ᠪᠠᠷᠠᠰᠢ ᠦᠭᠡᠢ ᠪᠠᠶᠠᠷ ᠤᠨ ᠠᠷᠢᠬᠢ

ᠪᠤᠤ ᠵᠢᠨᠵᠤᠸᠠᠨᠭᠽᠢ

ᠶᠡᠬᠡ ᠰᠣᠷᠭᠠᠭᠣᠯᠢ ᠶᠢᠨ ᠰᠢᠯᠭᠠᠯᠲᠠ ᠲᠠᠭᠣᠰᠣᠭᠠᠳ᠂ ᠲᠡᠮᠡᠢ ᠬᠡᠳᠦᠨ ᠡᠳᠦᠷ ᠪᠣᠯᠤᠯ ᠦᠭᠡᠢ ᠂ ᠪᠣᠷᠭᠠᠰᠣᠲᠠᠢ ᠲᠣᠰᠬᠣᠨ ᠤ ᠪᠦᠬᠡ ᠭᠣᠸᠠᠢ ᠪᠦᠳᠦᠭᠦᠨ ᠬᠣᠶᠠᠷ ᠦᠬᠡᠷ ᠢᠶᠡᠨ ᠬᠣᠳᠠᠯᠳᠣᠭᠠᠳ ᠪᠠᠶᠠᠷ ᠤᠨ ᠠᠷᠢᠬᠢ ᠲᠠᠲᠠᠭᠰᠠᠭᠠᠷ  ᠪᠠᠢᠵᠤ᠂ ᠵᠤᠭᠤᠰ ᠢᠶᠠᠨ ᠪᠦᠷ ᠪᠠᠷᠠᠭᠠᠬᠣ ᠰᠢᠬᠠᠯ᠎ᠠ ᠃ ᠦᠨᠦᠳᠦᠷ ᠲᠡᠷᠡ ᠪᠠᠷᠠᠭᠣᠨ ᠲᠣᠰᠬᠣᠨ  ᠤ ᠪᠠᠨ ᠪᠠᠶᠠᠷ ᠭᠣᠸᠠᠢ ᠶᠢᠨ᠂ ᠪᠠᠭ᠎ᠠ ᠬᠦᠦ ᠶᠢᠨ ᠰᠣᠷᠭᠠᠭᠣᠯᠢ ᠳᠤ ᠣᠷᠣᠭᠰᠠᠨ᠂ ᠪᠠᠶᠠᠷ ᠤᠨ ᠠᠷᠢᠬᠢ ᠶᠢ ᠲᠠᠲᠠᠬᠣ ᠪᠠᠷ ᠪᠣᠷᠭᠠᠰᠣ ᠰᠣᠨᠳᠣᠣ ᠲᠠᠶ ᠨᠠᠷᠢᠬᠠᠨ ᠵᠦᠷᠢᠭ ᠢᠶᠡᠷ ᠪᠠᠶᠠᠷ ᠦᠭᠡᠢᠬᠡᠨ ᠭᠡᠯᠲᠦᠷᠢᠨ ᠵᠠᠮᠨᠠᠨ᠎ᠠ ᠃ ︽ ᠪᠠᠷᠠᠰᠢ ᠦᠭᠡᠢ ᠪᠠᠶᠠᠷ ᠤᠨ ᠠᠷᠢᠬᠢ ᠪᠣᠯᠵᠠᠢ ︾ ᠬᠡᠵᠦ ᠪᠣᠳᠣᠬᠣ ᠪᠦᠷᠢ ᠪᠣᠷᠣ ᠵᠢᠷᠦᠬᠡ ᠨᠢ ᠵᠢᠮᠵᠢᠬᠢᠨᠡᠵᠦ ᠪᠠᠷᠠᠭᠠᠨ ᠬᠦᠮᠦᠰᠭᠡ ᠨᠢ ᠢᠲᠠᠪᠠᠯᠵᠠᠨ᠎ᠠ ᠃ ᠬᠠᠷᠮᠠᠨ ᠲᠣᠲᠣᠷᠠᠬᠢ ᠭᠠᠷ ᠣᠲᠠᠰᠣ ᠨᠢ ᠬᠠᠴᠢᠨ ᠰᠣᠨᠢᠨ ᠢᠶᠠᠷ ᠲᠠᠴᠢᠬᠢᠨᠠᠨ ᠲᠦᠴᠢᠬᠢᠨᠡᠵᠦ ᠪᠠᠢᠲᠠᠯ᠎ᠠ ᠬᠠᠷᠢᠨ ᠲᠡᠷᠡ ᠴᠢᠨᠢ ᠯᠠᠪᠲᠠᠢ ᠬᠣᠷᠢᠮ ᠪᠠᠶᠠᠷ ᠤᠨ ᠸᠡᠢᠴᠠᠲ ᠣᠲᠠᠰᠣ ᠯᠠ ᠪᠠᠢᠯᠭᠦᠢ ᠬᠡᠮᠡᠨ ᠪᠣᠳᠣᠭᠠᠳ ᠬᠠᠮᠢᠶ᠎ᠠ ᠴᠤ ᠦᠭᠡᠢ ᠶᠤᠮ ᠰᠢᠬ ᠣᠢᠰᠢᠶᠠᠬᠣ  ᠴᠤ ᠦᠭᠡᠢ ᠣᠷᠣᠭᠰᠢᠯᠠᠵᠣ ᠯᠠ ᠶᠠᠪᠣᠨ᠎ᠠ ᠃ ᠭᠡᠨᠡᠳᠲᠡ ᠠᠷᠣ ᠠᠴᠠ ᠨᠢ ᠄

︱ ᠬᠦᠢ ᠬᠦᠶ᠋ᠢ ︕ ᠲᠠ ᠴᠢᠨᠢ ᠡᠨᠳᠡ ᠶᠠᠪᠣᠵᠣ ᠪᠠᠢᠨᠠᠣ ︖ ᠪᠢ ᠲᠠᠨ ᠢ  ᠡᠷᠢᠭᠡᠳ ᠡᠷᠢᠭᠡᠳ ᠣᠯᠬᠣ ᠦᠭᠡᠢ ᠪᠠᠢᠭᠰᠠᠨ ᠂ ᠭᠡᠰᠡᠨ ᠭᠣᠮᠪᠦ ᠨᠠᠢᠵᠠ ᠶᠢᠨ ᠬᠢᠨᠢ  ᠲᠠᠨᠢᠯ ᠲᠠᠰᠣᠯ ᠲᠠᠭᠣᠨ ᠲᠣᠭᠤᠯᠳᠣᠪᠠ ᠃

︱ ᠲᠠ ᠶᠠᠭᠣᠨ ᠳᠤ ᠨᠠᠮ᠎ᠠ ᠶᠢ ᠡᠷᠢᠵᠦ ᠪᠠᠰᠠ ᠶᠠᠮᠠᠷ ᠣᠴᠢᠷ ᠲᠠᠶ ᠪᠣᠯᠪᠠ ︖

︱ ᠴᠢᠮ᠎ᠠ ᠶᠢ ᠣᠷᠢᠵᠣ ᠮᠠᠷᠭᠠᠰᠢ ᠪᠠᠶᠠᠷ ᠤᠨ ᠠᠷᠢᠬᠢ ᠲᠠᠲᠠᠭᠣᠯᠤᠶ᠎ᠠ

ᠭᠡᠰᠡᠨ ᠶᠤᠮ ᠭᠡᠴᠢᠭᠡᠳ ᠭᠣᠮᠪᠤ ᠭᠣᠸᠠᠢ ᠲᠡᠭᠷᠢ ᠭᠠᠵᠠᠷ ᠢ ᠰᠣᠯᠢᠪᠴᠢᠯᠠᠨ ᠰᠢᠷᠲᠡᠨ᠎ᠡ ᠃

︱  ᠲᠠ ᠴᠢᠨᠢ ᠣᠷᠵᠢᠨᠤᠨ ᠣᠷᠳᠣ ᠬᠠᠷᠰᠢ ᠰᠣᠯᠢᠯ᠎ᠠ ᠬᠡᠮᠡᠨ ᠠᠷᠢᠬᠢ ᠣᠣᠭᠤᠯᠭᠠᠨ ᠂ ᠨᠢᠳᠣᠨᠤᠨ ᠮᠡᠭᠡᠵᠢ ᠭᠠᠬᠠᠢ ᠠᠷᠪᠠᠨ ᠨᠡᠢᠮᠠ ᠲᠦᠷᠦᠯ᠎ᠡ ᠬᠡᠮᠡᠨ ᠣᠯᠠᠨ ᠢ ᠣᠷᠢᠵᠣ ᠬᠣᠷᠢᠮᠯᠠᠴᠢᠬᠠᠭᠠᠳ ᠂ ᠣᠳᠤ ᠪᠠᠰᠠ ᠶᠠᠮᠠᠷ ᠪᠠᠶᠠᠷ ᠪᠣᠯᠴᠢᠬᠠᠪᠠ ︖

︱ ᠬᠠᠢ ᠂ ᠡᠨᠡ ᠣᠳᠠᠭ᠎ᠠ ᠠᠭᠣᠯᠭ᠎ᠠ ᠨᠢ ᠣᠨᠳᠣᠣ ᠪᠣᠯᠴᠢᠬᠠᠪᠠ ᠂ ᠬᠦᠦ ᠶᠢᠨ ᠮᠢᠨᠢ ᠰᠣᠷᠭᠠᠭᠣᠯᠢ ᠳᠤ ᠣᠷᠣᠬᠤ ᠪᠠᠶᠠᠷ ᠤᠨ ᠠᠷᠢᠬᠢ ᠡ ᠂ ᠪᠠᠶᠠᠷ ᠨᠠᠢᠷ ᠤᠨ ᠣᠴᠢᠷ ᠬᠣᠢᠨ᠎ᠠ ᠬᠣᠢᠨ᠎ᠠ ᠠᠴᠠ ᠨᠢ ᠢᠷᠡᠵᠦ ᠯᠠ ᠪᠠᠢᠬᠣ ᠶᠤᠮ ᠴᠢᠨᠢ ᠬᠢᠬᠦ ᠦᠭᠡᠢ ᠪᠣᠯ ᠪᠠᠰᠠ ᠲᠠ ᠨᠠᠷ ᠮᠠᠭᠣ ᠰᠠᠨᠠᠨ᠎ᠠ ᠃ ᠨᠠᠢᠵᠠ ᠴᠢᠮᠠᠢ ᠪᠠᠨ ᠵᠠᠯᠠᠵᠤ ᠪᠠᠢᠨ᠎ᠠ ᠭᠡᠳ ᠬᠣᠭᠤᠯᠠᠢ ᠴᠡᠴᠡᠷᠬᠢᠯᠡᠭᠦᠯᠦᠨ ᠶᠠᠷᠢᠵᠣ ᠵᠣᠭᠰᠣᠨ᠎ᠠ ᠃

︱ ᠬᠣᠪᠢ ᠨᠢ ᠭᠠᠷᠣᠭᠠᠳ ᠢᠷᠡᠴᠢᠬᠡᠭᠰᠡᠨ ᠦᠦ ︖ ᠬᠡᠳᠦᠢ ᠬᠣᠪᠢ

ᠰᠢᠯᠭᠠᠭᠰᠠᠨ ᠪᠣᠢ ︖ ᠮᠠᠭᠣᠬᠠᠢ ᠰᠢᠯᠭᠠᠭᠰᠠᠨ ᠪᠣᠯ ᠪᠠᠶᠠᠷ ᠬᠢᠭᠡᠳ ᠨᠢᠭᠣᠷ  ᠢᠶᠠᠨ ᠭᠡᠭᠡᠬᠦ ᠦᠭᠡᠢ ᠦᠦ ︖

︱ ᠬᠠᠷᠢᠨ ᠢᠶᠠᠨ ᠪᠣᠴᠠᠭᠠᠬᠣ ᠭᠡᠵᠦ ᠪᠠᠢᠬᠣ ᠶᠤᠮ ᠴᠢᠨᠢ ᠬᠣᠪᠢ ᠮᠤᠪᠢ

ᠭᠡᠵᠦ ᠪᠢ ᠬᠠᠮᠢᠶᠠᠷᠬᠣ  ᠦᠭᠡᠢ ᠂ ᠬᠣᠷᠢᠨ ᠬᠣᠪᠢ ᠠᠪᠣᠭᠰᠠᠨ  ᠴᠤ ᠡᠨᠡ ᠪᠠᠶᠠᠷ ᠢ ᠵᠠᠪᠠᠯ ᠬᠢᠨ᠎ᠡ ᠭᠡᠵᠦ ᠠᠵᠢᠭ  ᠴᠤ ᠦᠭᠡᠢ ᠶᠠᠷᠢᠵᠣ ᠭᠠᠷᠣᠯ᠎ᠠ ᠃

ᠪᠦᠬᠡ ᠭᠣᠸᠠᠢ ᠠᠭᠣᠷ ᠢᠶᠠᠨ ᠲᠠᠷᠣᠰᠬᠢᠨ ᠬᠠᠷᠮᠠᠨ ᠠᠴᠠ ᠪᠠᠨ ᠭᠣᠷᠪᠠᠨ ᠵᠠᠭᠣᠨ ᠲᠦᠭᠦᠷᠢᠭ ᠲᠠᠲᠠᠨ ᠭᠠᠷᠭᠠᠭᠠᠳ ᠄

︱ ᠮᠠ ᠂ ᠪᠢ ᠣᠴᠢᠵᠤ ᠲᠡᠢᠯᠦᠬᠦ ᠦᠭᠡᠢ ᠯᠠᠢ ᠂ ᠪᠡᠯᠡᠭ ᠢ ᠨᠢ ᠦᠭᠴᠢᠭᠡᠶ᠎ᠡ ᠭᠡᠳ ᠭᠣᠮᠪᠦ ᠭᠤᠸᠠᠢ ᠳᠦ ᠭᠠᠷᠲᠠᠭᠣᠯᠪᠠ ᠃

ᠭᠣᠷᠪᠠᠨ ᠵᠠᠭᠣᠨ ᠲᠦᠭᠦᠷᠢᠭ ᠢ ᠲᠣᠰᠤᠨ ᠠᠪᠣᠭᠰᠠᠨ ᠭᠣᠮᠪᠦ ᠭᠣᠸᠠᠢ

ᠪᠠᠶᠠᠷᠯᠠᠭᠰᠠᠨ  ᠦᠭᠡᠢ ᠮᠦᠷᠳᠡᠭᠡᠨ ᠶᠡᠬᠡ ᠯᠠ ᠲᠣᠷ᠎ᠠ ᠦᠭᠡᠢᠴᠡᠭᠰᠡᠨ

ᠮᠠᠶ᠋ᠢᠭᠲᠠᠢ ᠄

︱ ᠬᠦᠶ᠋ᠢ ᠂ ᠨᠠᠢᠵᠠ ᠡ ᠂ ᠣᠳᠣ ᠶᠢᠨ ᠪᠡᠯᠡᠭ ᠴᠢᠨᠢ ᠭᠣᠷᠪᠠᠨ ᠵᠠᠭᠣ

ᠪᠢᠰᠢ ᠯᠠᠢ ᠂ ᠲᠠᠪᠣᠨ ᠵᠠᠭᠣ  ᠪᠣᠯᠴᠢᠬᠠᠭᠰᠠᠨ ᠰᠢᠦ ︕ ᠲᠠ ᠮᠡᠳᠡᠭᠡᠳᠦᠢ ᠦᠦ  ︖   ᠭᠡᠳ ᠪᠦᠬᠡ ᠭᠣᠸᠠᠢ ᠲᠡᠰᠢ ᠱᠣᠬᠣᠭᠣᠷᠬᠠᠨ ᠰᠢᠷᠲᠡᠨ᠎ᠡ ᠃

︱ ᠶᠠᠮᠠᠷ ᠲᠠᠪᠣᠨ ᠵᠠᠭᠣ ᠪᠣᠢ ︖ ᠪᠢ ᠬᠡᠨ ᠦ ᠳᠦ ᠴᠦᠮ ᠭᠣᠷᠪᠠᠨ ᠵᠠᠭᠣ ᠬᠡᠮᠡᠨ ᠠᠭᠣᠷᠯᠠᠨ ᠪᠠᠷᠬᠢᠷᠠᠪᠠ ᠃

ᠪᠦᠬᠡ ᠭᠣᠸᠠᠢ ᠶᠢᠨ ᠬᠢᠯᠢᠩᠨᠡᠨ ᠠᠭᠣᠷᠯᠠᠭᠰᠠᠨ ᠢ ᠬᠠᠷᠠᠭᠰᠠᠨ ᠭᠣᠮᠪᠦ ᠭᠣᠸᠠᠢ ᠠᠷᠭ᠎ᠠ ᠦᠭᠡᠢᠳᠡᠬᠦ ᠳᠦ ᠪᠡᠨ ᠭᠣᠷᠪᠠᠨ ᠵᠠᠭᠣᠨ ᠲᠦᠭᠦᠷᠢᠭ ᠢᠶᠡᠨ ᠬᠠᠷᠮᠠᠨ ᠳᠤ ᠪᠠᠨ ᠬᠢᠬᠦ ᠶᠢᠨ ᠲᠠᠭᠠᠣ ᠄

︱ ᠪᠣᠯᠵᠠᠢ ᠂ ᠪᠣᠯᠵᠠᠢ ᠃ ᠲᠡᠢᠮᠦ ᠪᠣᠯ ᠲᠠ ᠲᠠᠷᠠᠭ᠎ᠠ ᠣᠳᠠᠭᠠᠨ ᠤ ᠪᠠᠶᠠᠷ ᠲᠡᠭᠡᠷ᠎ᠡ ᠮᠡᠳᠡᠴᠢᠬᠡ ᠭᠡᠵᠣ ᠭᠠᠷ ᠡᠷᠭᠢᠭᠦᠯᠦᠨ ᠶᠠᠷᠢᠪᠠ ᠃

︱ ᠠ ︕ ᠲᠠᠷᠠᠭ᠎ᠠ ᠣᠳᠠᠭ᠎ᠠ  ᠪᠠᠰᠠ ᠶᠠᠮᠠᠷ ᠪᠠᠶᠠᠷ ᠬᠢᠬᠦ ᠭᠡᠵᠦ ᠪᠠᠢᠬᠣ ᠶᠤᠮ  ᠬᠡᠮᠡᠨ ᠶᠡᠬᠡ ᠯᠠ ᠰᠣᠴᠢᠨ ᠠᠰᠠᠭᠣᠪᠠ ᠃

︱ ᠠᠪᠣ ᠶᠢᠨ ᠮᠢᠨᠢ ᠵᠢᠷᠠᠨ ᠨᠢᠭᠡᠨ ᠦ ᠪᠠᠶᠠᠷ ᠰᠢᠳᠡ ᠭᠡᠵᠦ ᠶᠠᠷᠢᠴᠢᠬᠠᠭᠠᠳ ᠭᠤᠮᠪᠤ ᠭᠤᠸᠠᠢ ᠬᠠᠳᠠᠭᠠᠨᠠᠨ ᠢᠨᠢᠶᠡᠨ᠎ᠡ ᠃ 

︱ ᠪᠣᠷᠬᠠᠨ ᠂ ᠪᠣᠷᠬᠠᠨ ︕ ᠪᠠᠷᠠᠰᠢ ᠦᠭᠡᠢ ᠪᠠᠶᠠᠷ ᠤᠨ ᠠᠷᠢᠬᠢ ᠪᠣᠯᠵᠠᠢ ᠬᠡᠮᠡᠨ ᠵᠠᠯᠪᠠᠷᠢᠭᠰᠠᠭᠠᠷ ᠪᠠᠷᠠᠭᠣᠨ ᠵᠦᠭ ᠲᠦ ᠪᠦᠬᠡ ᠭᠣᠸᠠᠢ ᠪᠠᠷ᠎ᠠ ᠦᠭᠡᠢ ᠪᠣᠯᠵᠤ ᠣᠳᠪᠠ ᠃