ᠰᠢᠭᠦᠮᠵᠢ
ᠳ᠋ ᠊ ᠨᠣᠷᠪᠤ ᠶᠢᠨ︽ ᠲᠡᠵᠢᠭᠡᠪᠦᠷᠢ︾ ᠨᠣᠮ ᠡᠴᠡ ᠤᠩᠰᠢᠬᠤ 15︽ ᠵᠢᠪᠡᠭᠦᠨ︾ ᠰᠠᠨᠠᠭᠠ
ᠳ᠋ ᠊ ᠨᠣᠷᠪᠣ ᠪᠣᠯ ᠮᠣᠩᠭᠣᠯ ᠬᠡᠯᠡ ᠳᠦ ᠤᠷᠠᠨ ᠵᠣᠬᠢᠶᠠᠯ ᠤᠨ ᠶᠢᠷᠲᠢᠨᠴᠦ ᠳ᠋ᠡᠬᠢ ᠮᠠᠰᠢ ᠬᠦᠴᠥᠲᠡᠢ ᠬᠦᠦᠷᠨᠢᠯᠴᠢ᠂ ᠬᠦᠮᠦᠨ ᠦ ᠰᠡᠳᠬᠢᠯ ᠦᠨ ᠤᠲᠠᠰᠤ ᠶᠢ ᠴᠢᠪᠴᠢᠷᠡᠭᠦᠯᠵᠦ ᠴᠢᠪᠴᠢᠷᠡᠭᠦᠯᠵᠦ ᠪᠠᠶᠢᠭᠠᠳ ᠲᠡᠭᠦᠰᠬᠡᠯ ᠳᠦ ᠨᠢ ᠲᠣᠩ ᠬᠢᠲᠡᠯᠡ ᠲᠠᠲᠠᠨ ᠲᠠᠯᠪᠢᠵᠤ᠂ ᠳᠦᠷᠢ ᠦᠳ ᠦᠨ ᠰᠡᠳᠬᠢᠯ ᠵᠦᠢ ᠶᠢᠨ ᠨᠠᠷᠢᠨ ᠴᠢᠩᠳᠠ ᠬᠥᠪᠦᠷᠡᠯ ᠡᠴᠡ ᠤᠶᠠᠭᠳᠠᠨ ᠡᠷᠡᠴᠢᠯᠡᠭᠳᠡᠭᠰᠡᠨ ᠤᠩᠰᠢᠭᠴᠢ ᠶᠢᠨ ᠰᠡᠳᠬᠢᠯ ᠵᠦᠢ ᠶᠢ ᠴᠤ ᠪᠠᠰᠠ ᠳᠣᠩᠰᠣᠯᠭᠠᠨ ᠡᠯᠳᠡᠪᠯᠡᠵᠦ ᠴᠢᠳᠠᠳᠠᠭ ᠣᠪᠠᠳᠢᠰ ᠲᠠᠢ ᠵᠣᠬᠢᠶᠠᠯᠴᠢ᠃ ᠲᠡᠭᠦᠨ ᠢ ᠵᠠᠷᠢᠮ ᠤᠩᠰᠢᠭᠴᠢᠳ ᠡᠨᠡ ᠴᠠᠭ ᠦᠶᠡ ᠶᠢᠨ ᠮᠣᠩᠭᠣᠯ ᠤᠨ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠳᠠᠬᠢ ᠬᠠᠮᠤᠭ ᠤᠨ 《ᠵᠢᠪᠡᠭᠦᠨ》 ᠳᠦᠷᠢ ᠦᠳ ᠢ ᠪᠦᠲᠦᠭᠡᠭᠰᠡᠨ 《ᠵᠢᠪᠡᠭᠦᠨ》 ᠵᠣᠬᠢᠶᠠᠯᠴᠢ ᠭᠡᠬᠦ ᠨᠢ ᠴᠤ ᠪᠤᠢ᠃ ᠲᠡᠭᠦᠨ ᠦ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠳᠦ 《ᠵᠢᠪᠡᠭᠦᠨ ᠦᠨᠡᠨ》᠂ 《ᠰᠡᠳᠬᠢᠯ ᠦᠨ ᠤᠶᠠᠩᠭᠠ》 ᠠᠯᠢ ᠠᠯᠢ ᠨᠢ ᠲᠡᠩᠴᠡᠭᠦᠦ ᠪᠠᠶᠢᠳᠠᠭ ᠠᠴᠠ ᠵᠣᠬᠢᠶᠠᠯ ᠤᠳ ᠨᠢ ᠤᠩᠰᠢᠭᠴᠢ ᠶᠢᠨ ᠰᠡᠳᠬᠢᠯ ᠳᠦ ᠲᠡᠭᠡᠲᠡᠯᠡ ᠪᠡᠨ ᠲᠣᠳᠣ ᠦᠯᠡᠳᠡᠵᠦ᠂ ᠭᠦᠨ ᠰᠡᠳᠬᠢᠭᠳᠡᠯ ᠦᠯᠡᠳᠡᠭᠡᠳᠡᠭ ᠪᠢᠵᠡ ᠡ᠃
5073
2018-09-13 10:33
发表于:内蒙古
ᠳ᠋ ᠊ ᠨᠣᠷᠪᠤ ᠶᠢᠨ︽ ᠲᠡᠵᠢᠭᠡᠪᠦᠷᠢ︾ ᠨᠣᠮ ᠡᠴᠡ ᠤᠩᠰᠢᠬᠤ 15︽ ᠵᠢᠪᠡᠭᠦᠨ︾ ᠰᠠᠨᠠᠭᠠ
ᠳ᠋ ᠊ ᠨᠣᠷᠪᠣ ᠪᠣᠯ ᠮᠣᠩᠭᠣᠯ ᠬᠡᠯᠡ ᠳᠦ ᠤᠷᠠᠨ ᠵᠣᠬᠢᠶᠠᠯ ᠤᠨ ᠶᠢᠷᠲᠢᠨᠴᠦ ᠳ᠋ᠡᠬᠢ ᠮᠠᠰᠢ ᠬᠦᠴᠥᠲᠡᠢ ᠬᠦᠦᠷᠨᠢᠯᠴᠢ᠂ ᠬᠦᠮᠦᠨ ᠦ ᠰᠡᠳᠬᠢᠯ ᠦᠨ ᠤᠲᠠᠰᠤ ᠶᠢ ᠴᠢᠪᠴᠢᠷᠡᠭᠦᠯᠵᠦ ᠴᠢᠪᠴᠢᠷᠡᠭᠦᠯᠵᠦ ᠪᠠᠶᠢᠭᠠᠳ ᠲᠡᠭᠦᠰᠬᠡᠯ ᠳᠦ ᠨᠢ ᠲᠣᠩ ᠬᠢᠲᠡᠯᠡ ᠲᠠᠲᠠᠨ ᠲᠠᠯᠪᠢᠵᠤ᠂ ᠳᠦᠷᠢ ᠦᠳ ᠦᠨ ᠰᠡᠳᠬᠢᠯ ᠵᠦᠢ ᠶᠢᠨ ᠨᠠᠷᠢᠨ ᠴᠢᠩᠳᠠ ᠬᠥᠪᠦᠷᠡᠯ ᠡᠴᠡ ᠤᠶᠠᠭᠳᠠᠨ ᠡᠷᠡᠴᠢᠯᠡᠭᠳᠡᠭᠰᠡᠨ ᠤᠩᠰᠢᠭᠴᠢ ᠶᠢᠨ ᠰᠡᠳᠬᠢᠯ ᠵᠦᠢ ᠶᠢ ᠴᠤ ᠪᠠᠰᠠ ᠳᠣᠩᠰᠣᠯᠭᠠᠨ ᠡᠯᠳᠡᠪᠯᠡᠵᠦ ᠴᠢᠳᠠᠳᠠᠭ ᠣᠪᠠᠳᠢᠰ ᠲᠠᠢ ᠵᠣᠬᠢᠶᠠᠯᠴᠢ᠃ ᠲᠡᠭᠦᠨ ᠢ ᠵᠠᠷᠢᠮ ᠤᠩᠰᠢᠭᠴᠢᠳ ᠡᠨᠡ ᠴᠠᠭ ᠦᠶᠡ ᠶᠢᠨ ᠮᠣᠩᠭᠣᠯ ᠤᠨ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠳᠠᠬᠢ ᠬᠠᠮᠤᠭ ᠤᠨ 《ᠵᠢᠪᠡᠭᠦᠨ》 ᠳᠦᠷᠢ ᠦᠳ ᠢ ᠪᠦᠲᠦᠭᠡᠭᠰᠡᠨ 《ᠵᠢᠪᠡᠭᠦᠨ》 ᠵᠣᠬᠢᠶᠠᠯᠴᠢ ᠭᠡᠬᠦ ᠨᠢ ᠴᠤ ᠪᠤᠢ᠃ ᠲᠡᠭᠦᠨ ᠦ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠳᠦ 《ᠵᠢᠪᠡᠭᠦᠨ ᠦᠨᠡᠨ》᠂ 《ᠰᠡᠳᠬᠢᠯ ᠦᠨ ᠤᠶᠠᠩᠭᠠ》 ᠠᠯᠢ ᠠᠯᠢ ᠨᠢ ᠲᠡᠩᠴᠡᠭᠦᠦ ᠪᠠᠶᠢᠳᠠᠭ ᠠᠴᠠ ᠵᠣᠬᠢᠶᠠᠯ ᠤᠳ ᠨᠢ ᠤᠩᠰᠢᠭᠴᠢ ᠶᠢᠨ ᠰᠡᠳᠬᠢᠯ ᠳᠦ ᠲᠡᠭᠡᠲᠡᠯᠡ ᠪᠡᠨ ᠲᠣᠳᠣ ᠦᠯᠡᠳᠡᠵᠦ᠂ ᠭᠦᠨ ᠰᠡᠳᠬᠢᠭᠳᠡᠯ ᠦᠯᠡᠳᠡᠭᠡᠳᠡᠭ ᠪᠢᠵᠡ ᠡ᠃ ᠡᠨᠡ ᠤᠳᠠᠭᠠ ᠳᠤ ᠪᠢᠳᠡ ᠮᠠᠨ ᠤ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠤᠨ ᠲᠤᠯᠬᠤᠲᠠᠢ ᠲᠥᠯᠥᠭᠡᠯᠡᠭᠴᠢ᠂ ᠡᠨᠡ ᠴᠠᠭ ᠤᠨ ᠨᠢᠭᠡᠨ ᠡᠲᠡᠭᠡᠳ ᠰᠣᠳᠣᠨ ᠵᠣᠬᠢᠶᠠᠯᠴᠢ ᠳ ᠊ ᠨᠣᠷᠪᠤ ᠶᠢᠨ 《 ᠲᠡᠵᠢᠭᠡᠪᠦᠷᠢ ᠲᠡᠷᠢᠭᠦᠲᠦ ᠰᠢᠯᠢᠮᠡᠯ ᠪᠦᠲᠦᠭᠡᠯ ᠤᠨ ᠴᠢᠭᠤᠯᠭᠠᠨ》 ᠨᠣᠮ ᠠᠴᠠ ᠤᠩᠰᠢᠭᠰᠠᠨ ᠬᠦᠮᠦᠨ ᠦ ᠰᠡᠳᠬᠢᠯ ᠢ ᠡᠷᠬᠡ ᠦᠭᠡᠢ ᠰᠡᠷᠬᠢᠯᠭᠡᠬᠦ ᠳᠠᠷᠠᠭᠠᠬᠢ ᠡᠰᠢᠯᠡᠯ ᠦᠳ ᠢ ᠬᠦᠷᠭᠡᠵᠦ ᠪᠠᠶᠢᠨᠠ᠃
1
ᠪᠣᠷᠣ ᠶᠢ ᠠᠮᠢᠳᠤᠷᠠᠯ ᠤᠨ ᠬᠥᠬᠡ ᠬᠠᠷᠭᠤᠢ ᠪᠠᠷ ᠪᠥᠳᠥᠴᠢᠨ ᠪᠠᠷᠢᠨ ᠭᠡᠯᠳᠦᠷᠢᠬᠦ ᠳᠦ ᠨᠢ ᠶᠠᠷᠰᠢᠭ ᠲᠠᠢ ᠰᠠᠨᠠᠭᠳᠠᠬᠤ ᠡᠳᠦᠷ ᠣᠯᠠᠨ ᠪᠣᠯᠤᠯᠠ᠃ ᠠᠮᠢᠳᠤᠷᠠᠯ ᠬᠡᠮᠡᠭᠴᠢ ᠶᠢ ᠦᠯᠢᠭᠡᠷ ᠳᠣᠮᠣᠭ ᠤᠨ ᠭᠠᠶᠢᠬᠠᠮᠰᠢᠭᠲᠤ ᠶᠢᠷᠲᠢᠨᠴᠦ ᠮᠡᠲᠦ ᠪᠣᠳᠣᠵᠤ᠂ ᠲᠡᠷᠡ ᠯᠠ ᠶᠢᠷᠲᠢᠨᠴᠦ ᠳ᠋ᠤ ᠳᠤᠷᠠ ᠪᠠᠷ ᠵᠤᠭᠠᠴᠠᠨ᠂ ᠦᠨᠦᠷᠯᠡᠵᠦ ᠠᠮᠲᠠᠯᠠᠬᠤ ᠠᠴᠠ ᠡᠬᠢᠯᠡᠭᠡᠳ ᠲᠠᠪᠤᠨ ᠮᠡᠳᠡᠷᠡᠬᠦᠢ ᠪᠡᠷ ᠢᠶᠡᠨ ᠲᠠᠭᠠᠯᠠᠨ ᠬᠦᠷᠲᠡᠬᠦ ᠶᠢᠨ ᠮᠥᠷᠦᠭᠡᠰᠦᠯ ᠳᠦ ᠪᠣᠭᠲᠣᠯᠠᠭᠤᠯᠵᠤ᠂ ᠤᠬᠠᠭᠠᠨ ᠦᠭᠡᠢ ᠳᠤᠷᠠᠯᠠᠯ ᠤᠨ ᠤᠷᠠᠬᠠᠨ ᠳᠤ ᠣᠷᠣᠭᠠᠳ᠂ ᠵᠥᠩ ᠵᠡᠭᠦᠳᠦᠨ ᠦ ᠲᠩᠷᠢ ᠳᠦ᠂ ᠲᠣᠷᠮᠣᠭᠣᠷ ᠥᠬᠢᠨ ᠤ ᠬᠠᠷᠠ ᠨᠢᠳᠦᠨ ᠦ ᠬᠦᠰᠡᠯᠡᠩ ᠦᠨ ᠭᠢᠯᠪᠠᠭᠠ ᠮᠡᠲᠦ ᠬᠠᠷᠠᠴᠠᠨ ᠳᠤ ᠪᠤᠢ ᠪᠡᠶᠡ ᠮᠢᠨᠢ ᠬᠠᠯᠠᠭᠤ ᠲᠥᠭᠡᠨᠡᠨ ᠰᠢᠲᠠᠵᠤ᠂ ᠵᠢᠷᠦᠬᠡ ᠪᠡᠨ ᠰᠢᠮᠰᠢᠷᠡᠲᠡᠯᠡ ᠬᠠᠶᠢᠷᠠᠯᠠᠵᠤ ᠶᠠᠪᠤᠭᠰᠠᠨ ᠮᠢᠨᠢ ᠰᠠᠶ᠋ᠢᠬᠠᠨ ᠮᠡᠲᠦ᠃ ᠭᠡᠲᠡᠯᠡ ᠣᠳᠣ ᠤᠬᠠᠭᠠᠨ ᠦᠭᠡᠢ ᠪᠤᠤ ᠬᠡᠯᠡ ᠤᠬᠠᠭᠠᠨ ᠲᠠᠢ ᠳᠤᠷᠠᠯᠠᠬᠤ ᠪᠠᠨ ᠴᠤ ᠪᠣᠯᠢᠭᠠ ᠤᠤ ᠳ᠋ᠠ᠃
2
ᠨᠥᠮᠥᠷᠢ ᠶᠢ ᠨᠢ ᠪᠣᠳᠣᠵᠤ᠂ ᠬᠣᠭ ᠲᠠᠢ ᠵᠢᠯᠠᠭᠠ ᠰᠠᠬᠢᠵᠤ ᠬᠡᠪᠲᠡᠭᠰᠡᠨ ᠡᠴᠡ ᠨᠢᠴᠦᠭᠦᠨ ᠬᠢᠷᠠ ᠶᠢᠨ ᠣᠷᠣᠢ ᠳᠤ ᠭᠠᠷᠤᠭᠠᠳ ᠳᠠᠭᠠᠷᠠᠵᠤ ᠶᠠᠪᠤᠭᠰᠠᠨ ᠮᠢᠨᠢ ᠳᠡᠭᠡᠷᠡ ᠪᠢᠵᠡ ᠳ᠋ᠡ᠃
3
ᠦᠬᠦᠯ ᠭᠡᠭᠴᠢ ᠨᠢ ᠬᠦᠮᠦᠨ ᠦ ᠪᠡᠶᠡ ᠶᠢ ᠣᠭᠣᠷᠴᠣ᠂ ᠬᠣᠷᠣᠬᠠᠢ ᠰᠢᠪᠠᠵᠢᠨ ᠤ ᠰᠠᠷᠪᠠᠭᠤᠨ ᠳᠤ ᠴᠤ ᠪᠣᠯᠲᠤᠭᠠᠢ ᠬᠤᠪᠢᠯᠠᠬᠤᠢ ᠶᠢᠨ ᠴᠢᠨᠠᠷ ᠮᠥᠨ ᠪᠣᠯᠪᠠᠰᠤ ᠡᠨᠳᠡ ᠴᠤᠬᠤᠮ ᠲᠡᠷᠡ ᠮᠥᠬᠥᠯ ᠦᠨ ᠠᠮᠲᠠ ᠮᠡᠳᠡᠷᠡᠭᠳᠡᠬᠦ ᠠᠵᠤᠭᠤ᠃ ᠬᠦᠮᠦᠨ ᠤᠰᠠᠳᠴᠤ ᠪᠣᠯᠤᠨᠠ᠂ ᠬᠠᠷᠢᠨ ᠣᠶᠤᠨ ᠤᠬᠠᠭᠠᠨ ᠤᠰᠠᠳᠬᠤ ᠦᠭᠡᠢ ᠭᠡᠳᠡᠭ ᠬᠤᠳᠠᠯ ᠨᠢ ᠡᠨᠳᠡ ᠮᠡᠳᠡᠭᠳᠡᠨᠡ᠃ ᠡᠨᠳᠡ ᠤᠷᠢᠳ ᠢᠶᠠᠷ ᠣᠶᠤᠨ ᠰᠡᠳᠬᠢᠯ ᠨᠢ ᠦᠬᠦᠵᠦ᠂ ᠵᠥᠪᠬᠡᠨ ᠬᠦᠮᠦᠨ ᠳᠦᠷᠰᠦ ᠲᠡᠢ ᠠᠮᠢᠲᠠᠨ ᠦᠯᠡᠳᠡᠭᠡᠳ ᠡᠴᠦᠰ ᠲᠦ ᠨᠢ ᠵᠢᠰᠦ ᠬᠤᠪᠢᠷᠠᠭᠠᠨ ᠭᠦᠵᠡᠭᠡ ᠰᠢᠷᠤᠶᠢᠳᠠᠮᠤᠢ᠃ ᠬᠤᠪᠢ ᠵᠠᠶᠠᠭᠠᠨ ᠤ ᠡᠨᠡ ᠵᠣᠭᠰᠣᠭᠠᠯ ᠳᠤ ᠢᠷᠡᠭᠰᠡᠳ ᠠᠮᠢᠳᠤᠷᠠᠬᠤᠢ ᠶᠢᠨ ᠡᠴᠦᠰ ᠦᠨ ᠡᠨᠡ ᠠᠮᠲᠠ ᠶᠢ ᠲᠠᠨᠢᠮᠠᠭᠴᠠ ᠪᠤᠰᠢᠭᠤᠬᠠᠨ ᠲᠣᠨᠢᠯᠭᠠᠬᠤ ᠶᠢ ᠪᠤᠷᠬᠠᠨ ᠪᠠᠭᠰᠢ ᠠᠴᠠ ᠭᠤᠶᠤᠨ ᠵᠠᠯᠪᠠᠷᠢᠭᠰᠠᠭᠠᠷ ᠬᠠᠷᠠᠬᠤ ᠳᠤ ᠪᠠᠷᠠ ᠨᠢ ᠤᠬᠠᠭᠠᠨ ᠪᠦᠳᠦᠷᠢᠮᠡ᠂ ᠰᠤᠨᠤᠰᠬᠤ ᠳᠠᠭᠤ ᠨᠢ ᠠᠳᠠ ᠵᠡᠳᠬᠡᠷ ᠢ ᠰᠠᠨᠠᠭᠳᠠᠭᠤᠯᠤᠮᠠ ᠪᠣᠯᠬᠤ ᠠᠭᠠᠳ ᠡᠷᠯᠢᠭ ᠦᠨ ᠡᠯᠴᠢ ᠶᠢ ᠪᠠᠷᠢᠵᠤ ᠠᠪᠬᠤ ᠭᠡᠰᠡᠨ ᠮᠡᠲᠦ ᠭᠡᠲᠡᠨ ᠮᠢᠷᠢᠶᠠᠨ ᠰᠡᠭᠦᠳᠡᠭᠡᠨᠡᠨ ᠲᠡᠮᠲᠡᠴᠢᠬᠦ ᠨᠢ ᠴᠢᠳᠬᠥᠷ ᠪᠠᠬᠠᠳᠤᠮᠠ᠃
4
ᠠᠯᠢᠮᠠᠨ ᠰᠠᠷᠠᠨ ᠤ ᠪᠥᠵᠥᠩᠲᠦ ᠨᠢᠭᠤᠷ ᠲᠤ ᠡᠵᠢ ᠶᠢᠨ ᠮᠢᠨᠢ ᠴᠢᠷᠠᠢ ᠲᠣᠳᠣᠷᠠᠵᠤ᠂ ᠲᠦᠳᠡᠭ ᠦᠨ ᠭᠡᠷᠡᠯ ᠳᠦ ᠲᠠᠯᠠ ᠰᠡᠭᠦᠳᠡᠷᠲᠦᠭᠰᠡᠨ ᠬᠦᠦ ᠶᠢᠨ ᠢᠶᠡᠨ ᠨᠢᠭᠤᠷ ᠢ ᠬᠠᠷᠠᠭᠠᠳ ᠪᠠᠶᠢᠬᠤ ᠰᠢᠭ᠃ ᠭᠢᠲ᠋ᠠᠷ ᠤᠨ ᠤᠲᠠᠰᠤ ᠴᠢᠴᠢᠭᠢᠨᠡᠨ ᠴᠤᠷᠬᠢᠷᠠᠬᠤ ᠳᠤ ᠪᠠᠷᠠᠭᠠᠨ ᠣᠢ ᠶᠢᠨ ᠨᠠᠪᠴᠢᠰ ᠳᠣᠷᠭᠢᠵᠤ ᠡᠵᠢ ᠶᠢᠨ ᠲᠤᠬᠠᠢ ᠳᠠᠭᠤᠨ ᠳᠤ ᠤᠶᠠᠷᠠᠨ᠂ ᠬᠦᠢᠲᠡᠨ ᠰᠢᠭᠦᠳᠡᠷᠢ ᠪᠡᠨ ᠤᠨᠠᠭᠠᠵᠤ ᠪᠠᠶᠢᠨᠠ ᠤᠤ ᠭᠡᠵᠦ ᠪᠣᠳᠣᠭᠳᠠᠯᠠ᠃ ᠡᠵᠢ ᠶᠢᠨ ᠢᠶᠡᠨ ᠲᠤᠬᠠᠢ ᠰᠠᠶᠢᠬᠠᠨ ᠳᠠᠭᠤᠯᠠᠮᠠᠷ ᠰᠠᠨᠠᠭᠳᠠᠨ ᠬᠣᠭᠣᠯᠠᠢ ᠴᠡᠭᠡᠯᠰᠢᠭᠡᠳ ᠢᠷᠡᠪᠡ᠃ ᠬᠡᠳᠦᠨ ᠠᠷᠪᠠᠨ ᠬᠣᠨᠣᠭ ᠴᠡᠭᠡᠵᠢᠨ ᠳᠡᠭᠡᠷᠡ ᠳᠠᠷᠤᠵᠤ ᠪᠥᠭᠯᠡᠷᠡᠭᠦᠯᠦᠨ ᠪᠠᠶᠢᠭᠰᠠᠨ ᠪᠠᠷᠠᠭᠠᠨ ᠶᠠᠭᠤᠮᠠ ᠭᠡᠨᠡᠳᠲᠡ ᠵᠠᠳᠠ ᠦᠰᠦᠷᠴᠥ᠂ ᠳᠣᠲᠣᠷᠠ ᠰᠡᠳᠬᠢᠯ ᠳᠦ ᠬᠤᠷᠠᠯᠳᠤᠭᠰᠠᠨ ᠭᠤᠨᠢᠭ ᠬᠠᠷᠠᠭᠤᠰᠤᠯ᠂ ᠠᠲᠠᠭᠠ ᠬᠣᠷᠣᠰᠤᠯ᠂ ᠵᠢᠭᠰᠢᠯ ᠵᠢᠪᠡᠭᠦᠴᠡᠯ᠂ ᠶᠡᠷᠦ ᠶᠠᠭᠤᠮᠠ ᠪᠦᠬᠦᠨ ᠢ ᠮᠢᠨᠢ ᠤᠭᠢᠶᠠᠨ ᠠᠷᠢᠭᠤᠯᠠᠵᠤ ᠪᠠᠶᠢᠨᠠ ᠤᠤ ᠳ᠋ᠠ ᠭᠡᠮᠡᠷ ᠪᠠᠶᠢᠯᠠ᠃
5
ᠡᠨᠳᠡ ᠶᠠᠭᠤᠮᠠ ᠪᠦᠬᠦᠨ ᠪᠤᠢ ᠰᠢᠭ ᠠᠲᠠᠯᠠ ᠶᠠᠭᠤᠮᠠ ᠪᠦᠬᠦᠨ ᠪᠠᠶᠢᠬᠤ ᠦᠭᠡᠢ᠃ ᠬᠠᠶᠢᠷᠠᠯᠠᠬᠤ᠂ ᠳᠤᠷᠠᠯᠠᠬᠤ᠂ ᠬᠦᠰᠡᠬᠦ ᠲᠡᠮᠡᠦᠯᠬᠦ᠂ ᠠᠯᠳᠠᠬᠤ ᠣᠨᠣᠬᠤ᠂ ᠪᠦᠲᠦᠭᠡᠬᠦ ᠡᠪᠳᠡᠬᠦ ᠭᠡᠳ ᠠᠮᠢᠳᠤ ᠠᠬᠤᠢ ᠶᠢᠨ ᠣᠯᠠᠨ ᠶᠠᠭᠤᠮᠠ ᠡᠨᠳᠡ ᠦᠭᠡᠢ᠃ ᠵᠥᠪᠬᠡᠨ ᠬᠦᠯᠢᠶᠡᠬᠦ ᠳᠤᠷᠠᠰᠬᠤ ᠪᠤᠢ᠃
6
-ᠠᠷᠪᠠᠨ ᠵᠢᠷᠭᠤᠭᠠ᠂ ᠳᠣᠯᠣᠭᠠ ᠬᠦᠷᠦᠭᠰᠡᠨ ᠥᠬᠢᠳ ᠬᠥᠪᠡᠭᠦᠳ ᠬᠠᠷᠠᠴᠤᠳ ᠢ ᠪᠢᠲᠡᠭᠦᠬᠡᠨ ᠰᠡᠷᠲᠡᠩᠳᠡᠵᠦ᠂ ᠵᠢᠭ ᠵᠤᠭ ᠭᠡᠯᠴᠡᠨ ᠬᠣᠪ ᠬᠥᠭᠡᠭᠡᠴᠡᠯᠳᠦᠭᠰᠡᠭᠡᠷ ᠨᠢᠭᠡ ᠯᠠ ᠮᠡᠳᠡᠬᠦ ᠳᠦ ᠬᠡᠨ ᠨᠢᠭᠡᠨ ᠦ ᠬᠢ ᠨᠢ ᠳᠤᠷᠠᠯᠠᠯ ᠤᠨ ᠤᠷᠠᠬᠠᠨ ᠳᠤ ᠣᠷᠢᠶᠠᠯᠳᠤᠵᠤ᠂ ᠭᠠᠷᠬᠤ ᠲᠡᠩᠬᠡᠯ ᠦᠭᠡᠢ ᠪᠣᠯᠤᠨᠠ᠃ ᠲᠡᠭᠡᠮᠡᠭᠴᠡ ᠬᠠᠶᠢᠷᠠ ᠰᠡᠳᠬᠢᠯ ᠢᠶᠡᠨ ᠢᠯᠡᠴᠢᠯᠡᠯᠴᠡᠵᠦ ᠦᠨᠡᠨᠴᠢ ᠶᠠᠪᠤᠬᠤ ᠲᠠᠩᠭᠠᠷᠢᠭ ᠡᠷᠭᠦᠵᠦ᠂ ᠪᠤᠰᠢᠭᠤᠬᠠᠨ ᠡᠷᠡ ᠡᠮᠡ ᠪᠣᠯᠵᠤ᠂ ᠬᠣᠷᠸᠠ ᠶᠢᠨ ᠵᠢᠷᠭᠠᠯ ᠡᠳ᠋ᠯᠡᠬᠦ ᠶᠢ ᠶᠠᠭᠠᠷᠠᠪᠠᠴᠤ ᠪᠠᠰᠠ ᠬᠤᠳᠠᠯ ᠢᠴᠢᠩᠭᠦᠷᠡᠨ ᠦᠨᠡᠨᠴᠢ ᠡᠰᠡᠬᠦ ᠶᠢ ᠨᠢ ᠲᠤᠷᠰᠢᠬᠤ ᠢᠨᠢᠶᠡᠳᠦᠮᠲᠦ ᠵᠥᠴᠦᠭᠡ ᠵᠣᠬᠢᠶᠠᠨ ᠲᠣᠭᠯᠠᠵᠤ᠂ ᠲᠡᠭᠦᠨ ᠳᠦ ᠪᠡᠨ
ᠢᠲᠡᠭᠡᠭᠡᠳ ᠤᠬᠢᠯᠠᠵᠤ ᠭᠤᠨᠢᠵᠤ᠂ ᠵᠢᠷᠦᠬᠡ ᠪᠡᠨ ᠰᠢᠮᠰᠢᠷᠡᠭᠦᠯᠵᠦ ᠦᠵᠡᠳᠡᠭ ᠶᠤᠮ᠃ ᠡᠭᠦᠨ ᠢ ᠪᠡᠨ ᠦᠨᠡᠨᠴᠢ ᠳᠤᠷᠠᠯᠠᠯ ᠭᠡᠵᠦ ᠪᠣᠳᠣᠬᠤ ᠪᠥᠭᠡᠳ ᠵᠦᠴᠦᠭᠡ ᠳᠠᠭᠤᠰᠤᠮᠠᠭᠴᠠ ᠬᠤᠷᠠᠭᠠᠨ ᠤ ᠬᠤᠷᠠᠭᠠ ᠰᠢᠭ ᠨᠢᠯᠴᠠᠭᠠᠢ ᠬᠡᠦᠬᠡᠳ ᠭᠠᠷᠭᠠᠭᠠᠳ᠂ ᠵᠢᠩᠬᠢᠨᠢ ᠳᠤᠷᠠᠯᠠᠬᠤ ᠨᠠᠰᠤᠨ ᠤ ᠴᠡᠭᠡᠨ ᠳᠦ ᠬᠦᠷᠬᠦ ᠳᠦ ᠠᠯᠢ ᠠᠯᠢ ᠨᠢ ᠭᠡᠷ ᠪᠦᠯᠢ ᠶᠢᠨ ᠠᠮᠢᠳᠤᠷᠠᠯ ᠭᠡᠳᠡᠭ ᠡᠴᠡ ᠤᠶᠢᠳᠴᠤ ᠠᠮᠵᠢᠭᠰᠠᠨ᠂ ᠡᠷᠡ ᠳᠦ ᠨᠢ ᠥᠭᠡᠷᠡ ᠬᠡᠦᠬᠡᠨ ᠰᠠᠶᠢᠬᠠᠨ ᠰᠠᠨᠠᠭᠳᠠᠬᠤ ᠪᠣᠯᠤᠭᠠᠳ᠂ ᠡᠮᠡ ᠨᠢ ᠬᠡᠦᠬᠡᠳ ᠲᠡᠢ ᠪᠡᠨ ᠬᠠᠶᠠᠭᠳᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠬᠠᠷᠠᠳᠠᠵᠤ ᠰᠡᠷᠡᠳᠡᠵᠦ᠂ ᠤᠬᠢᠯᠠᠵᠤ ᠳᠠᠭᠤᠯᠠᠵᠤ᠂ ᠬᠡᠷᠡᠭᠦᠯ ᠠᠮᠠ ᠪᠣᠯᠤᠨ ᠭᠦᠶᠦᠭᠰᠡᠭᠡᠷ ᠨᠢᠭᠡ ᠮᠡᠳᠡᠬᠦ ᠳᠦ ᠭᠤᠴᠢ ᠬᠦᠷᠴᠦ ᠰᠠᠷᠨᠢᠮᠠᠬᠠᠢ ᠠᠮᠢᠳᠤᠷᠠᠯ ᠳᠤ ᠳᠠᠰᠴᠢᠬᠠᠵᠤ᠂ ᠨᠠᠶᠢᠵᠠ ᠨᠥᠬᠥᠳ ᠲᠡᠢ ᠪᠡᠨ ᠨᠠᠷᠭᠢᠵᠤ ᠴᠡᠩᠭᠡᠬᠦ ᠨᠢ ᠣᠯᠠᠰᠢᠷᠠᠵᠤ᠂ ᠦᠨᠡᠨᠴᠢ ᠳᠤᠷᠠᠯᠠᠯ ᠪᠠᠶᠢᠳᠠᠭ ᠴᠤ ᠪᠣᠯᠤᠭᠠᠰᠠᠢ ᠭᠡᠵᠦ ᠠᠮᠠ ᠨᠡᠶᠢᠯᠡᠨ ᠭᠠᠰᠢᠭᠤᠳᠠᠵᠤ᠂ ᠬᠡᠨ ᠨᠢᠭᠡ ᠨᠢ ᠲᠡᠷᠡ ᠦᠨᠡᠨᠴᠢ ᠰᠡᠳᠬᠢᠯ ᠢ ᠨᠢ ᠬᠤᠯᠠᠭᠠᠶᠢᠯᠠᠭᠠᠳ ᠠᠪᠴᠢᠬᠠᠭᠰᠠᠨ ᠰᠢᠭ ᠯᠠ ᠬᠠᠷᠠᠭᠤᠰᠤᠨᠠ᠃ ᠲᠡᠭᠡᠭᠡᠳ ᠬᠠᠷᠠ ᠰᠠᠨᠠᠭᠠᠲᠠᠨ ᠤ ᠭᠠᠢ ᠪᠠᠷ ᠦᠨᠡᠨᠴᠢ ᠳᠤᠷᠠᠯᠠᠯ ᠢ ᠡᠳ᠋ᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ ᠴᠤᠬᠤᠮ ᠲᠡᠭᠦᠨ ᠡᠴᠡ ᠪᠣᠯᠤᠭᠠᠳ ᠥᠪᠡᠷᠰᠡᠳ ᠢᠶᠡᠨ ᠱᠠᠯᠢᠭᠯᠠᠵᠤ ᠪᠠᠶᠢᠭᠠ ᠮᠡᠲᠦ ᠰᠠᠨᠤᠵᠠᠭᠠᠬᠤ ᠠᠲᠠᠯᠠ ᠪᠠᠨ ᠥᠪᠡᠷ ᠦᠨ ᠢᠶᠡᠨ ᠥᠷᠥᠭᠡᠰᠦᠨ ᠭᠤᠲᠤᠯ ᠤᠨ ᠫᠠᠶᠠᠩ ᠢ ᠰᠣᠨᠣᠰᠤᠮᠠᠭᠴᠠ ᠲᠤᠶᠢᠯ ᠠᠴᠠ ᠵᠢᠭᠰᠢᠨ ᠲᠣᠬᠣᠭᠤᠷᠬᠠᠨᠠ᠃ ᠲᠡᠭᠡᠭᠰᠡᠨ ᠠᠲᠠᠯᠠ ᠪᠠᠨ ᠨᠢᠯᠤᠭᠤᠨ ᠭᠤᠨᠢᠭ ᠨᠡᠪᠲᠡ ᠰᠢᠩᠭᠡᠭᠰᠡᠨ ᠳᠠᠭᠤᠤ ᠠᠶᠠᠯᠠᠵᠤ᠂ ᠬᠠᠭᠤᠷᠮᠠᠴᠢ ᠳᠤᠷᠠᠯᠠᠯ ᠤᠨ ᠲᠠᠴᠢᠶᠠᠩᠭᠤᠢ ᠦᠢᠯᠡ ᠶᠢ ᠠᠮᠢᠳᠤ ᠶᠢᠨ ᠵᠢᠷᠭᠠᠯ ᠬᠡᠮᠡᠨ ᠦᠬᠦᠨ ᠬᠠᠲᠠᠨ ᠬᠥᠭᠡᠭᠡᠴᠡᠯᠳᠦᠵᠦ ᠠᠮᠠᠷᠠᠯᠲᠠ ᠶᠢᠨ ᠭᠠᠵᠠᠷ ᠲᠠᠨᠢᠯᠴᠠᠭᠰᠠᠨ ᠵᠠᠭᠤᠷᠠᠳᠤ ᠶᠢᠨ ᠲᠠᠴᠢᠶᠠᠯᠳᠤ ᠢᠨᠠᠭ ᠠᠴᠠ ᠪᠠᠨ ᠬᠠᠭᠠᠴᠠᠨ ᠶᠠᠳᠠᠵᠤ᠂ ᠨᠢᠯᠪᠤᠰᠤ ᠤᠨᠠᠭᠠᠨ᠂ ᠥᠪᠡᠷ ᠢ ᠪᠡᠨ ᠭᠡᠨᠡᠨ ᠪᠠᠯᠴᠢᠷ ᠠᠷᠢᠭᠤᠨ ᠲᠤᠩᠭᠠᠯᠠᠭ ᠪᠦᠰᠡᠭᠦᠢ ᠠᠩᠬᠠ ᠤᠳᠠᠭᠠ ᠯᠠ ᠡᠶᠢᠨᠬᠦᠦ ᠴᠢᠮᠠ ᠳᠤ ᠬᠥᠯ ᠠᠯᠳᠠᠯᠠ ᠭᠡᠵᠦ ᠠᠵᠢᠭ ᠦᠭᠡᠢ ᠰᠢᠪᠡᠭᠡᠨᠡᠵᠦ᠂ ᠬᠠᠷᠢᠬᠤ ᠵᠠᠮ ᠳᠤ ᠪᠠᠨ ᠵᠢᠷᠦᠬᠡ ᠰᠢᠮᠰᠢᠷᠡᠭᠦᠯᠪᠠᠴᠤ ᠰᠥᠨᠢ ᠶᠢᠨ ᠪᠣᠷᠣ ᠬᠣᠨᠣᠭ ᠲᠤ ᠡᠷᠡ ᠨᠥᠬᠥᠷ ᠦᠨ ᠢᠶᠡᠨ ᠲᠣᠯᠣᠭᠠᠢ ᠶᠢ ᠲᠠᠰᠤ ᠲᠡᠪᠡᠷᠢᠵᠤ᠂ ᠴᠢᠮᠠ ᠶᠢ ᠶᠡᠬᠡ ᠰᠠᠨᠠᠭᠰᠠᠨ ᠠᠴᠠ ᠪᠣᠯᠵᠤ ᠦᠬᠦᠬᠦ ᠰᠢᠬᠠᠯᠠ ᠭᠡᠵᠦ ᠦᠨᠡᠨ ᠡᠴᠡ ᠪᠡᠨ ᠬᠡᠯᠡᠵᠦ ᠴᠢᠳᠠᠳᠠᠭ ᠡᠬᠡᠨᠡᠷ ᠪᠣᠯᠳᠠᠭ ᠶᠤᠮ ᠳ᠋ᠠ᠃ ᠲᠧᠭᠨᠢᠭ ᠦᠨ ᠪᠣᠭᠣᠯ ᠪᠣᠯᠵᠤ ᠪᠠᠶᠢᠭᠠ ᠬᠦᠮᠦᠰ ᠲᠦ ᠦᠨᠡᠨᠴᠢ ᠳᠤᠷᠠᠯᠠᠯ ᠬᠡᠷᠡᠭ ᠦᠭᠡᠢ᠃ ᠳᠤᠷᠠᠯᠠᠯ ᠮᠥᠬᠥᠬᠦ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠯᠡ᠃
- ᠶᠠᠭᠠᠬᠢᠨᠠ ᠡ ᠭᠡᠵᠦ ᠪᠦᠰᠡᠭᠦᠢ ᠦᠨᠡᠨ ᠡᠴᠡ ᠪᠡᠨ ᠠᠶᠤᠨ ᠳᠠᠭᠤ ᠠᠯᠳᠠᠪᠠ᠃
7
ᠪᠢ ᠡᠪᠦᠯ ᠭᠠᠵᠠᠷ ᠤᠨ ᠠᠮᠢ ᠶᠢ ᠬᠠᠳᠠᠭᠠᠯᠠᠨ ᠬᠠᠷᠠᠭᠠᠯᠵᠠᠳᠠᠭ᠂ ᠵᠤᠨ ᠡᠪᠦᠯ ᠢ ᠰᠠᠨᠠᠭᠳᠠᠭᠤᠯᠤᠨ ᠬᠦᠢᠲᠡᠨ ᠢᠶᠡᠷ ᠴᠣᠷᠭᠢᠳᠠᠭ ᠱᠠᠩᠳᠠ ᠤᠰᠤ ᠰᠢᠭ ᠯᠠ ᠪᠠᠶᠢᠬᠤ ᠶᠢ ᠬᠦᠰᠡᠳᠡᠭ᠂ ᠭᠠᠵᠠᠷ ᠤᠨ ᠠᠮᠢ ᠬᠥᠷᠦᠰᠦᠨ ᠳᠦ ᠪᠡᠨ ᠪᠢᠰᠢ᠂ ᠭᠦᠨ ᠳ᠋ᠡᠭᠡᠨ ᠪᠠᠶᠢᠳᠠᠭ ᠭᠡᠳᠡᠭ ᠪᠢᠵᠡ ᠳ᠋ᠡ︖
8
ᠬᠦᠰᠡᠯ ᠢᠶᠡᠨ ᠬᠠᠵᠠᠭᠠᠷᠯᠠᠵᠤ᠂ ᠥᠪᠡᠷᠲᠡᠭᠡᠨ ᠳᠠᠶᠢᠰᠤᠨ ᠰᠢᠭ ᠬᠠᠨᠳᠤᠵᠤ᠂ ᠲᠡᠭᠡᠭᠰᠡᠨ ᠢᠶᠡᠷ ᠢᠶᠡᠨ ᠪᠤᠰᠤᠳ ᠲᠤ ᠴᠤ ᠮᠥᠨ ᠲᠡᠶᠢᠮᠦ ᠪᠠᠶᠢᠵᠤ᠂ ᠡᠷᠬᠡᠰᠢᠶᠡᠯ ᠳᠦ ᠪᠡᠨ ᠣᠷᠣᠭᠤᠯᠵᠤ ᠪᠠᠶᠢᠬᠤ ᠨᠢ ᠮᠢᠨᠦ ᠭᠣᠣᠯ ᠬᠦᠰᠡᠯ ᠶᠤᠮ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠪᠢ ᠥᠪᠡᠷ ᠢᠶᠡᠨ ᠥᠪᠡᠷᠲᠡᠭᠡᠨ ᠡᠵᠡᠨ ᠪᠠᠶᠢᠵᠤ ᠴᠢᠳᠠᠬᠤ ᠦᠭᠡᠢ᠂ ᠶᠡᠬᠡ ᠯᠠ ᠪᠣᠯ ᠶᠠᠭᠤᠮᠠ ᠪᠦᠬᠦᠨ ᠳᠦ ᠠᠭᠤᠰᠳᠠᠭ ᠳᠠᠪᠤᠰᠤ ᠰᠢᠭ ᠠᠷᠠᠴᠢᠭᠠ ᠦᠭᠡᠢ ᠠᠮᠢᠲᠠᠨ ᠪᠣᠯᠤᠨᠠ᠃ ᠪᠤᠰᠤᠳ ᠲᠤ ᠠᠭᠤᠰᠬᠤ ᠶᠤᠮ ᠪᠣᠯ ᠪᠢ ᠬᠦᠮᠦᠨ ᠪᠢᠰᠢ ᠳᠠᠭᠤᠷᠢᠶᠠᠮᠠᠯ ᠪᠣᠯᠤᠨᠠ᠃ ᠭᠡᠲᠡᠯᠡ ᠪᠣᠳᠣᠭᠠᠳ ᠪᠠᠶᠢᠪᠠᠯ ᠡᠨᠡ ᠬᠠᠴᠢᠨ ᠠᠮᠢᠳᠤᠷᠠᠯ ᠨᠠᠮᠠ ᠶᠢ ᠰᠡᠮᠡᠯᠵᠥ᠂ ᠠᠭᠤᠰᠬᠠᠵᠤ ᠪᠠᠶᠢᠨᠠ ᠪᠤᠰᠤ ᠤᠤ︖
9
ᠦᠬᠦᠯ ᠭᠡᠭᠴᠢ ᠨᠢᠭᠡᠨ ᠬᠦᠮᠦᠨ ᠦ ᠮᠥᠩᠬᠡ ᠨᠣᠶᠢᠷᠰᠤᠭᠰᠠᠨ ᠢᠶᠡᠷ ᠲᠡᠭᠦᠰᠳᠡᠭ ᠶᠠᠭᠤᠮᠠ ᠪᠢᠰᠢ᠂ ᠲᠡᠷᠡ ᠬᠦᠮᠦᠨ ᠦ ᠨᠥᠬᠥᠷ ᠳᠠᠶᠢᠰᠤᠨ ᠬᠣᠶᠠᠷ ᠤᠨ ᠰᠡᠳᠬᠢᠯ ᠳᠦ ᠣᠷᠣᠰᠢᠨ ᠪᠠᠶᠢᠳᠠᠭ ᠢ ᠦᠵᠡᠪᠡ᠃ ᠲᠡᠷᠡ ᠬᠦ ᠦᠬᠦᠯ ᠥᠨᠥᠴᠢᠨ ᠬᠣᠴᠣᠷᠤᠭᠰᠠᠨ ᠪᠢᠴᠢᠬᠠᠨ ᠥᠬᠢᠨ ᠤ ᠬᠢ ᠨᠢ ᠵᠢᠷᠦᠬᠡᠨ ᠳᠦ᠂ ᠴᠠᠯ ᠪᠤᠭᠤᠷᠤᠯ ᠪᠣᠯᠤᠭᠰᠠᠨ ᠬᠥᠭᠰᠢᠨ ᠡᠬᠡ ᠶᠢᠨ ᠬᠢ ᠨᠢ ᠰᠡᠳᠬᠢᠯ ᠳᠦ᠂ ᠲᠦᠷᠦᠭᠰᠡᠨ ᠠᠬᠠ ᠶᠢᠨ ᠬᠢ ᠨᠢ ᠲᠣᠭᠣᠷᠢᠵᠤ ᠵᠠᠶᠢᠮᠤᠴᠢᠭᠰᠠᠨ ᠦᠭᠡᠨ ᠳᠦ᠂ ᠠᠮᠠᠨᠴᠢᠷ ᠪᠡᠷᠭᠡᠨ ᠦ ᠰᠢᠯᠤᠭᠤᠬᠠᠨ ᠠᠰᠠᠭᠤᠭᠰᠠᠨ ᠠᠰᠠᠭᠤᠯᠲᠠ ᠳᠤ ᠨᠢᠭᠤᠭᠳᠠᠨ ᠪᠠᠶᠢᠭᠠ ᠶᠢ ᠦᠵᠡᠪᠡ᠃ ᠡᠨᠳᠡ ᠨᠠᠶᠢᠷᠯᠠᠨ ᠰᠠᠭᠤᠭᠠ᠂ ᠮᠠᠭᠤ ᠪᠦᠬᠦᠨ ᠢ ᠤᠮᠠᠷᠲᠠᠨ ᠵᠠᠶᠢᠯᠠᠭᠤᠯᠤᠭᠰᠠᠨ ᠠᠮᠤᠭᠤᠯᠠᠩ ᠴᠢᠷᠠᠢ ᠲᠠᠢ ᠡᠨᠡ ᠬᠦᠮᠦᠰ ᠦᠨ ᠬᠠᠷᠠᠴᠠᠨ ᠳᠤ᠂ ᠥᠷᠯᠥᠭᠡᠬᠡᠨ ᠥᠬᠢᠨ ᠨᠢ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠴᠡᠩᠬᠡᠷ ᠳᠡᠪᠡᠯ ᠦᠨ ᠰᠢᠭᠯᠠᠭᠠᠰᠤᠨ ᠳᠤ᠂ ᠬᠡᠰᠢᠭ ᠬᠡᠦᠬᠡᠨ ᠦ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠪᠤᠭᠤᠷᠤᠯ ᠴᠠᠷᠠᠮ ᠳᠤ ᠪᠠᠶᠢᠭᠠ ᠶᠢ ᠮᠡᠳᠡᠪᠡ᠃
ᠡᠶᠢᠨᠬᠦᠦ ᠦᠬᠦᠯ ᠲᠡᠢ ᠤᠯᠠᠭᠠᠨ ᠨᠢᠭᠤᠷ ᠢᠶᠡᠷ ᠢᠶᠡᠨ ᠤᠴᠠᠷᠠᠭᠰᠠᠨ ᠢᠶᠠᠨ ᠮᠡᠳᠡᠪᠡ᠃ ᠭᠡᠮ ᠦᠭᠡᠢ ᠴᠢᠷᠠᠶᠢᠯᠠᠨ ᠬᠤᠳᠠᠯ ᠶᠠᠷᠢᠵᠤ ᠰᠠᠭᠤᠭᠠ ᠡᠨᠡ ᠪᠠᠽᠠᠷ ᠤᠨ ᠴᠡᠭᠡᠵᠢᠨ ᠳᠦ ᠪᠠᠶᠢᠭᠠ ᠦᠬᠦᠯ ᠲᠡᠢ ᠤᠴᠠᠷᠠᠭᠰᠠᠨ ᠢᠶᠠᠨ ᠮᠡᠳᠡᠪᠡ᠃ ᠡᠵᠢ ᠨᠢ ᠲᠠᠭ ᠳᠠᠭᠤ ᠦᠭᠡᠢ᠂ ᠠᠶᠤᠮᠠᠷ ᠴᠢᠷᠠᠶᠢᠯᠠᠨ ᠪᠣᠷᠣ ᠳᠠᠪᠤᠤ ᠶᠢᠨ ᠥᠭᠡᠳᠡᠰᠦᠨ ᠡᠴᠡ ᠵᠠᠬᠢᠶᠠ ᠭᠠᠷᠭᠠᠨ ᠥᠭᠴᠦ
-ᠡᠭᠦᠨ ᠢ ᠴᠢ ᠶᠠᠭᠠᠬᠢᠬᠤ ᠭᠡᠵᠦ ᠪᠢᠴᠢᠭᠰᠡᠨ ᠶᠤᠮ᠃ ᠶᠠᠮᠠᠷ ᠲᠠᠩᠭᠠᠷᠢᠭ ᠤᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠶᠤᠮ ᠭᠡᠵᠦ ᠲᠤᠯᠭᠠᠨ ᠠᠰᠠᠭᠤᠭᠠᠳ ᠬᠠᠭᠤᠷᠠᠢ ᠴᠢᠢᠯᠡᠭᠡᠷ ᠨᠢᠳᠦ ᠪᠡᠷ ᠳᠠᠯᠳᠢᠷᠲᠠᠯᠠ ᠰᠢᠷᠲᠡᠭᠰᠡᠨ ᠦᠶᠡ ᠳᠦ ᠦᠬᠦᠯ ᠲᠡᠢ ᠤᠴᠠᠷᠠᠪᠠ᠃
10
ᠡᠷᠢᠶᠡᠨ ᠪᠠᠷᠠᠭᠠᠨ᠂ ᠴᠣᠭᠣᠷᠠᠬᠠᠢ ᠰᠡᠮᠡᠷᠬᠡᠢ ᠲᠡᠢ᠂ ᠪᠠᠰᠠ ᠨᠡᠭᠦᠵᠦ ᠬᠤᠪᠢᠷᠠᠵᠤ᠂ ᠰᠠᠯᠵᠤ ᠨᠡᠶᠢᠯᠡᠵᠦ ᠪᠠᠶᠢᠭᠠ ᠲᠡᠷᠡ ᠡᠭᠦᠯᠡᠰ ᠶᠠᠭ ᠮᠢᠨᠦ ᠰᠡᠳᠬᠢᠯ ᠰᠢᠭ ᠰᠠᠨᠠᠭᠳᠠᠯᠠ᠃
11
ᠰᠡᠳᠬᠢᠯ ᠳᠦ ᠤᠶᠢᠳᠬᠠᠷ ᠬᠥᠪᠥᠯᠵᠡᠨᠡ᠃ ᠬᠠᠷᠢᠬᠤ ᠴᠤ ᠳᠤᠷᠠ ᠬᠦᠷᠬᠦ ᠦᠭᠡᠢ᠃ ᠬᠠᠷᠢᠪᠠᠯ ᠭᠠᠭᠴᠠᠭᠠᠷᠳᠠᠵᠤ ᠪᠦᠷ ᠤᠶᠢᠳᠤᠨᠠ᠃ ᠠᠵᠢᠯ᠂ ᠨᠣᠮ ᠬᠣᠶᠠᠷ ᠢᠶᠠᠷ ᠵᠢᠷᠦᠬᠡ ᠪᠡᠨ ᠳᠠᠷᠤᠨᠠ᠃ ᠤᠶᠢᠳᠬᠤ ᠶᠢ ᠬᠦᠴᠦ ᠪᠡᠷ ᠳᠠᠷᠤᠵᠤ᠂ ᠶᠠᠭᠤᠨ ᠳᠤ ᠴᠤ ᠪᠣᠯᠪᠠ᠂ ᠮᠥᠰᠥ ᠰᠢᠭ ᠬᠦᠢᠲᠡᠨ ᠪᠠᠶᠢᠬᠤ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠵᠤ ᠪᠠᠶᠢᠨᠠ ᠤᠤ︖
12
ᠬᠥᠲᠡᠢ ᠨᠢᠭᠡᠨ ᠪᠠᠨᠳᠢ ᠡᠶᠢᠨᠬᠦᠦ ᠦᠯᠦ ᠮᠡᠳᠡᠬᠦ ᠰᠣᠨᠢᠨ ᠪᠠᠶᠠᠷ ᠲᠦᠭᠰᠢᠭᠦᠷᠢ ᠶᠢ ᠬᠣᠣᠰᠯᠠᠭᠤᠯᠤᠨ᠂ ᠵᠢᠷᠦᠬᠡᠨ ᠦ ᠬᠢ ᠪᠡᠨ ᠨᠢᠭᠡ ᠯᠠ ᠰᠣᠳᠣᠨ ᠯᠤᠭᠰᠢᠯᠲᠠ ᠶᠢ ᠳᠥᠩᠭᠡᠵᠢ ᠮᠡᠳᠡᠷᠡᠨ ᠵᠣᠭᠰᠣᠭᠠ ᠶᠢ ᠲᠡᠷᠡ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠡ᠃
13
ᠪᠦᠬᠦ ᠬᠦᠮᠦᠰ ᠶᠠᠭᠤᠮᠠ ᠶᠢ ᠮᠠᠷᠲᠠᠩᠨᠠᠵᠤ᠂ ᠰᠠᠭᠠᠳᠠᠵᠤ᠂ ᠴᠡᠩᠭᠡᠯ ᠨᠠᠭᠠᠳᠤᠮ ᠳᠤ ᠵᠢᠯᠣᠭᠤ ᠪᠠᠨ ᠰᠤᠯᠠᠳᠬᠠᠵᠤ᠂ ᠲᠠᠰᠢᠭᠤᠷᠠᠵᠤ ᠴᠢᠳᠠᠳᠠᠭ ᠪᠠᠶᠢᠬᠤ ᠳᠤ ᠪᠢ ᠬᠣᠷᠤᠮ ᠤᠨ ᠲᠡᠳᠦᠢ ᠴᠤ ᠠᠯᠮᠠᠶᠢᠷᠠᠵᠤ ᠮᠠᠷᠲᠠᠩᠨᠠᠵᠤ ᠴᠢᠳᠠᠳᠠᠭ ᠦᠭᠡᠢ᠃ ᠬᠦᠮᠦᠰ ᠪᠡᠶᠡ ᠰᠡᠳᠬᠢᠯ ᠢᠶᠡᠨ ᠵᠥᠩ ᠳᠦ ᠨᠢ ᠲᠠᠯᠪᠢᠵᠤ ᠣᠶᠤᠨ ᠤᠬᠠᠭᠠᠨ ᠤ ᠬᠢ ᠪᠠᠨ ᠬᠥᠪᠴᠢ ᠶᠢ ᠰᠤᠯᠠᠯᠠᠵᠤ᠂ ᠠᠮᠠᠷᠠᠵᠤ ᠴᠡᠩᠭᠡᠵᠦ ᠴᠢᠳᠠᠳᠠᠭ ᠪᠠᠶᠢᠬᠤ ᠳᠤ ᠪᠢ ᠣᠭᠲᠣᠬᠠᠨ ᠴᠤ ᠴᠢᠳᠠᠬᠤ ᠦᠭᠡᠢ᠃ ᠥᠴᠥᠬᠡᠨ ᠵᠦᠢᠯ ᠢ ᠴᠤ ᠭᠡᠰᠡᠨ ᠢᠮᠠᠭᠲᠠ ᠤᠴᠢᠷ ᠤᠳᠬᠠ ᠲᠠᠢ ᠪᠣᠯᠭᠠᠵᠤ᠂ ᠥᠪᠡᠷ ᠢ ᠪᠡᠨ ᠪᠣᠯᠤᠨ ᠪᠤᠰᠤᠳ ᠢ ᠰᠡᠵᠢᠭᠯᠡᠨ ᠬᠠᠷᠠᠳᠠᠵᠤ᠂ ᠠᠵᠢᠭᠯᠠᠵᠤ᠂ ᠲᠡᠭᠦᠨ ᠳᠦ ᠬᠡᠷᠬᠢᠨ ᠬᠠᠷᠢᠭᠤᠯᠬᠤ ᠪᠠᠨ ᠪᠣᠳᠣᠵᠤ ᠪᠠᠶᠢᠳᠠᠭ᠃ ᠡᠨᠡ ᠪᠣᠯ ᠮᠢᠨᠦ ᠵᠣᠪᠠᠯᠠᠩ᠂ ᠮᠢᠨᠦ ᠳᠤᠲᠠᠭᠳᠠᠯ᠃
14
ᠪᠢ ᠡᠶᠢᠨᠬᠦᠦ ᠪᠡᠷᠲᠡᠭᠴᠢᠨ ᠤᠶᠠᠷᠠᠩᠭᠤᠢ ᠵᠥᠴᠦᠭᠡ ᠨᠠᠶᠢᠷᠠᠭᠤᠯᠤᠨ ᠲᠣᠭᠯᠠᠭᠤᠯᠤᠭᠰᠠᠨ ᠳᠤ ᠪᠠᠨ ᠪᠠᠬᠠ ᠬᠠᠨᠵᠤ ᠪᠠᠶᠢᠪᠠᠴᠤ ᠠᠲᠠᠭᠠ ᠬᠣᠷᠣᠰᠤᠯ ᠴᠡᠭᠡᠵᠢᠨ ᠳᠦ ᠰᠡᠷᠡᠪᠡ᠃ ᠬᠠᠷᠢᠨ ᠢᠨᠠᠭ ᠤᠨ ᠵᠦᠴᠦᠭᠡ ᠶᠢᠨ ᠭᠣᠣᠯ ᠳᠦᠷᠢ ᠳᠦ ᠲᠣᠭᠯᠠᠭᠰᠠᠨ ᠬᠣᠶᠠᠷ ᠮᠠᠨᠢ ᠣᠳᠣ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠬᠦ ᠪᠡᠨ ᠪᠠᠶᠢᠵᠤ ᠪᠣᠳᠣᠯ ᠳᠤ ᠳᠠᠷᠤᠭᠳᠠᠨ ᠰᠠᠭᠤᠨᠠ᠃
15
ᠪᠦᠰᠡᠭᠦᠢ ᠤᠬᠢᠯᠠᠵᠤ ᠤᠨᠵᠢᠵᠤ ᠪᠡᠶᠡ ᠪᠡᠨ ᠵᠥᠩ ᠢᠶᠡᠷ ᠨᠢ ᠲᠠᠯᠪᠢᠭᠰᠠᠨ ᠪᠣᠯ ᠨᠠᠳᠠ ᠪᠠᠷ ᠬᠠᠮᠤᠭ ᠤᠨ ᠬᠠᠲᠠᠭᠤ ᠴᠡᠭᠡᠷ ᠲᠡᠢ ᠦᠭᠡ ᠬᠡᠯᠡᠭᠦᠯᠬᠦ ᠪᠠᠶᠢᠯᠠ᠃ ᠲᠡᠭᠡᠭᠡ ᠦᠭᠡᠢ ᠤᠴᠢᠷ ᠠᠴᠠ ᠵᠢᠷᠦᠬᠡ ᠣᠭᠰᠢᠵᠤ᠂ ᠨᠢᠯᠪᠤᠰᠣᠨ ᠠᠴᠠ ᠭᠠᠰᠢᠭᠤᠨ ᠴᠢᠰᠤ ᠪᠦᠬᠦ ᠪᠡᠶᠡ ᠪᠡᠷ ᠲᠦᠭᠡᠭᠡᠬᠦ ᠰᠢᠭ ᠪᠣᠯᠪᠠ᠃
- ᠴᠢᠮᠠ ᠶᠢ ᠵᠣᠪᠠᠭᠠᠴᠢᠬᠠᠪᠠ ᠤᠤ ᠳ᠋ᠠ᠂ ᠨᠠᠶᠢᠵᠠ ᠨᠢ᠃ ᠳᠠᠬᠢᠭᠠᠳ ᠲᠡᠭᠡᠬᠦ ᠦᠭᠡᠢ᠃ ᠮᠢᠨᠦ ᠨᠠᠶᠢᠵᠠ ᠲᠠᠶᠢᠪᠤᠰᠢᠷᠠ︕ ᠭᠡᠳ ᠴᠡᠩᠭᠡᠯ ᠴᠦᠩᠬᠦ ᠡᠴᠡ ᠪᠡᠨ ᠴᠠᠭᠠᠰᠤᠨ ᠳᠤ ᠬᠤᠯᠳᠠᠭᠰᠠᠨ ᠨᠢᠮᠭᠡᠨ ᠶᠠᠭᠤᠮᠠ ᠭᠠᠷᠭᠠᠵᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ
-ᠰᠡᠭᠦᠯ ᠳᠦ ᠦᠵᠡᠭᠡᠷᠡᠢ︕ ᠭᠡᠰᠡᠨ ᠢᠶᠡᠨ ᠣᠭᠵᠣᠮ ᠡᠷᠭᠢᠵᠦ ᠨᠠᠳᠠ ᠠᠴᠠ ᠵᠢᠭᠤᠳᠠᠬᠤ ᠮᠡᠲᠦ ᠲᠦᠷᠭᠡᠨ ᠭᠠᠷᠤᠯᠠ᠃ ᠪᠢ ᠭᠥᠯᠢᠷᠡᠨ ᠰᠠᠭᠤᠭᠰᠠᠭᠠᠷ ᠬᠡᠵᠢᠶᠡ ᠬᠣᠶᠢᠨᠠ ᠦᠯᠡᠳᠡᠭᠡᠭᠰᠡᠨ ᠶᠠᠭᠤᠮᠠ ᠶᠢ ᠨᠢ ᠵᠠᠳᠠᠯᠤᠯᠠ᠃ ᠪᠢᠴᠢᠬᠠᠨ ᠴᠡᠭᠡᠵᠢ ᠵᠢᠷᠤᠭ ᠤᠨ ᠢᠶᠠᠨ ᠠᠷᠤ ᠳᠤ 《ᠨᠣᠬᠠᠢ ᠮᠡᠲᠦ ᠦᠨᠡᠨᠴᠢ》 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠶᠢᠯᠠ᠃
4 0