ᠠᠷᠠᠳ ᠤᠨ ᠶᠠᠷᠢᠶᠠᠨ ᠤ ᠬᠡᠯᠡ
ᠠᠷᠠᠳ ᠤᠨ ᠶᠠᠷᠢᠶᠠᠨ ᠤ ᠬᠡᠯᠡ
4920
2018-12-27 11:28
发表于:内蒙古
ᠰᠠᠮᠪᠤᠤ ᠶᠢᠨ ᠲᠣᠪᠤᠤᠳᠤᠷᠵᠢ : ᠠᠷᠠᠳ ᠤᠨ ᠶᠠᠷᠢᠶᠠᠨ ᠤ ᠬᠡᠯᠡ
2018 ᠣᠨ ᠤ 12 ᠰᠠᠷᠠ ᠶᠢᠨ 27᠃ ᠰᠣᠨᠢᠨ ᠤᠩᠰᠢᠵᠤ ᠰᠠᠭᠤᠭᠠᠳ ᠠᠮᠲᠠᠲᠠᠨ ᠠᠴᠠ ᠢᠯᠡᠭᠦᠦ ᠭᠠᠭᠴᠠ ᠰᠠᠶᠢᠬᠠᠨ ᠰᠠᠨᠠᠭᠠ ᠠᠭᠤᠯᠣᠭᠰᠠᠨ ᠥᠭᠦᠯᠡᠪᠦᠷᠢ ᠣᠯᠤᠯᠠ᠃ ᠠᠯᠳᠠᠷᠲᠤ 《ᠬᠦᠷᠡᠩ ᠮᠣᠷᠢ》 ᠨᠠᠶᠢᠷᠠᠭᠯᠠᠯ ᠤᠨ ᠡᠵᠡᠨ ᠴ ∙ ᡀᠠᠮᠣᠰᠦ᠋ᠷᠦᠩ ᠭᠤᠸᠠᠢ 1942 ᠣᠨ ᠳᠤ ᠮᠠᠲᠠᠳ ᠳᠠᠬᠢ ᠴᠡᠷᠢᠭ ᠦᠨ ᠠᠩᠭᠢ ᠳᠤ ᠠᠯᠪᠠ ᠬᠠᠭᠠᠬᠤ ᠳᠤ ᠪᠠᠨ 《ᠡᠷᠡ ᠶᠢᠨ ᠰᠠᠶᠢᠨ ᠪᠣᠯᠣᠳᠪᠠᠭᠠᠲᠤᠷ ᠬᠠᠮᠤᠭ ᠢ ᠵᠠᠯᠭᠢᠭᠴᠢ ᠬᠠᠷᠠ ᠮᠠᠩᠭᠤᠰ ᠢ ᠳᠠᠷᠤᠭᠰᠠᠨ ᠤ ᠦᠯᠢᠭᠡᠷ》 ᠠᠩᠬᠠᠨ ᠤ ᠨᠠᠶᠢᠷᠠᠭᠯᠠᠯ ᠢᠶᠠᠨ ᠪᠢᠴᠢᠵᠦ ᠯᠠ ᠳ᠋ᠡ᠃ ᠲᠡᠭᠦᠨ ᠢᠶᠡᠨ 《ᠦᠨᠡᠨ》 ᠰᠣᠨᠢᠨ ᠤ ᠡᠷᠬᠢᠯᠡᠭᠴᠢ ᠪᠠᠶᠢᠭᠰᠠᠨ ᠼ ∙ ᠳᠠᠮᠳᠢᠨᠰᠦ᠋ᠷᠦᠩ ᠭᠤᠸᠠᠢ ᠳᠤ ᠵᠠᠬᠢᠳᠠᠯ ᠤᠨ ᠬᠠᠮᠲᠤ ᠢᠯᠡᠭᠡᠭᠰᠡᠨ ᠮᠤᠨᠳᠠᠭ ᠵᠣᠷᠢᠭᠲᠠᠨ ᠠᠵᠡᠢ᠃ ᠼ ∙ ᠳᠠᠮᠳᠢᠨᠰᠦ᠋ᠷᠦᠩ ᠠᠪᠤᠭᠠᠢ ᠬᠠᠷᠢᠭᠤ ᠵᠠᠬᠢᠳᠠᠯ ᠢᠯᠡᠭᠡᠬᠦ ᠳᠦ ᠪᠡᠨ 《ᠴᠢᠨᠤ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠵᠠᠰᠠᠵᠤ ᠪᠠᠭᠠ ᠬᠡᠮᠵᠢᠶᠡ ᠪᠡᠷ ᠬᠡᠪᠯᠡᠭᠦᠯᠪᠡ᠃ ᠪᠢᠲᠡᠭᠦᠦ ᠬᠠᠲᠠᠭᠤ ᠮᠣᠳᠤᠨ ᠬᠡᠯᠡ ᠪᠡᠷ ᠪᠢᠰᠢ᠂ ᠠᠷᠠᠳ ᠤᠨ ᠠᠮᠠᠨ ᠶᠠᠷᠢᠶᠠᠨ ᠤ ᠬᠡᠯᠡ ᠪᠡᠷ ᠪᠢᠴᠢᠭᠰᠡᠨ ᠨᠢ ᠮᠣᠩᠭᠣᠯ ᠤᠨ ᠡᠷᠳᠡᠮ ᠰᠢᠨᠵᠢᠯᠡᠭᠡ ᠰᠠᠢᠨ ᠪᠠᠢᠨᠠ》 ᠭᠡᠰᠡᠨ ᠵᠤᠷᠪᠤᠰ ᠲᠠᠢ ᠬᠦᠷᠭᠡᠭᠦᠯᠵᠡᠢ᠃
ᠼ ∙ ᠳᠠᠮᠳᠢᠨᠰᠦ᠋ᠷᠦᠩ ᠠᠪᠤᠭᠠᠢ ᠭᠡᠳᠡᠭ ᠨᠢ ᠠᠯᠳᠠᠷᠲᠠᠢ ᠡᠷᠳᠡᠮᠲᠡᠨ ᠠᠺᠠᠳᠧᠮᠢᠴᠢ ᠴᠡᠨᠳᠥ ᠶᠢᠨ ᠳᠠᠮᠳᠢᠨᠰᠦ᠋ᠷᠦᠩᠲᠡᠨ ᠪᠢᠯᠡ᠃ ᠮᠢᠨᠦ ᠠᠩᠬᠠᠷᠤᠯ ᠲᠠᠲᠠᠵᠤ ᠰᠣᠨᠢᠭᠤᠴᠢ ᠵᠠᠩ ᠢ ᠬᠥᠳᠡᠯᠭᠡᠭᠰᠡᠨ ᠰᠠᠨᠠᠭᠠ ᠪᠣᠯ ᠳᠡᠭᠡᠷᠡ ᠲᠣᠳᠣᠷᠠᠭᠤᠯᠵᠤ ᠲᠣᠮᠣᠷᠠᠭᠤᠯᠤᠭᠰᠠᠨ ᠥᠭᠦᠯᠡᠪᠦᠷᠢ ᠮᠥᠨ᠃ ᠼ ∙ ᠳᠠᠮᠳᠢᠨᠰᠦ᠋ᠷᠦᠩ ᠭᠤᠸᠠᠢ ᠶᠢᠨ ᠵᠣᠬᠢᠶᠠᠯ ᠢ ᠤᠩᠰᠢᠬᠤ ᠳᠤ ᠶᠠᠷᠢᠭᠠᠳ ᠴᠤ ᠪᠠᠶᠢᠭᠠ ᠶᠤᠮ ᠰᠢᠭ ᠵᠢᠷ ᠦᠨ ᠬᠡᠯᠡ ᠨᠠᠶᠢᠷᠠᠭᠤᠯᠭᠠ ᠲᠠᠢ ᠪᠠᠶᠢᠳᠠᠭ᠃ ᠲᠡᠷᠡ ᠪᠣᠯ ᠠᠷᠠᠳ ᠤᠨ ᠬᠠᠷᠠ ᠶᠠᠷᠢᠶᠠ ᠪᠠᠷ ᠪᠢᠴᠢᠭᠰᠡᠨ ᠨᠠᠶᠢᠷᠠᠭᠤᠯᠭᠠ ᠶᠤᠮ᠃
ᠶᠡᠷᠦ ᠵᠣᠬᠢᠶᠠᠯ ᠪᠢᠴᠢᠬᠦ ᠳᠦ ᠪᠡᠨ ᠠᠯᠢ ᠪᠣᠯᠬᠣᠷ ᠡᠩ ᠦᠨ ᠦᠭᠡ ᠣᠯᠵᠤ ᠲᠠᠯᠪᠢᠪᠠᠯ ᠵᠦᠭᠡᠷ ᠰᠡᠨ᠃ ᠬᠥᠳᠡᠭᠡᠨ ᠦ ᠬᠥᠭᠰᠢᠳ ᠶᠠᠭᠠᠬᠢᠵᠤ ᠶᠠᠮᠠᠷᠬᠠᠤ ᠦᠭᠡ ᠪᠡᠷ ᠡᠭᠦᠨ ᠢ ᠬᠡᠯᠡᠬᠦ ᠪᠤᠢ ᠭᠡᠳᠡᠭ ᠢᠶᠡᠨ ᠪᠣᠳᠣᠵᠤ ᠪᠠᠶᠢᠪᠠᠯ ᠰᠠᠶᠢᠨ ᠰᠠᠨ ᠭᠡᠵᠦ ᠠᠬᠠᠮᠠᠳ ᠵᠣᠬᠢᠶᠠᠯᠴᠢ ᠳ᠋ᠤ ᠵᠥᠪᠯᠡᠳᠡᠭ ᠠᠭᠰᠠᠨ ᠢ ᠭᠡᠨᠡᠳᠲᠡ ᠰᠠᠨᠠᠪᠠ᠃ ᠡᠨᠡ ᠰᠠᠨᠠᠭᠠ ᠶᠢ ᠳᠤᠷᠠᠳᠤᠭᠰᠠᠨ ᠤᠴᠢᠷ ᠭᠡᠪᠡᠯ ᠪᠠᠰᠠ ᠵᠠᠷᠢᠮ ᠨᠢᠭᠡᠨ ᠮᠠᠨᠢ ᠼ ∙ ᠳᠠᠮᠳᠢᠨᠰᠦ᠋ᠷᠦᠩ ᠠᠪᠤᠭᠠᠢ ᠶᠢᠨ ᠦᠭᠡ ᠶᠢ ᠪᠣᠳᠣᠵᠤ᠂ ᠶᠠᠮᠠᠷ ᠤᠴᠢᠷ ᠲᠠᠢ ᠶᠤᠮ ᠪᠤᠢ ᠭᠡᠵᠦ ᠡᠷᠭᠢᠴᠡᠭᠦᠯᠬᠦ ᠪᠣᠯᠪᠠ ᠤᠤ ᠬᠡᠮᠡᠭᠰᠡᠨ ᠪᠥᠯᠦᠭᠡ᠃ ᠤᠷᠠᠨ ᠵᠣᠬᠢᠶᠠᠯ ᠪᠣᠯ ᠦᠭᠡ ᠶᠢᠨ ᠤᠷᠠᠯᠢᠭ᠂ ᠦᠭᠡᠰ ᠦᠨ ᠪᠠᠶᠢᠷᠢ ᠪᠠᠨ ᠣᠯᠤᠭᠰᠠᠨ ᠨᠠᠶᠢᠷᠠᠭᠤᠯᠭᠠ ᠭᠡᠭᠴᠢ ᠡᠴᠡ ᠶᠡᠬᠡ ᠬᠠᠮᠢᠶᠠᠷᠳᠠᠭ ᠰᠢᠦ᠃
ᠬᠠᠷᠢᠨ ᠣᠳᠣ ᠵᠠᠷᠢᠮ ᠮᠠᠨᠢ ᠰᠣᠨᠢᠨ᠂ ᠬᠤᠷᠠᠯ ᠤᠨ ᠢᠯᠡᠳᠬᠡᠯ᠂ ᠣᠷᠴᠢᠭᠤᠯᠭᠠ ᠶᠢᠨ ᠭᠡᠮᠡᠷ ᠡᠪ ᠬᠠᠪᠤ ᠦᠭᠡᠢ ᠦᠭᠡᠨ ᠳᠦ ᠳᠤᠷᠠᠯᠠᠭᠠᠳ ᠪᠠᠶᠢᠨᠠ ᠤᠤ ᠭᠡᠯᠲᠡᠢ᠃ ᠪᠦᠷ ᠪᠠᠶᠢᠲᠠᠯᠠ ᠪᠠᠨ 《ᠠᠷᠭᠠ ᠬᠡᠮᠵᠢᠶᠡ ᠠᠪᠤᠯᠠ᠃ ᠠᠷᠭᠠ ᠬᠡᠮᠵᠢᠶᠡ ᠵᠣᠬᠢᠶᠠᠯᠠ᠃ ᠠᠷᠭᠠ ᠬᠡᠮᠵᠢᠶᠡᠨ ᠳᠦ ᠣᠷᠣᠯᠴᠠᠯᠠ ᠭᠡᠳ ᠯᠠ ᠠᠪᠬᠤ ᠶᠢ ᠠᠨᠤ ᠶᠠᠭᠠᠬᠢᠨᠠ᠃ ᠪᠠᠶᠢᠷᠢ ᠪᠠᠨ ᠣᠯᠤᠭᠠ ᠦᠭᠡᠢ ᠨᠢᠭᠡ ᠦᠭᠡ ᠴᠤ ᠪᠦᠬᠦᠯᠢ ᠪᠦᠲᠦᠨ ᠥᠭᠦᠯᠡᠪᠦᠷᠢ ᠶᠢ ᠡᠪᠳᠡᠨᠡ᠂ ᠤᠳᠬᠠ ᠶᠢ ᠣᠷᠢᠶᠠᠯᠳᠤᠭᠤᠯᠤᠨᠠ᠃
ᠡᠮᠦᠨᠡᠭᠣᠪᠢ ᠶᠢᠨ ᠰᠡᠪᠡᠷᠡᠢ ᠰᠤᠮᠤ ᠶᠢᠨ ᠤᠣᠭᠠᠯ᠂ ᠳᠠᠯᠠᠨᠵᠠᠳᠠᠭᠠᠲᠤ ᠳᠤ ᠠᠵᠢᠯᠯᠠᠵᠤ ᠠᠵᠤ ᠲᠥᠷᠦᠳᠡᠭ ᠰ ᠊ ᠭᠠᠩᠲᠣᠭᠲᠠᠬᠤ ᠭᠡᠵᠦ ᠨᠠᠰᠤ ᠲᠣᠭᠲᠠᠵᠤ ᠪᠤᠢ ᠡᠷᠡ ᠲᠤᠩ ᠰᠠᠶ᠋ᠢᠬᠠᠨ ᠮᠣᠩᠭᠣᠯ ᠤᠨ ᠴᠢᠯᠦᠭᠡᠲᠦ ᠵᠣᠬᠢᠶᠠᠯᠴᠢᠳ ᠤᠨ ᠬᠣᠯᠪᠣᠭᠠᠨ ᠳᠤ ᠡᠯᠰᠡᠯᠡ᠃ ᠲᠡᠷᠡᠪᠡᠷ ᠨᠤᠲᠤᠭ ᠲᠤ ᠪᠠᠨ ᠰᠢᠯᠦᠭ ᠥᠭᠦᠯᠡᠯᠭᠡ ᠶᠢᠨ ᠣᠯᠠᠨ ᠨᠣᠮ ᠲᠠᠢ ᠶᠤᠮ᠃ ᠰ ∙ ᠭᠠᠩᠲᠣᠭᠲᠠᠬᠤ 1984 ᠣᠨ ᠳᠤ ᠠᠷᠪᠠᠳᠤᠭᠠᠷ ᠠᠩᠭᠢ ᠲᠡᠭᠦᠰᠦᠭᠡᠳ ᠲᠡᠭᠦᠰ ᠡᠪᠯᠡᠯ ᠦᠨ ᠲᠥᠪ ᠬᠣᠷᠢᠶᠠᠨ ᠤ ᠢᠯᠡᠭᠡᠯᠲᠡ ᠡᠪᠦᠷᠯᠡᠨ ᠮᠠᠯ ᠮᠠᠯᠯᠠᠵᠠᠢ᠃ ᠰᠤᠮᠤᠨ ᠳᠤ ᠪᠠᠨ ᠠᠷᠪᠠ ᠭᠠᠷᠤᠢ ᠵᠢᠯ ᠮᠠᠯ ᠮᠠᠯᠯᠠᠭᠰᠠᠨ ᠮᠠᠯᠴᠢᠨ ᠠᠷᠠᠳ ᠤᠨ ᠠᠬᠤᠢ ᠠᠵᠤ ᠲᠥᠷᠥᠯ ᠢ ᠶᠣᠰᠣᠲᠠᠢ ᠠᠷᠪᠠᠨ ᠬᠤᠷᠤᠭᠤ ᠰᠢᠭ ᠢᠶᠡᠨ ᠮᠡᠳᠡᠳᠡᠭ ᠨᠢᠭᠡᠨ ᠶᠤᠮ᠃ ᠲᠡᠷᠡ ᠪᠡᠷ ᠼ ∙ ᠳᠠᠮᠳᠢᠨᠰᠦᠷᠦᠩ ᠭᠤᠸᠠᠢ ᠶᠢᠨ ᠵᠥᠪᠯᠡᠭᠰᠡᠨ ᠲᠡᠢ ᠵᠦᠢᠷᠯᠡᠮᠡ ᠠᠷᠠᠳ ᠤᠨ ᠬᠠᠷᠠ ᠶᠠᠷᠢᠶᠠᠨ ᠤ ᠦᠭᠡ ᠪᠡᠷ ᠪᠢᠴᠢᠳᠡᠭ ᠨᠢ ᠰᠣᠨᠢᠷᠬᠠᠯ ᠲᠠᠲᠠᠪᠠ᠃ ᠲᠡᠭᠦᠨ ᠦ 《ᠮᠢᠨᠦ ᠨᠤᠲᠤᠭ ᠤᠨ ᠠᠶᠠᠰ》 ᠨᠣᠮ ᠳᠤ ᠨᠢ 《ᠦᠢᠯᠡᠰ ᠪᠦᠲᠦᠭᠡᠬᠦ ᠢᠨᠢᠶᠡᠮᠰᠦᠭᠯᠡᠯ》 ᠭᠡᠰᠡᠨ ᠰᠢᠯᠦᠭ ᠪᠠᠶᠢᠨᠠ᠃ ᠲᠡᠭᠦᠨ ᠳᠦ᠄
ᠮᠠᠨᠴᠤᠢ ᠳᠣᠲᠣᠷᠠ ᠪᠠᠨ ᠬᠣᠩᠭᠣᠷᠬᠠᠨ ᠦᠷᠡ ᠮᠢᠨᠢ
ᠮᠥᠰᠢᠶᠡᠵᠦ ᠢᠨᠢᠶᠡᠭᠡᠳ ᠤᠨᠲᠠᠵᠤ ᠪᠠᠶᠢᠨᠠ ᠳ᠋ᠠ᠃
ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠡᠳ ᠭᠠᠷᠬᠤᠯᠠᠷ
ᠮᠢᠨᠦ ᠠᠵᠢᠯ ᠳᠣᠣᠷᠠ ᠪᠠᠨ ᠯᠠ ᠪᠦᠲᠦᠬᠦ ᠶᠤᠮ ᠳ᠋ᠠ᠃
ᠥᠯᠥᠭᠡᠢ ᠳᠣᠲᠣᠷᠠ ᠪᠠᠨ ᠡᠩᠬᠦᠷᠡᠶᠢᠬᠡᠨ ᠦᠷᠡ ᠮᠢᠨᠢ
ᠦᠨᠡᠭᠡᠴᠢᠯᠡᠵᠦ ᠢᠨᠢᠶᠡᠭᠡᠳ ᠤᠨᠲᠠᠵᠤ ᠪᠠᠶᠢᠨᠠ ᠳ᠋ᠠ
ᠦᠨᠦᠷᠯᠡᠵᠦ ᠦᠨᠦᠰᠦᠭᠡᠳ ᠶᠠᠪᠤᠬᠤ ᠳᠤ ᠮᠢᠨᠢ ᠬᠠᠷᠢᠨ
ᠦᠢᠯᠡᠰ ᠠᠵᠢᠯ ᠮᠢᠨᠢ ᠠᠮᠵᠢᠭᠠᠳ ᠢᠷᠡᠬᠦ ᠶᠤᠮ ᠳ᠋ᠠ᠃
ᠵᠤᠯᠵᠠᠭᠠᠨ ᠨᠢᠯᠬᠠ ᠦᠷᠡ ᠮᠢᠨᠢ ᠬᠥᠭᠡᠷᠦᠬᠦᠢ
ᠵᠣᠷᠢᠭ ᠢᠶᠠᠷ ᠢᠶᠠᠨ ᠲᠠᠷᠪᠠᠯᠵᠠᠭᠠᠳ ᠢᠨᠢᠶᠡᠵᠦ ᠯᠠ ᠪᠠᠶᠢᠨᠠ ᠳ᠋ᠠ
ᠵᠤᠯᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠡᠳ ᠭᠠᠷᠬᠤᠯᠠᠷ ᠮᠢᠨᠢ
ᠵᠣᠷᠢᠭᠰᠠᠨ ᠬᠡᠷᠡᠭ ᠮᠢᠨᠢ ᠪᠦᠲᠦᠭᠡᠳ ᠢᠷᠡᠬᠦ ᠶᠤᠮ ᠳ᠋ᠠ᠃ ᠡᠶᠢᠮᠦ ᠮᠠᠶ᠋ᠢᠭ ᠢᠶᠠᠷ ᠲᠤᠭᠤᠷᠪᠢᠭᠰᠠᠨ ᠨᠡᠶᠢᠲᠡ ᠳᠣᠯᠣᠭᠠᠨ ᠪᠠᠳᠠᠭ ᠰᠢᠯᠦᠭ ᠪᠠᠶᠢᠨᠠ᠃ ᠡᠨᠳᠡ ᠴᠠᠮᠢᠷᠬᠠᠭᠰᠠᠨ ᠭᠣᠶᠣᠴᠢᠯᠠᠭᠰᠠᠨ ᠦᠭᠡ ᠠᠯᠠᠭᠠ᠃ ᠭᠡᠬᠦ ᠳᠦ ᠪᠡᠨ ᠡᠨᠳᠡ ᠦᠷᠡ ᠬᠡᠦᠬᠡᠳ ᠦᠨ ᠠᠰᠤᠷᠤ ᠶᠡᠬᠡ ᠳᠠᠯᠳᠠ ᠢᠪᠡᠭᠡᠯ ᠥᠷᠥᠰᠢᠶᠡᠵᠦ ᠪᠠᠶᠢᠳᠠᠭ ᠢ ᠶᠣᠰᠣ ᠲᠠᠢ ᠡᠩ ᠦᠨ ᠦᠭᠡ ᠪᠡᠷ ᠮᠠᠭᠲᠠᠨ ᠳᠠᠭᠤᠯᠠᠭᠰᠠᠨ ᠪᠤᠶᠤ᠃ ᠦᠷᠡ ᠬᠡᠦᠬᠡᠳ ᠭᠡᠳᠡᠭ ᠡᠴᠢᠭᠡ ᠡᠬᠡ ᠳᠦ ᠪᠡᠨ ᠶᠠᠮᠠᠷ ᠭᠠᠶᠢᠬᠠᠮᠰᠢᠭᠲᠠᠢ ᠵᠣᠯᠪᠣᠭᠠ ᠬᠡᠶᠢᠮᠣᠷᠢ ᠣᠯᠭᠤᠳᠠᠭ ᠶᠤᠮ ᠪᠤᠢ ᠭᠡᠳᠡᠭ ᠢ ᠬᠡᠯᠡᠭᠰᠡᠨ ᠮᠡᠲᠦ᠃ ᠠᠯᠢᠪᠠ ᠠᠮᠢᠲᠠᠨ᠂ ᠲᠡᠷᠡ ᠳᠣᠲᠣᠷᠠ ᠪᠠᠨ ᠢᠯᠠᠭᠠ ᠰᠢᠮᠠᠭᠤᠯ᠂ ᠬᠣᠷᠣᠬᠠᠢ ᠰᠢᠪᠠᠵᠢ ᠬᠦᠷᠲᠡᠯᠡ ᠦᠷᠡ ᠤᠳᠤᠮ ᠢᠶᠠᠨ ᠦᠯᠡᠳᠡᠭᠡᠬᠦ ᠯᠠ ᠭᠡᠵᠦ ᠳᠠᠪᠬᠤᠷᠯᠠᠵᠤ ᠲᠡᠭᠦᠨ ᠢᠶᠡᠨ ᠬᠢᠮᠠᠭᠠᠳᠠᠨ ᠨᠢᠭᠤᠴᠠᠬᠠᠨ ᠪᠠᠶᠢᠷᠢᠨ ᠳᠤ ᠭᠠᠷᠭᠠᠵᠤ ᠥᠰᠬᠡᠵᠦ ᠲᠣᠮᠣᠷᠠᠬᠤ ᠶᠢᠨ ᠲᠥᠯᠥᠭᠡ ᠲᠡᠮᠡᠴᠡᠳᠡᠭ᠃ ᠲᠡᠷᠡ ᠪᠣᠯ ᠨᠢᠭᠡ ᠲᠠᠯᠠ ᠪᠠᠷ ᠪᠠᠶᠢᠭᠠᠯᠢ ᠶᠢᠨ ᠬᠠᠤᠯᠢ ᠳᠣᠲᠣᠭᠠᠳᠤ ᠮᠡᠳᠡᠷᠡᠬᠦᠢ ᠶᠢᠨ ᠪᠣᠯᠤᠮᠵᠢᠲᠤ ᠨᠥᠬᠥᠴᠡᠯ ᠪᠠᠶᠢᠬᠤ᠃
ᠬᠠᠷᠢᠨ ᠥᠨᠳᠥᠷ ᠬᠥᠭᠵᠢᠭᠰᠡᠨ ᠰᠡᠳᠬᠢᠬᠦᠢ ᠲᠡᠢ ᠳᠡᠭᠡᠳᠦ ᠲᠥᠷᠥᠯᠲᠡᠨ ᠬᠥᠮᠥᠨ ᠦᠷᠡ ᠤᠳᠤᠮ ᠢᠶᠠᠨ ᠥᠪᠯᠡᠨ ᠦᠯᠡᠳᠡᠭᠡᠨᠡ ᠭᠡᠳᠡᠭ ᠪᠠᠬᠠᠷᠬᠠᠯ᠂ ᠠᠮᠢᠳᠤᠷᠠᠬᠤᠢ ᠶᠢᠨ ᠪᠠᠶᠠᠰᠬᠤᠯᠠᠩ ᠪᠠᠶᠢᠬᠤ ᠡ᠃ ᠨᠢᠯᠬᠠ ᠪᠠᠯᠴᠢᠷ ᠦᠷᠡ ᠪᠡᠨ 《ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠡᠳ ᠁ ᠦᠨᠦᠷᠯᠡᠵᠦ ᠦᠨᠦᠰᠦᠭᠡᠳ ᠁ ᠵᠤᠯᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠡᠳ ᠭᠠᠷᠬᠤᠯᠠᠷ ᠮᠢᠨᠦ ᠠᠵᠢᠯ ᠳᠣᠣᠷᠠ ᠪᠠᠨ ᠪᠦᠲᠦᠬᠦ ᠶᠤᠮ᠃ ᠠᠵᠢᠯ ᠦᠢᠯᠡᠰ ᠨᠢ ᠠᠮᠵᠢᠭᠠᠳ ᠢᠷᠡᠬᠦ ᠶᠤᠮ᠃ ᠵᠣᠷᠢᠭᠰᠠᠨ ᠬᠡᠷᠡᠭ ᠪᠦᠲᠦᠭᠡᠳ ᠢᠷᠡᠬᠦ ᠶᠤᠮ》 ᠭᠡᠰᠡᠨ ᠰᠠᠨᠠᠭᠠ ᠤᠷᠢᠳᠤ ᠡᠮᠦᠨᠡ ᠮᠢᠨᠦ ᠬᠤᠪᠢ ᠳᠤ ᠤᠩᠰᠢᠭᠠ ᠦᠭᠡᠢ ᠣᠯᠵᠤ ᠦᠵᠡᠭᠡ ᠦᠭᠡᠢ ᠣᠯᠵᠠᠭᠤᠷᠬᠠᠬᠤ ᠠᠴᠠ ᠠᠷᠭᠠ ᠦᠭᠡᠢ ᠰᠠᠨᠠᠭᠠ ᠶᠤᠮ᠃ ᠡᠨᠡ ᠪᠣᠯ ᠦᠷᠡ ᠬᠡᠦᠬᠡᠳ ᠢᠶᠡᠷ ᠢᠶᠡᠨ ᠪᠠᠬᠠᠷᠬᠠᠭᠰᠠᠨ ᠡᠴᠢᠭᠡ ᠡᠬᠡ ᠶᠢᠨ ᠨᠠᠨᠳᠢᠨ ᠰᠡᠳᠬᠢᠯ᠃ ᠨᠥᠭᠥᠭᠡ ᠲᠠᠯᠠ ᠪᠠᠷ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠦᠷᠡ ᠬᠡᠦᠬᠡᠳ ᠲᠡᠢ ᠪᠣᠯᠤᠭᠰᠠᠨ ᠴᠠᠭ ᠲᠤ ᠭᠣᠣᠯ ᠦᠢᠯᠡᠰ ᠵᠣᠷᠢᠯᠭᠠ ᠪᠦᠲᠦᠳᠡᠭ ᠭᠡᠰᠡᠨ ᠰᠠᠨᠠᠭᠠᠨ ᠤ ᠢᠯᠡᠷᠬᠡᠶᠢᠯᠡᠯ ᠪᠤᠶᠤ᠃ ᠡᠬᠢᠨ ᠡᠴᠡ ᠪᠡᠨ ᠠᠪᠤᠭᠠᠳ ᠳᠠᠭᠤᠰᠲᠠᠯᠠ ᠪᠠᠨ ᠨᠡᠪᠲᠡ ᠭᠠᠷᠤᠭᠰᠠᠨ ᠰᠠᠨᠠᠭᠠ ᠲᠠᠢ ᠰᠢᠯᠦᠭ ᠴᠢᠬᠤᠯᠠ ᠭᠡᠵᠦ ᠶᠠᠷᠢᠳᠠᠭ᠃ ᠡᠨᠡ ᠪᠣᠯ ᠲᠡᠶᠢᠮᠦ ᠨᠢᠭᠡ ᠭᠣᠣᠯ ᠰᠠᠨᠠᠭᠠ ᠪᠠᠨ ᠪᠠᠳᠠᠭ ᠪᠦᠷᠢ ᠳᠦ ᠯᠠᠪᠰᠢᠷᠠᠭᠤᠯᠤᠨ ᠳᠠᠪᠲᠠᠵᠤ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠰᠢᠯᠦᠭ ᠭᠡᠵᠦ ᠪᠣᠯᠬᠤᠶᠢᠴᠠ ᠮᠡᠲᠦ᠃ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠢᠨᠢᠶᠡᠵᠦ ᠮᠥᠰᠢᠶᠡᠨ ᠲᠣᠷᠨᠢᠵᠤ ᠪᠤᠢ ᠦᠷᠡ ᠬᠡᠦᠬᠡᠳ ᠪᠣᠯ ᠵᠥᠪᠬᠡᠨ ᠡᠴᠢᠭᠡ ᠡᠬᠡ ᠶᠢᠨ ᠠᠵᠢᠯ ᠦᠢᠯᠡᠰ ᠪᠦᠲᠦᠵᠦ ᠪᠤᠢ ᠶᠢᠨ ᠪᠡᠯᠭᠡᠳᠡᠯ ᠲᠡᠳᠦᠢ ᠪᠡᠷ ᠬᠢᠵᠠᠭᠠᠷᠯᠠᠬᠤ ᠵᠦᠢᠯ ᠪᠢᠰᠢ᠃ ᠡᠩᠬᠡ ᠲᠤᠩᠬᠠ ᠥᠰᠴᠦ ᠪᠠᠶᠠᠷ ᠪᠠᠶᠠᠰᠤᠯ ᠢᠶᠠᠷ ᠳᠦᠭᠦᠷᠡᠩ ᠰᠤᠷᠬᠤ ᠬᠦᠮᠦᠵᠢᠬᠦ ᠬᠥᠳᠡᠯᠮᠦᠷᠢ ᠪᠡᠷ ᠢᠶᠡᠨ ᠰᠡᠳᠬᠢᠯ ᠳᠦᠭᠦᠷᠡᠩ ᠪᠤᠢ ᠦᠷᠡ ᠬᠡᠦᠬᠡᠳ ᠮᠢᠨᠢ ᠮᠣᠩᠭᠣᠯ ᠡᠬᠡ ᠣᠷᠣᠨ ᠤ ᠢᠷᠡᠭᠡᠳᠦᠢ ᠥᠷᠨᠢᠭᠦᠨ ᠳᠡᠪᠵᠢᠨ ᠳᠡᠭᠡᠭᠰᠢᠯᠡᠬᠦ ᠶᠢᠨ ᠪᠡᠯᠭᠡᠳᠡᠯ ᠶᠤᠮ᠃ ᠡᠶᠢᠮᠦ ᠰᠢᠯᠦᠭ ᠢ ᠪᠣᠯ ᠰᠡᠳᠬᠢᠯ ᠢᠶᠡᠷ ᠢᠶᠡᠨ ᠪᠢᠴᠢᠵᠡᠢ᠂ ᠪᠣᠳᠣᠵᠤ ᠲᠤᠩᠭᠠᠵᠤ ᠲᠤᠭᠤᠷᠪᠢᠵᠠᠢ ᠭᠡᠮᠡᠷ ᠪᠠᠶᠢᠨᠠ᠃
ᠬᠠᠷᠢᠨ ᠣᠳᠣ ᠪᠣᠯ ᠮᠠᠨ ᠤ ᠵᠠᠯᠠᠭᠤ ᠦᠶᠡ ᠶᠢᠨ ᠬᠢᠨ ᠦ ᠶᠡᠬᠡᠩᠬᠢ ᠰᠢᠯᠦᠭ ᠨᠡᠪᠲᠡ ᠭᠠᠷᠤᠭᠰᠠᠨ ᠰᠠᠨᠠᠭᠠ ᠦᠭᠡᠢ᠂ ᠵᠦᠢᠮᠡᠯ ᠥᠮᠪᠢᠢ ᠴᠥᠮᠪᠢᠢ᠂ ᠭᠣᠶᠣ ᠦᠭᠡ ᠪᠡᠷ ᠶᠢᠯᠸᠢᠳᠡᠬᠦ ᠭᠡᠰᠡᠨ ᠬᠡᠰᠡᠭ ᠪᠤᠰᠠᠭ ᠬᠣᠯᠪᠣᠭᠠᠰᠤ ᠶᠢᠨ ᠴᠤᠭᠯᠠᠭᠤᠯᠭᠠ ᠮᠡᠲᠦ᠃ ᠲᠡᠭᠦᠨ ᠢᠶᠡᠨ ᠴᠤ ᠪᠠᠬᠠᠳᠤᠭᠠᠳ ᠮᠠᠭᠲᠠᠭᠠᠳ ᠪᠠᠶᠢᠬᠤ ᠰᠢᠭ᠃ ᠲᠡᠭᠡᠭᠡᠳ ᠰᠢᠯᠦᠭ ᠢᠶᠡᠨ ᠮᠡᠳᠡᠷᠡᠬᠦᠢ ᠪᠡᠷ ᠪᠢᠴᠢᠳᠡᠭ ᠭᠡᠬᠦ ᠶᠤᠮ᠃ ᠮᠡᠳᠡᠷᠡᠬᠦᠢ ᠪᠡᠷ ᠪᠢᠴᠢᠨᠡ ᠭᠡᠳᠡᠭ ᠨᠡᠪᠲᠡ ᠭᠠᠷᠤᠭᠰᠠᠨ ᠰᠠᠨᠠᠭᠠ ᠦᠭᠡᠢ ᠭᠡᠰᠡᠨ ᠮᠡᠲᠦ᠃ ᠮᠡᠳᠡᠷᠡᠬᠦᠢ ᠪᠡᠷ ᠭᠡᠳᠡᠭ ᠨᠢ ᠰᠠᠨᠠᠭᠠᠨ ᠳᠤ ᠪᠠᠨ ᠣᠷᠣᠭᠰᠠᠨ ᠢ ᠲᠠᠲᠠᠯᠭᠠᠭᠠᠳ ᠲᠤᠭᠠᠴᠢᠭᠠᠳ ᠣᠷᠬᠢᠨᠠ ᠭᠡᠰᠡᠨ ᠮᠡᠲᠦ᠃ ᠰᠠᠨᠠᠭᠠᠨ ᠳᠤ ᠪᠠᠨ ᠣᠷᠣᠭᠰᠠᠨ ᠢ ᠲᠤᠭᠠᠴᠢᠭᠠᠳ ᠣᠷᠬᠢᠬᠤ ᠪᠠᠷ ᠬᠠᠵᠠᠭᠠᠢ ᠮᠤᠷᠤᠢ᠂ ᠳᠣᠭᠣᠯᠠᠩ ᠭᠢᠰᠭᠢᠭᠰᠡᠨ ᠮᠡᠲᠦ ᠮᠥᠷ ᠦᠯᠡᠳᠡᠮᠡᠷ᠃ ᠮᠡᠳᠡᠷᠡᠬᠦᠢ ᠪᠡᠷ ᠢᠶᠡᠨ ᠪᠢᠴᠢᠵᠦ ᠪᠣᠯᠤᠨᠠ ᠯᠠ ᠳ᠋ᠠ᠃ ᠲᠡᠭᠦᠨ ᠢ ᠪᠡᠨ ᠬᠠᠷᠢᠴᠠᠩᠭᠤᠢ ᠪᠠᠷ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠳᠤ ᠡᠷᠭᠢᠵᠦ ᠬᠠᠷᠠᠨ ᠵᠠᠰᠠᠵᠤ ᠪᠢᠯᠡᠭᠦᠳᠡᠨ ᠰᠡᠳᠬᠢᠯ ᠢᠶᠡᠨ ᠰᠢᠩᠭᠡᠭᠡᠨ ᠴᠡᠭᠴᠡᠯᠡᠪᠡᠯ ᠠᠶᠠᠲᠠᠶᠢᠬᠠᠨ ᠪᠦᠲᠦᠭᠡᠯ ᠪᠣᠯᠬᠤ ᠪᠣᠯᠪᠠ ᠤᠤ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠮᠡᠳᠡᠷᠡᠬᠦᠢ ᠭᠡᠭᠴᠢ ᠪᠡᠷ ᠢᠶᠡᠨ ᠲᠤᠭᠠᠴᠢᠭᠰᠠᠨ ᠰᠢᠯᠦᠭ ᠡᠵᠡᠨ ᠢᠶᠡᠨ ᠪᠣᠯᠤᠨ ᠳᠠᠷᠪᠢᠭᠴᠢᠳ ᠢᠶᠠᠨ ᠨᠢᠭᠡ ᠤᠳᠠᠭᠠ ᠪᠠᠬᠠᠷᠬᠠᠭᠤᠯᠬᠤ ᠠᠴᠠ ᠪᠤᠰᠤ ᠤᠷᠲᠤ ᠤᠳᠠᠭᠠᠨ ᠨᠠᠰᠤᠯᠠᠬᠤ ᠦᠭᠡᠢ ᠪᠣᠯᠪᠠ ᠤᠤ᠃
《ᠲᠤᠰᠠᠭᠠᠷ ᠲᠣᠭᠲᠠᠨᠢᠯ》᠂ 《ᠪᠢ ᠬᠠᠮᠢᠭᠠ ᠪᠡᠨ ᠲᠥᠷᠥᠭᠡ ᠪᠤᠢ》᠂ 《ᠶᠢᠰᠦᠨ ᠡᠷᠳᠡᠨᠢ ᠶᠢᠨ ᠣᠷᠣᠨ》 ᠵᠡᠷᠭᠡ ᠣᠯᠠᠨ ᠠᠯᠳᠠᠷᠲᠤ ᠪᠦᠲᠦᠭᠡᠯ ᠦᠳ ᠴᠢᠨᠢ ᠰᠡᠳᠬᠢᠵᠦ ᠪᠣᠳᠣᠵᠤ ᠲᠤᠭᠤᠷᠪᠢᠭᠰᠠᠨ ᠢᠷᠭᠡᠨ ᠦ ᠤᠶᠠᠩᠭᠠ ᠰᠢᠦ ᠳ᠋ᠡ᠃ ᠲᠡᠶᠢᠮᠦ ᠡᠴᠡ ᠤᠷᠲᠤ ᠨᠠᠰᠤ ᠲᠠᠢ ᠤᠳᠠᠭᠠᠨ ᠵᠢᠷᠭᠠᠯ ᠢ ᠡᠳ᠋ᠯᠡᠬᠦ ᠮᠡᠲᠦ ᠪᠠᠶᠠᠷ ᠶᠣᠰᠣᠯᠠᠯ ᠤᠨ ᠦᠶᠡ ᠪᠡᠷ ᠵᠢᠷᠤᠭᠲᠤ ᠪᠣᠯᠤᠨ ᠷᠠᠳᠢᠣ᠋ ᠪᠡᠷ ᠤᠷᠠᠨ ᠤᠩᠰᠢᠭᠴᠢᠳ ᠪᠠᠶᠢᠩᠭᠤ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠪᠠᠨ ᠰᠣᠷᠢᠨ ᠳᠠᠭᠤᠷᠢᠰᠬᠠᠨ ᠲᠠᠨᠢᠯᠴᠠᠭᠤᠯᠵᠤ ᠪᠠᠶᠢᠳᠠᠭ᠃
ᠬᠤᠴᠤᠷᠠᠵᠤ ᠭᠦᠢᠴᠡᠭᠰᠡᠨ ᠪᠣᠯᠤᠭᠠᠳ ᠲᠡᠷᠡ ᠦᠦ᠂ ᠮᠠᠨᠢ ᠮᠡᠲᠦ ᠰᠢᠯᠦᠭ ᠢ ᠰᠡᠳᠬᠢᠬᠦᠢ ᠪᠡᠷ᠂ ᠰᠡᠳᠬᠢᠵᠦ ᠵᠠᠰᠠᠵᠤ ᠶᠠᠩᠵᠤᠯᠠᠨ ᠦᠭᠡ ᠶᠢᠨ ᠪᠠᠶᠢᠷᠢᠯᠠᠯ ᠢ ᠣᠯᠵᠤ ᠪᠢᠴᠢᠨᠡ ᠭᠡᠵᠦ ᠮᠤᠶᠢᠬᠤᠷᠯᠠᠨ ᠵᠥᠷᠢᠮᠡᠷ ᠪᠠᠶᠢᠬᠤ ᠶᠤᠮ᠃ ᠰᠡᠳᠬᠢᠨᠡ ᠭᠡᠳᠡᠭ ᠨᠢ ᠪᠣᠳᠣᠵᠤ ᠴᠡᠭᠴᠡᠯᠡᠨᠡ᠂ ᠡᠨᠡ ᠦᠭᠡ ᠶᠢᠨ ᠰᠠᠨᠠᠭᠠ ᠶᠢ ᠵᠢᠷ ᠦᠨ ᠠᠷᠠᠳ ᠶᠠᠭᠤ ᠭᠡᠵᠦ ᠬᠡᠯᠡᠳᠡᠭ ᠪᠢᠯᠡ ᠭᠡᠵᠦ ᠡᠷᠢᠵᠦ ᠬᠠᠶᠢᠬᠤ ᠶᠢᠨ ᠨᠡᠷᠡ ᠭᠡᠵᠦ ᠮᠤᠩᠬᠠᠭᠯᠠᠬᠤ ᠪᠣᠯᠠᠢ᠃ ᠰ ∙ ᠭᠠᠩᠲᠣᠭᠲᠠᠬᠤ ᠮᠢᠨᠢ ᠴᠢᠨᠠᠭᠰᠢᠳᠠ ᠪᠠᠨ ᠰᠡᠳᠬᠢᠯ ᠢᠶᠡᠨ ᠰᠢᠩᠭᠡᠭᠡᠨ ᠡᠷᠢᠵᠦ ᠬᠠᠶᠢᠵᠤ ᠤᠳᠠᠭᠠᠨ ᠪᠣᠳᠣᠵᠤ ᠪᠣᠯᠪᠠᠰᠤᠷᠠᠭᠤᠯᠤᠨ ᠠᠷᠠᠳ ᠤᠨ ᠢᠶᠠᠨ ᠰᠠᠶᠢᠬᠠᠨ ᠵᠢᠷ ᠦᠨ ᠬᠡᠯᠡ ᠶᠠᠷᠢᠶᠠᠨ ᠤ ᠦᠭᠡ ᠪᠡᠷ ᠣᠯᠠᠨ ᠤᠷᠠᠨ ᠪᠦᠲᠦᠭᠡᠯ ᠢᠶᠡᠨ ᠲᠤᠭᠤᠷᠪᠢᠵᠤ ᠤᠯᠠᠮ ᠶᠡᠬᠡ ᠠᠮᠵᠢᠯᠲᠠ ᠣᠯᠬᠤ ᠶᠢᠨ ᠢᠷᠦᠭᠡᠯ ᠡᠷᠭᠦᠶᠡ᠃ ᠪᠠᠰᠠ ᠠᠬᠠᠮᠠᠳ ᠦᠶᠡ ᠶᠢᠨ ᠢᠶᠡᠨ ᠰᠠᠶᠢᠬᠠᠨ ᠲᠡᠭᠰᠢ ᠨᠠᠶᠢᠷᠠᠭᠤᠯᠭᠠ ᠲᠠᠢ ᠲᠤᠭᠤᠷᠪᠢᠭᠰᠠᠨ ᠨᠣᠮ ᠶᠡᠬᠡ ᠤᠩᠰᠢᠵᠤ ᠠᠵᠢᠭᠯᠠᠵᠤ ᠪᠣᠳᠣᠭᠠᠷᠠᠢ᠃
3 0