ᠠᠷᠤ ᠠᠶ᠋ᠢᠮᠠᠭ ᠂ ᠠᠷᠤ ᠬᠤᠷᠴᠢᠨ ᠠᠶ᠋ᠢᠮᠠᠭ ᠂ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠶ᠋ᠢᠨ ᠲᠤᠬᠠᠢ
ᠠᠷᠤ ᠠᠶ᠋ᠢᠮᠠᠭ ᠂ ᠠᠷᠤ ᠬᠤᠷᠴᠢᠨ ᠠᠶ᠋ᠢᠮᠠᠭ ᠂ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠶ᠋ᠢᠨ ᠲᠤᠬᠠᠢ
13685
2019-06-21 16:32
发表于:内蒙古
ᠠᠷᠤ ᠬᠤᠷᠴᠢᠨᠴᠤᠳ ᠪᠤᠯ ᠴᠢᠩᠭᠢᠰ ᠬᠠᠭᠠᠨ ᠤ ᠲᠡᠭᠦᠤ ᠬᠠᠪᠤᠳᠤ ᠬᠠᠰᠠᠷ ᠤᠨ ᠬᠤᠶ᠋ᠢᠴᠢᠰ ᠬᠢᠭᠡᠳ ᠲᠡᠭᠦᠨ ᠤ ᠬᠠᠷᠢᠶᠠᠳᠤ ᠠᠶ᠋ᠢᠮᠠᠭ ᠤᠨ ᠬᠢᠨ ᠪᠤᠯᠤᠨᠠ ᠃ ᠤᠤᠯ ᠳᠠᠭᠠᠨ ᠡᠷᠭᠦᠨᠡ ᠭᠤᠤᠯ ᠪᠠ ᠬᠠᠶ᠋ᠢᠯᠠᠷ ᠭᠤᠤᠯ ᠂ ᠬᠦᠯᠦᠨ ᠂ ᠪᠤᠶ᠋ᠢᠷ ᠨᠠᠭᠤᠷ ᠤᠨ ᠤᠷᠴᠢᠮ ᠢᠶᠠᠷ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠨ ᠠᠵᠤ ᠲᠦᠷᠦᠵᠤ ᠪᠠᠶ᠋ᠢᠭᠰᠠᠨ ᠬᠤᠷᠴᠢᠨ ᠠᠶ᠋ᠢᠮᠠᠭ ᠤᠨ ᠨᠢᠭᠡᠨ ᠰᠠᠯᠠᠭᠠ ᠶᠤᠮ ᠃ ᠬᠤᠷᠴᠢᠨ ᠭᠡᠳᠡᠭ ᠨᠢ ᠬᠤᠷ ᠰᠠᠭᠠᠳᠠᠭ ᠵᠡᠭᠦᠳᠡᠭ ᠬᠦᠮᠤᠰ ᠭᠡᠰᠡᠨ ᠤᠳᠬᠠ ᠲᠠᠢ ᠃ 15 ᠳ᠋ᠤᠭᠠᠷ ᠵᠠᠭᠤᠨ ᠤ ᠲᠤᠮᠳᠠᠴᠢ ᠡᠴᠠ 16 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶᠡ ᠪᠠᠷ ᠬᠤᠷᠴᠢᠨ ᠠᠶ᠋ᠢᠮᠠᠭ ᠤᠨ ᠨᠢᠭᠡ ᠪᠦᠯᠦᠭ ᠨᠢ ᠡᠮᠤᠨᠡᠰᠢ ᠨᠡᠭᠦᠵᠤ ᠬᠢᠩᠭᠠᠨ ᠲᠠᠪᠠᠭᠠᠨ ᠤ ᠡᠩᠭᠡᠷ ᠨᠤᠨ ᠮᠦᠷᠡᠨ ᠤ ᠰᠠᠪᠠ ᠭᠠᠵᠠᠷ ᠲᠠᠭᠠᠤ ᠢᠷᠡᠵᠤ ᠨᠤᠲᠤᠭᠰᠢᠭᠰᠠᠨ ᠡᠴᠠ ᠨᠤᠨ ᠬᠤᠷᠴᠢᠨ ᠪᠤᠯᠪᠠ ᠂ ᠨᠢᠭᠡ ᠪᠦᠯᠦᠭ ᠨᠢ ᠬᠢᠩᠭᠠᠨ ᠲᠠᠪᠠᠭᠠᠨ ᠤ ᠠᠷᠤ ᠳ᠋ᠠᠬᠢ ᠬᠦᠯᠦᠨ ᠪᠤᠶ᠋ᠢᠷ ᠲᠠᠭᠠᠨ ᠬᠤᠴᠤᠷᠤᠨ ᠰᠠᠭᠤᠷᠢᠰᠢᠵᠤ ︽ ᠠᠷᠤ ᠠᠶ᠋ᠢᠮᠠᠭ ︾ ᠭᠡᠵᠤ ᠨᠡᠷᠡᠯᠡᠵᠤ ᠪᠠᠶ᠋ᠢᠭᠰᠠᠨ ᠢᠶᠡᠨ ᠬᠠᠪᠤᠳᠤ ᠬᠠᠰᠠᠷ ᠤᠨ 16 ᠳ᠋ᠤᠭᠠᠷ ᠦᠶᠡ ᠶ᠋ᠢᠨ ᠬᠤᠶ᠋ᠢᠴᠢ ᠬᠦᠨᠳᠡᠯᠡᠨ ᠲᠠᠶ᠋ᠢᠴᠢᠩ ᠤᠨ ᠦᠶᠡ ᠳ᠋ᠤ ᠦᠪᠡᠷ ᠤᠨ ᠬᠠᠷᠢᠶᠠᠳᠤ ᠠᠶ᠋ᠢᠮᠠᠭ ᠢᠶᠡᠨ ᠠᠳᠠᠯᠢ ᠠᠶ᠋ᠢᠮᠠᠭ ᠤᠭᠰᠠᠭᠠ ᠶ᠋ᠢᠨ ︽ ᠨᠤᠨ ᠬᠤᠷᠴᠢᠨ ︾ ᠡᠴᠠ ᠢᠯᠭᠠᠬᠤ ᠶ᠋ᠢᠨ ᠲᠦᠯᠦᠭᠡ ︽ ᠠᠷᠤ ᠬᠤᠷᠴᠢᠨ ︾ ᠭᠡᠵᠤ ᠨᠡᠷᠡᠯᠡᠵᠡᠢ ᠃ ᠲᠠᠷᠤᠢ ᠬᠢᠩᠭᠠᠨ ᠲᠠᠪᠠᠭᠠᠨ ᠤ ᠠᠷᠤ ᠳ᠋ᠤ ᠦᠯᠡᠳᠡᠭᠰᠡᠨ ᠬᠤᠷᠴᠢᠨ ᠢᠶᠡᠨ ︽ ᠠᠷᠤ ︾ ᠭᠡᠰᠡᠨ ᠲᠤᠳᠤᠳᠬᠠᠯ ᠠᠪᠤᠭᠠᠳ ︽ ᠠᠷᠤ ᠬᠤᠷᠴᠢᠨ ︾ ᠪᠤᠯᠤᠭᠰᠠᠨ ᠪᠠᠶ᠋ᠢᠨᠠ ᠃ ᠠᠷᠤ ᠬᠤᠷᠴᠢᠨᠴᠤᠳ ᠤᠳᠤ ᠴᠦ ᠭᠡᠰᠡᠨ ᠦᠪᠡᠷ ᠢ ᠪᠠᠨ ︽ ᠬᠦᠯᠦᠨ ᠪᠤᠶ᠋ᠢᠷ ᠨᠤᠲᠤᠭ ᠲᠠᠢ ᠂ ᠬᠦᠨᠳᠡᠯᠡᠨ ᠲᠠᠶ᠋ᠢᠴᠢᠩ ᠨᠤᠶᠠᠨ ᠲᠠᠢ ︾ ᠭᠡᠵᠤ ᠭᠡᠯᠡᠳᠡᠭ ᠨᠢ ᠦᠨᠳᠤᠰᠤᠯᠡᠯ ᠲᠠᠢ ᠦᠭᠡ ᠶᠤᠮ ᠃
1630 ᠤᠨ ᠤ ᠦᠶᠡ ᠪᠠᠷ ᠠᠷᠤ ᠬᠤᠷᠴᠢᠨ ᠠᠶ᠋ᠢᠮᠠᠭ ᠨᠢ ᠯᠢᠭᠳᠡᠨ ᠬᠤᠳᠤᠭᠳᠤ ᠬᠠᠭᠠᠨ ᠤ ᠲᠤᠪᠳᠤᠯᠤᠯ ᠡᠴᠠ ᠵᠠᠶ᠋ᠢᠯᠠᠵᠤ ᠂ ᠬᠢᠩᠭᠠᠨ ᠲᠠᠪᠠᠭᠠ ᠶ᠋ᠢ ᠲᠠᠪᠠᠵᠤ ᠡᠮᠤᠨᠡᠰᠢ ᠨᠡᠭᠦᠭᠡᠳ ᠤᠷᠢᠳ ᠬᠤᠵᠢᠳ ᠰᠢᠷᠠᠮᠦ᠋ᠷᠡᠨ ᠤ ᠰᠠᠪᠠ ᠲᠠᠭᠠᠤ ᠠᠮᠢᠳᠤᠷᠠᠵᠤ ᠪᠠᠶ᠋ᠢᠭᠰᠠᠨ ᠢᠶᠡᠨ ᠬᠤᠶ᠋ᠢᠳᠤ ᠠᠯᠳᠠᠨ ᠤᠯᠤᠰ ᠤᠨ ᠲᠡᠭᠷᠢ ᠶ᠋ᠢᠨ ᠰᠡᠴᠡᠨ ᠤ ᠨᠠᠢᠮᠠᠳᠤᠭᠠᠷ ᠤᠨ ︵ 1634 ᠤᠨ ︶ ᠳ᠋ᠤ ᠯᠢᠭᠳᠡᠨ ᠬᠤᠳᠤᠭᠳᠤ ᠬᠠᠭᠠᠨ ᠤ ᠨᠡᠶ᠋ᠢᠰᠯᠡᠯ ᠪᠠᠶ᠋ᠢᠭᠰᠠᠨ ᠤᠳᠤᠬᠢ ᠠᠷᠤ ᠬᠤᠷᠴᠢᠨ ᠤ ᠨᠤᠲᠤᠭ ᠲᠤ ᠰᠢᠯᠵᠢᠨ ᠢᠷᠡᠵᠤ ᠨᠤᠲᠤᠭᠯᠠᠭᠰᠠᠨ ᠪᠠᠶ᠋ᠢᠨᠠ ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠲᠤᠭᠳᠠᠭᠠᠵᠤ ᠦᠭᠭᠦᠭᠰᠡᠨ ᠠᠷᠤ ᠬᠤᠷᠴᠢᠨ ᠠᠶ᠋ᠢᠮᠠᠭ ᠤᠨ ᠵᠠᠭᠠᠭ ᠬᠢᠵᠠᠭᠠᠷ ᠨᠢ ᠵᠡᠭᠦᠨᠰᠢ ᠪᠠᠶᠠᠨᠳᠠᠯᠠ ᠡᠴᠠ 30 ᠭᠠᠵᠠᠷ ᠲᠤ ᠵᠠᠷᠤᠳ ᠪᠠᠷᠠᠭᠤᠨ ᠭᠠᠷ ᠤᠨ ᠬᠤᠰᠢᠭᠤ ᠲᠠᠢ ᠵᠠᠬᠠ ᠨᠡᠶ᠋ᠢᠯᠡᠵᠤ ᠂ ᠡᠮᠤᠨᠡᠰᠢ ᠪᠠᠨ 200 ᠵᠠᠭᠤᠨ ᠭᠠᠵᠠᠷ ᠲᠤ ᠰᠢᠷᠠᠮᠦ᠋ᠷᠡᠨ ᠢᠶᠠᠷ ᠤᠩᠨᠢᠭᠤᠳ ᠵᠡᠭᠦᠨ ᠬᠤᠰᠢᠭᠤ ᠪᠠ ᠨᠠᠢᠮᠠᠨ ᠬᠤᠰᠢᠭᠤ ᠲᠠᠢ ᠵᠠᠯᠭᠠᠵᠤ ᠂ ᠪᠠᠷᠠᠭᠤᠨᠰᠢ ᠪᠠᠨ ᠰᠤᠪᠠᠢ ᠠᠭᠤᠯᠠ ᠡᠴᠠ 100 ᠭᠠᠵᠠᠷ ᠲᠤ ᠪᠠᠭᠠᠷᠢᠨ ᠲᠠᠢ ᠵᠠᠯᠭᠠᠯᠳᠤᠵᠤ ᠂ ᠤᠮᠠᠷᠠᠰᠢ ᠪᠠᠨ ᠤᠯᠠᠭᠠᠨᠳᠠᠪᠠᠭᠠ ᠡᠴᠠ 260 ᠭᠠᠵᠠᠷ ᠲᠤ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠲᠠᠢ ᠵᠠᠬᠠ ᠨᠡᠶ᠋ᠢᠯᠡᠵᠤ ᠂ ᠵᠡᠭᠦᠨ ᠡᠮᠤᠨᠡ ᠪᠠᠨ 220 ᠭᠠᠵᠠᠷ ᠤᠨ ᠦᠵᠦᠭᠦᠷ ᠲᠤ ᠵᠠᠷᠤᠳ ᠵᠡᠭᠦᠨ ᠭᠠᠷᠤᠨ ᠬᠤᠰᠢᠭᠤ ᠲᠠᠢ ᠵᠠᠯᠭᠠᠯᠳᠤᠵᠤ ᠂ ᠪᠠᠷᠠᠭᠤᠨ ᠡᠮᠤᠨᠡ ᠪᠠᠨ ᠲᠠᠮᠠᠬᠤ ᠴᠠᠭᠠᠨ ᠮᠠᠩᠬᠠ ᠬᠦᠷᠲᠡᠯᠡ 200 ᠭᠠᠵᠠᠷ ᠲᠤ ᠪᠠᠭᠠᠷᠢᠨ ᠲᠠᠢ ᠵᠠᠬᠠ ᠨᠡᠶ᠋ᠢᠯᠡᠨ ᠂ ᠵᠡᠭᠦᠨ ᠬᠤᠶ᠋ᠢᠨᠠ ᠪᠠᠨ ᠬᠦᠷᠢᠶᠡᠳᠤ ᠨᠠᠭᠤᠷ ᠡᠴᠠ 265 ᠭᠠᠵᠠᠷ ᠤᠨ ᠦᠵᠦᠭᠦᠷ ᠵᠠᠷᠤᠳ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤ ᠲᠠᠢ ᠵᠠᠯᠭᠠᠯᠳᠤᠵᠤ ᠂ ᠪᠠᠷᠠᠭᠤᠨ ᠬᠤᠶ᠋ᠢᠨᠠ ᠪᠠᠨ ᠪᠠᠶᠠᠨᠬᠤᠰᠢᠭᠤ ᠡᠴᠠ 270 ᠭᠠᠵᠠᠷ ᠤᠨ ᠦᠵᠦᠭᠦᠷ ᠲᠤ ᠪᠠᠭᠠᠷᠢᠨ ᠵᠢᠴᠢ ᠦᠵᠦᠮᠤᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤ ᠲᠠᠢ ᠵᠠᠬᠠ ᠨᠡᠶ᠋ᠢᠯᠡᠵᠤ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ 130 ᠭᠠᠵᠠᠷ ᠂ ᠡᠮᠤᠨᠡᠰᠢ ᠤᠮᠠᠷᠠᠰᠢ 420 ᠭᠠᠵᠠᠷ ᠭᠡᠵᠤ ᠲᠤᠭᠳᠠᠭᠠᠵᠠᠢ ᠃
1634 ᠤᠨ ᠳ᠋ᠤ ᠠᠷᠤ ᠬᠤᠷᠴᠢᠨ ᠠᠶ᠋ᠢᠮᠠᠭ ᠢ ᠡᠮᠤᠨᠡᠳᠤ ᠬᠤᠶ᠋ᠢᠳᠤ ᠬᠤᠶᠠᠷ ᠬᠤᠰᠢᠭᠤ ᠬᠤᠪᠢᠶᠠᠵᠤ ᠬᠠᠪᠤᠳᠤ ᠬᠠᠰᠠᠷ ᠤᠨ 17 ᠳ᠋ᠤᠭᠠᠷ ᠦᠶᠡ ᠶ᠋ᠢᠨ ᠬᠤᠶ᠋ᠢᠴᠢ ᠲᠠᠯᠠᠢ ᠴᠦᠭᠦᠷ ︵ ᠵᠠᠷᠢᠮ ᠨᠤᠮ ᠳ᠋ᠤ ᠲᠠᠯᠠᠢ ᠴᠦᠩᠭᠦᠷ ᠭᠡᠵᠤ ᠪᠤᠢ ︶ ᠨᠤᠶᠠᠨ ᠪᠠ ᠲᠡᠭᠦᠨ ᠤ ᠬᠦᠪᠡᠭᠦᠨ ᠮᠤᠵᠠᠩ ᠢᠶᠠᠷ ᠲᠤᠰ ᠲᠤᠰ ᠵᠠᠬᠢᠷᠤᠭᠤᠯᠪᠠ ᠃ 1636 ᠤᠨ ᠳ᠋ᠤ ᠬᠤᠶᠠᠷ ᠬᠤᠰᠢᠭᠤ ᠶ᠋ᠢ ᠨᠢᠭᠡᠳᠬᠡᠨ ᠨᠢᠭᠡᠨ ᠬᠤᠰᠢᠭᠤ ᠪᠤᠯᠭᠠᠵᠤ ᠂ 3000 ᠭᠠᠷᠤᠢ ᠡᠷᠦᠭᠡ ᠶ᠋ᠢ 60 ᠰᠤᠮᠤ ᠬᠤᠪᠢᠶᠠᠵᠤ ᠂ ᠬᠠᠪᠤᠳᠤ ᠬᠠᠰᠠᠷ ᠤᠨ 18 ᠳ᠋ᠤᠭᠠᠷ ᠦᠶᠡ ᠶ᠋ᠢᠨ ᠬᠤᠶ᠋ᠢᠴᠢ ᠮᠤᠵᠠᠩ ᠢᠶᠠᠷ ᠵᠠᠬᠢᠷᠤᠭᠤᠯᠤᠭᠰᠠᠨ ᠪᠠᠶ᠋ᠢᠨᠠ ᠃ ᠡᠨᠡ ᠪᠤᠯ ᠠᠷᠤ ᠬᠤᠷᠴᠢᠨ ᠠᠶ᠋ᠢᠮᠠᠭ ᠨᠢ ᠬᠤᠰᠢᠭᠤ ᠪᠠᠶ᠋ᠢᠭᠤᠯᠤᠭᠰᠠᠨ ᠡᠬᠢᠨ ᠤ ᠦᠶᠡ ᠶᠤᠮ ᠃ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠲᠠᠭᠳᠠᠨᠸᠠᠩᠴᠤᠭ ᠪᠡᠶ᠋ᠢᠯᠡ 1744 - 1746 ᠤᠨ ᠤ ᠬᠤᠭᠤᠷᠤᠨᠳᠤ ᠪᠤᠭᠳᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠂ ᠲᠤᠬᠤᠮᠳᠠᠢ ᠶ᠋ᠢᠨ ᠭᠤᠤᠯ ᠤᠨ ᠲᠡᠨᠵᠢᠨ ︵ ᠤᠳᠤ ᠶ᠋ᠢᠨ ᠬᠤᠨᠳᠤ ᠪᠠᠯᠭᠠᠰᠤᠨ ᠤ ᠲᠦᠪ ᠤᠨ ᠰᠠᠭᠤᠭᠠ ᠭᠠᠵᠠᠷ ︶ ᠲᠡᠭᠡᠷᠡ ᠬᠤᠰᠢᠭᠤ ᠸᠠᠩ ᠤᠨ ᠤᠷᠳᠤᠨ ᠢᠶᠡᠨ ᠪᠠᠶ᠋ᠢᠭᠤᠯᠵᠤ ᠂ 1946 ᠤᠨ ᠤ 6 ᠰᠠᠷᠠ ᠳ᠋ᠤ ᠬᠤᠰᠢᠭᠤ ᠵᠠᠰᠠᠭ ᠤᠨ ᠤᠷᠳᠤᠨ ᠨᠢ ᠤᠳᠤ ᠶ᠋ᠢᠨ ᠴᠢᠪᠠᠭᠠ ᠪᠠᠯᠭᠠᠰᠤᠨ ᠳ᠋ᠤ ᠰᠢᠯᠵᠢᠳᠡᠯᠡ ᠪᠠᠨ ᠡᠯᠡ ᠦᠶᠡ ᠶ᠋ᠢᠨ ᠵᠠᠰᠠᠭ ᠸᠠᠩ ᠨᠠᠷ ᠬᠤᠨᠳᠤ ᠨᠤᠲᠤᠭ ᠢᠶᠠᠷ ᠲᠦᠪ ᠪᠤᠯᠭᠠᠭᠰᠠᠨ ᠠᠷᠤ ᠬᠤᠷᠴᠢᠨ ᠤ ᠬᠤᠶ᠋ᠢᠳᠤ ᠬᠡᠰᠡᠭ ᠢᠶᠠᠷ 300 ᠭᠠᠷᠤᠢ ᠵᠢᠯ ᠵᠠᠰᠠᠭᠯᠠᠭᠰᠠᠨ ᠪᠠᠶ᠋ᠢᠭᠠ ᠶᠤᠮ ᠃ 1908 ᠤᠨ ᠳ᠋ᠤ ᠴᠢᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠡᠴᠠ ᠺᠠᠶ᠋ᠢᠯᠤ ᠰᠢᠶᠠᠨ ᠢ ᠪᠠᠶ᠋ᠢᠭᠤᠯᠵᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠡᠮᠤᠨᠡ ᠬᠡᠰᠡᠭ ᠪᠠ ᠵᠡᠭᠦᠨ ᠡᠮᠤᠨᠡ ᠬᠡᠰᠡᠭ ᠤᠨ ᠦᠷᠭᠡᠨ ᠠᠭᠤᠳᠠᠮ ᠨᠤᠲᠤᠭ ᠪᠡᠯᠴᠢᠭᠡᠷ ᠢ ᠬᠡᠰᠡᠭᠯᠡᠨ ᠦᠭᠪᠡ ᠃ ᠢᠷᠭᠡᠨ ᠤᠯᠤᠰ ᠤᠨ ᠡᠬᠢᠨ ᠤ ᠦᠶᠡ ᠳ᠋ᠤ ᠪᠦᠬᠦ ᠬᠤᠰᠢᠭᠤ ᠶ᠋ᠢ ᠨᠡᠶ᠋ᠢᠳᠡ 5 ᠨᠤᠲᠤᠭ ᠬᠤᠪᠢᠶᠠᠪᠠ ᠂ ᠲᠠᠷᠤᠢ ᠬᠤᠨᠳᠤ ᠂ ᠬᠠᠨᠰᠦ᠋ᠮᠡ ᠂ ᠲᠤᠤᠳᠠᠨ ᠂ ᠪᠠᠯᠴᠢᠷᠤᠳ ᠂ ᠲᠢᠪᠦᠯᠢ ᠨᠤᠲᠤᠭ ᠪᠤᠯᠤᠨᠠ ᠃ 1933 ᠤᠨ ᠳ᠋ᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠶᠠᠫᠤᠨ ᠳ᠋ᠤ ᠡᠵᠡᠯᠡᠭᠳᠡᠵᠤ ᠂ ᠬᠢᠩᠭᠠᠨ ᠪᠠᠷᠠᠭᠤᠨ ᠮᠤᠵᠢ ᠳ᠋ᠤ ᠵᠢᠷᠤᠭᠯᠠᠭᠳᠠᠪᠠ ᠃ 1940 ᠤᠨ ᠳ᠋ᠤ ᠷᠸ ᠾᠧ ᠮᠤᠵᠢ ᠶ᠋ᠢᠨ ᠵᠠᠬᠢᠷᠤᠯ ᠳ᠋ᠤ ᠤᠷᠤᠵᠤ ᠂ 1941 ᠤᠨ ᠳ᠋ᠤ ᠪᠦᠬᠦ ᠬᠤᠰᠢᠭᠤ ᠶ᠋ᠢ ᠬᠤᠨᠳᠤ ᠂ ᠬᠠᠨᠰᠦ᠋ᠮᠡ ᠂ ᠲᠤᠤᠳᠠᠨ ᠂ ᠪᠠᠯᠴᠢᠷᠤᠳ ᠂ ᠬᠢᠲᠠᠳ ᠲᠠᠪᠤᠨ ᠨᠤᠲᠤᠭ ᠂ ᠲᠢᠪᠦᠯᠢ ᠂ ᠰᠢᠷᠠᠳᠠᠯᠠ ᠂ ᠪᠠᠶᠠᠨᠳᠠᠯᠠ ᠵᠡᠷᠭᠡ ᠨᠠᠢᠮᠠᠨ ᠨᠤᠲᠤᠭ ᠬᠤᠪᠢᠶᠠᠵᠤ ᠂ ᠨᠤᠲᠤᠭ ᠤᠨ ᠲᠤᠤᠷᠠ ᠵᠠᠭᠤᠳᠤ ᠶ᠋ᠢᠨ ᠲᠠᠷᠤᠭᠠ ᠪᠠᠷᠤᠭ 180 ᠬᠦᠮᠤᠨ ᠂ ᠲᠠᠪᠢᠳᠤ ᠶ᠋ᠢᠨ ᠲᠠᠷᠤᠭᠠ 360 ᠬᠦᠮᠤᠨ ᠂ ᠠᠷᠪᠠᠳᠤ ᠶ᠋ᠢᠨ ᠲᠠᠷᠤᠭᠠ 1800 ᠢᠯᠡᠭᠦᠤ ᠬᠦᠮᠤᠨ ᠪᠠᠶ᠋ᠢᠪᠠ ᠃
1945 ᠤᠨ ᠳ᠋ᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠪᠠᠶ᠋ᠢᠭᠤᠯᠤᠭᠳᠠᠵᠤ ᠂ 1946 ᠤᠨ ᠳ᠋ᠤ ᠵᠤᠤ ᠤᠳᠠ ᠠᠶ᠋ᠢᠮᠠᠭ ᠤᠨ ᠲᠦᠷ ᠴᠠᠭ ᠤᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠤ ᠵᠦᠪᠯᠡᠯ ᠳ᠋ᠤ ᠬᠠᠮᠢᠶᠠᠷᠤᠭᠳᠠᠵᠤ ᠂ ᠪᠦᠬᠦ ᠬᠤᠰᠢᠭᠤᠨ ᠳ᠋ᠤ 14 ᠨᠤᠲᠤᠭ ᠴᠢᠤᠢ ᠪᠠᠶ᠋ᠢᠭᠤᠯᠵᠤ ᠲᠤᠤᠷᠠ ᠨᠢ ᠭᠠᠴᠠᠭᠠ ᠲᠤᠰᠬᠤᠨ ᠤ ᠪᠠᠶ᠋ᠢᠭᠤᠯᠤᠯ ᠲᠠᠢ ᠪᠤᠯᠵᠤ ᠬᠢᠳᠠᠳ ᠮᠤᠩᠭᠤᠯ ᠢ ᠲᠤᠰᠠᠭᠠᠷᠯᠠᠨ ᠵᠠᠰᠠᠬᠤ ᠶ᠋ᠢ ᠬᠡᠷᠡᠭᠵᠢᠭᠦᠯᠪᠡ ᠃ 1947 ᠤᠨ ᠳ᠋ᠤ ᠵᠤᠤ ᠤᠳᠠ ᠠᠶ᠋ᠢᠮᠠᠭ ᠤᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠳ᠋ᠤ ᠬᠠᠷᠢᠶᠠᠯᠠᠭᠳᠠᠵᠤ ᠂ 1949 ᠤᠨ ᠳ᠋ᠤ ᠦᠪᠤᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠳ᠋ᠤ ᠬᠠᠷᠢᠶᠠᠯᠠᠭᠳᠠᠵᠤ ᠂ ᠲᠤᠰ ᠵᠢᠯ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠤᠯᠠᠭᠠᠨᠳᠠᠪᠠᠭᠠ ᠨᠤᠲᠤᠭ ᠢ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠳ᠋ᠤ ᠬᠤᠪᠢᠶᠠᠨ ᠦᠭᠴᠦ ᠂ 1950 ᠤᠨ ᠳ᠋ᠤ ᠰᠢᠷᠠᠮᠦ᠋ᠷᠡᠨ ᠭᠤᠤᠯ ᠤᠨ ᠵᠡᠭᠦᠨ ᠳ᠋ᠠᠬᠢ ᠲᠠᠢ ᠫᠢᠩ ᠾᠧ ᠂ ᠶᠡᠭᠡ ᠰᠠᠯᠠᠭᠠ ᠂ ᠪᠤᠯᠠᠭ ᠂ ᠰᠢᠶᠤᠤ ᠵᠢᠶᠧ ᠵᠢᠢ ᠵᠡᠷᠭᠡ ᠲᠦᠷᠪᠡᠨ ᠲᠤᠰᠬᠤᠨ ᠢ ᠵᠢᠷᠢᠮ ᠠᠶ᠋ᠢᠮᠠᠭ ᠲᠤ ᠵᠢᠷᠤᠭᠯᠠᠨ ᠦᠭᠴᠤ ᠂ 1951 ᠤᠨ ᠳ᠋ᠤ ᠲᠢᠪᠦᠯᠢ ᠰᠦᠮᠡ ᠨᠤᠲᠤᠭ ᠤᠨ ᠲᠤᠶ᠋ᠢᠭ ᠤᠨ ᠭᠤᠤᠯ ᠤᠨ ᠡᠮᠤᠨᠡ ᠬᠦᠪᠡᠭᠡᠨ ᠳ᠋ᠠᠬᠢ ᠲᠤᠰᠬᠤᠨ ᠪᠤᠯᠤᠨ ᠰᠤᠯᠤᠩᠭᠤᠰ ᠲᠤᠰᠬᠤᠨ ᠢ ᠵᠢᠷᠢᠮ ᠠᠶ᠋ᠢᠮᠠᠭ ᠤᠨ ᠺᠠᠶ᠋ᠢᠯᠤ ᠰᠢᠶᠠᠨ ᠳ᠋ᠤ ᠵᠢᠷᠤᠭᠯᠠᠨ ᠦᠭᠴᠦ ᠂ 1952 ᠤᠨ ᠳ᠋ᠤ ᠪᠠᠶᠠᠨᠳᠠᠯᠠ ᠨᠤᠲᠤᠭ ᠤᠨ ᠪᠠᠶᠠᠨᠳᠠᠯᠠ ᠂ ᠱᠤᠸᠠᠩ ᠯᠦᠩ ᠵᠧᠨ ᠬᠤᠶᠠᠷ ᠲᠤᠰᠬᠤᠨ ᠢ ᠵᠢᠷᠢᠮ ᠠᠶ᠋ᠢᠮᠠᠭ ᠤᠨ ᠵᠠᠷᠤᠳ ᠬᠤᠰᠢᠭᠤᠨ ᠳ᠋ᠤ ᠵᠢᠷᠤᠭᠯᠠᠨ ᠦᠭᠴᠦ ᠂ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠪᠠᠶᠠᠨᠪᠤᠳᠠ ᠴᠢᠤᠢ ᠶ᠋ᠢ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠳ᠋ᠤ ᠵᠢᠷᠤᠭᠯᠠᠨ ᠦᠭᠴᠠᠢ ᠃ ᠲᠤᠰ ᠵᠢᠯ ᠪᠠᠰᠠ ᠤᠤᠯ ᠤᠨ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠤᠯᠠᠭᠠᠨᠳᠠᠪᠠᠭᠠ ᠨᠤᠲᠤᠭ ᠤᠨ ᠬᠠᠷᠢᠶᠠᠨ ᠳ᠋ᠤ ᠪᠠᠶ᠋ᠢᠭᠰᠠᠨ ᠰᠠᠨ ᠱᠠᠨ ᠂ ᠱᠤᠤ ᠭᠦᠸᠧ ᠶᠤᠤ ᠂ ᠦᠨᠳᠤᠷᠬᠤᠰᠢᠭᠤ ᠂ ᠬᠠᠪᠴᠢᠯ ᠂ ᠦᠵᠦᠭᠦᠷᠬᠤᠸᠠ ᠂ ᠬᠤᠭᠤᠯᠠᠶ᠋ᠢᠳᠤ ᠰᠦᠮᠡ ᠂ ᠬᠤᠯᠪᠤᠭᠠ ᠵᠡᠷᠭᠡ ᠲᠤᠰᠬᠤᠨ ᠬᠢᠭᠡᠳ ᠭᠦᠨ ᠰᠤᠪᠠᠭ ᠤᠨ ᠲᠠᠪᠠᠭᠠᠨ ᠡᠴᠠ ᠡᠮᠤᠨᠡᠰᠢᠭᠢ ᠱᠠᠪᠷᠤᠩ ᠠᠭᠤᠯᠠ ᠶ᠋ᠢᠨ ᠰᠢᠭᠤᠶ᠋ᠢᠳᠤ ᠤᠷᠤᠨ ᠢ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠳ᠋ᠤ ᠵᠢᠷᠤᠭᠯᠠᠨ ᠦᠭᠪᠡ ᠃ 1969 ᠤᠨ ᠳ᠋ᠤ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠶ᠋ᠢ ᠯᠢᠶᠤᠤᠨᠢᠩ ᠮᠤᠵᠢ ᠳ᠋ᠤ ᠬᠠᠷᠢᠶᠠᠯᠠᠭᠤᠯᠤᠨ ᠂ 1979 ᠤᠨ ᠳ᠋ᠤ ᠲᠠᠬᠢᠨ ᠦᠪᠤᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠳᠠᠭᠠᠨ ᠪᠤᠴᠠᠨ ᠢᠷᠡᠵᠡᠢ ᠃ ᠤᠳᠤ ᠶ᠋ᠢᠨ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠨᠢ ᠦᠪᠤᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠤᠯᠠᠭᠠᠨᠬᠠᠳᠠ ᠬᠤᠳᠠ ᠶ᠋ᠢᠨ ᠵᠡᠭᠦᠨ ᠬᠤᠶ᠋ᠢᠳᠤ ᠬᠡᠰᠡᠭ ᠲᠤ ᠰᠢᠷᠠᠮᠦᠢᠷᠡᠨ ᠤ ᠠᠷᠤ ᠬᠦᠪᠡᠭᠡᠨ ᠡᠴᠠ ᠶᠡᠭᠡ ᠬᠢᠩᠭᠠᠨ ᠲᠠᠪᠠᠭᠠᠨ ᠤ ᠲᠤᠮᠳᠠᠳᠤ ᠬᠡᠰᠡᠭ ᠤᠨ ᠠᠷᠤ ᠳ᠋ᠤ ᠬᠦᠷᠳᠡᠯᠡᠬᠢ ᠦᠷᠭᠡᠨ ᠠᠭᠤᠳᠠᠮ ᠨᠤᠲᠤᠭ ᠲᠡᠪᠢᠰᠭᠡᠷ ᠲᠡᠭᠡᠷᠡ ᠪᠠᠷᠠᠭᠤᠡᠰᠢ ᠪᠠᠨ ᠭᠡᠷ ᠤᠪᠤᠭᠠ ᠤᠷᠤᠢ ᠡᠴᠠ ᠡᠬᠢᠯᠡᠨ ᠵᠡᠭᠦᠨ ᠵᠠᠬᠠ ᠨᠢ ᠹᠧᠩ ᠬᠤᠸᠠᠩ ᠯᠢᠩ ᠬᠦᠭᠦᠷᠭᠡ ᠶ᠋ᠢᠨ ᠵᠡᠭᠦᠨ ᠦᠵᠦᠭᠦᠷ ᠲᠤ ᠬᠦᠷᠴᠤ ᠂ ᠡᠮᠤᠨᠠᠰᠢ ᠪᠠᠨ ᠵᠡᠭᠦᠨ ᠫᠠᠶ᠋ᠢᠮᠤᠳᠤ ᠶ᠋ᠢᠨ ᠡᠮᠤᠨᠡ ᠡᠴᠠ ᠡᠬᠢᠯᠡᠨ ᠬᠤᠶ᠋ᠢᠳᠤ ᠵᠠᠬᠠ ᠨᠢ ᠬᠦᠷᠢᠶᠡᠳᠤ ᠵᠠᠬᠠ ᠨᠠᠭᠤᠷ ᠤᠨ ᠬᠤᠶ᠋ᠢᠳᠤ ᠲᠠᠯᠠ ᠬᠦᠷᠴᠤ ᠂ ᠵᠡᠭᠦᠨ ᠲᠠᠯᠠ ᠪᠠᠷ ᠢᠶᠡᠨ ᠵᠠᠷᠤᠳ ᠬᠤᠰᠢᠭᠤ ᠲᠠᠢ ᠬᠦᠷᠰᠢᠯᠡᠵᠤ ᠂ ᠡᠮᠤᠨᠡ ᠵᠠᠬᠠ ᠨᠢ ᠺᠠᠶ᠋ᠢᠯᠤ ᠰᠢᠶᠠᠨ ᠂ ᠤᠩᠨᠢᠭᠤᠳ ᠬᠤᠰᠢᠭᠤ ᠲᠠᠢ ᠲᠤᠶ᠋ᠢᠭ ᠤᠨ ᠭᠤᠤᠯ ᠂ ᠰᠢᠷᠠᠮᠦᠢᠷᠡᠨ ᠭᠤᠤᠯ ᠤᠨ ᠬᠠᠭᠤᠴᠢᠨ ᠰᠠᠪᠠ ᠪᠠᠷ ᠵᠠᠭᠠᠭᠯᠠᠵᠤ ᠂ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢᠶᠡᠨ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤ ᠂ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤ ᠲᠠᠢ ᠵᠠᠯᠭᠠᠯᠳᠤᠵᠤ ᠂ ᠬᠤᠶ᠋ᠢᠳᠤ ᠲᠠᠯᠠ ᠪᠠᠷ ᠢᠶᠡᠨ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤ ᠲᠠᠢ ᠵᠠᠬᠠ ᠨᠡᠶ᠋ᠢᠯᠡᠵᠤ ᠪᠠᠶ᠋ᠢᠨᠠ ᠃ ᠭᠠᠵᠠᠷ ᠵᠦᠢ ᠶ᠋ᠢᠨ ᠪᠠᠶ᠋ᠢᠷᠢᠰᠢᠯ ᠤᠨ ᠲᠠᠯᠠ ᠪᠠᠷ ᠵᠡᠭᠦᠨ ᠤᠷᠲᠤᠷᠢᠭ ᠤᠨ 119 . 2 -120 . 1 ᠭᠷᠠᠳᠦᠢᠰ ᠂ ᠤᠮᠠᠷᠠᠳᠤ ᠦᠷᠭᠡᠷᠢᠭ ᠤᠨ 43 . 21 - 45 . 24 ᠭᠷᠠᠳᠦᠢᠰ ᠶ᠋ᠢᠨ ᠬᠤᠭᠤᠷᠤᠨᠳᠤ ᠪᠠᠶ᠋ᠢᠷᠢᠰᠢᠵᠤ ᠂ ᠡᠮᠤᠨᠡᠰᠢ ᠤᠮᠠᠷᠠᠰᠢ 232 ᠺᠢᠯᠤᠮᠧᠲᠷ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ 114.4 ᠺᠢᠯᠤᠮᠧᠲᠷ ᠦᠷᠭᠡᠨ ᠂ ᠨᠤᠲᠤᠭ ᠲᠡᠪᠢᠰᠭᠡᠷ ᠤᠨ ᠪᠦᠬᠦ ᠲᠠᠯᠠᠪᠠᠢ ᠨᠢ 14277 ᠳᠡᠭᠰᠢ ᠲᠦᠷᠪᠡᠯᠵᠢᠨ ᠺᠢᠯᠤᠮᠧᠲᠷ ᠪᠠᠶ᠋ᠢᠳᠠᠭ ᠃ 2011 ᠤᠨ ᠤ ᠪᠦᠷᠢᠳᠭᠡᠯ ᠳ᠋ᠤ ᠪᠦᠬᠦ ᠬᠤᠰᠢᠭᠤᠨ ᠳ᠋ᠤ 125120 ᠡᠷᠤᠬᠡ ᠂ 300315 ᠬᠦᠮᠤᠨ ᠠᠮᠠ ᠲᠠᠢ ᠂ ᠡᠭᠦᠨ ᠳ᠋ᠤ ᠴᠦᠬᠡᠨ ᠲᠤᠭᠠᠳᠤ ᠦᠨᠳᠤᠰᠤᠳᠡᠨ 128215 ᠬᠦᠮᠤᠨ ᠢᠶᠠᠷ ᠲᠠᠩᠰᠠᠯᠠᠭᠤᠯᠵᠤ ᠪᠠᠶ᠋ᠢᠪᠠ ᠃ ᠬᠤᠰᠢᠭᠤᠨ ᠤ ᠡᠯᠡ ᠰᠤᠮᠤ ᠰᠢᠶᠠᠩ ᠪᠠᠯᠭᠠᠰᠤᠨ ᠳ᠋ᠤ ᠤᠯᠠᠨ ᠤᠳᠠᠭᠠ ᠲᠤᠬᠢᠷᠠᠭᠤᠯᠤᠯᠳᠠ ᠬᠢᠭᠰᠡᠨ ᠤ ᠲᠠᠷᠠᠭᠠ 2016 ᠤᠨ ᠪᠤᠯᠬᠤ ᠳ᠋ᠤ ᠨᠡᠶ᠋ᠢᠳᠡ 14 ᠰᠤᠮᠤ ᠂ ᠰᠢᠶᠠᠩ ᠂ ᠪᠠᠯᠭᠠᠰᠤ ᠂ 2 ᠵᠡᠭᠡᠯᠢ ᠭᠤᠳᠤᠮᠵᠢ ᠶ᠋ᠢᠨ ᠭᠡᠷᠡᠭ ᠡᠷᠬᠢᠯᠡᠬᠦ ᠭᠠᠵᠠᠷ ᠪᠤᠯᠭᠠᠨ ᠬᠤᠪᠢᠶᠠᠭᠰᠠᠨ ᠪᠠᠶ᠋ᠢᠨᠠ ᠃ ᠲᠠᠷᠤᠢ ᠪᠠᠶᠬᠠᠦ᠋ᠨᠳᠤᠷ ᠂ ᠬᠠᠨᠰᠦ᠋ᠮᠡ ᠂ ᠰᠠᠶ᠋ᠢᠬᠠᠨᠳᠠᠯᠠ ᠂ ᠪᠠᠯᠴᠢᠷᠤᠳ ᠵᠡᠷᠭᠡ 4 ᠰᠤᠮᠤ ᠂ ᠰᠢᠨ ᠮᠢᠨ ᠂ ᠰᠢᠶᠠᠨ ᠹᠧᠩ ᠂ ᠤᠯᠠᠭᠠᠨᠬᠠᠳᠠ ᠵᠡᠷᠭᠡ 3 ᠰᠢᠶᠠᠩ ᠂ ᠴᠢᠪᠠᠭᠠ ᠂ ᠬᠤᠨᠳᠤ ᠂ ᠱᠤᠸᠠᠩ ᠱᠧᠩ ᠂ ᠲᠢᠶᠠᠨᠱᠠᠨᠺᠸᠤ ᠂ ᠱᠤᠤ ᠂ ᠪᠠᠶᠠᠨᠬᠤᠸᠠ ᠂ ᠵᠢᠭᠠᠰᠤᠳᠠᠢ ᠵᠡᠷᠭᠡ 7 ᠪᠠᠯᠭᠠᠰᠤ ᠂ ᠡᠤᠤ ᠮᠦᠷᠡᠨ ᠂ ᠬᠠᠨ ᠠᠭᠤᠯᠠ ᠵᠡᠷᠭᠡ 2 ᠵᠡᠭᠡᠯᠢ ᠭᠤᠳᠤᠮᠵᠢ ᠶ᠋ᠢᠨ ᠬᠡᠷᠡᠭ ᠡᠷᠬᠢᠯᠡᠬᠦ ᠭᠠᠵᠠᠷ ᠲᠠᠢ ᠮᠤᠩᠭᠤᠯ ᠦᠨᠳᠤᠰᠤᠳᠡᠨ ᠢᠶᠠᠷ ᠭᠤᠤᠯ ᠴᠤᠭᠴᠠ ᠪᠤᠯᠭᠠᠭᠰᠠᠨ ᠬᠤᠰᠢᠭᠤ ᠪᠤᠯᠤᠨᠠ ᠃ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤ ᠪᠠᠶ᠋ᠢᠭᠤᠯᠤᠭᠳᠠᠭᠰᠠᠨ ᠤ ᠲᠠᠷᠠᠭᠠ ᠬᠠᠮᠤᠭ ᠠᠩᠬᠠᠨ ᠤ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠨᠢ ᠲᠠᠯᠠᠢ ᠴᠦᠬᠦᠷ ᠂ ᠮᠤᠵᠠᠩ ᠡᠴᠢᠭᠡ ᠬᠦᠤ ᠬᠤᠶᠠᠷ ᠂ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠪᠠᠶ᠋ᠢᠭᠤᠯᠤᠭᠳᠠᠠᠠᠰᠠᠨ ᠤ ᠲᠠᠷᠠᠭᠠᠬᠢ ᠠᠩᠬᠠᠨ ᠤ ᠬᠤᠰᠢᠭᠤ ᠲᠠᠷᠤᠭᠠ ᠨᠢ ᠰᠤᠳᠨᠠᠮᠳᠤᠪ ᠂ ᠰᠢᠨᠡ ᠲᠤᠮᠳᠠᠳᠤ ᠤᠯᠤᠰ ᠪᠠᠶ᠋ᠢᠭᠤᠯᠤᠭᠳᠠᠭᠰᠠᠨ ᠤ ᠲᠠᠷᠠᠭᠠ ᠠᠩᠬᠠᠨ ᠤ ᠬᠤᠰᠢᠭᠤ ᠲᠠᠷᠤᠭᠠ ᠨᠢ ᠠᠯᠢᠨ ︵ ᠬᠠᠰᠳᠤᠷᠵᠢ ︶ ᠪᠤᠯᠤᠨᠠ ᠃
1634 ᠤᠨ ᠳ᠋ᠤ ᠬᠤᠰᠢᠭᠤ ᠪᠠᠶ᠋ᠢᠭᠤᠯᠤᠭᠳᠠᠭᠰᠠᠨ ᠡᠴᠠ ᠨᠠᠰᠢ ᠤᠳᠤ ᠪᠤᠯᠳᠠᠯᠠ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠸᠠᠩ ︵ ᠪᠡᠶ᠋ᠢᠯᠡ ᠂ ᠪᠡᠶ᠋ᠢᠰᠡ ᠂ ᠵᠢᠶᠦ᠋ᠨ ᠸᠠᠩ ᠂ ᠳ᠋ᠠ ᠸᠠᠩ ︶ ᠬᠢᠭᠡᠳ ᠬᠤᠰᠢᠭᠤᠨ ᠲᠠᠷᠤᠭᠠ ᠨᠠᠷ ᠭᠡᠪᠡᠯ ᠄ ᠴᠢᠩ ᠤᠯᠤᠰ ᠤᠨ ᠦᠶᠡ ᠳ᠋ᠤ 1634 - 1916 ᠤᠨ ᠪᠤᠯᠳᠠᠯᠠ ᠲᠠᠯᠠᠢ ᠴᠦᠭᠦᠷ ᠂ ᠮᠤᠵᠠᠩ ᠪᠡᠶ᠋ᠢᠰᠡ ᠂ ᠵᠤᠯᠵᠠᠭᠠᠨ ᠵᠢᠶᠦ᠋ᠨ ᠸᠠᠩ ᠂ ᠰᠡᠷᠡᠩ ᠵᠢᠶᠦ᠋ᠨ ᠸᠠᠩ ᠂ ᠴᠦᠶᠢ ᠵᠢᠶᠦ᠋ᠨ ᠸᠠᠩ ᠂ ᠮᠤᠨᠢᠩ ᠪᠡᠶ᠋ᠢᠯᠡ ᠂ ᠸᠠᠩᠵᠢᠯ ᠪᠡᠶ᠋ᠢᠯᠡ ᠂ ᠲᠠᠭᠳᠠᠨᠸᠠᠩᠴᠤᠭ ᠪᠡᠶ᠋ᠢᠯᠡ ᠂ ᠠᠷᠲᠠᠰᠢᠳᠢ ᠪᠡᠶ᠋ᠢᠯᠡ ᠂ ᠲᠤᠷᠵᠢᠫᠠᠯᠮᠤ ᠪᠡᠶ᠋ᠢᠯᠡ ᠂ ᠲᠠᠨᠵᠢᠨᠪᠠᠯᠰᠠᠩ ᠪᠡᠶ᠋ᠢᠯᠡ ᠂ ᠵᠠᠮᠢᠶᠠᠨᠸᠠᠩᠴᠤᠭ ᠪᠡᠶ᠋ᠢᠯᠡ ᠂ ᠷᠠᠰᠢᠵᠦᠩᠨᠠᠢ ᠪᠡᠶ᠋ᠢᠯᠡ ᠂ ᠪᠠᠽᠠᠷᠭᠠᠷᠤᠳᠢ ᠵᠢᠶᠦ᠋ᠨ ᠸᠠᠩ ᠵᠡᠷᠭᠡ ᠠᠷᠪᠠᠨ ᠨᠢᠭᠡᠨ ᠦᠶᠡ ᠶ᠋ᠢᠨ ᠠᠷᠪᠠᠨ ᠲᠦᠷᠪᠡᠨ ᠬᠦᠮᠤᠨ ᠬᠤᠰᠢᠭᠤᠨ ᠵᠠᠰᠠᠭ ᠨᠤᠶᠠᠨ ᠰᠠᠭᠤᠪᠠ ᠃ ᠢᠷᠭᠡᠨ ᠤᠯᠤᠰ ᠤᠨ ᠦᠶᠡ ︵ ᠬᠠᠭᠤᠷᠮᠠᠭ ᠮᠠᠨᠵᠤ ᠶ᠋ᠢᠨ ᠦᠶᠡ ᠶ᠋ᠢ ᠴᠦ ᠪᠠᠭᠳᠠᠭᠠᠵᠤ ᠪᠤᠢ ︶ ᠳ᠋ᠤ ᠂ 1916 ᠤᠨ ᠡᠴᠠ 1941 ᠤᠨ ᠪᠤᠯᠳᠠᠯᠠ ᠬᠠᠪᠤᠳᠤ ᠬᠠᠰᠠᠷ ᠤᠨ ᠬᠤᠷᠢᠨ ᠨᠠᠢᠮᠠᠳᠤᠭᠠᠷ ᠦᠶᠡ ᠶ᠋ᠢᠨ ᠬᠤᠶ᠋ᠢᠴᠢᠰ ᠸᠠᠩᠴᠢᠨᠫᠧᠷᠯᠠᠢ ᠲᠦᠰᠢᠶᠡ ᠭᠦᠩ ᠬᠤᠰᠢᠭᠤ ᠵᠠᠰᠠᠭ ᠨᠤᠶᠠᠨ ᠰᠠᠭᠤᠪᠠ ᠃ 1941 ᠤᠨ ᠡᠴᠠ 1949 ᠤᠨ ᠪᠤᠯᠳᠠᠯᠠ ᠤᠤᠯ ᠤᠨ ᠬᠤᠰᠢᠭᠤ ᠲᠤᠰᠠᠯᠠᠭᠴᠢ ᠶ᠋ᠢᠨ ᠬᠡᠷᠭᠡᠮ ᠳ᠋ᠤ ᠪᠠᠶ᠋ᠢᠭᠰᠠᠨ ᠰᠤᠳᠨᠠᠮᠳᠤᠪ ᠬᠤᠰᠢᠭᠤᠨ ᠲᠠᠷᠤᠭᠠ ᠰᠠᠭᠤᠪᠠ ᠃ ︵ ᠰ ᠂ ᠵᠠᠮᠢᠶᠠᠨ ︶
16 0