ᠲᠤᠭᠤᠵᠢ
ᠮᠥᠷᠥᠭᠡᠳᠦᠯ ᠦᠨ ᠡᠭᠡᠴᠢ
ᠮᠥᠷᠥᠭᠡᠳᠦᠯ ᠦᠨ ᠡᠭᠡᠴᠢ
4999
2018-11-14 17:00
发表于:内蒙古
ᠼ ∙ ᠲᠦᠮᠡᠨᠪᠠᠶᠠᠷ : ᠮᠥᠷᠥᠭᠡᠳᠦᠯ ᠦᠨ ᠡᠭᠡᠴᠢ
ᠪᠢ ᠲᠡᠷᠡ ᠦᠶᠡ ᠳᠦ ᠳᠥᠩᠭᠡᠵᠢ ᠳᠣᠯᠣᠭᠠᠬᠠᠨ ᠨᠠᠰᠤᠲᠠᠢ ᠪᠠᠶᠢᠵᠠᠢ᠃ ᠴᠠᠰᠤᠨ ᠰᠢᠭᠤᠷᠭᠠᠨ ᠳᠤ ᠰᠠᠯᠬᠢ ᠰᠥᠷᠥᠨ ᠠᠯᠬᠤᠬᠤ ᠳᠤ ᠲᠣᠮᠣᠳᠠᠭᠰᠠᠨ ᠬᠠᠭᠤᠴᠢᠨ ᠬᠥᠷᠮᠡ ᠶᠢᠨ ᠮᠢᠨᠢ ᠬᠣᠷᠮᠣᠢ ᠬᠥᠭᠡᠷᠭᠡᠳᠡᠨ ᠵᠢᠬᠡᠭᠦᠨ ᠵᠢᠪᠠᠷ ᠲᠤ ᠨᠢᠷᠤᠭᠤ᠂ ᠭᠡᠳᠡᠰᠦ ᠬᠠᠭᠠᠷᠢᠭᠳᠠᠨᠠ᠃ ᠰᠠᠯᠬᠢᠨ ᠳᠤ ᠠᠯᠳᠠᠴᠢᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠲᠠᠯᠬᠠᠨ ᠤ ᠮᠥᠩᠭᠥ ᠪᠡᠨ ᠴᠢᠩᠭᠠ ᠪᠠᠵᠠᠭᠰᠠᠨ ᠭᠠᠷ ᠮᠢᠨᠢ ᠪᠠᠳᠠᠶᠢᠷᠠᠨ᠂ ᠰᠠᠷᠢᠰᠤ ᠰᠢᠭ ᠬᠣᠶᠠᠷ ᠳᠡᠯᠳᠡᠩ ᠴᠢᠬᠢ ᠮᠢᠨᠢ ᠲᠠᠰᠤᠷᠠᠨ ᠠᠯᠳᠠᠵᠤ ᠴᠢᠰ ᠴᠢᠰᠬᠢᠨᠡ᠃ ᠶᠠᠳᠠᠵᠤ ᠳᠡᠯᠭᠡᠭᠦᠷ ᠬᠣᠯᠠ᠂ ᠭᠤᠷᠪᠠᠨ ᠭᠤᠳᠤᠮᠵᠢᠨ ᠤ ᠴᠠᠭᠠᠨᠠ᠃ ᠳᠡᠯᠭᠡᠭᠦᠷ ᠦᠨ ᠬᠠᠭᠠᠯᠭᠠᠨ ᠳᠤ ᠰᠠᠪᠠᠭᠤᠯᠬᠤ ᠰᠢᠬᠠᠮ ᠠᠷᠠᠢ ᠭᠡᠵᠦ ᠣᠷᠣᠭᠠᠳ ᠪᠠᠳᠠᠶᠢᠷᠠᠭᠰᠠᠨ ᠠᠯᠠᠭᠠ ᠪᠠᠨ ᠠᠯᠭᠤᠷᠬᠠᠨ ᠳᠡᠯᠭᠡᠵᠦ᠂ ᠮᠥᠩᠭᠥ ᠪᠡᠨ ᠥᠭᠭᠦᠯᠡ᠃
ᠲᠠᠯᠬᠠ ᠪᠠᠨ ᠡᠩᠭᠡᠷ ᠲᠦ ᠪᠡᠨ ᠲᠡᠪᠡᠷᠢᠨ ᠳᠡᠯᠭᠡᠭᠦᠷ ᠡᠴᠡ ᠭᠠᠷᠬᠤ ᠳᠤ ᠥᠭᠡᠳᠡ ᠡᠴᠡ ᠮᠥᠰᠥ ᠮᠡᠲᠦ ᠰᠠᠯᠬᠢ ᠰᠢᠪᠬᠠᠭᠤᠷᠳᠠᠨ ᠬᠠᠶᠢᠷᠠ ᠨᠠᠶᠢᠷ ᠦᠭᠡᠢ ᠬᠠᠴᠠᠷ ᠢ ᠮᠢᠨᠢ ᠠᠯᠠᠭᠠᠳᠠᠬᠤ ᠳᠤ᠂ ᠠᠮᠢᠰᠬᠤᠯ ᠮᠢᠨᠢ ᠪᠥᠭᠯᠡᠷᠡᠵᠦ᠂ ᠲᠣᠯᠣᠭᠠᠢ ᠪᠠᠨ ᠳᠠᠯᠵᠢᠭᠠᠰᠬᠢᠯᠭᠡᠬᠦ ᠳ᠋ᠦ ᠥᠨᠥ ᠮᠠᠭᠤ ᠬᠥᠷᠮᠡ ᠶᠢᠨ ᠬᠢ ᠨᠢ ᠡᠩᠭᠡᠷ ᠬᠣᠶᠠᠷ ᠲᠡᠰᠢ ᠢᠷᠠᠭᠳᠠᠨ᠂ ᠳᠠᠯᠠᠪᠴᠢ ᠰᠢᠭ ᠬᠡᠶᠢᠰᠦᠯᠡ᠃ ᠪᠢ ᠲᠠᠯᠬᠠ ᠪᠠᠨ ᠭᠠᠵᠠᠷ ᠠᠯᠳᠠᠵᠤ᠂ ᠬᠤᠩᠭᠠᠷᠯᠠᠭᠰᠠᠨ ᠴᠠᠰᠤᠨ ᠳᠤ ᠡᠯᠢᠶᠡ ᠰᠢᠭ ᠯᠠ ᠨᠡᠪᠰᠡᠭᠡᠰᠬᠢᠨ ᠤᠨᠠᠯᠠ᠃ ᠴᠠᠰᠤᠨ ᠬᠤᠩᠭᠠᠷ ᠲᠤ ᠬᠠᠮᠠᠷ ᠢᠶᠠᠷ ᠢᠶᠠᠨ ᠬᠠᠳᠬᠤᠨ ᠤᠨᠠᠬᠤ ᠲᠡᠷᠡ ᠭᠱᠠᠨ ᠳᠤ ᠬᠠᠮᠢᠭᠠ ᠠᠴᠠ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠵᠠᠯᠠᠭᠤᠬᠠᠨ ᠡᠭᠡᠴᠢ ᠨᠠᠮᠠ ᠶᠢ ᠲᠠᠲᠠᠵᠤ ᠪᠣᠰᠬᠠᠯᠠ᠃ 《ᠮᠢᠨᠦ ᠳᠡᠭᠦᠦ ᠪᠣᠰ᠂ ᠬᠥᠯᠳᠡᠯᠡ ᠰᠢᠦ ᠳ᠋ᠡ》 ᠬᠡᠮᠡᠨ ᠴᠠᠰᠤ ᠶᠢ ᠮᠢᠨᠢ ᠭᠥᠪᠢᠵᠦ ᠥᠭᠬᠦ ᠳᠦ ᠲᠡᠷᠡ ᠡᠭᠡᠴᠢ ᠶᠢᠨ ᠬᠥᠭᠵᠢᠭᠦᠨ ᠪᠠᠶᠠᠰᠬᠤᠯᠠᠩ ᠲᠠᠢ ᠴᠢᠷᠠᠢ᠂ ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦᠨ ᠡᠴᠡ ᠤᠷᠢᠳᠤ ᠡᠮᠦᠨᠡ ᠮᠢᠨᠦ ᠬᠡᠵᠢᠶᠡ ᠴᠤ ᠮᠡᠳᠡᠷᠡᠵᠥ ᠪᠠᠶᠢᠭᠠ ᠦᠭᠡᠢ ᠲᠡᠶᠢᠮᠦ ᠶᠡᠬᠡ ᠭᠡᠷᠡᠯᠲᠦ ᠬᠠᠶᠢᠷᠠ ᠠᠰᠬᠠᠷᠴᠣ᠂ ᠡᠨᠡ ᠬᠦᠢᠲᠡᠨ ᠳ᠋ᠤ ᠬᠠᠮᠢᠭᠠ ᠠᠴᠠ ᠨᠢ ᠭᠠᠷᠳᠠᠭ ᠬᠠᠯᠠᠭᠤᠨ ᠪᠤᠢ ᠭᠡᠮᠡᠷ ᠬᠠᠴᠢᠨ ᠳᠤᠯᠠᠭᠠᠬᠠᠨ ᠭᠠᠷ ᠢᠶᠠᠷ ᠢᠶᠠᠨ ᠲᠠᠰᠤᠷᠠᠬᠤ ᠰᠢᠬᠠᠭᠰᠠᠨ ᠴᠢᠬᠢ ᠶᠢ ᠮᠢᠨᠢ ᠳᠠᠷᠤᠵᠤ᠂ ᠬᠣᠶᠠᠷ ᠭᠠᠷ ᠢ ᠮᠢᠨᠢ ᠠᠳᠬᠤᠵᠤ ᠪᠦᠯᠢᠶᠡᠴᠡᠭᠦᠯᠬᠦ ᠳᠦ ᠪᠦᠬᠦᠢ ᠯᠠ ᠪᠡᠶᠡ ᠮᠢᠨᠢ ᠬᠠᠯᠠᠭᠤ ᠣᠷᠭᠢᠬᠤ ᠰᠢᠭ ᠪᠣᠯᠤᠭᠰᠠᠨ ᠰᠠᠨ᠃ ᠪᠢ ᠪᠦᠷ ᠶᠠᠭᠤ ᠴᠤ ᠭᠡᠵᠦ ᠬᠡᠯᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠳᠡᠮᠡᠢ ᠯᠠ ᠡᠷᠡᠦ ᠠᠮᠠ ᠪᠠᠨ ᠵᠣᠳᠣᠯᠳᠤᠭᠤᠯᠤᠨ ᠳᠠᠭᠵᠢᠲᠠᠯᠠ ᠴᠡᠴᠡᠷᠡᠨ ᠵᠣᠭᠰᠣᠬᠤ ᠳᠤ ᠥᠨᠥ ᠡᠭᠡᠴᠢ ᠲᠣᠪᠴᠢ ᠨᠢ ᠲᠠᠰᠤᠷᠠᠭᠠᠳ ᠤᠨᠠᠴᠢᠬᠠᠭᠰᠠᠨ ᠬᠥᠷᠮᠡ ᠶᠢᠨ ᠡᠩᠭᠡᠷ ᠢ ᠯᠠᠪ ᠭᠡᠭᠴᠢ ᠨᠢ ᠵᠥᠷᠢᠭᠦᠯᠦᠭᠡᠳ᠂ ᠵᠠᠬᠠ ᠶᠢ ᠮᠢᠨᠢ ᠪᠣᠰᠬᠠᠵᠤ᠂ ᠭᠠᠵᠠᠷ ᠠᠯᠳᠠᠭᠰᠠᠨ ᠲᠠᠯᠬᠠ ᠶᠢ ᠮᠢᠨᠢ ᠲᠡᠪᠡᠷᠢᠭᠦᠯᠦᠨ 《ᠵᠠ ᠳᠡᠭᠦᠦ ᠮᠢᠨᠢ ᠳᠡᠭᠳᠡᠭᠡᠳ ᠬᠠᠷᠢᠴᠢᠬᠠ》 ᠭᠡᠵᠦ ᠥᠬᠦᠭᠡᠷᠳᠡᠭᠰᠡᠨ ᠥᠩᠭᠡ ᠪᠡᠷ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠵᠦ ᠪᠢᠯᠡ᠃
ᠪᠢ ᠲᠠᠯᠬᠠ ᠪᠠᠨ ᠲᠠᠰᠤ ᠲᠡᠪᠡᠷᠢᠨ ᠭᠡᠷ ᠳᠦ ᠪᠡᠨ ᠭᠦᠶᠦᠭᠰᠡᠨ ᠢᠶᠡᠨ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠡᠷᠭᠢᠨ ᠥᠨᠥ ᠡᠭᠡᠴᠢ ᠶᠢᠨ ᠠᠷᠤ ᠠᠴᠠ ᠮᠡᠯᠮᠡᠷᠡᠲᠡᠯᠡ ᠰᠢᠷᠲᠡᠨ ᠬᠣᠴᠣᠷᠤᠭᠰᠠᠨ ᠰᠠᠨ᠃ ᠲᠡᠷᠡ ᠡᠭᠡᠴᠢ ᠴᠠᠰᠤᠨ ᠰᠢᠭᠤᠷᠭᠠᠨ ᠠᠴᠠ ᠭᠡᠨᠡᠳᠲᠡᠬᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠰᠢᠭ ᠢᠶᠡᠨ ᠲᠩᠷᠢ ᠡᠴᠡ ᠲᠠᠰᠤᠷᠠᠯᠲᠠ ᠦᠭᠡᠢ ᠯᠠᠪᠰᠠᠨ ᠤᠨᠠᠵᠤ ᠥᠳᠬᠡᠷᠡᠨ ᠡᠭᠡᠷᠡᠭᠰᠡᠨ ᠶᠡᠬᠡ ᠴᠠᠰᠤᠨ ᠳᠤᠮᠳᠠ ᠴᠣᠭᠯᠢᠭ ᠠᠯᠬᠤᠭᠰᠠᠭᠠᠷ ᠰᠢᠩᠭᠡᠨ ᠠᠯᠠᠭᠠ ᠪᠣᠯᠤᠭᠰᠠᠨ ᠰᠠᠨ᠃ ᠲᠡᠭᠦᠨ ᠡᠴᠡ ᠬᠣᠶᠢᠰᠢ ᠨᠥᠭᠥᠭᠡ ᠡᠭᠡᠴᠢ ᠶᠢ ᠭᠠᠷᠤᠭᠠᠳ ᠢᠷᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠪᠦᠲᠦᠨ ᠡᠪᠦᠯᠵᠢᠨ ᠴᠥᠬᠦᠷᠡᠲᠡᠯᠡ ᠪᠡᠨ ᠬᠦᠯᠢᠶᠡᠭᠰᠡᠨ ᠴᠤ ᠪᠠᠷᠠ ᠰᠤᠷᠠᠭ ᠦᠭᠡᠢ᠃ ᠬᠠᠪᠤᠷ ᠴᠠᠰᠤ ᠬᠠᠶᠢᠯᠠᠵᠤ᠂ ᠭᠠᠵᠠᠷ ᠲᠠᠷᠯᠠᠨᠲᠤᠬᠤ ᠳᠤ 《ᠴᠠᠰᠤᠨ ᠳᠤᠮᠳᠠ ᠠᠴᠠ ᠢᠷᠡᠭᠰᠡᠨ᠂ ᠴᠠᠰᠤᠨ ᠳᠤᠮᠳᠠ ᠰᠢᠩᠭᠡᠭᠰᠡᠨ ᠮᠥᠷᠥᠭᠡᠳᠦᠯ ᠦᠨ ᠡᠭᠡᠴᠢ ᠮᠢᠨᠢ…》 ᠭᠡᠵᠦ ᠰᠢᠢᠳᠦᠭᠰᠡᠨ ᠡᠴᠡ ᠪᠡᠨ ᠬᠣᠶᠢᠰᠢ ᠲᠡᠭᠦᠨ ᠢ ᠬᠠᠷᠠᠭᠤᠯᠳᠠᠬᠤ ᠠᠴᠠ ᠪᠣᠯᠢᠭᠰᠠᠨ᠃
ᠭᠡᠪᠡᠴᠦ ᠦᠢᠯᠡ ᠶᠢᠨ ᠬᠣᠷᠸᠠ ᠳᠤ ᠡᠷᠭᠢᠯᠳᠦᠬᠦ ᠬᠡᠷᠦᠮᠡᠯ ᠠᠮᠢᠳᠤᠷᠠᠯ ᠤᠨ ᠮᠢᠨᠢ ᠤᠳᠬᠠ ᠤᠴᠢᠷ᠂ ᠪᠢᠲᠡᠭᠦᠯᠢᠭ ᠮᠥᠷᠥᠭᠡᠳᠦᠯ ᠴᠣᠬᠣᠮ ᠲᠡᠷᠡ ᠳᠤᠯᠠᠭᠠᠬᠠᠨ ᠭᠠᠷ ᠢ ᠣᠯᠬᠤ ᠳᠤ ᠯᠠ ᠶᠤᠮ ᠰᠢᠭ᠂ ᠣᠷᠴᠢᠨ ᠲᠣᠭᠣᠷᠢᠨ ᠳᠤ ᠪᠠᠨ ᠲᠠᠭᠠᠷᠠᠯᠳᠤᠭᠰᠠᠨ ᠪᠦᠰᠡᠭᠦᠢ ᠬᠦᠮᠦᠨ ᠪᠣᠯᠭᠠᠨ ᠠᠴᠠ ᠢᠲᠡᠭᠡᠯ ᠬᠠᠶᠢᠷᠠᠯᠠᠭᠰᠠᠨ ᠰᠢᠳᠢᠲᠦ ᠬᠠᠷᠠᠴᠠ ᠶᠢ ᠡᠷᠢᠭᠰᠡᠭᠡᠷ ᠯᠠ ᠶᠠᠪᠤᠯᠠ᠃
ᠨᠠᠮᠠ ᠶᠢ ᠲᠠᠯᠬᠠᠨ ᠳᠤ ᠶᠠᠪᠤᠭᠤᠯᠤᠭᠰᠠᠨ ᠠᠪᠠᠭᠠ ᠡᠭᠡᠴᠢ ᠶᠢᠨ ᠢᠶᠡᠨ ᠨᠢᠳᠦᠨ ᠡᠴᠡ ᠣᠯᠬᠤ ᠭᠡᠵᠦ ᠬᠠᠷᠠᠯᠠ᠃ ᠲᠡᠷᠡᠨ ᠦ ᠨᠢᠳᠦᠨ ᠡᠴᠡ ᠬᠠᠶᠢᠷᠠ ᠤᠷᠤᠰᠬᠤ ᠨᠢ ᠪᠤᠤ ᠬᠡᠯᠡ᠂ ᠶᠠᠭ ᠲᠡᠷᠡ ᠴᠠᠰᠤᠨ ᠰᠢᠭᠤᠷᠭᠠ ᠲᠠᠢ ᠡᠳᠦᠷ ᠦᠨ ᠲᠩᠷᠢ ᠰᠢᠭ ᠬᠦᠢᠲᠡᠨ ᠵᠢᠪᠠᠷ ᠰᠡᠩᠭᠢᠨᠡᠭᠦᠯᠦᠨ ᠰᠢᠯᠪᠢᠭᠦᠷᠳᠡᠬᠦ ᠨᠢ ᠲᠡᠷᠡ᠃ ᠲᠡᠶᠢᠮᠦ ᠪᠣᠯᠬᠤ ᠪᠠᠷ ᠬᠠᠷᠠᠬᠤ ᠠᠴᠠ ᠵᠢᠬᠡᠭᠦᠳᠡᠰᠦ ᠬᠦᠷᠥᠨ ᠵᠢᠭᠢᠷᠬᠡᠳᠡᠭ ᠪᠣᠯᠤᠭᠰᠠᠨ᠃
ᠮᠢᠨᠤ ᠡᠵᠢ ᠳᠦ… ᠭᠡᠵᠦ ᠪᠣᠳᠣᠭᠠᠳ ᠡᠵᠢ ᠶᠢᠨ ᠢᠶᠡᠨ ᠨᠢᠳᠦ ᠤᠷᠤᠭᠣ ᠭᠣᠷᠢᠳᠠᠨ ᠰᠢᠷᠲᠡᠲᠡᠯᠡ ᠶᠠᠮᠠᠷ ᠴᠤ ᠳᠣᠷᠣᠮᠵᠢᠯᠠᠯ ᠵᠠᠯᠬᠠᠭᠠᠯᠲᠠ ᠶᠢ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠬᠦ ᠳᠦ ᠪᠡᠯᠡᠨ ᠬᠦᠯᠢᠴᠡᠩᠭᠦᠢ ᠪᠣᠷᠣ ᠨᠢᠳᠦ ᠠᠶᠢᠳᠠᠰ ᠢᠶᠠᠷ ᠮᠡᠯᠲᠡᠶᠢᠵᠦ ᠪᠠᠶᠢᠯᠠ᠃ ᠲᠡᠭᠦᠨ ᠡᠴᠡ ᠬᠣᠶᠢᠰᠢ ᠪᠢ ᠡᠵᠢ ᠶᠢᠨ ᠢᠶᠡᠨ ᠨᠢᠳᠦᠨ ᠡᠴᠡ ᠳᠠᠯᠳᠢᠷᠳᠠᠭ ᠪᠣᠯᠤᠭᠰᠠᠨ᠃
ᠨᠠᠮᠠ ᠶᠢ《ᠡᠮᠡᠭᠡ᠂ ᠡᠮᠡᠭᠡ》 ᠬᠡᠮᠡᠨ ᠭᠦᠶᠦᠵᠦ ᠣᠴᠢᠬᠤ ᠳᠤ ᠥᠭᠡᠳᠡ ᠡᠴᠡ ᠲᠣᠰᠤᠨ ᠴᠢᠳᠠᠯ ᠢᠶᠠᠷ ᠢᠶᠠᠨ ᠯᠠ ᠬᠤᠷᠳᠤᠯᠠᠨ ᠮᠠᠶᠢᠵᠢᠭᠢᠨᠠᠭᠰᠠᠭᠠᠷ ᠢᠷᠡᠳᠡᠭ᠂ ᠡᠨᠡ ᠣᠷᠴᠢᠯᠠᠩ ᠳᠤ ᠨᠠᠮᠠ ᠶᠢ ᠬᠦᠮᠦᠨ ᠪᠣᠯᠵᠤ ᠲᠥᠷᠦᠭᠰᠡᠨ ᠳᠦ ᠮᠢᠨᠢ ᠪᠠᠶᠠᠷᠯᠠᠳᠠᠭ᠂ ᠮᠠᠭᠠᠳ ᠦᠭᠡᠢ ᠪᠠᠰᠠ ᠬᠠᠷᠠᠮᠰᠠᠳᠠᠭ ᠡᠮᠡᠭᠡ ᠶᠢᠨ ᠢᠶᠡᠨ ᠥᠭᠡᠳᠡ ᠡᠴᠡ ᠨᠤᠬᠤᠴᠠᠲᠠᠢ ᠬᠠᠷᠠᠲᠠᠯᠠ 《ᠨᠠᠳᠠ ᠠᠴᠠ ᠬᠣᠶᠢᠰᠢ ᠶᠠᠭᠠᠬᠢᠨᠠ ᠳ᠋ᠠ》 ᠭᠡᠬᠦ ᠢᠲᠡᠭᠡᠯ ᠠᠯᠳᠠᠷᠠᠭᠰᠠᠨ᠂ ᠠᠪᠤᠷᠠᠯ ᠡᠷᠢᠬᠦ ᠮᠡᠲᠦ ᠴᠥᠬᠦᠷᠡᠩᠭᠦᠢ ᠬᠠᠷᠠᠴᠠ ᠲᠠᠢ ᠲᠤᠯᠭᠠᠷᠠᠭᠠᠳ᠂ ᠪᠠᠰᠠ ᠯᠠ᠂ ᠳᠠᠬᠢᠨ ᠬᠠᠷᠠᠬᠤ ᠠᠴᠠ ᠭᠢᠷᠪᠢᠰᠢᠳᠡᠭ᠌ ᠪᠣᠯᠤᠯᠠ᠃
ᠵᠡᠭᠦᠳᠦ ᠵᠥᠩ ᠤᠨ ᠢᠶᠡᠨ ᠬᠢᠵᠠᠭᠠᠷ ᠠᠴᠠ ᠴᠤ ᠲᠡᠷᠡ ᠨᠢᠳᠦ ᠶᠢ ᠬᠠᠶᠢᠵᠤ ᠦᠵᠡᠭᠰᠡᠨ᠃ ᠵᠢᠷᠦᠬᠡᠨ ᠦ ᠬᠢ ᠪᠡᠨ ᠭᠦᠨ ᠤᠷᠤᠭᠤ ᠤᠯᠠᠮ ᠰᠢᠭᠢᠳᠦᠨ ᠳᠣᠲᠣᠭᠰᠢᠯᠠᠬᠤ ᠭᠤᠨᠢᠭ ᠠᠴᠠ ᠪᠠᠨ ᠴᠤ ᠬᠠᠶᠢᠭᠰᠠᠨ᠃ ᠭᠡᠲᠡᠯᠡ ᠡᠬᠡᠷ ᠲᠠᠲᠠᠨ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠠᠴᠠ ᠥᠭᠡᠷᠡ ᠶᠢ ᠮᠡᠳᠡᠷᠡᠭᠰᠡᠨ ᠦᠭᠡᠢ᠃
ᠪᠢ 《ᠮᠥᠷᠥᠭᠡᠳᠦᠯ ᠦᠨ ᠡᠭᠡᠴᠢ ᠲᠡᠢ》 ᠤᠴᠠᠷᠠᠭᠰᠠᠨ ᠲᠡᠷᠡ ᠡᠳᠦᠷ ᠡᠴᠡ ᠬᠣᠶᠢᠰᠢ ᠠᠩᠬᠠᠨ ᠤ ᠴᠠᠰᠤ ᠬᠠᠶᠠᠯᠠᠬᠤ ᠪᠣᠯᠭᠠᠨ ᠳᠤ ᠶᠡᠷᠦ ᠪᠤᠰᠤ ᠶᠢᠨ ᠴᠣᠪᠤᠭᠤ ᠴᠣᠯᠭᠢᠨ ᠢᠶᠠᠷ ᠰᠡᠳᠬᠢᠯ ᠬᠥᠭᠯᠡᠭᠳᠡᠨ᠂ ᠲᠡᠷᠲᠡᠭᠡ ᠳᠡᠭᠡᠷᠡ ᠡᠴᠡ ᠨᠢᠰᠦᠨ ᠢᠷᠡᠬᠦ ᠢᠪᠡᠭᠡᠯ ᠬᠠᠶᠢᠷᠠ ᠶᠢ ᠬᠦᠯᠢᠶᠡᠨ ᠴᠠᠭᠠᠨ ᠲᠩᠷᠢ ᠥᠭᠡᠳᠡ ᠶᠧᠯᠸᠢᠳᠡᠭᠦᠯᠦᠭᠰᠡᠨ ᠮᠡᠲᠦ ᠭᠥᠯᠢᠷᠡᠳᠡᠭ ᠪᠢᠯᠡ᠃ ᠭᠡᠪᠡᠴᠦ ᠲᠡᠷᠡ ᠡᠭᠡᠴᠢ ᠬᠠᠷᠢ ᠶᠢᠷᠲᠢᠨᠴᠦ ᠶᠢᠨ ᠭᠡᠭᠡᠨ ᠡᠴᠡ ᠲᠠᠰᠤᠷᠴᠣ ᠴᠠᠰᠤ ᠲᠠᠢ ᠬᠠᠮᠲᠤ ᠢᠷᠡᠭᠡᠳ ᠲᠡᠷᠡ ᠴᠠᠰᠣ ᠲᠠᠢ ᠪᠠᠨ ᠪᠤᠴᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ…ᠣᠷᠣ ᠮᠥᠷ ᠦᠭᠡᠢ᠃
ᠬᠠᠷᠢᠨ ᠠᠮᠢᠳᠤᠷᠠᠯ ᠤᠨ ᠨᠤᠭᠤᠴᠢᠶᠠᠨ ᠳᠤᠮᠳᠠ ᠪᠦᠳᠦᠷᠢᠵᠦ ᠤᠨᠠᠭᠠᠳ ᠠᠶᠢᠳᠠᠰ ᠲᠦᠭᠰᠢᠭᠦᠷᠢ᠂ ᠭᠠᠰᠠᠯᠠᠩᠲᠤ ᠨᠢᠯᠪᠤᠰᠣᠠ ᠳᠤ ᠵᠢᠪᠪᠦᠬᠦ ᠳᠦ ᠥᠨᠥ ᠡᠭᠡᠴᠢ ᠵᠢᠷᠤᠰᠬᠢᠲᠡᠯᠡ ᠭᠡᠷᠡᠯᠲᠦᠭᠡᠳ 《ᠮᠢᠨᠤ ᠳᠡᠭᠦᠦ ᠪᠣᠰ》 ᠬᠡᠮᠡᠨ ᠠᠶᠠᠳᠠᠭᠤ ᠨᠠᠮᠤᠭᠤᠬᠠᠨ ᠴᠤ 《ᠴᠢ ᠴᠢᠳᠠᠨᠠ》 ᠭᠡᠰᠡᠨ ᠢᠲᠡᠭᠡᠯ ᠲᠡᠢ ᠰᠡᠷᠭᠦᠯᠡᠩ ᠥᠩᠭᠡ ᠪᠡᠷ ᠬᠡᠯᠡᠵᠦ᠂ ᠵᠢᠷᠦᠬᠡ ᠰᠡᠳᠬᠢᠯ ᠦᠨ ᠮᠢᠨᠢ ᠰᠢᠷᠬᠠ ᠶᠢ ᠢᠯᠠᠷᠢᠰᠢᠭᠤᠯᠵᠤ ᠣᠷᠬᠢᠭᠠᠳ ᠯᠠ ᠠᠯᠠᠭᠠ ᠪᠣᠯᠴᠢᠬᠠᠨᠠ᠃
ᠲᠡᠷᠡ ᠬᠦᠢᠲᠡᠨ ᠴᠠᠰᠤᠨ ᠠᠴᠠ 《ᠮᠥᠷᠥᠭᠡᠳᠦᠯ ᠦᠨ ᠡᠭᠡᠴᠢ ᠮᠢᠨᠢ》 ᠨᠠᠮᠠ ᠶᠢ ᠲᠠᠲᠠᠵᠤ ᠭᠠᠷᠭᠠᠭᠠ ᠦᠭᠡᠢ ᠪᠣᠯ ᠮᠢᠨᠤ ᠰᠡᠳᠬᠢᠯ ᠲᠡᠷᠡ ᠴᠢᠭ ᠲᠦ ᠪᠡᠨ ᠴᠠᠷᠴᠠᠬᠤ ᠪᠠᠶᠢᠭᠰᠠᠨ ᠪᠢᠵᠡ ᠡ᠃
ᠪᠡᠭᠡᠷᠡᠵᠦ ᠤᠯᠠᠶᠢᠰᠤᠨ ᠭᠠᠷ ᠢ ᠮᠢᠨᠢ ᠠᠳᠬᠤᠭᠰᠠᠨ ᠬᠠᠯᠠᠭᠤᠨ ᠢᠯᠴᠢ ᠯᠠ ᠥᠨᠥ ᠪᠣᠯᠲᠠᠯᠠ ᠮᠢᠨᠤ ᠰᠤᠳᠠᠰᠤ ᠪᠠᠷ ᠭᠦᠶᠦᠵᠦ᠂ ᠭᠤᠳᠤᠮᠯᠠᠭᠰᠠᠨ ᠬᠠᠷᠠᠩᠭᠤᠢ ᠬᠠᠪᠴᠢᠯ ᠮᠡᠲᠦ ᠠᠮᠢᠳᠤᠷᠠᠯ ᠢ ᠲᠡᠷᠡ ᠡᠷᠴᠢᠮ ᠬᠦᠴᠥ ᠪᠡᠷ ᠲᠤᠭᠤᠯᠵᠤ ᠶᠠᠪᠤᠭᠠ ᠴᠤ ᠶᠤᠮ ᠰᠢᠭ…
ᠬᠣᠵᠢᠮ ᠲᠦᠢᠮᠡᠷ ᠰᠢᠭ ᠳᠦᠷᠡᠯᠵᠡᠬᠦ ᠳᠤᠷᠠᠯᠠᠯ ᠳᠤ ᠪᠠᠨ ᠰᠢᠲᠠᠭᠰᠠᠨ ᠠᠮᠠᠷᠠᠭ ᠪᠦᠰᠡᠭᠦᠢ ᠶᠢᠨ ᠢᠶᠡᠨ ᠨᠢᠳᠦᠨ ᠡᠴᠡ ᠲᠡᠷᠡ ᠬᠠᠷᠠᠴᠠ ᠶᠢ ᠤᠯᠬᠤ ᠭᠡᠵᠦ ᠰᠢᠨᠤᠯ ᠲᠠᠢ ᠪᠠᠷ ᠴᠣᠭᠤ ᠰᠢᠷᠲᠡᠲᠡᠯᠡ᠂ ᠲᠡᠷᠡᠨ ᠦ ᠮᠢᠨᠢ ᠨᠢᠳᠦ ᠬᠠᠷᠢᠨ᠂ ᠨᠠᠳᠠ ᠠᠴᠠ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠬᠠᠶᠢᠷᠠ ᠶᠢ ᠴᠥᠬᠦᠷᠡᠯᠲᠡ ᠦᠭᠡᠢ ᠨᠡᠬᠡᠨ ᠮᠡᠯᠮᠡᠷᠡᠵᠥ ᠪᠠᠶᠢᠯᠠ᠃
ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ
6 0