ᠰᠢᠭᠦᠮᠵᠢ
ᠭ ∙ ᠨᠢᠮᠠ 《ᠴᠠᠳᠢᠭ ᠬᠠᠭᠤᠴᠢ ᠷᠣᠮᠠᠨ》
ᠭ ∙ ᠨᠢᠮᠠ 《ᠴᠠᠳᠢᠭ ᠬᠠᠭᠤᠴᠢ ᠷᠣᠮᠠᠨ》
- ᠦᠢᠯᠡ ᠶᠢᠨ ᠦᠷᠡ ᠳ᠋ᠤ ᠬᠦᠯᠢᠭᠳᠡᠭᠰᠡᠨ ᠰᠦᠨᠡᠰᠦ
4832
2018-09-11 14:42
发表于:内蒙古
ᠭ ∙ ᠨᠢᠮᠠ 《ᠴᠠᠳᠢᠭ ᠬᠠᠭᠤᠴᠢ ᠷᠣᠮᠠᠨ》
- ᠦᠢᠯᠡ ᠶᠢᠨ ᠦᠷᠡ ᠳ᠋ᠤ ᠬᠦᠯᠢᠭᠳᠡᠭᠰᠡᠨ ᠰᠦᠨᠡᠰᠦ
ᠨᠠᠶᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠳᠡᠩᠵᠡᠨ ᠡᠪᠦᠭᠡᠨ ᠬᠡᠨ ᠨᠢᠭᠡᠨ ᠢ ᠬᠦᠯᠢᠶᠡᠨ ᠬᠥᠯ ᠦᠨ ᠴᠢᠮᠡᠭᠡ ᠴᠢᠩᠨᠠᠨᠠ᠃ ᠭᠡᠷ ᠦᠨ ᠭᠠᠳᠠᠭᠠ ᠳᠤᠭᠤᠯᠳᠠᠬᠤ ᠡᠯᠳᠡᠪ ᠬᠥᠯ ᠦᠨ ᠴᠢᠮᠡᠭᠡ᠂ ᠬᠦᠮᠦᠰ ᠦᠨ ᠳᠠᠭᠤ ᠬᠣᠭᠣᠯᠠᠢ ᠶᠢ ᠲᠠᠨᠢᠬᠤ ᠭᠡᠵᠦ ᠣᠢ ᠰᠠᠨᠠᠮᠵᠢ ᠪᠠᠨ ᠠᠭᠤᠳᠠᠯᠤᠨ ᠡᠷᠲᠡ ᠴᠠᠭ ᠤᠨ ᠳᠤᠷᠠᠰᠤᠮᠵᠢ ᠣᠷᠤᠭᠤ ᠪᠠᠨ ᠣᠳᠴᠤ ᠪᠠᠶᠢᠨᠠ᠃ ᠶᠡᠷᠦ ᠡᠴᠡ ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠭᠡᠳᠡᠭ ᠶᠠᠪᠤᠵᠤ ᠶᠠᠪᠤᠵᠤ ᠬᠡᠰᠡᠭ ᠪᠤᠰᠠᠭ ᠳᠤᠷᠠᠰᠤᠮᠵᠢ ᠶᠢᠨ ᠴᠤᠭᠯᠠᠭᠤᠯᠭᠠ ᠲᠡᠳᠦᠢ ᠯᠠ ᠶᠤᠮ ᠰᠢᠦ ᠳ᠋ᠡ᠃ ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠢᠮᠠᠭᠲᠠ ᠥᠩᠭᠡᠷᠡᠭᠰᠡᠨ ᠴᠠᠭ ᠲᠤ ᠯᠠ ᠣᠷᠣᠰᠢᠳᠠᠭ᠃ ᠡᠨᠡ ᠵᠣᠬᠢᠶᠠᠯ ᠳᠤ ᠳᠡᠩᠵᠡᠨ ᠡᠪᠦᠭᠡᠨ ᠦ ᠤᠷᠤᠭ ᠤᠳᠤᠮ ᠤᠨ ᠲᠡᠦᠬᠡ ᠡᠴᠡ ᠤᠯᠪᠠᠭᠠᠯᠠᠨ ᠮᠣᠩᠭᠣᠯ ᠤᠨ ᠲᠡᠦᠬᠡ ᠶᠢᠨ ᠭᠠᠵᠢᠭᠤᠳᠠᠯᠳᠤ ᠡᠮᠭᠡᠨᠢᠯᠳᠦ ᠴᠠᠭ ᠦᠶᠡ ᠶᠢ ᠬᠥᠪᠥᠩ ᠳᠦ ᠪᠣᠭᠣᠭᠰᠠᠨ ᠴᠢᠯᠠᠭᠤ ᠪᠠᠷ ᠲᠦᠩᠰᠢᠭᠰᠡᠨ ᠨᠢ ᠲᠤᠩ ᠴᠤ ᠰᠣᠨᠢᠷᠬᠠᠯᠲᠠᠢ᠃ ᠯᠠᠮᠠ ᠬᠤᠸᠠᠷᠠᠭ᠂ ᠢᠵᠠᠭᠤᠷᠲᠠᠨ ᠳᠡᠭᠡᠳᠦᠰ᠂ ᠣᠶᠤᠨ ᠤ ᠧᠯᠢᠲ ᠬᠡᠰᠡᠭ ᠢᠶᠡᠨ ᠬᠣᠮᠣᠷᠭᠠᠯᠠᠨ ᠤᠰᠠᠳᠬᠠᠭᠰᠠᠨ ᠬᠡᠯᠮᠡᠭᠳᠡᠭᠦᠯᠦᠯᠲᠡ ᠶᠢᠨ ᠬᠠᠷᠠ ᠰᠢᠭᠤᠷᠭᠠ᠂ ᠺᠣᠮᠮᠤᠶᠢᠨᠢᠰᠲ ᠬᠡᠶᠢᠷᠬᠡᠯ ᠦᠨ ᠲᠤᠷᠰᠢᠯᠲᠠ ᠶᠢᠨ ᠲᠠᠤᠯᠠᠢ ᠪᠣᠯᠵᠤ ᠬᠠᠮᠲᠤᠷᠠᠯ ᠬᠣᠮᠤᠨ ᠭᠡᠭᠴᠢ ᠪᠠᠶᠢᠭᠤᠯᠤᠨ ᠮᠣᠩᠭᠣᠯ ᠤᠨ ᠪᠤᠶᠠᠨ ᠢᠶᠠᠨ ᠪᠠᠷᠠᠬᠤ ᠰᠢᠬᠠᠭᠰᠠᠨ ᠭᠠᠰᠢᠭᠤᠨ ᠲᠡᠦᠬᠡ᠂ ᠬᠤᠪᠢ ᠶᠢᠨ ᠥᠮᠴᠢ ᠶᠢ ᠤᠰᠠᠳᠬᠠᠨ ᠨᠢᠭᠡᠳᠦᠯᠵᠢᠬᠦ ᠬᠥᠳᠡᠯᠭᠡᠭᠡᠨ ᠨᠡᠷᠡ ᠪᠡᠷ ᠮᠠᠯᠴᠢᠳ ᠢ ᠮᠣᠳᠣ ᠶᠢ ᠨᠢ ᠪᠠᠷᠢᠭᠤᠯᠵᠤ ᠭᠠᠷ ᠢ ᠨᠢ ᠮᠤᠬᠤᠷᠯᠠᠭᠰᠠᠨ ᠰᠣᠴᠢᠶᠠᠯᠢᠰᠲ ᠬᠡᠨᠡᠭᠡᠷᠬᠡᠯ᠂ ᠴᠠᠭ ᠬᠤᠭᠤᠴᠠᠭᠠᠨ ᠤ ᠪᠤᠷᠤᠭᠤ ᠭᠠᠯᠲᠤ ᠲᠡᠷᠭᠡᠨ ᠳᠦ ᠰᠠᠭᠤᠵᠤ ᠪᠤᠳᠤᠯᠢᠵᠤ ᠬᠥᠭᠯᠡᠭᠰᠡᠨ ᠲᠡᠦᠬᠡ ᠭᠡᠳ ᠦᠨᠡᠬᠡᠷ ᠥᠷᠭᠡᠨ ᠳᠠᠯᠠᠶᠢᠴᠠ ᠲᠠᠢ ᠰᠡᠳᠦᠪ ᠬᠦᠷᠢᠶᠡ ᠶᠢ ᠬᠠᠮᠤᠷᠤᠭᠰᠠᠨ᠂ ᠪᠢᠴᠢᠯᠭᠡ ᠶᠢᠨ ᠬᠤᠪᠢ ᠳᠤ ᠮᠠᠨ ᠤ ᠳᠤ ᠪᠠᠨ ᠯᠠ ᠴᠣ ᠰᠢᠨᠡ᠂ ᠰᠢᠨᠡᠯᠡᠭ ᠰᠡᠳᠬᠢᠯᠭᠡᠳᠦ ᠤᠷᠠᠨ ᠪᠦᠲᠦᠭᠡᠯ ᠶᠤᠮ᠃
ᠪᠦᠯᠦᠭ ᠪᠣᠯᠭᠠᠨ ᠤ ᠡᠬᠢᠨ ᠳᠦ ᠳᠡᠩᠵᠡᠨ ᠡᠪᠦᠭᠡᠨ ᠦ ᠬᠦᠦᠷᠨᠢᠬᠦ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠶᠢᠨ ᠡᠭᠦᠰᠦᠯ ᠭᠠᠷᠤᠯ ᠤᠨ ᠲᠤᠬᠠᠢ ᠰᠣᠨᠢᠨ ᠰᠠᠶᠢᠬᠠᠨ ᠳᠣᠮᠣᠭ ᠪᠣᠯ ᠶᠣᠭᠲᠠ ᠳᠠᠯᠳᠠ ᠤᠳᠬᠠ ᠲᠠᠢ ᠲᠡᠳᠦᠢ ᠦᠭᠡᠢ ᠡᠬᠢᠯᠡᠯ ᠲᠡᠭᠦᠰᠬᠡᠯ ᠦᠭᠡᠢ ᠴᠠᠭ ᠬᠤᠭᠤᠴᠠᠭᠠᠨ ᠳᠤ ᠲᠣᠭᠠᠯᠠᠯ ᠪᠤᠢ ᠪᠣᠯᠭᠠᠭᠰᠠᠨ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠡᠭᠦᠰᠦᠯ ᠭᠠᠷᠤᠯ ᠤᠨ ᠲᠣᠪᠴᠢ ᠲᠡᠦᠬᠡ ᠶᠤᠮ᠃ ᠡᠬᠢᠯᠡᠯ ᠲᠡᠭᠦᠰᠬᠡᠯ ᠡᠬᠢᠯᠡᠯ ᠭᠡᠰᠡᠨ ᠮᠥᠩᠬᠡ ᠶᠢᠨ ᠲᠣᠭᠣᠷᠢᠭ ᠲᠤ ᠡᠷᠭᠢᠯᠳᠦᠬᠦ ᠣᠷᠴᠢᠯᠠᠩ ᠤᠨ ᠶᠠᠭᠤᠮᠠᠰ ᠦᠵᠡᠭᠳᠡᠯ ᠳᠦ ᠴᠠᠭ ᠬᠤᠭᠤᠴᠠᠭᠠ ᠣᠨᠣᠭᠠᠬᠤ ᠨᠢ ᠶᠡᠷᠦ ᠡᠴᠡ ᠤᠳᠬᠠ ᠦᠭᠡᠢ ᠵᠦᠢᠯ ᠪᠥᠭᠡᠳ ᠠᠶᠠᠨᠳᠠᠭᠠᠨ ᠡᠮᠬᠢᠷᠡᠵᠦ ᠴᠡᠭᠴᠡᠷᠡᠭᠡᠳ ᠲᠡᠭᠦᠰ ᠲᠥᠯᠥᠪ ᠢ ᠣᠯᠤᠭᠠᠳ ᠪᠤᠴᠠᠭᠠᠳ ᠡᠬᠢᠯᠡᠯ ᠳᠦ ᠪᠡᠨ ᠣᠴᠢᠬᠤ ᠮᠥᠩᠬᠡ ᠶᠢᠨ ᠬᠥᠳᠡᠯᠭᠡᠭᠡᠨ ᠳᠦ ᠮᠠᠲ᠋ᠧᠷᠢ ᠤᠷᠤᠰᠢᠬᠤ ᠲᠤᠬᠠᠢ ᠭᠦᠨ ᠭᠦᠨᠵᠡᠭᠡᠢ ᠹᠢᠯᠣᠰᠣᠹᠢ ᠰᠠᠨᠠᠭᠠ ᠶᠢ ᠬᠥᠨᠳᠡᠭᠰᠡᠨ ᠨᠢ ᠲᠤᠩ ᠴᠤ ᠢᠲᠡᠭᠡᠯ ᠦᠨᠡᠮᠰᠢᠯ ᠲᠡᠢ᠃ ᠦᠯᠢᠭᠡᠷ ᠳᠣᠮᠣᠭ ᠭᠡᠳᠡᠭ ᠲᠡᠭᠦᠰᠬᠡᠯ ᠦᠭᠡᠢ ᠪᠥᠭᠡᠳ ᠶᠠᠭ ᠯᠠ ᠣᠷᠴᠢᠯᠠᠩ ᠬᠣᠷᠸᠠ ᠰᠢᠭ ᠥᠪᠡᠷ ᠢᠶᠡᠨ ᠡᠭᠦᠰᠴᠦ ᠪᠦᠲᠦᠭᠡᠳ ᠬᠢᠵᠠᠭᠠᠷ ᠦᠭᠡᠢ ᠦᠷᠭᠦᠯᠵᠢᠯᠡᠬᠦ ᠪᠣᠯᠤᠮᠵᠢ ᠶᠢ ᠥᠪᠡᠷᠲᠡᠭᠡᠨ ᠠᠭᠤᠯᠵᠤ ᠪᠠᠶᠢᠳᠠᠭ ᠰᠢᠭ ᠭᠠᠶᠢᠬᠠᠮᠰᠢᠭ ᠶᠤᠮ᠃ ᠴᠠᠳᠢᠭ ᠬᠠᠭᠤᠴᠢ ᠭᠡᠳᠡᠭ 《ᠣᠳᠣ ᠴᠠᠭ ᠤᠨ ᠷᠣᠮᠠᠨ ᠲᠤᠭᠤᠵᠢ ᠭᠡᠭᠴᠢ ᠬᠣᠪ ᠵᠢᠪ ᠬᠥᠭᠡᠭᠡᠴᠡᠯᠳᠦᠭᠰᠡᠨ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠬᠤᠳᠠᠯ ᠲᠡᠮᠡᠴᠡᠯ ᠥᠷᠨᠢᠭᠦᠯᠦᠨ ᠵᠠᠮᠠᠭ ᠢ ᠨᠢ ᠶᠡᠬᠡᠳᠡᠭᠦᠯᠵᠦ ᠵᠢᠭᠠᠰᠤ ᠶᠢ ᠨᠢ ᠴᠥᠭᠡᠷᠡᠭᠦᠯᠦᠭᠰᠡᠨ ᠵᠣᠬᠢᠶᠠᠮᠠᠯ ᠵᠣᠬᠢᠶᠠᠯ ᠰᠢᠭ ᠳᠡᠮᠡᠢ ᠶᠠᠷᠢᠶᠠ ᠪᠢᠰᠢ》 ᠬᠡᠮᠡᠨ ᠵᠣᠬᠢᠶᠠᠯ ᠳᠤ ᠳᠤᠷᠠᠳᠤᠭᠰᠠᠨ ᠪᠠᠶᠢᠳᠠᠭ ᠨᠢ ᠦᠨᠡᠨ ᠦ ᠡᠷᠢᠯ ᠳᠦ ᠬᠠᠳᠤᠭᠰᠠᠨ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠦ ᠦᠯᠢᠭᠡᠷ ᠳᠣᠮᠤᠭ᠂ ᠬᠠᠭᠤᠴᠢ ᠶᠠᠷᠢᠶᠠ ᠭᠡᠳᠡᠭ ᠥᠩᠭᠡᠷᠡᠭᠰᠡᠨ ᠴᠠᠭ ᠤᠨ ᠳᠠᠯᠳᠠ ᠲᠡᠦᠬᠡ ᠶᠣᠭᠲᠠ ᠤᠳᠬᠠ᠂ ᠢᠷᠡᠭᠡᠳᠦᠢ ᠴᠠᠭ ᠤᠨ ᠵᠥᠩᠨᠡᠯ ᠮᠥᠷᠥᠭᠡᠳᠦᠯ ᠴᠥᠮ ᠰᠢᠩᠭᠡᠭᠰᠡᠨ ᠪᠠᠶᠢᠳᠠᠭ ᠲᠡᠳᠦᠢ ᠦᠭᠡᠢ ᠤᠷᠠᠨ ᠰᠡᠳᠬᠢᠮᠵᠢ ᠶᠢᠨ ᠪᠠᠶᠠᠯᠢᠭ ᠤᠨᠳᠤᠷᠭᠠ᠂ ᠤᠳᠬᠠ ᠵᠣᠬᠢᠶᠠᠯ ᠤᠨ ᠰᠢᠪᠬᠠᠭᠳᠠᠰᠢ ᠦᠭᠡᠢ ᠡᠬᠢ ᠪᠤᠯᠠᠭ ᠪᠣᠯᠳᠠᠭ ᠢᠶᠠᠷ ᠢᠶᠠᠨ ᠶᠠᠮᠠᠷ ᠴᠤ ᠵᠣᠬᠢᠶᠠᠮᠠᠯ ᠲᠡᠦᠬᠡ ᠲᠡᠢ ᠬᠠᠷᠢᠴᠠᠭᠤᠯᠬᠤ ᠠᠷᠭᠠ ᠦᠭᠡᠢ ᠰᠢᠳᠡ ᠤᠪᠢᠳᠠᠰ ᠲᠠᠢ ᠶᠢ ᠬᠡᠯᠡᠭᠰᠡᠨ ᠬᠡᠷᠡᠭ᠃
ᠮᠣᠩᠭᠣᠯ ᠬᠡᠯᠡᠨ ᠦ ᠠᠷᠪᠢᠨ ᠪᠠᠶᠠᠯᠢᠭ ᠦᠭᠡ ᠶᠢᠨ ᠠᠭᠤᠷᠬᠠᠢ ᠠᠴᠠ ᠲᠡᠭᠦᠪᠦᠷᠢᠯᠡᠨ ᠠᠰᠢᠭᠯᠠᠭᠰᠠᠨ᠂ ᠣᠨᠣᠪᠴᠢᠲᠠᠢ ᠰᠠᠶᠢᠬᠠᠨ ᠨᠠᠶᠢᠷᠠᠭᠤᠯᠭᠠ ᠪᠦᠬᠦᠢ ᠡᠨᠡ ᠰᠣᠨᠢᠨ ᠰᠣᠳᠣᠨ ᠵᠣᠬᠢᠶᠠᠯ ᠢ ᠮᠡᠷᠭᠡᠵᠢᠯ ᠦᠨ ᠤᠳᠬᠠ ᠵᠣᠬᠢᠶᠠᠯ ᠰᠤᠳᠤᠯᠤᠭᠠᠴᠢ ᠰᠢᠭᠦᠮᠵᠢᠯᠡᠭᠴᠢ ᠨᠠᠷ ᠤᠨ ᠵᠦᠭ ᠡᠴᠡ ᠰᠡᠭᠦᠯ ᠦᠨ 20 ᠵᠢᠯ ᠳᠦ ᠬᠡᠪᠯᠡᠭᠳᠡᠭᠰᠡᠨ ᠬᠠᠮᠤᠭ ᠤᠨ ᠰᠢᠯᠢᠳᠡᠭ ᠷᠣᠮᠠᠨ ᠢᠶᠠᠷ ᠭ ∙ ᠠᠶᠤᠤᠷᠽᠠᠨᠠ ᠶᠢᠨ 《ᠪᠥᠭᠡ ᠶᠢᠨ ᠳᠣᠮᠣᠭ》᠂《ᠭᠤᠷᠮᠤᠰᠤᠨ ᠴᠠᠳᠢᠭ》 ᠷᠣᠮᠠᠨ ᠨᠤᠭᠤᠳ ᠤᠨ ᠬᠠᠮᠲᠤ ᠪᠠᠷ ᠨᠡᠷᠡᠯᠡᠵᠦ᠂ ᠤᠳᠬᠠ ᠵᠣᠬᠢᠶᠠᠯ ᠰᠤᠳᠤᠯᠤᠭᠠᠴᠢ᠂ ᠰᠢᠭᠦᠮᠵᠢᠯᠡᠭᠴᠢ ᠬ ∙ ᠴᠣᠶᠢᠳᠣᠭᠵᠠᠮᠰᠤ ᠭ ∙ ᠮᠠᠷᠺᠧᠰ ᠤᠨ ︽ᠵᠠᠭᠤᠨ ᠵᠢᠯ ᠦᠨ ᠭᠠᠭᠴᠠᠭᠠᠷᠳᠠᠯ︾᠂ ᠮ ∙ ᠪᠤᠯᠭᠠᠺᠣᠸ ᠤᠨ ︽ᠮᠠᠰᠲ᠋ᠸᠷ ᠮᠠᠷᠭᠤᠷᠢᠲ᠋ᠠ ᠬᠣᠶᠠᠷ︾ ᠲᠠᠢ ᠳᠦᠢᠬᠦᠶᠢᠴᠡ ᠰᠣᠨᠢᠨ ᠰᠠᠶᠢᠬᠠᠨ ᠵᠣᠬᠢᠶᠠᠯ ᠭᠡᠵᠦ ᠦᠨᠡᠯᠡᠭᠰᠡᠨ ᠵᠡᠷᠭᠡ ᠡᠴᠡ ᠬᠠᠷᠠᠬᠤ ᠳᠤ ᠶᠠᠮᠠᠷᠬᠠᠤ ᠴᠢᠨᠰᠠᠭᠠ ᠲᠠᠢ ᠪᠦᠲᠦᠭᠡᠯ ᠪᠤᠢ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ ᠪᠢᠵᠡ᠃ 《 ᠴᠠᠳᠢᠭ ᠬᠠᠭᠤᠴᠢ》 1996 ᠣᠨ ᠤ ᠰᠢᠯᠢᠳᠡᠭ ᠷᠣᠮᠠᠨ ᠢᠶᠠᠷ ᠰᠢᠯᠭᠠᠷᠴᠣ᠂ ᠡᠨᠡ ᠪᠦᠲᠦᠭᠡᠯ ᠢᠶᠡᠷ ᠢᠶᠡᠨ ᠵᠣᠬᠢᠶᠠᠯᠴᠢ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠭ ∙ ᠨᠢᠮᠠ ᠮᠣᠩᠭᠤᠯ ᠤᠨ ᠵᠣᠬᠢᠶᠠᠯᠴᠢᠳ ᠤᠨ ᠡᠪᠯᠡᠯ ᠦᠨ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ᠨᠢ ᠨᠢᠳᠦ ᠪᠡᠨ ᠣᠯᠤᠭᠰᠠᠨ ᠬᠡᠷᠡᠭ᠃ ᠣᠷᠣᠰ ᠤᠨ ᠰᠤᠤᠲᠤ ᠵᠣᠬᠢᠶᠠᠯᠴᠢ ᠭᠣᠭᠣᠯ ᠠᠴᠠ ᠡᠬᠢᠯᠡᠭᠰᠡᠨ ᠤᠳᠬᠠ ᠵᠣᠬᠢᠶᠠᠯ ᠳᠠᠬᠢ《ᠬᠠᠷᠢᠴᠠᠩᠭᠤᠢ ᠴᠠᠭ ᠬᠤᠭᠤᠴᠠᠭᠠ ᠣᠷᠣᠨ ᠵᠠᠢ》 ᠶᠢᠨ ᠮᠤᠰᠬᠢᠷᠠᠯᠲᠠ᠂ ᠯᠠᠲ᠋ᠢᠨ ᠠᠮᠧᠷᠢᠺᠠ ᠵᠣᠬᠢᠶᠠᠯᠴᠢᠳ ᠤᠨ ᠦᠯᠢᠭᠡᠷ ᠲᠣᠮᠣᠭ ᠵᠦᠢ ᠳᠦ ᠲᠤᠯᠭᠠᠭᠤᠷᠢᠯᠠᠭᠰᠠᠨ ᠰᠢᠳᠢᠲᠦ ᠷᠧᠶᠠᠯᠢᠰᠮ ᠤᠨ ᠠᠷᠭᠠ ᠪᠠᠷᠢᠯ ᠢ ᠴᠢᠳᠠᠪᠤᠷᠢᠯᠢᠭ ᠠᠰᠢᠭᠯᠠᠨ ᠥᠪᠡᠷᠮᠢᠴᠡ ᠵᠣᠬᠢᠶᠠᠮᠵᠢ ᠥᠭᠦᠯᠡᠮᠵᠢ ᠳᠦᠷᠢ ᠳᠦᠷᠰᠦᠯᠡᠯ ᠪᠦᠬᠦᠢ ᠭᠣᠴᠣ ᠰᠣᠨᠢᠨ ᠪᠦᠲᠦᠭᠡᠯ ᠲᠤᠭᠤᠷᠪᠢᠵᠠᠢ ᠭᠡᠰᠡᠨ ᠰᠡᠳᠬᠢᠭᠳᠡᠯ ᠲᠥᠷᠦᠵᠥ ᠪᠠᠶᠢᠨᠠ᠃
ᠦᠯᠢᠭᠡᠷ᠂ ᠳᠣᠮᠣᠭ᠂ ᠬᠠᠭᠤᠴᠢ ᠶᠠᠷᠢᠶᠠ᠂ ᠵᠡᠭᠦᠳᠦ ᠵᠥᠩ᠂ ᠬᠡᠶᠢᠰᠪᠦᠷᠢᠯᠡᠯ᠂ ᠪᠣᠳᠠᠲᠤ ᠠᠮᠢᠳᠤᠷᠠᠯ᠂ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ᠂ ᠦᠦᠬᠡ ᠲᠡᠦᠬᠡ ᠶᠢ ᠬᠣᠭᠣᠷᠣᠨᠳᠣ ᠨᠢ ᠴᠢᠳᠠᠪᠤᠷᠢᠯᠢᠭ ᠰᠦᠯᠵᠢᠨ᠂ ᠲᠤᠩ ᠴᠤ ᠥᠪᠡᠷᠮᠢᠴᠡ ᠪᠠᠶᠢᠳᠠᠯ ᠢᠶᠠᠷ ᠬᠣᠯᠪᠣᠨ ᠨᠠᠶᠢᠷᠠᠭᠤᠯᠤᠭᠰᠠᠨ ᠡᠯᠡ ᠵᠣᠬᠢᠶᠠᠯ ᠮᠣᠩᠭᠣᠯ ᠤᠨ ᠤᠳᠬᠠ ᠵᠣᠬᠢᠶᠠᠯ ᠤᠨ ᠰᠡᠳᠬᠢᠯᠭᠡ᠂ ᠤᠷᠠᠨ ᠴᠢᠳᠠᠪᠤᠷᠢ ᠳᠡᠯᠡᠬᠡᠢ ᠶᠢᠨ ᠳᠠᠶᠢᠳᠤ ᠳ᠋ᠤ ᠬᠦᠷᠦᠭᠰᠡᠨ ᠦ ᠪᠠᠰᠠ ᠨᠢᠭᠡ ᠨᠣᠲᠠᠯᠠᠭᠠ ᠶᠤᠮ᠃ ᠣᠷᠴᠢᠯᠠᠩ ᠤᠨ ᠵᠦᠢ ᠲᠣᠭᠲᠠᠯ᠂ ᠣᠷᠣᠰᠢᠬᠤᠢ ᠶᠢᠨ ᠤᠳᠬᠠ ᠤᠴᠢᠷ᠂ ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠤᠨ ᠳᠠᠯᠳᠠ ᠬᠣᠯᠪᠣᠭᠠ ᠰᠦᠯᠵᠢᠶᠡ ᠶᠢ ᠤᠷᠠᠨ ᠵᠣᠬᠢᠶᠠᠯ ᠤᠨ ᠬᠡᠯᠡ ᠪᠡᠷ ᠬᠦᠦᠷᠨᠢᠵᠦ ᠴᠢᠳᠠᠭᠰᠠᠨ ᠳᠤ ᠪᠠᠶᠠᠷᠯᠠᠨ ᠣᠯᠵᠠᠭᠤᠷᠬᠠᠨᠠ᠃ ᠳᠣᠷᠣᠨᠠ ᠳ᠋ᠠᠬᠢᠨ ᠤ ᠠᠷᠭᠠ ᠪᠢᠯᠢᠭ ᠭᠡᠰᠡᠨ ᠬᠣᠣᠰᠯᠠᠮᠠᠯ ᠦᠵᠡᠯ ᠢ ᠨᠡᠩ ᠲᠣᠳᠣᠷᠬᠠᠢ ᠦᠵᠡᠭᠦᠯᠵᠦ᠂ ᠣᠷᠣᠰᠢᠬᠤᠢ ᠶᠢᠨ ᠰᠢᠲᠦᠨ ᠪᠠᠷᠢᠯᠳᠤᠯᠭᠠ᠂ ᠦᠢᠯᠡ ᠶᠢᠨ ᠦᠷᠡ᠂ ᠰᠦᠨᠡᠰᠦ ᠰᠡᠭᠦᠳᠡᠷ᠂ ᠨᠢᠭᠦᠯ ᠪᠤᠶᠠᠨ ᠤ ᠦᠷᠡ ᠳᠠᠭᠠᠪᠤᠷᠢ᠂ ᠤᠷᠢᠳᠤ ᠬᠣᠶᠢᠳᠣ ᠨᠠᠰᠤᠨ ᠤ ᠶᠠᠪᠤᠳᠠᠯ ᠮᠥᠷ ᠦᠨ ᠲᠤᠬᠠᠢ ᠪᠤᠳ᠋ᠳ᠋ᠾᠠ ᠶᠢᠨ ᠭᠦᠨ ᠤᠬᠠᠭᠠᠨ ᠤ ᠦᠵᠡᠯ ᠰᠠᠨᠠᠭᠠ ᠶᠢ ᠵᠣᠬᠢᠶᠠᠯ ᠳᠤ ᠪᠠᠨ ᠨᠡᠪᠴᠢᠭᠦᠯᠦᠨ ᠪᠠᠷᠢᠨ ᠲᠠᠯᠪᠢᠨ ᠦᠵᠡᠭᠦᠯᠵᠦ ᠪᠠᠶᠢᠭᠠ ᠨᠢ ᠲᠤᠩ ᠶᠡᠬᠡ ᠰᠣᠨᠢᠷᠬᠠᠯᠲᠠᠢ ᠪᠣᠯᠵᠠᠢ᠃
ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠤᠨ ᠵᠢᠮᠠ ᠶᠣᠰᠣ ᠶᠢ ᠡᠩ ᠦᠨ ᠰᠠᠶᠢᠬᠠᠨ ᠬᠦᠦᠷᠨᠢᠬᠦ ᠳᠦ ᠪᠡᠨ ᠬᠠᠶᠢᠷᠠ ᠰᠡᠳᠬᠢᠯ᠂ ᠨᠢᠭᠤᠴᠠ ᠠᠮᠠᠷᠠᠭ ᠤᠨ ᠰᠡᠳᠦᠪ ᠢ ᠬᠥᠨᠳᠡᠵᠦ ᠡᠨᠡ ᠨᠢ ᠵᠢᠮᠠ ᠶᠣᠰᠣᠨ ᠠᠴᠠ ᠭᠠᠳᠠᠭᠤᠷ ᠪᠤᠵᠠᠷ ᠮᠠᠭᠤᠬᠠᠢ ᠵᠢᠭᠰᠢᠮᠡᠷ ᠵᠦᠢᠯ ᠣᠭᠲᠣᠬᠠᠨ ᠴᠤ ᠪᠢᠰᠢ ᠬᠠᠷᠢᠨ ᠬᠦᠮᠦᠨ ᠦ ᠬᠤᠪᠢ ᠵᠠᠶᠠᠭᠠᠨ ᠤ ᠲᠥᠭᠡᠷᠢᠯᠳᠦᠭᠰᠡᠨ ᠲᠥᠭᠡᠷᠭᠡ ᠶᠤᠮ ᠭᠡᠳᠡᠭ ᠢ ᠲᠤᠩ ᠴᠤ ᠦᠨᠡᠮᠰᠢᠯᠲᠡᠢ ᠳᠦᠷᠰᠦᠯᠡᠨ ᠦᠵᠡᠭᠦᠯᠦᠭᠰᠡᠨ ᠪᠠᠶᠢᠳᠠᠭ᠃ 《ᠦᠢᠯᠡ ᠦᠢᠯᠡ ᠪᠡᠨ ᠳᠠᠭᠠᠨᠠ᠂ ᠦᠨᠢᠶᠡ ᠲᠤᠭᠤᠯ ᠢᠶᠠᠨ ᠳᠠᠭᠠᠨᠠ》 ᠭᠡᠰᠡᠨ ᠵᠦᠢᠷ ᠦᠭᠡ ᠶᠠᠭᠤᠲᠠᠢ ᠦᠨᠡᠨ ᠪᠢᠯᠡ᠃ ᠡᠴᠢᠭᠡ ᠡᠬᠡ ᠶᠢᠨ ᠬᠢᠭᠰᠡᠨ ᠦᠢᠯᠡ ᠶᠢᠨ ᠦᠷᠡ ᠦᠷᠡ ᠬᠡᠦᠬᠡᠳ ᠲᠦ ᠨᠢ ᠡᠷᠭᠢᠵᠦ ᠲᠤᠰᠳᠠᠭ ᠭᠠᠰᠢᠭᠤᠨ ᠦᠨᠡᠨ ᠨᠢᠳᠦᠨ ᠦ ᠡᠮᠦᠨᠡ ᠳᠤᠷᠠᠶᠢᠨᠠ᠃ ᠵᠠᠯᠠᠭᠤ ᠴᠠᠭ ᠲᠤ ᠪᠠᠨ ᠯᠠᠮᠠ ᠬᠤᠸᠠᠷᠠᠭ ᠬᠡᠮᠡᠨ ᠬᠡᠯᠮᠡᠭᠳᠡᠭᠦᠯᠦᠯᠲᠡ ᠳ᠋ᠤ ᠥᠷᠲᠥᠨ ᠪᠠᠷᠢᠪᠴᠢᠯᠠᠭᠳᠠᠵᠤ᠂ ᠠᠭᠤᠯᠠ ᠬᠠᠳᠠ ᠪᠠᠷ ᠭᠡᠷ ᠬᠢᠵᠦ ᠣᠷᠭᠣᠭᠤᠯ ᠪᠣᠰᠬᠠᠭᠤᠯ ᠶᠠᠪᠤᠭᠰᠠᠨ ᠳᠡᠩᠵᠡᠨ ᠡᠪᠦᠭᠡᠨ ᠨᠠᠰᠤᠨ ᠲᠤᠷᠰᠢᠳᠠ ᠪᠠᠨ ᠦᠨᠡᠨᠴᠢ ᠰᠢᠳᠤᠷᠭᠤ᠂ ᠭᠡᠮ ᠬᠣᠣᠷ ᠦᠭᠡᠢ ᠰᠠᠶᠢᠬᠠᠨ ᠠᠮᠢᠳᠤᠷᠠᠵᠤ᠂ ᠪᠤᠶᠠᠨ ᠤ ᠵᠠᠮ ᠮᠥᠷ ᠢᠶᠡᠷ ᠬᠣᠷᠸᠠ ᠶᠢ ᠲᠤᠭᠤᠯᠤᠭᠰᠠᠨ ᠴᠤ ᠨᠢᠭᠡ ᠯᠠ ᠭᠡᠮ ᠨᠢᠭᠦᠯ ᠨᠠᠰᠤᠨ ᠲᠤᠷᠰᠢᠳᠠ ᠨᠢ ᠵᠣᠪᠠᠭᠠᠵᠠᠢ᠃ ᠮᠠᠰᠢᠨ ᠳᠤ ᠠᠴᠢᠭᠳᠠᠨ ᠶᠠᠪᠤᠬᠤ ᠳᠤ ᠪᠠᠨ ᠣᠷᠭᠣᠨ ᠵᠢᠭᠤᠲᠠᠭᠰᠠᠨ ᠳᠡᠩᠵᠡᠨ ᠯᠠᠮᠠ ᠶᠢᠨ ᠣᠷᠣᠨ ᠳᠤ ᠮᠥᠷ ᠢᠶᠡᠷ ᠢᠶᠡᠨ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠵᠢᠷ ᠤᠨ ᠮᠠᠯᠴᠢᠨ ᠡᠷᠡ ᠶᠢ ᠲᠣᠭᠠ ᠭᠦᠢᠴᠡᠭᠡᠨ ᠠᠪᠴᠤ ᠴᠢᠳᠠᠭᠰᠠᠨ ᠲᠡᠷᠡ ᠡᠮᠭᠡᠨᠢᠯᠳᠦ ᠶᠠᠪᠤᠳᠠᠯ ᠳᠤ ᠥᠪᠡᠷ ᠢᠶᠡᠨ ᠪᠤᠷᠤᠭᠤᠲᠠᠢ ᠮᠡᠲᠦ᠂ ᠬᠦᠮᠦᠨ ᠦ ᠬᠤᠪᠢ ᠵᠠᠶᠠᠭᠠ ᠶᠢ ᠪᠤᠯᠢᠶᠠᠭᠰᠠᠨ ᠮᠡᠲᠦ ᠂ ᠡᠳ᠋ᠯᠡᠬᠦ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠪᠡᠨ ᠡᠭᠦᠷᠦᠭᠦᠯᠦᠭᠰᠡᠨ ᠮᠡᠲᠦ ᠰᠢᠨᠠᠯᠵᠤ ᠶᠠᠪᠤᠵᠠᠢ᠃ ᠨᠡᠷᠡ ᠨᠢᠭᠡᠳᠦ ᠳᠡᠩᠵᠡᠨ ᠡᠪᠦᠭᠡᠨ ᠰᠢᠨᠠᠭᠠ ᠪᠤᠳᠠᠭᠠᠨ ᠤ ᠥᠷᠢ ᠪᠠᠨ ᠤᠯᠭᠤᠬᠤ ᠭᠡᠵᠦ ᠦᠬᠦᠯ ᠢ ᠬᠣᠶᠢᠰᠢᠯᠠᠭᠤᠯᠤᠨ ᠦᠢᠯᠡ ᠪᠡᠨ ᠪᠠᠷᠠᠭᠰᠠᠨ ᠶᠠᠪᠤᠳᠠᠯ ᠲᠠᠢ ᠲᠥᠰᠲᠡᠢ ᠶᠤᠮ᠃ ᠬᠦᠮᠦᠨ ᠴᠢᠨᠠᠷ᠂ ᠵᠤᠳᠠᠭ ᠭᠡᠳᠡᠭ ᠡᠶᠢᠮᠦ ᠨᠠᠷᠢᠨ ᠨᠠᠨᠳᠢᠨ ᠰᠥᠭᠥᠳᠴᠦ ᠮᠥᠷᠭᠥᠮᠡᠷ ᠡᠳ᠋ ᠶᠤᠮ ᠰᠢᠦ ᠳ᠋ᠡ ᠤᠭ ᠨᠢ᠃
ᠦᠯᠢᠭᠡᠷ ᠲᠣᠮᠣᠭ᠂ ᠴᠠᠳᠢᠭ ᠬᠠᠭᠤᠴᠢ ᠪᠠᠷ ᠠᠷᠪᠢᠨ ᠪᠠᠶᠠᠯᠢᠭ᠂ ᠠᠳᠠᠯᠢᠳᠬᠠᠯ᠂ ᠬᠡᠶᠢᠰᠪᠦᠷᠢᠯᠡᠯ᠂ ᠵᠦᠢᠷᠯᠡᠯ ᠳᠦᠷᠰᠦᠯᠡᠯ ᠢ ᠤᠷᠠᠨ ᠢᠶᠠᠷ ᠠᠰᠢᠭᠯᠠᠭᠰᠠᠨ ᠳᠠᠮ ᠪᠡᠯᠭᠡᠳᠡᠯ᠂ ᠳᠠᠯᠳᠠ ᠶᠣᠭᠲᠠ ᠤᠳᠬᠠ ᠰᠠᠨᠠᠭᠠ ᠳᠦᠭᠦᠷᠡᠩ ᠡᠯᠡ ᠪᠦᠲᠦᠭᠡᠯ ᠡᠴᠦᠰ ᠦᠨ ᠪᠦᠯᠦᠭ ᠲᠦ ᠬᠦᠮᠦᠨ ᠦ ᠲᠤᠬᠠᠢ᠂ ᠬᠦᠮᠦᠨ ᠴᠢᠨᠠᠷ᠂ ᠬᠦᠮᠦᠯᠢᠭ ᠰᠡᠳᠬᠢᠯ᠂ ᠵᠤᠳᠠᠭ ᠶᠣᠰᠣ ᠶᠢᠨ ᠲᠤᠬᠠᠢ ᠵᠣᠬᠢᠶᠠᠯ ᠶᠤᠮ᠃ ᠦᠷᠡ ᠬᠣᠶᠢᠴᠢ ᠳᠤ ᠪᠠᠨ ᠦᠯᠢᠭᠡᠷ ᠳᠣᠮᠣᠭ ᠢᠶᠠᠨ ᠥᠪᠯᠡᠭᠦᠯᠦᠭᠰᠡᠨ ᠳᠡᠩᠵᠡᠨ ᠡᠪᠦᠭᠡᠨ ᠦᠬᠦᠯ ᠢ ᠠᠮᠤᠷ ᠲᠠᠶᠢᠪᠤᠩ ᠨᠡᠷᠡ ᠲᠥᠷᠥ ᠲᠡᠢ ᠤᠭᠲᠤᠵᠤ ᠪᠠᠶᠢᠨᠠ᠃ ᠦᠬᠦᠯ ᠪᠣᠯ ᠠᠮᠢᠳᠤᠷᠠᠯ ᠤᠨ ᠲᠡᠭᠦᠰᠬᠡᠯ ᠪᠢᠰᠢ ᠨᠢᠭᠡ ᠡᠴᠡ ᠨᠥᠭᠥᠭᠡ ᠳᠦ ᠰᠢᠯᠵᠢᠵᠦ ᠪᠤᠢ ᠮᠥᠩᠬᠡ ᠪᠤᠰᠤ ᠶᠢᠨ ᠵᠢᠮᠠ ᠶᠣᠰᠣᠨ ᠤ ᠮᠥᠴᠡᠯᠭᠡ ᠶᠤᠮ᠃ ᠭᠠᠭᠴᠠ ᠡᠷᠭᠦᠮᠡᠯ ᠬᠦᠦ ᠪᠡᠨ ᠬᠦᠯᠢᠶᠡᠵᠦ ᠰᠠᠭᠤᠭᠠ ᠳᠡᠩᠵᠡᠨ ᠡᠪᠦᠭᠡᠨ ᠠᠭᠤᠯᠵᠠᠵᠤ ᠠᠮᠵᠢᠯ ᠦᠭᠡᠢ ᠰᠦᠨᠡᠰᠦ ᠨᠢ ᠲᠩᠷᠢ ᠳᠦ ᠭᠠᠷᠴᠠᠢ᠃ ᠨᠠᠰᠤ ᠪᠠᠷ ᠢᠶᠠᠨ ᠭᠠᠭᠴᠠ ᠪᠡᠶᠡ᠂ ᠬᠠᠨᠢ ᠬᠠᠮᠵᠢᠭᠠ ᠦᠭᠡᠢ ᠶᠠᠪᠤᠭᠰᠠᠨ ᠳᠡᠩᠵᠡᠨ ᠡᠪᠦᠭᠡᠨ ᠦ ᠲᠦᠷᠦᠭᠰᠡᠨ ᠦᠷᠡ ᠤᠳᠤᠮ ᠨᠢ ᠬᠠᠯᠵᠠᠨ ᠴᠤ ᠪᠠᠶᠢᠵᠤ ᠮᠠᠭᠠᠳ ᠦᠭᠡᠢ᠃ ᠦᠯᠦ ᠲᠠᠰᠤᠷᠴᠣ ᠦᠯᠦ ᠪᠠᠷᠠᠭᠳᠠᠬᠤ ᠤᠷᠤᠭ ᠤᠳᠤᠮ ᠭᠡᠳᠡᠭ ᠬᠤᠪᠢ ᠵᠠᠶᠠᠭᠠᠨ ᠤ ᠬᠡᠯᠬᠢᠶᠡᠰᠦ ᠶᠤᠮ᠃ ᠬᠦᠮᠦᠨ ᠦ ᠬᠤᠪᠢ ᠵᠠᠶᠠᠭᠠᠨ ᠤ ᠡᠷᠭᠢᠭᠦᠯᠭᠡ ᠬᠠᠮᠢᠭᠠᠰᠢ ᠪᠠᠨ᠂ ᠶᠠᠭᠠᠬᠢᠵᠤ ᠴᠤ ᠡᠷᠭᠢᠵᠦ ᠬᠥᠷᠪᠡᠵᠦ ᠪᠣᠯᠬᠤ ᠪᠠᠷᠢᠴᠠ ᠦᠭᠡᠢ ᠡᠳ᠋ ᠪᠣᠯᠬᠤ ᠶᠢ ᠳᠡᠩᠵᠡᠨ ᠡᠪᠦᠭᠡᠨ ᠦ ᠲᠤᠭᠤᠯᠤᠭᠰᠠᠨ ᠠᠮᠢᠳᠤᠷᠠᠯ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢ ᠨᠢ ᠬᠦᠮᠦᠰ ᠦᠨ ᠬᠤᠪᠢ ᠵᠠᠶᠠᠭᠠ ᠪᠠᠷ ᠢᠶᠠᠨ ᠲᠣᠳᠣᠷᠬᠠᠢ ᠰᠠᠶᠢᠬᠠᠨ ᠦᠵᠡᠭᠦᠯᠵᠦ ᠴᠢᠳᠠᠯᠠ᠃ ᠬᠦᠦ ᠪᠠᠨ ᠡᠷᠢᠵᠦ ᠬᠠᠶᠢᠨ ᠨᠠᠰᠤ ᠶᠢ ᠪᠠᠷᠠᠵᠤ ᠶᠠᠪᠤᠭᠠ ᠭᠠᠯ ᠰᠢᠷᠭᠠ ᠮᠣᠷᠢ ᠲᠠᠢ᠂ ᠭᠠᠨᠳᠠᠭᠤ ᠪᠣᠷᠣ ᠳᠡᠪᠡᠯ ᠲᠡᠢ ᠰᠢᠩᠬᠤᠯᠠᠢ ᠡᠪᠦᠭᠡᠨ ᠪᠣᠯ ᠮᠣᠩᠭᠣᠯ ᠤᠨ ᠢᠶᠠᠨ ᠬᠤᠪᠢ ᠵᠠᠶᠠᠭᠠᠨ ᠳᠤ ᠰᠠᠨᠠᠭᠠ ᠵᠣᠪᠠᠨᠢᠨ ᠢᠷᠡᠭᠡᠳᠦᠢ ᠶᠢ ᠨᠢ ᠰᠢᠨᠵᠢᠵᠤ ᠶᠠᠪᠤᠭᠠ ᠪᠡᠯᠭᠡᠳᠡᠯᠲᠦ ᠰᠠᠶᠢᠬᠠᠨ ᠳᠦᠷᠢ ᠶᠤᠮ᠃ ᠬᠦᠮᠦᠨ ᠨᠣᠮ ᠪᠣᠯᠤᠭᠰᠠᠨ ᠬᠥᠬᠡ ᠡᠪᠦᠭᠡᠳ ᠦᠨ ᠴᠠᠳᠢᠭ ᠬᠠᠭᠤᠴᠢ ᠬᠡᠵᠢᠶᠡ ᠴᠤ ᠦᠯᠦ ᠲᠠᠰᠤᠷᠠᠨ ᠤᠷᠤᠭ ᠤᠳᠤᠮ ᠢᠶᠠᠷ ᠳᠠᠮᠵᠢᠨ ᠦᠷᠭᠦᠯᠵᠢᠯᠠᠵᠦ ᠪᠠᠶᠢᠳᠠᠭ ᠢ ᠰᠠᠨᠠᠭᠤᠯᠤᠭᠰᠠᠨ ᠰᠠᠶᠢᠬᠠᠨ ᠪᠦᠲᠦᠭᠡᠯ ᠶᠤᠮ᠃
ᠬᠣᠭᠣᠰᠣᠨ ᠠᠬᠤᠢ ᠶᠢ ᠪᠣᠳᠠᠲᠤ ᠮᠡᠲᠦ ᠪᠡᠷ ᠲᠠᠰᠢᠶᠠᠷᠠᠵᠤ᠂ ᠬᠣᠷᠸᠠ ᠶᠢᠨ ᠶᠠᠭᠤᠮᠠᠰ ᠦᠵᠡᠭᠳᠡᠯ ᠵᠡᠭᠦᠳᠦ ᠵᠡᠷᠭᠡᠯᠭᠡ ᠮᠡᠲᠦ ᠬᠠᠭᠤᠷᠮᠠᠭ ᠭᠡᠳᠡᠭ ᠢ ᠦᠯᠦ ᠮᠡᠳᠡᠭᠴᠢ ᠬᠥᠮᠥᠨ ᠦ ᠠᠮᠢᠳᠤᠷᠠᠯ ᠭᠡᠭᠴᠢ ᠦᠢᠯᠡ ᠶᠢᠨ ᠦᠷᠡ ᠳ᠋ᠤ ᠬᠦᠯᠢᠭᠳᠡᠭᠰᠡᠨ ᠰᠦᠨᠡᠰᠦᠨ ᠤ ᠲᠠᠷᠴᠢᠯᠠᠭᠠ ᠶᠤᠮ᠃
ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠸᠴᠢᠷ
2018-08-24
Photo; Mongolian Dream᠃
ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ
0 0