  ᠲᠦᠮᠡᠲᠦ ᠰᠢᠨ᠎ᠡ       
     ᠦᠦᠰᠢᠨ  ᠭᠠᠯᠠᠭᠤᠲᠤ 
   2017-07-25 10:54
   2024-01-05 18:54
   1774537
   1251

ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠸᠴᠢᠷ : ᠴᠠᠭ ᠬᠤᠭᠤᠴᠠᠭᠠᠨ ᠤ ᠮᠡᠯᠡᠬᠡᠢ

ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠸᠴᠢᠷ : ᠴᠠᠭ ᠬᠤᠭᠤᠴᠠᠭᠠᠨ ᠤ ᠮᠡᠯᠡᠬᠡᠢ
        5014     
2018-09-13 20:03    
发表于:内蒙古
ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠸᠴᠢᠷ : ᠴᠠᠭ ᠬᠤᠭᠤᠴᠠᠭᠠᠨ ᠤ ᠮᠡᠯᠡᠬᠡᠢ ᠁ ᠡᠨᠡ ᠪᠣᠯ ᠶᠡᠷᠦᠳᠡ ᠶᠢᠨ ᠤᠳᠬ᠎ᠠ ᠪᠠᠷ ᠢᠶᠠᠨ ᠨᠣᠮ ᠪᠢᠰᠢ᠃ ᠣᠭᠲᠣ ᠪᠢᠰᠢ︕ ᠡᠨᠡ ᠪᠣᠯ ᠰᠤᠨᠵᠢᠷᠠᠭᠤ ᠳᠣᠷᠣᠮᠵᠢᠯᠠᠯ᠂ ᠤᠷᠠᠯᠢᠭ ᠤᠨ ᠥᠭᠡᠳᠡ ᠡᠴᠡ ᠨᠢᠯᠪᠤᠭᠰᠠᠨ ᠰᠢᠯᠦᠰᠦ᠂ ᠪᠤᠷᠬᠠᠨ᠂ ᠬᠦᠮᠦᠨ᠂ ᠬᠤᠪᠢ ᠵᠠᠶᠠᠭ᠎ᠠ᠂ ᠴᠠᠭ ᠬᠤᠭᠤᠴᠠᠭ᠎ᠠ᠂ ᠬᠠᠶᠢᠷ᠎ᠠ᠂ ᠭᠣᠸ᠎ᠠ ᠰᠠᠶᠢᠬᠠᠨ ᠁ ᠭᠡᠳ ᠠᠯᠢ ᠲᠠᠭᠠᠷᠠᠭᠰᠠᠨ ᠤ ᠬᠢ ᠪᠠᠨ ᠪᠥᠭᠰᠡᠨ ᠳ᠋ᠤ ᠥᠭᠭᠦᠭᠰᠡᠨ ᠠᠮᠪᠠᠷ᠎ᠠ᠃ ᠲᠠᠨ ᠢ ᠠᠮᠤᠰᠬᠢᠬᠤ ᠵᠠᠭᠤᠷ᠎ᠠ ᠳᠤ ᠪᠢ ᠳᠠᠭᠤᠯᠠᠶ᠎ᠠ᠂ ᠪᠤᠵᠠᠷ ᠬᠡᠭᠦᠷ ᠳᠡᠭᠡᠷ᠎ᠡ ᠴᠢᠨᠢ ᠪᠦᠵᠢᠭᠯᠡᠶ᠎ᠡ ᠁ ᠬᠦᠷᠢ ᠮᠡᠯᠯᠢᠷ ᠨᠣᠮ ᠢᠶᠠᠨ ᠥᠪᠡᠷ ᠢᠶᠡᠨ ᠢᠩᠭᠢᠵᠦ ᠲᠣᠳᠣᠷᠬᠠᠶᠢᠯᠠᠭᠰᠠᠨ ᠪᠠᠶᠢᠳᠠᠭ ᠶᠤᠮ᠃ 《ᠡᠨᠡ ᠪᠣᠯ ᠡᠷᠡᠭᠡ ᠴᠡᠭᠡᠷ ᠦᠭᠡᠢ᠂ ᠱᠠᠯᠢᠭ ᠵᠠᠪᠬᠠᠢ᠂ ᠠᠮᠲᠠᠲᠠᠢ ᠷᠣᠮᠠᠨ》 ᠭᠡᠵᠦ ᠬᠠᠪᠲᠠᠰᠤᠨ ᠳᠡᠭᠡᠷ᠎ᠡ ᠪᠡᠨ ᠪᠢᠴᠢᠭᠡᠰᠦ ᠲᠡᠢ ᠬᠠᠷ᠎ᠠ ᠨᠣᠮ ᠨᠠᠮ᠎ᠠ ᠶᠢ ᠵᠢᠩᠬᠢᠨᠢ ᠡᠴᠡ ᠪᠡᠨ ᠲᠠᠶᠢᠳᠬᠤᠷᠠᠭᠤᠯᠵᠤ ᠴᠢᠳᠠᠳᠠᠭ ᠶᠤᠮ᠃ ᠥᠪᠡᠷ ᠢ ᠪᠡᠨ ᠭᠣᠯᠣᠵᠤ ᠴᠢᠮᠠᠯᠠᠵᠤ᠂ ᠥᠪᠡᠷ ᠢ ᠪᠡᠨ ᠳᠣᠣᠷ᠎ᠠ ᠳᠤ ᠦᠵᠡᠬᠦ ᠭᠤᠲᠤᠷᠠᠩᠭᠢ ᠦᠵᠡᠯ᠂ ᠰᠡᠳᠬᠢᠯ ᠦᠨ ᠳᠣᠷᠣᠶᠢᠲᠠᠯ ᠠᠴᠠ ᠮᠢᠯᠯᠧᠷ ᠤᠨ ᠡᠨᠡ ᠵᠠᠪᠬᠠᠢ ᠨᠣᠮ ᠨᠠᠮ᠎ᠠ ᠶᠢ ᠰᠤᠭᠤ ᠲᠠᠲᠠᠨ ᠭᠠᠷᠭᠠᠳᠠᠭ ᠶᠤᠮ᠃ ᠠᠮᠢᠳᠤᠷᠠᠯ ᠤᠴᠢᠷ ᠤᠳᠬ᠎ᠠ ᠦᠭᠡᠢ ᠰᠠᠨᠠᠭᠳᠠᠭᠰᠠᠨ ᠦᠶ᠎ᠡ ᠳᠦ ᠬᠠᠷ᠎ᠠ ᠨᠣᠮ ᠢᠶᠠᠨ ᠡᠷᠭᠢᠭᠦᠯᠵᠦ ᠲᠣᠭᠣᠷᠢᠭᠤᠯᠵᠤ ᠰᠠᠭᠤᠬᠤ ᠳᠤ ᠠᠶᠠᠨᠳᠠᠭᠠᠨ ᠨᠢᠭᠡ ᠮᠡᠳᠡᠬᠦ ᠳᠦ ᠰᠠᠶᠢᠬᠠᠨ ᠲᠠᠶᠢᠪᠤᠰᠢᠷᠠᠴᠢᠬᠠᠭᠰᠠᠨ ᠪᠠᠶᠢᠳᠠᠭ ᠶᠤᠮ᠃ ᠨᠢᠭᠡ ᠶᠣᠰᠣᠨ ᠳᠤ ᠪᠠᠨ ᠬᠤᠪᠰᠤᠨ ᠳᠤ ᠣᠷᠣᠳᠠᠭ ᠭᠡᠰᠡᠨ ᠦᠭᠡ ᠯᠠ ᠳ᠋ᠡ᠃ ᠠᠵᠢᠯ ᠦᠭᠡᠢ᠂ ᠣᠷᠣᠯᠭ᠎ᠠ ᠦᠭᠡᠢ᠂ ᠬᠤᠷᠢᠶᠠᠵᠤ ᠬᠤᠷᠠᠮᠲᠤᠯᠠᠭᠤᠯᠤᠭᠰᠠᠨ ᠥᠮᠴᠢ ᠬᠥᠷᠦᠩᠭᠡ ᠦᠭᠡᠢ᠂ ᠣᠷᠣᠨ ᠭᠡᠷ ᠦᠭᠡᠢ ᠲᠡᠨᠦᠭᠦᠯᠴᠢ᠂ ᠵᠠᠪᠬᠠᠢ ᠮᠢᠯᠯᠧᠷ 《 ᠪᠢ ᠡᠨᠡ ᠬᠣᠷᠸ᠎ᠠ ᠶᠢᠨ ᠬᠠᠮᠤᠭ ᠤᠨ ᠵᠢᠷᠭᠠᠯᠲᠠᠢ ᠬᠦᠮᠦᠨ》 ᠭᠡᠵᠦ ᠥᠪᠡᠷ ᠢ ᠪᠡᠨ ᠲᠤᠩᠬᠠᠭᠯᠠᠭᠰᠠᠨ ᠪᠠᠶᠢᠳᠠᠭ᠃ ᠭᠡᠲᠡᠯ᠎ᠡ ᠲᠡᠭᠦᠨ ᠦ ᠨᠣᠮ ᠢ ᠤᠩᠰᠢᠭᠴᠢ ᠪᠡᠷ᠎ ᠬᠡᠴᠢᠨᠡᠨ ᠠᠵᠠ ᠦᠭᠡᠢ ᠳᠣᠣᠷ᠎ᠠ ᠳᠤ ᠨᠢᠭᠡᠨ ᠪᠠᠶᠢᠭᠰᠠᠨ ᠴᠤ ᠰᠡᠷᠭᠦᠭᠡᠳ ᠯᠠ ᠢᠷᠡᠨ᠎ᠡ᠃ ᠠᠪᠢᠶᠠᠰ ᠪᠢᠯᠢᠭ ᠲᠠᠩᠬᠠᠢ ᠵᠣᠬᠢᠶᠠᠯᠴᠢ ᠬᠦᠮᠦᠨ ᠤᠷᠤᠬᠤ ᠣᠷᠣᠨ ᠦᠭᠡᠢ᠂ ᠲᠠᠲᠠᠬᠤ ᠲᠠᠮᠠᠬᠢ ᠦᠭᠡᠢ᠂ ᠬᠣᠳᠣᠭᠣᠳᠣ ᠨᠢ ᠬᠣᠷᠵᠢᠭᠢᠨᠠᠵᠤ᠂ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠵᠤ ᠶᠠᠪᠤᠬᠤ ᠳᠤ ᠮᠠᠨᠢ ᠮᠡᠲᠦ ᠶᠢᠨ ᠥᠴᠥᠬᠡᠨ ᠪᠡᠷᠬᠡᠰᠢᠶᠡᠯ᠂ ᠶᠠᠯᠠᠷᠬᠠᠤ ᠵᠠᠩ ᠪᠣᠯ ᠶᠠᠷᠰᠢᠭ ᠯᠠ ᠪᠠᠶᠢᠨ᠎ᠠ᠃ ᠶᠠᠩᠬᠠᠨ ᠬᠡᠦᠬᠡᠨ᠂ ᠢᠨᠠᠭ ᠠᠮᠠᠷᠠᠭ ᠤᠳ ᠢᠶᠠᠨ ᠪᠡᠭᠡᠯᠡᠢ ᠰᠢᠭ ᠰᠣᠯᠢᠳᠠᠭ ᠮᠢᠯᠯᠧᠷ ᠤᠨ ᠨᠣᠮ ᠳᠤ ᠶᠠᠮᠠᠷ ᠴᠤ ᠬᠤᠳᠠᠯ ᠬᠠᠭᠤᠷᠮᠠᠭ ᠪᠠᠶᠢᠳᠠᠭ ᠦᠭᠡᠢ᠂ ᠴᠢᠩ ᠰᠡᠳᠬᠢᠯ ᠦᠨ ᠦᠭᠡᠰ ᠤᠷᠤᠰᠳᠠᠭ ᠪᠣᠯᠬᠣᠷ ᠯᠠ ᠲᠡᠷᠡ᠃ ᠶᠡᠷᠦᠳᠡ ᠶᠢᠨ ᠤᠳᠬ᠎ᠠ ᠪᠠᠷ ᠨᠢ ᠤᠩᠰᠢᠪᠠᠯ ᠵᠠᠪᠬᠠᠢ ᠵᠠᠶᠢᠳᠠᠩ᠂ ᠫᠣᠷᠨᠤᠭᠷᠠᠹ ᠮᠠᠶ᠋ᠢᠭ ᠤᠨ ᠯᠠ ᠶᠤᠮ᠃ ᠦᠭᠡ ᠬᠡᠯᠡᠯᠭᠡ᠂ ᠳᠦᠷᠰᠦᠯᠡᠯ ᠨᠢ ᠴᠣᠴᠢᠷᠳᠠᠭᠤᠯᠤᠨ᠎ᠠ᠂ ᠰᠣᠯᠢᠶᠠᠲᠠᠢ ᠰᠠᠳᠤᠷ ᠬᠣᠭ ᠪᠤᠢ ᠭᠡᠵᠦ ᠪᠣᠳᠣᠨ᠎ᠠ᠃ ᠬᠠᠷᠢᠨ ᠬᠡᠳᠦ ᠬᠡᠳᠦ ᠲᠤᠯᠬᠤᠲᠠᠢ ᠤᠩᠰᠢᠭᠰᠠᠨ ᠤ ᠳᠠᠷᠠᠭ᠎ᠠ ᠡᠨᠡ ᠴᠢᠨᠢ ᠬᠠᠷ᠎ᠠ ᠲᠠᠮᠠᠬᠢ ᠰᠢᠭ ᠳᠣᠩᠲᠤᠭᠤᠯᠬᠤ ᠡᠳ᠋ ᠪᠠᠶᠢᠨ᠎ᠠ ᠭᠡᠵᠦ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠤᠤᠯᠭ᠎ᠠ ᠠᠯᠳᠠᠨ᠎ᠠ᠃ ᠬᠦᠮᠦᠨ ᠦ ᠠᠩᠬᠠᠷᠤᠯ ᠲᠠᠲᠠᠬᠤ ᠭᠡᠰᠡᠨ ᠰᠧᠺᠰ ᠦᠨ ᠬᠠᠭᠤᠷᠮᠠᠴᠢ ᠲᠡᠦᠬᠡ ᠨᠦᠭᠦᠳ ᠪᠢᠰᠢ ᠬᠠᠷᠢᠨ ᠵᠢᠩᠬᠢᠨᠢ ᠤᠷᠠᠨ ᠵᠣᠬᠢᠶᠠᠯ ᠤᠨ ᠮᠥᠨ ᠴᠢᠨᠠᠷᠲᠠᠢ ᠡᠳ᠋ ᠶᠤᠮ᠎ ᠡ ᠭᠡᠰᠡᠨ ᠪᠣᠳᠣᠯ ᠲᠥᠷᠥᠨ᠎ᠡ᠃ 《 ᠴᠠᠭ ᠬᠤᠭᠤᠴᠠᠭᠠᠨ ᠤ ᠮᠡᠯᠡᠬᠡᠢ ᠪᠢᠳᠡᠨ ᠢ ᠢᠳᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃ ᠪᠢᠳᠡ ᠦᠬᠦᠯ ᠦᠨ ᠱᠣᠷᠣᠩ ᠤᠷᠤᠭᠤ ᠬᠥᠯ ᠨᠡᠶᠢᠯᠡᠭᠦᠯᠦᠨ ᠠᠯᠬᠤᠵᠤ ᠪᠠᠶᠢᠨ᠎ᠠ᠃ ᠣᠷᠭᠣᠵᠤ ᠪᠣᠰᠬᠤ ᠠᠷᠭ᠎ᠠ ᠦᠭᠡᠢ》 ᠭᠡᠵᠦ ᠲᠡᠷᠡ ᠪᠢᠴᠢᠭᠰᠡᠨ ᠶᠤᠮ᠃ ᠪᠦᠬᠦᠨ ᠢ ᠵᠠᠯᠭᠢᠬᠤ ᠴᠠᠭ ᠬᠤᠭᠤᠴᠠᠭᠠᠨ ᠤ ᠮᠡᠯᠡᠬᠡᠢ ᠶᠢᠨ ᠳᠡᠷᠭᠡᠳᠡ ᠪᠢᠳᠡ ᠶᠠᠭᠤ ᠰᠠᠨ ᠪᠢᠯᠡ᠃ ᠤᠷᠠᠯᠢᠭ ᠤᠨ ᠮᠥᠨ ᠴᠢᠨᠠᠷ᠂ ᠭᠣᠸ᠎ᠠ ᠵᠦᠢ ᠶᠢᠨ ᠬᠢᠯᠢ ᠬᠢᠵᠠᠭᠠᠷ ᠢ ᠡᠪᠳᠡᠭᠰᠡᠨ ᠰᠠᠳᠤᠷ ᠵᠠᠪᠬᠠᠢ ᠡᠳ᠋ ᠭᠡᠰᠡᠨ ᠶᠤᠮ ᠪᠢᠵᠡ ᠳ᠋ᠡ᠃ ᠬᠡᠴᠢᠨᠡᠨ ᠠᠳᠠ ᠦᠵᠡᠭᠳᠡᠵᠦ᠂ ᠬᠠᠪᠴᠢᠭᠳᠠᠵᠤ ᠪᠠᠶᠢᠭᠰᠠᠨ ᠴᠤ ᠮᠡᠯᠡᠬᠡᠢ ᠶᠢᠨ ᠵᠠᠮ ᠷᠣᠮᠠᠨ ᠣᠶᠤᠨ ᠰᠠᠨᠠᠭᠠᠨ ᠤ ᠦᠨᠡᠲᠦ ᠪᠦᠲᠦᠭᠡᠯ ᠳᠦ ᠲᠣᠭᠠᠴᠠᠭᠳᠠᠬᠤ ᠪᠣᠯᠵᠠᠢ᠃ ᠡᠨᠡ ᠨᠣᠮ ᠤᠨ ᠲᠤᠬᠠᠢ ᠪᠢ ᠨᠢᠭᠡ ᠲᠡᠮᠳᠡᠭᠯᠡᠯ ᠪᠢᠴᠢᠭᠰᠡᠨ ᠤᠬᠠᠭᠠᠨ ᠲᠠᠢ᠃ ᠲᠡᠷᠡ ᠪᠣᠯ ᠵᠦᠭᠡᠷ ᠰᠢᠯᠦᠰᠦ ᠬᠠᠶᠠᠬᠤ ᠲᠡᠳᠦᠢ᠃ ᠮᠡᠳᠡᠳᠡᠭ᠂ ᠮᠡᠳᠡᠷᠡᠳᠡᠭ᠂ ᠴᠢᠳᠠᠳᠠᠭ ᠶᠤᠮ ᠪᠣᠯ ᠬᠡᠴᠢᠨᠡᠨ ᠠᠷᠪᠠᠨ ᠡᠰᠰᠡ ᠪᠢᠴᠢᠭᠰᠡᠨ ᠴᠤ ᠪᠣᠯᠤᠨ᠎ᠠ᠃ ᠶᠠᠭ ᠲᠡᠶᠢᠮᠦ ᠭᠡᠳ ᠲᠠᠶᠢᠯᠪᠤᠷᠢᠯᠠᠬᠤ ᠠᠷᠭ᠎ᠠ ᠦᠭᠡᠢ ᠪᠠᠶᠢᠳᠠᠭ ᠨᠢ ᠤᠷᠠᠯᠢᠭ ᠤᠨ ᠵᠢᠩᠬᠢᠨᠢ ᠮᠦᠨ ᠴᠢᠨᠠᠷ ᠪᠠᠶᠢᠬᠤ᠃ ᠲᠡᠭᠡᠪᠡᠯ ᠮᠡᠯᠡᠬᠡᠢ ᠶᠢᠨ ᠵᠠᠮ ᠶᠠᠭ ᠡᠶᠢᠮᠦ ᠠᠭᠤᠯᠭ᠎ᠠ ᠲᠠᠢ ᠭᠡᠳ ᠬᠡᠯᠡᠴᠢᠬᠡᠬᠦ ᠭᠡᠬᠦ ᠪᠡᠷ ᠣᠶᠤᠨ ᠤ ᠪᠢᠳ ᠬᠦᠷᠬᠦ ᠦᠭᠡᠢ ᠨᠢ᠃ ᠵᠦᠭᠡᠷ ᠨᠢᠭᠡ ᠰᠣᠨᠢᠨ ᠨᠢ ᠨᠠᠳᠠ ᠳᠤ ᠠᠯᠳᠠᠷᠲᠤ ᠦᠯᠢᠰᠰ ᠷᠣᠮᠠᠨ ᠢ ᠯᠠ ᠶᠡᠬᠡ ᠰᠠᠨᠠᠭᠳᠠᠭᠤᠯᠤᠭᠰᠠᠨ᠂ ᠪᠢᠴᠢᠯ ᠬᠤᠪᠢᠯᠪᠤᠷᠢ ᠨᠢ ᠴᠤ ᠶᠤᠮ ᠰᠢᠭ ᠪᠢᠴᠢᠯᠭᠡ ᠶᠢᠨ ᠥᠩᠭᠡ ᠠᠶᠠᠰ᠂ ᠬᠡᠪ ᠮᠠᠶ᠋ᠢᠭ ᠨᠢ ᠲᠡᠶᠢᠮᠦᠷᠬᠦ ᠲᠥᠰᠲᠡᠢ᠃ ᠮᠠᠨ ᠤ ᠮᠣᠳᠧᠷᠨᠢᠰᠲ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠭᠠᠯᠰᠠᠩᠰᠦ᠋ᠬᠡ ᠬᠦᠦᠷᠨᠢᠯ ᠵᠣᠬᠢᠶᠠᠯᠴᠢ ᠪᠠᠶᠢᠭᠰᠠᠨ ᠪᠣᠯ ᠶᠠᠭ ᠯᠠ ᠢᠩᠭᠢᠵᠦ ᠪᠢᠴᠢᠨ᠎ᠡ ᠳ᠋ᠡ ᠭᠡᠵᠦ ᠪᠣᠳᠣᠭᠳᠠᠭᠰᠠᠨ᠃ ᠶᠠᠭᠤᠨ ᠳᠤ ᠴᠤ ᠦᠯᠦ ᠬᠣᠷᠢᠭᠳᠠᠬᠤ ᠵᠠᠳᠠᠭᠠᠢ ᠰᠡᠳᠬᠢᠯᠭᠡ᠂ ᠠᠪᠢᠶᠠᠰ ᠤᠨ ᠳᠤᠷ᠎ᠠ ᠲᠠᠯᠪᠢᠯᠲᠠ ᠭᠡᠵᠦ ᠡᠨᠡ ᠶᠤᠮ ᠤᠤ ᠳ᠋ᠠ᠃ 2018-09-11 ᠲᠦᠮᠡᠲᠦ ᠰᠢᠨ᠎ᠡ ᠬᠥᠷᠪᠡᠭᠦᠯᠪᠡ

5        0       

                             13847524386      211429899@qq.com      13847524386   QQ  211429899 蒙ICP备17002503号-1