ᠰᠢᠨ᠎ᠡ ᠭᠡᠷ ᠦᠨ ᠨᠠᠶᠢᠷ ᠨᠡᠶᠢᠭᠡᠮ ᠤᠨ ᠨᠢᠭᠡᠴᠡ ᠪᠣᠯᠤᠭᠰᠠᠨ ᠠᠶᠢᠯ ᠡᠷᠦᠬᠡ ᠣᠷᠣᠰᠢᠨ ᠪᠠᠶᠢᠵᠤ ᠵᠢᠷᠭᠠᠬᠤ ᠶᠢᠨ ᠨᠢᠭᠡ ᠨᠥᠬᠥᠴᠡᠯ ᠨᠢ ᠣᠷᠣᠨ ᠭᠡᠷ ᠶᠤᠮ᠃ ᠡᠶᠢᠮᠦ ᠤᠴᠢᠷ ᠠᠴᠠ 《ᠤᠲᠤᠭ᠎ᠠ ᠲᠠᠯᠪᠢᠵᠤ ᠭᠣᠯᠣᠮᠲᠠ ᠪᠣᠯᠳᠠᠭ᠂ ᠤᠷᠤᠴᠠ ᠪᠠᠷᠢᠵᠤ ᠠᠶᠢᠯ ᠪᠣᠯᠳᠠᠭ》 ᠭᠡᠰᠡᠨ ᠰᠡᠴᠡᠨ ᠦᠭᠡ ᠭᠠᠷᠴᠠᠢ᠃ ᠭᠡᠷ ᠪᠠᠷᠢᠬᠤ ᠨᠢ ᠬᠤᠷᠢᠮᠯᠠᠬᠤ ᠶᠣᠰᠣᠯᠠᠯ ᠤᠨ ᠭᠣᠣᠯ ᠬᠡᠰᠡᠭ ᠪᠠᠶᠢᠳᠠᠭ ᠠᠴᠠ ᠭᠠᠳᠠᠨ᠎ᠠ ᠵᠠᠷᠢᠮ ᠠᠶᠢᠯ ᠠᠵᠤ ᠠᠮᠢᠳᠤᠷᠠᠯ ᠨᠢ ᠳᠡᠭᠡᠭᠰᠢᠯᠡᠬᠦ ᠬᠢᠷᠢ ᠪᠡᠷ ᠰᠢᠨ᠎ᠡ ᠪᠡᠷ ᠭᠡᠷ ᠲᠥᠬᠦᠭᠡᠷᠡᠵᠥ ᠪᠠᠷᠢᠬᠤ ᠶᠠᠪᠤᠳᠠᠯ ᠲᠦᠭᠡᠮᠡᠯ ᠶᠤᠮ᠃ ᠰᠢᠨ᠎ᠡ ᠭᠡᠷ ᠦᠨ ᠶᠣᠰᠣᠯᠠᠯ ᠤᠨ ᠦᠶ᠎ᠡ ᠳᠦ ᠬᠡᠯᠡᠬᠦ ᠢᠷᠦᠭᠡᠯ᠂ ᠪᠡᠯᠭᠡ ᠶᠢᠨ ᠦᠭᠡ ᠶᠢ ᠭᠡᠷ ᠦᠨ ᠢᠷᠦᠭᠡᠯ᠂ ᠭᠡᠷ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡ ᠭᠡᠵᠦ ᠢᠯᠭᠠᠳᠠᠭ᠃ ᠭᠡᠷ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡ ᠶᠢ ᠭᠡᠷ ᠪᠦᠯᠢ ᠶᠢᠨ ᠨᠠᠶᠢᠷ ᠳᠡᠭᠡᠷ᠎ᠡ ᠬᠡᠯᠡᠳᠡᠭ ᠪᠣᠯ ᠭᠡᠷ ᠦᠨ ᠢᠷᠦᠭᠡᠯ ᠢ ᠬᠤᠷᠢᠮ ᠤᠨ ᠦᠶ᠎ᠡ ᠳᠦ ᠬᠡᠯᠡᠳᠡᠭ ᠣᠨᠴᠠᠯᠢᠭ ᠲᠠᠢ᠃ ᠮᠥᠨ ᠬᠤᠷᠢᠮᠯᠠᠬᠤ ᠶᠣᠰᠣᠯᠠᠯ ᠤᠨ ᠦᠶ᠎ᠡ ᠳᠦ ᠬᠦᠷᠭᠡᠨ ᠦ ᠲᠠᠯ᠎ᠠ ᠭᠡᠷ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡ ᠬᠡᠯᠡᠳᠡᠭ ᠪᠣᠯ ᠪᠡᠷᠢ ᠶᠢᠨ ᠲᠠᠯ᠎ᠠ ᠭᠡᠷ ᠳᠣᠲᠣᠷᠠᠬᠢ ᠵᠦᠢᠯ ᠢ ᠢᠷᠦᠭᠡᠳᠡᠭ᠃ ᠰᠢᠨ᠎ᠡ ᠭᠡᠷ ᠢᠶᠡᠨ ᠪᠠᠷᠢᠴᠢᠬᠠᠭᠠᠳ ᠵᠣᠴᠢᠳ ᠢ ᠭᠡᠷ ᠲᠦ ᠣᠷᠣᠬᠤ ᠶᠢ ᠤᠷᠢᠨ ᠰᠠᠭᠤᠯᠭᠠᠭᠰᠠᠨ ᠤ ᠳᠠᠷᠠᠭ᠎ᠠ ᠭᠡᠷ ᠦᠨ ᠡᠵᠡᠨ ᠲᠣᠭᠣᠨᠤ ᠡᠴᠡ ᠬᠠᠳᠠᠭ ᠵᠡᠭᠦᠭᠰᠡᠨ ᠢᠶᠡᠷ ᠭᠡᠷ ᠮᠢᠯᠢᠶᠠᠬᠤ ᠦᠭᠡ ᠬᠡᠯᠡᠵᠦ᠂ ᠨᠠᠶᠢᠷ ᠡᠬᠢᠯᠡᠨ᠎ᠡ᠃ ᠭᠡᠷ ᠮᠢᠯᠢᠶᠠᠯᠭ᠎ᠠ ᠶᠢᠨ ᠢᠷᠦᠭᠡᠯ ᠬᠡᠯᠡᠬᠦ ᠦᠶ᠎ᠡ ᠳᠦ ᠰᠠᠴᠤᠯᠢ ᠶᠢᠨ ᠬᠤᠪᠢᠩ ᠳᠦᠭᠦᠷᠡᠩ ᠰᠦᠨ ᠡᠴᠡ ᠲᠣᠭᠣᠨᠣ᠂ ᠤᠨᠢ᠂ ᠬᠠᠨ᠎ᠠ ᠥᠭᠡᠳᠡ ᠰᠠᠴᠤᠯᠢ ᠡᠷᠭᠦᠬᠦ ᠪᠤᠶᠤ ᠡᠰᠡᠪᠡᠯ ᠬᠣᠨᠢᠨ ᠤ ᠲᠣᠯᠣᠭᠠᠢ᠂ ᠳᠥᠷᠪᠡᠨ ᠥᠨᠳᠥᠷ᠂ ᠱᠠᠭᠠᠨᠲᠤ ᠴᠢᠮᠦᠭᠡ᠂ ᠤᠭᠤᠷᠠᠭ ᠰᠡᠭᠦᠯ ᠵᠡᠷᠭᠡ ᠶᠢ ᠤᠷᠲᠤ ᠮᠣᠳᠣᠨ ᠤ ᠦᠵᠦᠭᠦᠷ ᠲᠦ ᠬᠠᠳᠬᠤᠨ ᠴᠠᠭᠠᠨ ᠢᠳᠡᠭᠡ ᠪᠡᠷ ᠴᠢᠮᠡᠭᠡᠳ ᠢᠷᠦᠭᠡᠯ ᠪᠡᠯᠭᠡ ᠶᠢᠨ ᠦᠭᠡ ᠳ᠋ᠤ ᠭᠠᠷᠴᠤ ᠪᠤᠢ ᠡᠳ᠋ ᠵᠦᠢᠯᠡᠰ ᠥᠭᠡᠳᠡ ᠳᠣᠬᠢᠨ ᠶᠣᠰᠣᠯᠠᠯ ᠦᠢᠯᠡᠳᠳᠡᠭ᠃ ᠢᠷᠦᠭᠡᠯ ᠬᠡᠯᠡᠵᠦ ᠳᠠᠭᠤᠰᠤᠭᠠᠳ ᠢᠳᠡᠭᠡᠨ ᠦ ᠳᠡᠭᠡᠷᠡᠬᠢ ᠵᠦᠢᠯᠡᠰ ᠡᠴᠡ ᠳᠡᠭᠡᠵᠢᠯᠡᠨ ᠭᠠᠯ ᠳᠤ ᠡᠷᠭᠦᠨ ᠲᠣᠯᠣᠭᠠᠢ ᠶᠢ ᠲᠣᠭᠣᠨᠣ ᠶᠢᠨ ᠭᠣᠣᠯ ᠳᠡᠭᠡᠷ᠎ᠡ ᠲᠠᠯᠪᠢᠵᠤ᠂ ᠳᠥᠷᠪᠡᠨ ᠴᠢᠭᠲᠠᠭ᠎ᠠ ᠳᠤ ᠪᠢᠰᠢᠯᠠᠭ ᠬᠠᠪᠴᠢᠭᠤᠯᠤᠨ ᠭᠤᠷᠪᠠ ᠬᠣᠨᠣᠭᠤᠯᠤᠨ᠎ᠠ᠃ ᠭᠡᠷ ᠮᠢᠯᠢᠶᠠᠬᠤ ᠡᠯ᠎ᠡ ᠵᠠᠩ ᠦᠢᠯᠡ ᠨᠢ ᠭᠠᠯ ᠭᠣᠯᠣᠮᠲᠠ ᠲᠠᠬᠢᠬᠤ ᠡᠷᠲᠡᠨ ᠦ ᠶᠣᠰᠣᠯᠠᠯ ᠠᠴᠠ ᠡᠭᠦᠰᠦᠯ ᠲᠡᠢ ᠭᠡᠵᠦ ᠪᠣᠯᠤᠨ᠎ᠠ᠃ ᠭᠡᠷ ᠦᠨ ᠢᠷᠦᠭᠡᠯ᠂ ᠭᠡᠷ ᠦᠨ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡᠨ ᠳᠦ ᠠᠯᠢᠪᠠ ᠢᠷᠦᠭᠡᠯ ᠳᠦ ᠪᠠᠶᠢᠳᠠᠭ ᠲᠣᠭᠲᠠᠮᠠᠯ ᠡᠬᠢᠯᠡᠯ ᠦᠨ ᠵᠡᠷᠭᠡᠴᠡᠭᠡ ᠭᠡᠷ ᠦᠨ ᠬᠡᠰᠡᠭ ᠡᠳ᠋ ᠬᠣᠭᠰᠢᠯ ᠢ ᠲᠣᠭᠠᠴᠢᠨ ᠮᠠᠭᠲᠠᠳᠠᠭ᠃ ᠲᠡᠭᠡᠬᠦ ᠳᠦ ᠪᠡᠨ ᠬᠠᠭᠠᠯᠭ᠎ᠠ᠂ ᠲᠣᠭᠣᠨᠣ ᠬᠣᠶᠠᠷ ᠤᠨ ᠠᠯᠢ ᠨᠢᠭᠡ ᠶᠢ ᠡᠬᠢᠯᠡᠨ ᠮᠠᠭᠲᠠᠵᠤ ᠬᠠᠨ᠎ᠠ᠂ ᠤᠨᠢ᠂ ᠳᠡᠭᠡᠪᠦᠷ᠂ ᠲᠤᠭᠤᠷᠭ᠎ᠠ᠂ ᠣᠭᠣᠰᠣᠷ᠂ ᠬᠣᠰᠢᠯᠠᠩ᠂ ᠡᠷᠦᠬᠡ ᠪᠤᠰᠤᠳ ᠲᠠᠪᠢᠯᠭ᠎ᠠ ᠬᠡᠷᠡᠭᠯᠡᠯ ᠭᠡᠰᠡᠨ ᠨᠠᠷᠢᠨ ᠲᠣᠭᠲᠠᠭᠰᠠᠨ ᠳᠡᠰ ᠳᠠᠷᠠᠭᠠᠯᠠᠯ ᠲᠠᠢ ᠪᠠᠶᠢᠳᠠᠭ ᠨᠢ ᠭᠡᠷ ᠪᠠᠷᠢᠬᠤ ᠦᠶ᠎ᠡ ᠳᠦ ᠬᠢᠬᠦ ᠦᠢᠯᠡ ᠶᠠᠪᠤᠴᠠ ᠶᠢᠨ ᠳᠠᠷᠠᠭᠠᠯᠠᠯ ᠲᠠᠢ ᠬᠣᠯᠪᠣᠭ᠎ᠠ ᠲᠠᠢ ᠶᠤᠮ᠃ ᠭᠡᠷ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡᠨ ᠳᠦ ᠭᠡᠷ ᠦᠨ ᠪᠦᠲᠦᠴᠡ ᠬᠡᠰᠡᠭ ᠢᠶᠡᠷ ᠨᠢ ᠵᠠᠳᠠᠯᠤᠨ ᠲᠣᠭᠣᠴᠢᠵᠤ ᠮᠠᠭᠲᠠᠬᠤ ᠳᠤ ᠪᠠᠨ ᠵᠥᠪᠬᠡᠨ ᠲᠤᠬᠠᠢ ᠶᠢᠨ ᠵᠦᠢᠯᠡᠰ ᠢ ᠪᠤᠰᠤ ᠲᠡᠭᠦᠨ ᠢ ᠬᠢᠵᠦ ᠪᠦᠲᠦᠭᠡᠬᠦ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ᠂ ᠬᠦᠳᠡᠯᠮᠦᠷᠢᠯᠡᠬᠦ ᠦᠢᠯᠡ ᠶᠠᠪᠤᠴᠠ ᠶᠢ ᠳᠦᠷᠰᠦᠯᠡᠨ ᠮᠠᠭᠲᠠᠵᠤ ᠰᠢᠯᠦᠭᠯᠡᠳᠡᠭ᠃ ᠡᠳᠡᠭᠡᠷ ᠦᠨ ᠳᠣᠲᠣᠷ᠎ᠠ ᠭᠡᠷ ᠦᠨ ᠳᠡᠭᠡᠪᠦᠷ᠂ ᠲᠤᠭᠤᠷᠭ᠎ᠠ ᠲᠡᠷᠢᠭᠦᠲᠡᠨ ᠦ ᠲᠤᠬᠠᠢ ᠬᠡᠯᠡᠭᠰᠡᠨ ᠨᠢ ᠣᠨᠴᠠᠭᠠᠢ ᠪᠠᠶᠢᠷᠢ ᠶᠢ ᠡᠵᠡᠯᠡᠬᠦ ᠪᠥᠭᠡᠳ ᠢᠰᠡᠭᠡᠢ ᠶᠢᠨ ᠢᠷᠦᠭᠡᠯ ᠲᠡᠢ ᠲᠥᠰᠲᠡᠢ᠃ ᠲᠤᠬᠠᠶᠢᠯᠠᠪᠠᠯ ᠡᠮ᠎ᠡ ᠬᠣᠨᠢᠨ ᠤ ᠨᠣᠣᠰᠣ ᠪᠠᠷ ᠡᠪᠯᠡᠭᠦᠯᠦᠨ ᠵᠤᠯᠤᠵᠤ ᠬᠢᠭᠰᠡᠨ ᠡᠯᠡᠰᠦᠲᠦ ᠭᠣᠣᠯ ᠤᠨ ᠤᠰᠤ ᠪᠠᠷ ᠱᠠᠪᠰᠢᠨ ᠤᠰᠤᠯᠠᠵᠤ ᠬᠢᠭᠰᠡᠨ ᠡᠷᠴᠢᠮ ᠰᠠᠶᠢᠨ ᠮᠣᠷᠢ ᠪᠠᠷ ᠲᠠᠲᠠᠨ ᠴᠢᠷᠴᠥ ᠬᠢᠭᠰᠡᠨ ᠡᠩᠲᠡᠢ ᠴᠠᠭᠠᠨ ᠲᠤᠭᠤᠷᠭ᠎ᠠ ᠳᠡᠭᠡᠪᠦᠷ ᠢ ᠴᠢᠨᠢ ᠮᠢᠯᠢᠶᠠᠶ᠎ᠠ ᠭᠡᠵᠦ ᠮᠠᠭᠲᠠᠵᠤ ᠪᠠᠶᠢᠨ᠎ᠠ᠃ ᠶᠡᠷᠦ ᠨᠢ ᠭᠡᠷ ᠦᠨ ᠢᠷᠦᠭᠡᠯ᠂ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡ ᠡᠴᠡ ᠮᠣᠩᠭᠣᠯᠴᠤᠳ ᠤᠨ ᠢᠰᠡᠭᠡᠢ ᠬᠢᠬᠦ᠂ ᠣᠭᠣᠰᠣᠷ ᠬᠣᠰᠢᠯᠠᠩ ᠲᠣᠮᠣᠬᠤ᠂ ᠰᠢᠷᠳᠡᠭ ᠳᠡᠪᠢᠰᠬᠡᠷ ᠰᠢᠷᠢᠵᠥ᠂ ᠮᠣᠳᠣ ᠶᠢ ᠪᠣᠯᠪᠠᠰᠤᠷᠠᠭᠤᠯᠬᠤ ᠵᠡᠷᠭᠡ ᠠᠵᠢᠯ ᠬᠥᠳᠡᠯᠮᠦᠷᠢ ᠶᠢᠨ ᠤᠷ᠎ᠠ ᠴᠢᠳᠠᠪᠤᠷᠢ᠂ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ ᠲᠠᠢ ᠲᠠᠨᠢᠯᠴᠠᠵᠤ ᠪᠣᠯᠤᠨ᠎ᠠ᠃ ᠡᠶᠢᠨᠬᠦᠦ ᠰᠢᠨ᠎ᠡ ᠭᠡᠷ ᠦᠨ ᠢᠷᠦᠭᠡᠯ᠂ ᠮᠢᠯᠢᠶᠠᠯᠭ᠎ᠠ ᠶᠢᠨ ᠦᠭᠡ ᠬᠡᠯᠡᠭᠰᠡᠨ ᠦ ᠳᠠᠷᠠᠭ᠎ᠠ ᠨᠠᠶᠢᠷ ᠤᠨ ᠶᠡᠷᠦᠩᠬᠡᠢ ᠳᠢᠭ ᠦᠨ ᠳᠠᠭᠠᠤ ᠨᠠᠶᠢᠷᠯᠠᠨ᠎ᠠ᠃ ᠮᠡᠳᠡᠭᠡᠯᠡᠯ ᠦᠨ ᠡᠬᠡ ᠰᠤᠷᠪᠤᠯᠵᠢ᠄ 《ᠮᠣᠩᠭᠣᠯ ᠤᠨ ᠦᠨᠳᠦᠰᠦᠨ ᠦ ᠪᠡᠶᠡᠲᠦ ᠪᠤᠰᠤ ᠰᠤᠶᠤᠯ ᠤᠨ ᠥᠪ》 ᠨᠣᠮ᠃