ᠰᠢᠭᠦᠮᠵᠢ
ᠰᠢᠭᠦᠮᠵᠢᠯᠡᠭᠴᠢ ᠨᠠᠷ ᠤᠨ ᠲᠤᠬᠠᠢ
ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ : ᠰᠢᠭᠦᠮᠵᠢᠯᠡᠭᠴᠢ ᠨᠠᠷ ᠤᠨ ᠲᠤᠬᠠᠢ
5152
2019-01-04 20:04
发表于:内蒙古
ᠰᠢᠭᠦᠮᠵᠢᠯᠡᠭᠴᠢ ᠨᠠᠷ ᠤᠨ ᠲᠤᠬᠠᠢ
ᠬᠠᠮᠤᠭ ᠤᠨ ᠲᠦᠷᠦᠭᠦᠨ ᠳᠦ ᠤᠳᠬᠠ ᠵᠣᠬᠢᠶᠠᠯ ᠰᠤᠳᠤᠯᠤᠭᠠᠴᠢ᠂ ᠰᠢᠭᠦᠮᠵᠢᠯᠡᠭᠴᠢ ᠭ ∙ ᠪᠠᠲᠤᠰᠠᠭᠤᠷᠢ ᠶᠢᠨ ᠰᠢᠭᠦᠮᠵᠢ ᠶᠢ ᠠᠯᠭᠠᠰᠠᠯ ᠦᠭᠡᠢ ᠤᠩᠰᠢᠬᠤ ᠳᠤᠷᠠ ᠲᠠᠢ ᠪᠠᠨ ᠬᠡᠯᠡᠶᠡ᠃ ᠪᠠᠲᠤᠰᠠᠭᠤᠷᠢ ᠶᠢᠨ ᠣᠨᠴᠠᠯᠢᠭ ᠨᠢ ᠲᠤᠬᠠᠢ ᠶᠢᠨ ᠰᠢᠭᠦᠮᠵᠢ ᠳᠦ ᠪᠡᠨ ᠲᠠᠭᠠᠷᠠᠭᠤᠯᠵᠤ ᠳᠣᠨᠵᠢ ᠮᠠᠶ᠋ᠢᠭ ᠢ ᠨᠢ ᠣᠯᠬᠤ ᠳᠤ ᠪᠠᠨ ᠭᠠᠷᠮᠠᠭᠠᠢ᠃ ᠡᠮᠣᠼᠢ ᠲᠠᠢ ᠪᠢᠴᠢᠨᠡ᠃ ᠰᠢᠭᠦᠬᠦ ᠳᠦ ᠳᠠᠭᠤᠳᠠᠭᠳᠠᠭᠰᠠᠨ᠂ ᠲᠡᠷᠡ ᠪᠠᠶᠢᠲᠤᠭᠠᠢ ᠢᠯᠠ ᠰᠤᠨᠤᠰᠬᠤ ᠳᠥᠬᠦᠭᠰᠡᠨ ᠭᠡᠳᠡᠭ ᠢᠶᠡᠷ ᠢᠶᠡᠨ ᠡᠨᠡ ᠦᠶᠡ ᠳᠦ ᠯᠠ ᠭᠣᠴᠣ ᠰᠣᠨᠢᠨ ᠦᠵᠡᠭᠳᠡᠯ ᠪᠣᠯᠤᠭᠰᠠᠨ ᠰᠢᠭᠦᠮᠵᠢᠯᠡᠭᠴᠢ᠃ ᠮᠠᠰ ᠤᠨ ᠤᠷᠠᠨ ᠵᠣᠬᠢᠶᠠᠯ ᠤᠨ ᠹᠠᠨᠠᠲ ᠤᠳ ᠬᠠᠶᠢᠷᠠᠲᠠᠢ ᠵᠣᠬᠢᠶᠠᠯᠴᠢ ᠨᠠᠷ ᠢ ᠨᠢ ᠰᠢᠭᠦᠮᠵᠢᠯᠡᠩᠭᠦᠲᠡ ᠭᠡᠨᠡᠳᠲᠡ ᠯᠠ ᠡᠶᠢᠮᠦ ᠲᠡᠶᠢᠷᠡᠩ ᠬᠠᠮᠢᠭᠠ ᠠᠴᠠ ᠭᠠᠷᠤᠭᠠᠳ ᠢᠷᠡᠪᠡ ᠭᠡᠵᠦ ᠳᠣᠣᠷᠠ ᠪᠦᠷᠢᠨᠡ ᠱᠤᠤᠭᠢᠭᠰᠠᠨ᠃ ᠲᠡᠷᠡ ᠪᠤᠤ ᠬᠡᠯᠡ ᠶᠡᠬᠡᠳᠡ ᠲᠤᠯᠬᠤᠲᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠮ ∙ ᠤᠶᠠᠨᠰᠦ᠋ᠬᠡ 《 ᠰᠠᠶᠢᠬᠠᠨ ᠣᠷᠳᠣᠨ ᠳᠣᠲᠣᠷᠠ ᠪᠠᠲᠠᠭᠠᠨᠠ ᠳᠤᠤᠭᠠᠷᠬᠤ ᠳᠤ ᠭᠤᠲᠤᠨᠠ》 ᠴᠤ ᠭᠡᠮᠡᠭᠦ ᠰᠥᠷᠢᠰᠦᠨ ᠪᠠᠵᠠᠭᠠ ᠬᠢᠵᠦ ᠪᠠᠶᠢᠭᠰᠠᠨ ᠢ ᠰᠠᠨᠠᠵᠤ ᠪᠠᠶᠢᠨᠠ᠃ ᠣᠪᠣᠭᠠ ᠲᠣᠮᠣ ᠴᠢᠯᠠᠭᠤ ᠬᠥᠳᠡᠯᠭᠡᠭᠰᠡᠨ ᠬᠡᠷᠡᠭ ᠰᠢᠦ᠃ 《ᠡᠮᠡᠭᠡ》ᠨᠠᠷ ᠤᠨ ᠤᠳᠬᠠ ᠵᠣᠬᠢᠶᠠᠯ ᠳᠤ ᠬᠠᠷᠰᠢᠯ ᠲᠠᠢ᠃
ᠬ ∙ ᠴᠣᠶᠢᠳᠣᠭᠵᠠᠮᠰᠤ ᠭᠡᠵᠦ ᠮᠤᠨᠳᠠᠭ ᠰᠢᠭᠦᠮᠵᠢᠯᠡᠭᠴᠢ ᠪᠤᠢ᠃ ᠭᠣᠣᠯ ᠨᠢ ᠪᠠᠷᠢᠮᠲᠠ ᠨᠣᠲᠠᠯᠠᠭᠠ ᠰᠠᠶᠢᠲᠠᠢ᠂ ᠭᠠᠷᠬᠤ ᠭᠠᠷᠤᠴᠠ ᠦᠭᠡᠢ ᠪᠣᠯᠲᠠᠯᠠ ᠨᠣᠴᠠᠳᠠᠭ ᠵᠢᠩᠬᠢᠨᠢ 《ᠮᠣᠩᠭᠣᠯ ᠪᠠᠩᠬᠤᠷ》᠃ ᠰᠢᠭᠦᠮᠵᠢ ᠪᠢᠴᠢᠨᠡ ᠭᠡᠳᠡᠭ ᠮᠡᠳᠡᠯᠭᠡ᠂ ᠮᠡᠳᠡᠭᠡᠯᠡᠯ ᠡᠴᠡ ᠭᠠᠳᠠᠨᠠ ᠮᠡᠳᠡᠷᠡᠮᠵᠢ᠂ ᠠᠨᠠᠯᠢᠽᠢ ᠶᠤᠮ ᠰᠢᠦ ᠳ᠋ᠡ ᠭᠡᠳᠡᠭ ᠢ ᠤᠳᠬᠠ ᠪᠠᠷ ᠨᠢ ᠬᠠᠷᠠᠭᠤᠯᠵᠤ ᠪᠤᠢ ᠵᠠᠯᠠᠭᠤ᠃ ᠰᠢᠭᠦᠮᠵᠢᠯᠡᠭᠴᠢ ᠬᠦᠮᠦᠨ ᠦ ᠬᠠᠮᠤᠭ ᠤᠨ ᠭᠣᠣᠯ ᠰᠢᠯᠭᠠᠭᠤᠷ ᠪᠣᠯᠬᠤ 《ᠰᠢᠳᠤᠷᠭᠤ》 ᠪᠠᠶᠢᠬᠤ ᠭᠡᠰᠡᠨ ᠡᠨᠡ ᠮᠥᠷᠳᠡᠯᠭᠡ ᠪᠣᠯ ᠲᠡᠭᠦᠨ ᠳᠦ ᠬᠠᠩᠭᠠᠯᠲᠠ ᠲᠠᠢ᠃ ᠪᠤᠷᠬᠠᠨ ᠳᠤ ᠦᠨᠦᠰᠦᠭᠦᠯᠦᠭᠰᠡᠨ ᠬᠦᠦ ᠭᠡᠳ ᠪᠤᠢ ᠳ ∙ ᠨᠢᠮᠠᠳᠣᠷᠵᠢ ᠬᠡᠮᠡᠬᠦ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠰᠢᠯᠦᠭ ᠦᠨ ᠨᠣᠮ ᠳᠤ ᠰᠢᠭᠦᠮᠵᠢ ᠪᠢᠴᠢᠭᠰᠡᠨ ᠢ ᠤᠩᠰᠢᠭᠠᠳ ᠪᠠᠬᠠᠷᠬᠠᠭᠰᠠᠨ᠃ ᠪᠦᠭᠦᠳᠡ ᠯᠠ ᠮᠠᠭᠲᠠᠭᠠᠯ ᠤᠨ ᠴᠠᠭᠠᠰᠤᠨ ᠮᠠᠯᠠᠭᠠᠢ ᠡᠮᠦᠰᠬᠡᠵᠦ ᠪᠠᠶᠢᠬᠤ ᠳᠤ 《ᠠᠪᠢᠶᠠᠰ ᠵᠠᠯᠢ ᠬᠣᠶᠠᠷ ᠨᠢᠭᠡ ᠳᠣᠣᠷᠠ ᠪᠠᠭᠲᠠᠬᠤ ᠦᠭᠡᠢ 》 ᠭᠡᠵᠦ ᠵᠣᠷᠢᠭᠲᠠᠢ ᠳᠤᠤᠭᠠᠷᠤᠭᠰᠠᠨ ᠰᠢᠭᠦᠮᠵᠢᠯᠡᠭᠴᠢ ᠰᠢᠦ᠃ ᠦᠨᠡᠬᠡᠷ ᠵᠠᠯᠢ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠨᠣᠲᠠᠯᠠᠵᠤ ᠴᠢᠳᠠᠭᠰᠠᠨ᠃
ᠠᠺᠣ ᠺᠧᠨ᠋ᠽᠣ ᠪᠤᠶᠤ ᠠᠯᠲᠠᠨᠬᠤᠶᠠᠭ ᠭᠡᠵᠦ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠵᠠᠯᠠᠭᠤ ᠪᠠᠶᠢᠨᠠ᠃ ᠭᠣᠣᠯ ᠨᠢ ᠤᠳᠬᠠ ᠵᠣᠬᠢᠶᠠᠯ ᠤᠨ ᠠᠺᠠᠳᠧᠮᠢᠺ ᠪᠣᠯᠪᠠᠰᠤᠷᠠᠯ ᠲᠠᠢ᠂ ᠠᠪᠢᠶᠠᠰ ᠲᠠᠢ ᠤᠴᠢᠷ ᠠᠴᠠ ᠤᠷᠠᠨ ᠵᠣᠬᠢᠶᠠᠯ ᠤᠨ ᠴᠠᠭᠠᠳᠤ ᠮᠥᠨ ᠴᠢᠨᠠᠷ ᠢ ᠨᠡᠭᠡᠭᠡᠨ ᠬᠠᠷᠠᠭᠤᠯᠬᠤ ᠳᠤ ᠪᠠᠨ ᠭᠣᠴᠣ᠃ ᠳᠡᠯᠡᠬᠡᠢ ᠶᠢᠨ ᠰᠣᠩᠭᠣᠳᠠᠭ ᠤᠳ ᠤᠨ ᠬᠦᠨᠳᠦ ᠬᠡᠴᠡᠭᠦᠦ ᠲᠠᠭᠠᠪᠤᠷᠢ ᠶᠢ ᠲᠠᠶᠢᠯᠵᠤ᠂ ᠲᠠᠶᠢᠯᠪᠤᠷᠢᠯᠠᠵᠤ ᠪᠠᠶᠢᠭᠠ ᠬᠦᠮᠦᠨ ᠦ ᠨᠢᠭᠡ᠃ ᠣᠷᠴᠢᠨ ᠴᠠᠭ ᠤᠨ ᠤᠳᠬᠠ ᠵᠣᠬᠢᠶᠠᠯ ᠤᠨ ᠰᠢᠭᠦᠮᠵᠢ ᠣᠨᠣᠯ ᠨᠣᠮ ᠭᠡᠬᠦ ᠡᠴᠡ ᠪᠡᠨ ᠢᠯᠡᠭᠦᠦ ᠮᠡᠳᠡᠯᠭᠡ᠂ ᠮᠡᠳᠡᠷᠡᠮᠵᠢᠨ ᠳᠤ ᠲᠤᠯᠭᠠᠭᠤᠷᠢᠯᠠᠵᠤ ᠪᠤᠢ ᠭᠡᠳᠡᠭ ᠢ ᠣᠶᠢᠯᠠᠭᠠᠭᠤᠯᠵᠤ ᠪᠤᠢ ᠵᠠᠯᠠᠭᠤ᠃
ᠭᠠᠷᠴᠠᠭᠠ ᠦᠭᠡᠢ ᠫ ∙ ᠪᠠᠲᠤᠬᠤᠶᠠᠭ ᠭᠡᠵᠦ ᠵᠣᠬᠢᠶᠠᠯᠴᠢ ᠪᠠᠶᠢᠨᠠ᠃ ᠪᠢ ᠵᠣᠬᠢᠶᠠᠯ ᠤᠳ ᠢ ᠨᠢ ᠤᠩᠰᠢᠵᠤ ᠦᠵᠡᠭᠡ ᠦᠭᠡᠢ᠃ ᠭᠡᠬᠦ ᠳᠦ ᠪᠡᠨ ᠰᠢᠭᠦᠮᠵᠢ ᠡᠴᠡ ᠨᠢ ᠬᠠᠷᠠᠵᠤ ᠪᠠᠶᠢᠬᠤ ᠳᠤ ᠮᠠᠰᠢ ᠭᠦᠨ ᠭᠦᠨᠵᠡᠭᠡᠢ ᠶᠠᠷᠭᠠᠵᠤ ᠣᠷᠣᠳᠠᠭ᠂ ᠬᠦᠮᠦᠨ ᠪᠤᠴᠠᠭᠠᠵᠤ ᠨᠢᠴᠤᠭᠠᠬᠤ ᠠᠷᠭᠠ ᠦᠭᠡᠢ ᠲᠠᠶᠢᠯᠪᠤᠷᠢ ᠬᠢᠳᠡᠭ ᠰᠢᠭᠦᠮᠵᠢᠯᠡᠭᠴᠢ᠃ ᠦᠨᠳᠦᠰᠦᠯᠡᠯ᠂ ᠨᠣᠲᠠᠯᠠᠭᠠ ᠰᠠᠶᠢᠲᠠᠢ ᠲᠡᠭᠦᠨ ᠦ ᠰᠢᠭᠦᠮᠵᠢ ᠶᠢ ᠡᠰᠡᠷᠭᠦᠴᠡᠬᠦ ᠪᠣᠯᠤᠮᠵᠢ ᠦᠭᠡᠢ᠃ 2×2=4 ᠭᠡᠳᠡᠭ ᠰᠢᠭ ᠲᠣᠪ ᠲᠣᠳᠣᠷᠬᠠᠢ ᠶᠠᠭᠤᠮᠠ ᠲᠠᠢ ᠬᠡᠨ ᠮᠠᠷᠭᠤᠬᠤ ᠪᠢᠯᠡ᠃
ᠶᠠ᠊ ∙ ᠪᠠᠶᠠᠷ ᠭᠡᠵᠦ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠤᠢ᠃ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠭᠤᠸᠠᠢ ᠶᠢᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠦᠨ ᠣᠨᠴᠠᠯᠢᠭ ᠪᠣᠯᠤᠠ ᠠᠮᠢᠳᠤᠷᠠᠯ ᠢ ᠦᠵᠡᠬᠦ ᠹᠢᠯᠣᠰᠣᠹᠢ ᠶᠢ ᠬᠥᠨᠳᠡᠭᠰᠡᠨ ᠰᠢᠭᠦᠮᠵᠢ ᠨᠢ ᠦᠨᠡᠨ ᠶᠠᠩᠵᠤᠲᠠᠢ ᠪᠣᠯᠤᠭᠰᠠᠨ᠃ ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠣᠯ ᠺᠢᠨᠣᠨ ᠤ ᠲᠤᠬᠠᠢ ᠰᠢᠭᠦᠮᠵᠢ ᠨᠢ ᠮᠠᠰᠢ ᠭᠣᠶᠣ᠃ ᠶᠡᠷᠦ ᠨᠢ ᠨᠤᠬᠤᠴᠠᠲᠠᠢ᠂ ᠤᠷᠠ ᠴᠢᠳᠠᠪᠤᠷᠢ ᠥᠨᠳᠥᠷ ᠰᠢᠭᠦᠮᠵᠢ ᠪᠢᠴᠢᠭᠴᠢ ᠰᠠᠨᠠᠭᠳᠠᠭᠰᠠᠨ᠃ ᠬᠠᠷᠠᠬᠤ ᠥᠨᠴᠥᠭ ᠭᠡᠵᠦ ᠨᠢᠭᠡ ᠶᠠᠭᠤᠮᠠ ᠪᠠᠢᠨᠠ ᠡ᠃
ᠤᠳᠬᠠ ᠵᠣᠬᠢᠶᠠᠯ ᠤᠨ ᠰᠢᠭᠦᠮᠵᠢ ᠭᠡᠬᠦ 《ᠬᠠᠳᠠᠨ ᠤ ᠮᠠᠩᠭᠠ》 ᠍ ᠢ ᠠᠷᠠᠢ ᠥᠭᠡᠷᠡ ᠵᠦᠭ ᠲᠦ ᠴᠢᠭᠯᠡᠭᠦᠯᠦᠭᠰᠡᠨ ᠤ᠊ ∙ ᠪᠢᠮᠪᠠᠨᠢᠮᠠ ᠭᠡᠵᠦ ᠰᠤᠳᠤᠯᠤᠭᠠᠴᠢ ᠵᠠᠯᠠᠭᠤ ᠪᠤᠢ᠃ ᠰᠢᠭᠦᠮᠵᠢ ᠡᠰᠰᠡ ᠭᠡᠬᠦ ᠰᠢᠨᠡ ᠲᠥᠷᠥᠯ ᠳᠦ ᠠᠪᠢᠶᠠᠰ ᠢᠶᠠᠨ ᠰᠣᠷᠢᠵᠤ ᠪᠤᠢ ᠡᠨᠡ ᠵᠠᠯᠠᠭᠤ 《ᠴᠠᠭ ᠬᠤᠭᠤᠴᠠᠭᠠ ᠬᠡᠯᠡᠨᠡ》 ᠨᠣᠮ ᠢᠶᠠᠷ ᠢᠶᠠᠨ ᠴᠠᠬᠢᠭᠤᠷ ᠬᠠᠭᠠᠯᠤᠭᠰᠠᠨ᠃
5 0