠳᠡᠭᠡᠷᠡᠢ᠃ ᠡᠬᠡ ᠨᠤᠲᠤᠭ ᠤᠨ ᠢᠶᠠᠨ ᠰᠢᠷᠬᠡᠭ ᠴᠢᠯᠠᠭᠤ ᠶᠢ ᠴᠤ ᠪᠣᠯᠪᠠ ᠳᠠᠶᠢᠰᠤᠨ ᠡᠲᠡᠭᠡᠳ ᠲᠦ ᠪᠤᠤ ᠬᠥᠨᠳᠡᠭᠦᠯ᠃ ᠮᠢᠨᠦ ᠨᠤᠲᠤᠭ ᠤᠨ ᠭᠠᠵᠠᠷ ᠠᠴᠠ ᠪᠤᠷᠬᠠᠨ ᠭᠤᠶᠤᠭᠰᠠᠨ ᠴᠤ ᠪᠤᠤ ᠥᠭ ᠭᠡᠰᠡᠨ ᠭᠡᠷᠢᠶᠡᠰ ᠢ ᠮᠢᠨᠢ ᠦᠷᠡ ᠤᠳᠤᠮ ᠳᠤ ᠪᠠᠨ ᠳᠠᠮᠵᠢᠭᠤᠯᠤᠨ ᠵᠠᠬᠢᠵᠤ ᠦᠯᠡᠳᠡᠭᠡᠭᠡᠷᠡᠢ᠃ ᠮᠠᠨᠵᠤ ᠶᠢᠨ ᠯᠤᠤᠲᠤ ᠲᠤᠭ ᠬᠥᠰᠡᠷ ᠤᠨᠠᠵᠤ᠂ ᠲᠡᠳᠡ ᠭᠠᠵᠠᠷ ᠤᠨ ᠬᠥᠷᠦᠰᠦᠨ ᠡᠴᠡ ᠠᠷᠴᠢᠭᠳᠠᠬᠤ ᠴᠠᠭ ᠢᠷᠡᠨᠡ᠃ ᠬᠥᠬᠡ ᠮᠣᠩᠭᠣᠯ ᠦᠶᠡ ᠶᠢᠨ ᠦᠶᠡ ᠳᠦ ᠮᠠᠨᠳᠤᠨ ᠪᠠᠳᠠᠷᠠᠬᠤ ᠪᠣᠯᠤᠨᠠ᠃ ᠦᠭᠡ ᠡᠪᠯᠡᠭᠦᠯᠵᠦ ᠳᠠᠭᠤᠰᠤᠭᠠᠳ ᠴᠡᠭᠡᠵᠢ ᠨᠢ ᠨᠢᠭᠡ ᠶᠡᠬᠡ ᠰᠠᠶᠢᠬᠠᠨ ᠣᠩᠭᠣᠶᠢᠬᠤ ᠰᠢᠭ ᠪᠣᠯᠪᠠ᠃ ︽ ᠴᠢᠮᠠ ᠶᠢ ᠮᠡᠨᠳᠦᠯᠡᠬᠦ ᠳᠦ ᠣᠨᠴᠠᠭᠠᠢ ᠲᠡᠮᠳᠡᠭ ᠲᠡᠢ ᠬᠤᠪᠢᠯᠭᠠᠨ ᠬᠦᠦ ᠲᠥᠷᠥᠯᠡ ᠬᠡᠮᠡᠨ ᠣᠶᠢᠷᠠ ᠳᠤ ᠳᠠᠶᠠᠭᠠᠷ ᠪᠥᠭᠡᠮ ᠪᠠᠶᠠᠷ ᠬᠥᠷ ᠪᠣᠯᠵᠤ ᠪᠢᠯᠡ ︾ ᠬᠡᠮᠡᠨ ᠤᠬᠠᠭᠠᠨ ᠰᠠᠭᠤᠭᠰᠠᠨ ᠦᠶᠡ ᠳᠦ ᠨᠢ ᠬᠠᠲᠤᠨ ᠡᠵᠢ ᠳᠤᠷᠠᠰᠤᠨ ᠶᠠᠷᠢᠭᠠᠳ ᠲᠣᠯᠣᠭᠠᠢ ᠶᠢ ᠨᠢ ᠢᠯᠡᠵᠦ ᠪᠠᠶᠢᠭᠰᠠᠨ ᠨᠢ ᠲᠣᠳᠣᠬᠠᠨ ᠰᠠᠨᠠᠭᠳᠠᠪᠠ᠃ ᠬᠦᠨᠳᠦ ᠪᠣᠳᠣᠯ ᠠᠴᠠ ᠪᠠᠨ ᠰᠠᠯᠤᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠲᠣᠭᠣᠨᠣ ᠥᠭᠡᠳᠡ ᠪᠡᠨ ᠬᠠᠷᠠᠪᠠᠯ ᠨᠥᠭᠥᠭᠡ ᠢᠷᠠᠶᠢᠭᠰᠠᠨ ᠣᠳᠣᠳ ᠰᠢᠭᠤᠭᠳᠠᠨ ᠨᠢᠭᠡᠨ ᠶᠡᠬᠡ ᠭᠡᠷᠡᠯ ᠦᠨ ᠬᠦᠷᠢᠶᠡᠨ ᠳᠦ ᠬᠠᠶᠢᠷᠠᠲᠤ ᠠᠨᠤ ᠬᠠᠲᠤᠨ᠂ ᠬᠦᠦ ᠶᠢᠨ ᠬᠢ ᠨᠢ ᠴᠢᠷᠠᠢ ᠲᠣᠳᠣᠬᠠᠨ ᠦᠵᠡᠭᠳᠡᠪᠡ᠃ ᠪᠦᠷ ᠴᠠᠰᠢ ᠯᠠᠪᠯᠠᠭᠤᠯᠤᠨ ᠬᠠᠷᠠᠪᠠᠯ ᠬᠠᠭᠠᠨ ᠠᠪᠤ ᠬᠠᠲᠤᠨ ᠡᠵᠢ ᠶᠢᠨ ᠬᠢ ᠨᠢ ᠳᠦᠷᠢ ᠲᠥᠷᠬᠥ ᠨᠦᠭᠦᠳ ᠲᠣᠳᠣᠷᠠᠭᠠᠳ ᠢᠷᠡᠯᠡ ᠁ ᠣᠯᠠᠨ ᠠᠮᠢᠲᠠᠨ ᠳᠤ ᠡᠭᠡᠷᠡᠭᠦᠯᠦᠨ᠂ ᠠᠭᠤᠢ ᠶᠢᠨ ᠮᠤᠬᠤᠷ ᠲᠤ ᠰᠢᠬᠠᠭᠳᠠᠭᠰᠠᠨ ᠴᠢᠨᠣᠠ ᠡᠴᠦᠰ ᠦᠨ ᠮᠥᠴᠡ ᠳᠦ ᠥᠰᠲᠡᠨ ᠳᠦ ᠪᠡᠨ ᠦᠯᠦ ᠳᠡᠶᠢᠯᠳᠡᠨ ᠬᠣᠭᠣᠯᠠᠢ ᠪᠠᠨ ᠲᠠᠰᠤ ᠬᠠᠵᠠᠳᠠᠭ ᠪᠠᠶᠢᠭᠠᠯᠢ ᠶᠢᠨ ᠵᠢᠮᠠ ᠶᠢ ᠴᠤ ᠬᠦᠮᠦᠨ ᠴᠤ ᠪᠠᠰᠠ ᠦᠯᠦ ᠲᠣᠭᠣᠷᠢᠨᠠ᠃ ᠱᠠᠰᠢᠨ ᠤ ᠬᠤᠪᠢᠯᠭᠠᠨ᠂ ᠴᠡᠷᠢᠭ ᠦᠨ ᠠᠪᠢᠶᠠᠰᠯᠢᠭ ᠵᠠᠩᠵᠤᠨ᠂ ᠤᠯᠤᠰ ᠲᠥᠷᠥ ᠶᠢᠨ ᠭᠠᠷᠮᠠᠭᠠᠢ ᠵᠢᠳᠬᠦᠯᠲᠡᠨ ᠭᠡᠰᠡᠨ ᠬᠣᠪᠣᠷᠬᠠᠨ ᠠᠪᠢᠶᠠᠰ ᠪᠢᠯᠢᠭ ᠦᠳ ᠨᠢᠭᠡᠨ ᠪᠡᠶᠡ ᠳᠦ ᠬᠤᠷᠠᠨ ᠴᠢᠭᠤᠯᠤᠭᠰᠠᠨ ᠨᠢ ᠬᠣᠪᠣᠷᠬᠠᠨ ᠲᠣᠬᠢᠶᠠᠬᠤ ᠭᠠᠶᠢᠬᠠᠮᠰᠢᠭ ᠶᠤᠮ ᠡ᠃ ᠲᠩᠷᠢ ᠳᠦ ᠪᠡᠨ ᠥᠳᠦᠯᠡᠭᠰᠡᠨ ᠪᠦᠷᠭᠦᠳ ᠲᠩᠷᠢ ᠳᠦ ᠪᠡᠨ ᠬᠠᠯᠢᠨ ᠣᠳᠪᠠ᠃
2016.08.03
ᠥᠭᠡᠯᠡᠳ ᠣᠪᠣᠭᠲᠤ ᠳ ∙ ᠲᠡᠮᠦᠷ- ᠸᠴᠢᠷ
0 0