ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ : ᠪᠢᠳᠡ᠂ ᠪᠢᠳᠡᠨ ᠤ ᠭᠠᠷᠳᠠᠭ ᠶᠢᠷᠲᠢᠨᠴᠦ ᠶᠢᠨ ᠲᠤᠬᠠᠢ ᠥᠭᠥᠯᠡᠬᠦ ᠨᠣᠮ ᠡᠨᠡ ᠨᠣᠮ ᠲᠤᠩ ᠴᠤ ᠰᠣᠨᠢᠷᠬᠠᠯᠲᠠᠢ᠃ ᠪᠢᠳᠡᠨ ᠦ ᠮᠡᠳᠡᠬᠦ ᠦᠭᠡᠢ ᠶᠠᠭᠤᠮ᠎ᠠ ᠥᠴᠢ ᠲᠥᠴᠢᠨᠡᠨ ᠪᠠᠶᠢᠬᠤ ᠳᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠳᠤ ᠪᠠᠰᠠ ᠮᠡᠳᠡᠵᠦ ᠴᠢᠳᠠᠭ᠎ᠠ ᠦᠭᠡᠢ ᠵᠦᠢᠯᠡᠰ ᠪᠦᠷ ᠴᠤ ᠶᠡᠬᠡ ᠪᠠᠶᠢᠳᠠᠭ ᠠᠵᠢ᠃ ᠬᠠᠮᠤᠭ ᠤᠨ ᠠᠩᠬᠠᠨ ᠤ ᠰᠤᠶᠤᠯ ᠢᠷᠭᠡᠨᠰᠢᠯ ᠢ ᠡᠭᠦᠰᠬᠡᠭᠰᠡᠨ ᠰᠢᠮᠧᠷ ᠦᠳ ᠣᠳᠣᠳ ᠤᠨ ᠬᠥᠳᠡᠯᠭᠡᠭᠡᠨ ᠢ ᠠᠵᠢᠭᠯᠠᠵᠤ ᠡᠬᠢᠯᠡᠭᠰᠡᠨ ᠢᠶᠡᠷ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠭᠠᠷᠤᠭ᠎ᠠ ᠪᠠᠨ ᠡᠬᠢᠯᠡᠵᠦ ᠡᠯᠳᠡᠪ ᠰᠠᠭᠠᠳ ᠪᠡᠷᠬᠡᠰᠢᠶᠡᠯ ᠢ ᠳᠠᠪᠠᠨ ᠤᠷᠤᠭᠰᠢᠯᠠᠭᠰᠠᠭᠠᠷ 5000 ᠵᠢᠯ ᠦᠨ ᠳᠠᠷᠠᠭ᠎ᠠ ᠪᠠᠷᠤᠭ ᠯᠠ ᠡᠴᠦᠰ ᠦᠨ ᠴᠡᠭ ᠳᠡᠭᠡᠷ᠎ᠡ ᠪᠡᠨ ᠢᠷᠡᠪᠡ ᠦᠦ ᠭᠡᠲᠡᠯ᠎ᠡ ᠬᠠᠷᠢᠨ ᠴᠤ ᠪᠦᠷ ᠲᠠᠭᠠᠵᠤ ᠲᠠᠭᠠᠮᠠᠭᠯᠠᠬᠤ ᠠᠴᠠ ᠥᠭᠡᠷ᠎ᠡ ᠠᠷᠭ᠎ᠠ ᠦᠭᠡᠢ ᠵᠦᠢᠯᠡᠰ ᠲᠡᠢ ᠲᠤᠯᠭᠠᠷᠴᠣ ᠰᠢᠨᠵᠢᠯᠡᠨ ᠰᠤᠳᠤᠯᠬᠤ ᠠᠵᠢᠯ ᠤᠯᠠᠮ ᠪᠦᠷ ᠬᠡᠴᠡᠭᠦᠦ ᠲᠥᠪᠡᠭ ᠲᠡᠢ ᠪᠣᠯᠵᠠᠢ᠃ ᠡᠷᠲᠡᠨ ᠦ ᠭᠷᠧᠺ ᠦᠨ ᠣᠶᠤᠨ ᠤ ᠤᠬᠠᠭᠠᠨ ᠤ ᠭᠢᠭᠠᠩᠲᠤ ᠨᠤᠭᠤᠳ ᠶᠢᠷᠲᠢᠨᠴᠦ ᠶᠢᠨ ᠵᠦᠢ ᠲᠣᠭᠲᠠᠯ ᠢ ᠠᠵᠢᠭᠯᠠᠵᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠠᠩᠬᠠᠨ ᠤ ᠲᠠᠭᠠᠮᠠᠭᠯᠠᠯ ᠤᠳ ᠢ ᠳᠡᠪᠰᠢᠭᠦᠯᠵᠦ᠂ ᠣᠯᠠᠨ ᠶᠠᠩᠵᠤ ᠶᠢᠨ ᠭᠠᠷᠭᠠᠯᠭ᠎ᠠ ᠪᠣᠳᠣᠵᠤ ᠣᠯᠤᠭᠰᠠᠨ ᠨᠢ ᠡᠷᠭᠢᠴᠡᠭᠦᠯᠬᠦ ᠶᠢᠨ ᠭᠠᠶᠢᠬᠠᠮᠰᠢᠭ ᠪᠠᠶᠢᠵᠠᠢ᠃ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ᠂ ᠰᠤᠶᠤᠯ ᠤᠷᠠᠯᠢᠭ ᠴᠡᠴᠡᠭᠯᠡᠨ ᠬᠥᠭᠵᠢᠭᠰᠡᠨ 《ᠢᠰᠯᠠᠮ ᠤᠨ ᠠᠯᠲᠠᠨ ᠵᠠᠭᠤᠨ》 ᠍ ᠤ ᠦᠶ᠎ᠡ ᠳᠦ ᠬᠠᠷ᠎ᠠ᠂ ᠣᠫᠲ᠋ᠢᠺ ᠤᠨ ᠦᠵᠡᠭᠳᠡᠯ ᠢ ᠠᠩᠬ᠎ᠠ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠠᠷᠠᠪ ᠤᠨ ᠰᠣᠳᠣ ᠡᠷᠳᠡᠮᠲᠡᠨ ᠠᠯᠢᠬᠠᠽᠧᠨ ᠠᠯᠢᠪᠠ ᠣᠨᠣᠯ ᠲᠠᠭᠠᠮᠠᠭ ᠢ ᠲᠤᠷᠰᠢᠯᠲᠠ ᠪᠠᠷ ᠪᠠᠲᠤᠯᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠦᠵᠡᠭᠰᠡᠨ ᠨᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ 《ᠠᠯᠲᠠᠨ ᠳᠦᠷᠢᠮ》 ᠍ ᠶᠢ ᠲᠣᠭᠲᠠᠭᠠᠭᠰᠠᠨ ᠬᠡᠷᠡᠭ᠃ ᠫᠣᠯᠢᠰᠢ ᠶᠢᠨ ᠯᠠᠮᠠ ᠺᠣᠫᠧᠷᠨᠢᠺ ᠨᠠᠷ ᠲᠥᠪᠲᠦ ᠣᠨᠣᠯ ᠤᠨ ᠮᠠᠲ᠋ᠧᠮᠠᠲ᠋ᠢᠺ ᠵᠠᠭᠪᠤᠷ ᠭᠠᠷᠭᠠᠵᠤ ᠢᠷᠡᠭᠰᠡᠨ ᠨᠢ ᠵᠢᠩᠬᠢᠨᠢ ᠡᠴᠡ ᠪᠡᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠤᠪᠢᠰᠬᠠᠯ ᠢ ᠡᠬᠢᠯᠡᠭᠦᠯᠵᠡᠢ᠃ ᠬᠠᠮᠤᠭ ᠤᠨ ᠶᠡᠬᠡ ᠰᠠᠭᠠᠳ ᠲᠣᠳᠬᠠᠷ ᠬᠢᠭᠴᠢᠳ ᠨᠢ ᠪᠢᠪᠯᠢ ᠰᠤᠳᠤᠷ ᠢ ᠭᠠᠷ ᠲᠤ ᠪᠠᠨ ᠪᠠᠷᠢᠭᠰᠠᠨ ᠰᠦᠮ᠎ᠡ ᠬᠡᠶᠢᠳ ᠦᠨ ᠬᠢᠨ᠃ ᠮᠣᠳᠣᠨ ᠤ ᠰᠡᠭᠦᠳᠡᠷ ᠲᠦ ᠤᠨᠲᠠᠵᠤ ᠪᠠᠶᠢᠭᠰᠠᠨ ᠨᠢᠶᠦ᠋ᠲ᠋ᠣᠨ ᠤ ᠲᠣᠯᠣᠭᠠᠢ ᠳᠡᠭᠡᠷ᠎ᠡ ᠤᠨᠠᠭᠰᠠᠨ ᠠᠯᠢᠮ᠎ᠠ ᠴᠣ ᠰᠢᠨ᠎ᠡ ᠶᠢᠷᠲᠢᠨᠴᠦ ᠶᠢᠨ ᠡᠭᠦᠳᠡ ᠶᠢ ᠨᠡᠭᠡᠭᠡᠨ᠎ᠡ ᠭᠡᠵᠦ ᠬᠡᠨ ᠰᠠᠨᠠᠬᠤ ᠪᠢᠯᠡ᠃ ᠲᠠᠲᠠᠯᠴᠠᠯ ᠤᠨ ᠬᠦᠴᠦ ᠶᠢ ᠨᠡᠭᠡᠭᠡᠭᠰᠡᠨ ᠢᠶᠡᠷ ᠰᠣᠩᠭᠣᠳᠠᠭ ᠮᠧᠬᠠᠨᠢᠭ ᠤᠨ ᠣᠨᠣᠯ ᠤᠷᠭᠤᠨ ᠭᠠᠷᠴᠤ ᠠᠵᠤ ᠦᠢᠯᠡᠳᠪᠦᠷᠢ ᠶᠢᠨ ᠰᠢᠨ᠎ᠡ ᠡᠷᠡᠨ ᠦ ᠦᠷ ᠦᠨ ᠲᠤᠶᠠᠭ᠎ᠠ ᠭᠡᠶᠢᠪᠡ᠃ ᠨᠢᠭᠡ ᠲᠣᠮᠣ ᠰᠢᠢᠳᠪᠦᠷᠢᠯᠡᠬᠦ ᠣᠨᠣᠯ ᠨᠡᠭᠡᠭᠡᠭᠳᠡᠬᠦ ᠶᠢᠨ ᠡᠮᠦᠨ᠎ᠡ ᠠᠰᠤᠷᠤ ᠣᠯᠠᠨ ᠲᠤᠷᠰᠢᠯᠲᠠ᠂ ᠲᠠᠭᠠᠮᠠᠭᠯᠠᠯ᠂ ᠣᠨᠣᠯ᠂ ᠰᠠᠭᠤᠷᠢ ᠲᠣᠭᠣᠰᠬ᠎ᠠ ᠨᠤᠭᠤᠳ ᠥᠷᠦᠭᠳᠡᠵᠦ ᠪᠠᠶᠢᠭᠰᠠᠨ ᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠲᠡᠦᠬᠡ ᠨᠦᠭᠦᠳ ᠭᠡᠷᠡᠴᠢᠯᠡᠨ᠎ᠡ᠃ ᠨᠢᠶᠦ᠋ᠲ᠋ᠣᠨ᠂ ᠡᠶᠢᠨᠱᠲ᠋ᠧᠶᠢᠨ ᠰᠢᠭ ᠠᠭᠤᠤ ᠬᠦᠮᠦᠰ ᠨᠢᠭᠡᠳᠬᠡᠨ ᠵᠠᠩᠭᠢᠳᠴᠤ ᠰᠤᠫᠧᠷ ᠣᠨᠣᠯ ᠪᠣᠯᠭᠠᠨ ᠳᠠᠷᠠᠭ᠎ᠠ ᠶᠢᠨ ᠡᠷᠭᠢ ᠤᠷᠤᠭᠦ ᠭᠠᠷᠬᠤ ᠭᠦᠭᠦᠷᠭᠡ ᠨᠢ ᠪᠣᠯᠳᠠᠭ ᠠᠵᠢ᠃ ᠨᠢᠶᠦ᠋ᠲ᠋ᠣᠨ ᠤ ᠰᠣᠩᠭᠣᠳᠠᠭ ᠮᠧᠬᠠᠨᠢᠭ ᠠᠴᠠ ᠺᠸᠠᠨᠲ ᠮᠧᠬᠠᠨᠢᠭ ᠤᠷᠤᠭᠤ ᠬᠢᠭᠰᠡᠨ ᠠᠭᠤᠤ ᠦᠰᠦᠷᠦᠯᠲᠡ ᠶᠢᠨ ᠡᠵᠡᠨ ᠨᠢ ᠬᠠᠷ᠎ᠠ ᠮᠠᠭᠤ ᠲᠠᠢ ᠮᠠᠺᠰ ᠫᠯᠠᠨᠺ ᠭᠡᠬᠦ ᠥᠨᠳᠦᠷ ᠲᠤᠷᠠᠩᠬᠠᠢ ᠭᠧᠷᠮᠠᠨ ᠡᠷ᠎ᠡ᠃ ᠭᠠᠳᠠᠭᠠᠳᠤ ᠶᠢᠷᠲᠢᠨᠴᠦ᠂ ᠣᠳᠣᠳ᠂ ᠭᠠᠯᠠᠺᠲ᠋ᠢᠺ ᠬᠢᠯᠢ ᠬᠢᠵᠠᠭᠠᠷ ᠦᠭᠡᠢ ᠲᠥᠰᠦᠭᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠪᠣᠯᠬᠤ ᠶᠢ ᠣᠶᠢᠯᠠᠭᠠᠵᠤ ᠤᠬᠠᠭᠠᠷᠠᠭᠰᠠᠨ ᠡᠷᠳᠡᠮᠲᠡᠳ ᠮᠠᠲ᠋ᠧᠷᠢ ᠶᠢᠨ ᠭᠦᠨ ᠤᠷᠤᠭᠤ ᠰᠢᠷᠭᠤᠵᠤ ᠦᠵᠡᠪᠡᠯ ᠪᠦᠷ ᠴᠤ ᠬᠦᠨᠳᠦ ᠬᠡᠴᠡᠭᠦᠦ᠂ ᠬᠦᠮᠦᠨ ᠢᠲᠡᠭᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠳᠠᠭᠠᠵᠢᠩ ᠲᠠᠢ ᠪᠣᠯᠬᠤ ᠶᠢ ᠣᠯᠵᠤ ᠮᠡᠳᠡᠭᠡᠳ ᠭᠠᠶᠢᠬᠠᠰᠢᠷᠠᠵᠠᠢ᠃ ᠭᠡᠷᠡᠯ ᠪᠥᠭᠡᠮ ᠦᠨ ᠳᠤᠸᠠᠯᠢᠰᠮ ᠭᠡᠬᠦ ᠬᠠᠴᠢᠷᠬᠠᠯᠲᠠᠢ ᠫᠠᠷᠠᠳ᠋ᠣᠺᠰ ᠠᠴᠠ ᠡᠬᠢᠯᠡᠭᠡᠳ ᠠᠨᠲ᠋ᠢᠮᠠᠲ᠋ᠧᠷ᠂ ᠬᠠᠷ᠎ᠠ ᠨᠦᠬᠡ᠂ ᠬᠢ ᠦᠭᠰ ᠪᠣᠽᠣᠨ᠂ ᠬᠠᠷᠠᠩᠭᠤᠢ ᠮᠠᠰᠲ᠋ᠧᠷ᠂ ᠬᠠᠷᠠᠩᠭᠤᠢ ᠡᠨᠧᠷᠭᠢ ᠭᠡᠬᠦ ᠮᠡᠲᠦ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠤᠷᠠᠨ ᠵᠥᠩᠨᠡᠯ ᠡᠴᠡ ᠴᠤ ᠢᠯᠡᠭᠦᠦ ᠭᠠᠶᠢᠬᠠᠯ ᠤᠳ ᠵᠥᠩᠳᠡᠭᠡᠨ ᠪᠠᠶᠢᠨ᠎ᠠ᠂ ᠴᠠᠭᠠᠨ᠎ᠠ ᠴᠢᠨᠢ᠃ ᠥᠯᠥ ᠦᠵᠡᠭᠳᠡᠬᠦ ᠨᠢ ᠪᠣᠳᠠᠲᠤ ᠵᠦᠢᠯ᠃ ᠶᠢᠷᠲᠢᠨᠴᠦ ᠶᠢᠨ 95 ᠬᠤᠪᠢ ᠨᠢ ᠦᠯᠦ ᠦᠵᠡᠭᠳᠡᠨ᠎ᠡ᠃ ᠲᠣᠬᠢᠶᠠᠯᠳᠤᠯ ᠪᠦᠬᠦᠨ ᠲᠣᠬᠢᠶᠠᠯᠳᠤᠵᠤ ᠪᠣᠯᠬᠤ ᠭᠠᠶᠢᠬᠠᠮᠰᠢᠭᠲᠤ ᠵᠡᠷᠭᠡᠴᠡᠭᠡ ᠣᠯᠠᠨ ᠶᠢᠷᠲᠢᠨᠴᠦ ᠡᠴᠡ ᠪᠢᠳᠡ ᠵᠥᠪᠬᠡᠨ ᠭᠠᠭᠴᠠ ᠦᠷ᠎ᠡ ᠳ᠋ᠦᠩ ᠢ ᠨᠢ ᠯᠠ ᠬᠠᠷᠠᠬᠤ ᠪᠣᠯᠤᠮᠵᠢ ᠲᠠᠢ ᠶᠢᠷᠲᠢᠨᠴᠦ ᠳ᠋ᠤ ᠠᠮᠢᠳᠤᠷᠠᠳᠠᠭ ᠲᠤᠯᠠ ᠪᠢᠳᠡᠨ ᠳᠦ ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠢᠩᠭᠢᠵᠦ ᠯᠠ ᠬᠠᠷᠠᠭᠳᠠᠨ᠎ᠠ᠃ ᠱᠣᠣ ᠵᠢᠷᠭᠤᠭᠠᠨ ᠲᠠᠯ᠎ᠠ ᠲᠠᠢ ᠪᠣᠯᠪᠠᠴᠤ ᠪᠢᠳᠡ ᠨᠢᠭᠡ ᠲᠠᠯ᠎ᠠ ᠪᠠᠷ ᠨᠢ ᠪᠠᠭᠤᠭᠰᠠᠨ ᠦᠷ᠎ᠡ ᠳ᠋ᠦᠢᠩ ᠢ ᠬᠠᠷᠠᠨ᠎ᠠ᠃ ᠺᠸᠠᠨᠲ ᠤᠨ ᠶᠢᠷᠲᠢᠨᠴᠦ ᠳ᠋ᠤ ᠵᠢᠷᠭᠤᠭᠤᠯᠠ ᠪᠠᠨ ᠵᠡᠷᠭᠡ ᠪᠠᠶᠢᠬᠤ ᠪᠣᠯᠤᠮᠵᠢ ᠲᠠᠢ᠃ ᠫᠠᠷᠠᠧᠯ ᠶᠢᠷᠲᠢᠨᠴᠦ ᠶᠢᠨ ᠰᠡᠳᠦᠪ ᠤᠳᠬ᠎ᠠ ᠵᠣᠬᠢᠶᠠᠯ ᠳᠤ ᠨᠢᠭᠡ ᠪᠤᠰᠤ ᠲᠣᠬᠢᠶᠠᠯᠳᠤᠨ᠎ᠠ᠃ ᠪᠣᠷᠬᠧᠰ ᠦᠨ 《ᠰᠠᠯᠠᠭ᠎ᠠ ᠵᠠᠮ ᠤᠳ ᠳᠠᠪᠬᠤᠴᠠᠭᠰᠠᠨ ᠴᠡᠴᠡᠷᠯᠢᠭ》 ᠦᠭᠦᠯᠡᠯᠭᠡ ᠳᠦ ᠡᠨᠡ ᠰᠠᠨᠠᠭ᠎ᠠ ᠶᠢ ᠤᠷᠠᠨ ᠭᠣᠶᠣ ᠪᠡᠷ ᠭᠠᠷᠭᠠᠭᠰᠠᠨ ᠪᠠᠶᠢᠳᠠᠭ᠃ ᠪᠢᠳᠡ᠂ ᠪᠢᠳᠡᠨ ᠦ ᠭᠠᠷᠠᠭ ᠶᠢᠷᠲᠢᠨᠴᠦ ᠣᠳᠣᠳ ᠤᠨ ᠲᠣᠭᠣᠰᠣᠨ ᠠᠴᠠ ᠪᠦᠷᠢᠳᠦᠭᠰᠡᠨ ᠭᠡᠵᠦ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠪᠠᠲᠤᠯᠠᠵᠤ ᠪᠠᠶᠢᠨ᠎ᠠ᠃ 《ᠣᠷᠴᠢᠯᠠᠩ ᠬᠤᠮᠠᠬᠢ ᠶᠢᠨ ᠲᠣᠭᠣᠰᠣᠨ ᠠᠴᠠ ᠡᠭᠦᠰᠦᠨ ᠪᠤᠢ ᠪᠣᠯᠤᠭᠰᠠᠨ》 ᠭᠡᠬᠦ ᠪᠤᠳ᠋ᠳ᠋ᠾᠠ ᠶᠢᠨ ᠭᠦᠨ ᠤᠬᠠᠭᠠᠨ ᠤ ᠲᠠᠶᠢᠯᠪᠤᠷᠢ ᠲᠠᠢ ᠠᠳᠠᠯᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠶᠢᠭ᠎ᠠ ᠪᠢᠵᠡ᠃ ᠪᠢ ᠵᠥᠪᠬᠡᠨ ᠵᠠᠬ᠎ᠠ ᠵᠤᠬ᠎ᠠ ᠠᠴᠠ ᠨᠢ ᠯᠠ ᠳᠤᠷᠠᠳᠤᠯ᠎ᠠ᠃ ᠤᠩᠰᠢᠵᠤ ᠰᠣᠨᠢᠷᠬᠠᠪᠠᠯ ᠰᠣᠨᠢᠭᠤᠴᠢ ᠬᠥᠮᠦᠨ ᠳ᠋ᠤ ᠮᠤᠩᠳᠠᠬᠤ ᠦᠭᠡᠢ ᠣᠯᠠᠨ ᠰᠣᠨᠢᠨ ᠬᠠᠴᠢᠨ ᠵᠦᠢᠯᠡᠰ ᠪᠠᠶᠢᠨ᠎ᠠ᠃ ᠡᠴᠦᠰ ᠦᠨ ᠡᠴᠦᠰ ᠲᠦ ᠮᠥᠩᠭᠥ ᠤᠯᠬᠤ᠂ ᠰᠠᠶᠢᠬᠠᠨ ᠠᠮᠢᠳᠤᠷᠠᠬᠤ ᠴᠢᠬᠤᠯᠠ ᠪᠣᠯᠬᠤ ᠠᠴᠠ ᠡᠨᠡ ᠪᠦᠬᠦᠨ ᠬᠡᠨ ᠳᠦ ᠬᠡᠷᠡᠭ ᠲᠡᠢ ᠶᠤᠮ ᠪᠤᠢ ᠭᠡᠵᠦ ᠪᠣᠳᠣᠬᠤ ᠬᠦᠮᠦᠨ ᠴᠤ ᠪᠠᠶᠢᠭ᠎ᠠ᠃ ᠶᠠᠭᠤ ᠴᠤ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠭᠰᠠᠨ ᠠᠴᠠ ᠵᠢᠭᠠᠬᠠᠨ ᠴᠤ ᠭᠡᠰᠡᠨ ᠶᠠᠭᠤᠮ᠎ᠠ ᠲᠥᠰᠦᠭᠡᠯᠡᠳᠡᠭ ᠪᠠᠶᠢᠪᠠᠯ ᠤᠭ ᠨᠢ ᠵᠦᠭᠡᠷ ᠰᠢᠦ ᠳ᠋ᠡ ᠭᠡᠵᠦ᠃