ᠴᠠᠰᠣ ᠮᠢᠨᠢ
ᠪᠤᠤ ᠵᠢᠨᠵᠤᠸᠠᠨᠭᠽᠢ
ᠴᠠᠰᠣ ᠮᠢᠨᠢ
ᠴᠠᠭᠠᠨ ᠴᠡᠴᠡᠭ ᠴᠢᠨᠢ ᠭᠠᠵᠠᠷ ᠲᠡᠭᠡᠷᠡ
ᠴᠠᠪ ᠴᠠᠭᠠᠨ ᠭᠡᠭᠡ ᠪᠣᠯᠵᠣ ᠯᠠᠪᠰᠠᠨᠠ
ᠴᠠᠭᠯᠠᠰᠢ ᠦᠭᠡᠢ ᠷᠢᠳᠢ ᠰᠢᠳᠢ ᠴᠢᠨᠢ
ᠴᠡᠭᠡᠵᠢ ᠵᠢᠷᠦᠬᠡᠨ ᠦ ᠬᠣᠪᠢᠯᠭᠠᠨ ᠪᠣᠯᠵᠤ ᠪᠦᠷᠬᠦᠨᠡ
ᠴᠠᠰᠣ ᠮᠢᠨᠢ
ᠴᠠᠭᠠᠨ ᠲᠡᠯᠡᠬᠡᠢ ᠶᠢᠨ ᠲᠣᠭᠣᠰᠣ ᠶᠢ ᠦᠳᠡᠵᠦ
ᠴᠠᠬᠠᠨᠠᠬᠢ ᠠᠭᠣᠯᠠᠰ ᠢ ᠦᠩᠭᠡᠯᠡᠨ ᠮᠢᠯᠢᠶᠠᠭᠠᠳ
ᠴᠣᠯ ᠴᠠᠭᠠᠨ ᠴᠠᠬᠢᠯᠭᠠᠨ ᠭᠡᠷᠡᠯ ᠴᠢᠨᠢ
ᠴᠢᠭᠡᠴᠢ ᠰᠡᠳᠭᠢᠯ ᠦᠨ ᠴᠢᠮᠡᠭ ᠪᠣᠯᠵᠤ ᠭᠡᠷᠡᠯᠲᠦᠨᠡ ᠃
ᠴᠠᠰᠣ ᠮᠢᠨᠢ
ᠴᠠᠬᠢᠯᠭᠠᠨ ᠲᠡᠭᠷᠢ ᠶᠢᠨ ᠴᠢᠭᠡᠴᠢ ᠰᠠᠴᠣᠯᠢ ᠶᠣᠮ ᠰᠢᠦ ᠴᠢ
ᠴᠠᠭᠠᠨ ᠪᠣᠶᠠᠨ ᠤ ᠷᠠᠰᠢᠶᠠᠨ ᠬᠣᠷᠠᠮᠠᠯ ᠶᠤᠮ ᠰᠢᠦ ᠴᠢ
ᠦᠨᠳᠦᠷ ᠠᠭᠣᠯᠠᠰ ᠨᠢ ᠴᠢᠮᠠ ᠳᠤ ᠪᠠᠨ ᠴᠠᠢᠯᠵᠠᠨ ᠮᠡᠬᠦᠢᠨᠡ
ᠦᠷᠭᠡᠨ ᠲᠠᠯᠠ ᠨᠢ ᠴᠢᠮᠠ ᠳᠤ ᠪᠠᠨ ᠴᠡᠩᠭᠡᠷᠯᠡᠨ ᠮᠦᠰᠢᠶᠡᠨᠡ ᠃
ᠴᠠᠰᠣ ᠮᠢᠨᠢ
ᠦᠨᠳᠦᠷ ᠲᠡᠭᠷᠢ ᠦᠷᠭᠡᠨ ᠲᠠᠯᠠ ᠬᠣᠶᠠᠷ ᠢ
ᠦᠩᠭᠡᠯᠡᠨ ᠴᠢᠮᠡᠵᠦ ᠬᠣᠯᠪᠣᠭᠰᠠᠨ ᠬᠠᠳᠠᠭ ᠪᠠᠢᠨᠠᠮ
ᠬᠦᠬᠡᠷᠡᠭᠴᠢ ᠤᠷᠭᠣᠮᠠᠯ ᠬᠦᠪᠦᠭᠴᠢ ᠠᠮᠢᠳᠠᠳ ᠤᠨ
ᠬᠦᠷᠨᠢᠨ ᠪᠠᠶᠠᠰᠴᠣ ᠬᠦᠪᠦᠨ ᠪᠦᠵᠢᠭᠯᠡᠭᠰᠡᠨ ᠰᠡᠳᠭᠢᠯ ᠪᠠᠢᠨᠠᠮ ︕
ᠴᠠᠰᠣ ᠮᠢᠨᠢ
ᠠᠯᠳᠠᠨ ᠲᠡᠯᠡᠬᠡᠢ ᠶᠢᠨ ᠠᠩ ᠵᠠᠪᠰᠠᠷ ᠢ
ᠠᠮᠠᠳᠠᠵᠤ ᠭᠣᠶᠤᠯᠠᠭᠰᠠᠨ ᠣᠳᠤᠨ ᠪᠠᠢᠨᠠᠮ
ᠠᠮᠢᠳᠠᠨ ᠪᠦᠬᠦᠨ ᠦ ᠣᠶᠠᠷᠠᠯ ᠣᠢᠳᠬᠠᠯ ᠢ
ᠠᠷᠢᠯᠭᠠᠵᠤ ᠠᠮᠵᠢᠭᠰᠠᠨ ᠰᠣᠳᠣᠨ ᠪᠠᠢᠨᠠᠮ ︕
ᠴᠠᠰᠣ ᠮᠢᠨᠢ
ᠴᠡᠪᠡᠷ ᠰᠠᠢᠬᠠᠨ ᠣᠬᠢᠶᠠᠭᠳᠠᠭᠰᠠᠨ ᠲᠡᠭᠷᠢ ᠰᠢᠭ
ᠴᠡᠯᠡᠭᠡᠷ ᠲᠠᠯᠠ ᠶᠢᠨ ᠦᠩᠭᠡ ᠵᠢᠰᠣ ᠪᠠᠢᠨᠠᠮ
ᠴᠣᠬᠣᠢᠭᠰᠠᠨ ᠡᠪᠡᠰᠦ ᠪᠠᠢᠲᠠᠯᠠ ᠪᠢᠷ ᠠᠳᠬᠣᠵᠤ
ᠴᠡᠯᠡᠢᠬᠦ ᠡᠪᠦᠯ ᠦᠨ ᠷᠤᠮᠠᠨ ᠪᠢᠴᠢᠭᠯᠡᠨᠠᠮ ︕
ᠴᠠᠰᠣ ᠮᠢᠨᠢ
ᠵᠢᠷᠪᠢᠯᠵᠡᠨ ᠪᠠᠭᠣᠬᠤ ᠵᠢᠷᠭᠣᠭᠠᠯᠵᠢᠨ ᠴᠡᠴᠡᠭ ᠡᠴᠡ ᠴᠢᠨᠢ
ᠵᠢᠷᠭᠠᠯ ᠴᠩᠭᠡᠯ ᠦᠨ ᠪᠣᠳᠣᠯ ᠰᠡᠷᠭᠦᠨᠡ
ᠬᠦᠢᠲᠡᠨ ᠳᠦ ᠲᠡᠰᠡᠪᠦᠷᠢᠲᠠᠢ ᠨᠠᠬᠢᠶᠠ ᠴᠢᠨᠢ
ᠬᠣᠸᠠᠷ ᠴᠡᠴᠡᠭ ᠦᠨ ᠦᠩᠭᠡ ᠲᠡᠯᠭᠡᠨᠡ ᠃
ᠴᠠᠰᠣ ᠮᠢᠨᠢ
ᠴᠠᠬᠢᠯᠭᠠᠨ ᠲᠡᠭᠷᠢ ᠶᠢᠨ ᠲᠣᠮᠳᠠᠭᠣᠷ
ᠴᠠᠢᠯᠵᠠᠵᠤ ᠢᠷᠡᠭᠰᠡᠨ ᠲᠠᠪᠠᠯᠭᠠᠨ ᠪᠠᠢᠨᠠᠮ
ᠴᠠᠢᠯᠭᠠᠨ ᠰᠡᠳᠭᠢᠯ ᠲᠠᠢ ᠪᠦᠰᠡᠭᠦᠢ ᠶᠢᠨ
ᠴᠠᠢ ᠳᠤ ᠨᠡᠮᠡᠭᠰᠡᠨ ᠰᠢᠬᠢᠷ ᠪᠠᠢᠨᠠᠮ ︕
ᠴᠠᠰᠣ ᠮᠢᠨᠢ
ᠢᠷᠦᠭᠡᠯ ᠬᠤᠪᠢ ᠶᠢᠨ ᠲᠣᠭᠣᠷᠢᠭ ᠵᠢᠷᠣᠬᠣ
ᠠᠯᠣᠰ ᠠᠴᠠ ᠴᠠᠢᠯᠵᠠᠭᠰᠠᠨ ᠢᠷᠡᠭᠡᠳᠦᠢ ᠪᠠᠢᠨᠠᠮ
ᠠᠨᠢᠪᠠᠯᠵᠠᠨ ᠲᠡᠷᠪᠡᠯᠵᠡᠬᠦ ᠰᠢᠪᠠᠭᠣᠳ ᠨᠢᠰᠬᠦ ᠰᠢᠭ
ᠠᠶᠣᠤᠯᠢᠬᠠᠢ ᠵᠢᠷᠦᠬᠡᠨ ᠦ ᠮᠢᠨᠢ ᠣᠷᠤᠰᠬᠠᠯ ᠪᠠᠢᠨᠠᠮ ︕
ᠴᠠᠰᠣ ᠮᠢᠨᠢ
ᠰᠣᠷᠲᠠᠯ ᠰᠣᠷᠭᠠᠯ ᠰᠠᠢᠲᠠᠢ ᠬᠡᠣᠬᠡᠳ ᠲᠦ
ᠰᠣᠳᠣᠷ ᠨᠣᠮ ᠤᠨ ᠲᠡᠪᠲᠡᠷ ᠪᠣᠯᠵᠤ ᠲᠡᠯᠭᠡᠭᠳᠡᠨᠡ
ᠬᠣᠷᠣᠭᠣ ᠪᠠᠨ ᠬᠦᠰᠢᠭᠡᠭᠰᠡᠨ ᠬᠦᠭᠡᠷᠦᠬᠦᠨ ᠬᠦᠦ
ᠬᠠᠭᠣᠳᠠᠰᠣ ᠴᠠᠰᠣᠨᠠ ᠦᠰᠦᠭ ᠡᠷᠢᠶᠡᠴᠡᠨᠠᠮ ︕
ᠲᠣᠭᠣᠰᠣᠷᠠᠵᠤ ᠪᠠᠢᠭᠰᠠᠨ ᠲᠠᠯᠠ
ᠲᠣᠲᠣᠭᠠᠳᠤ ᠠᠴᠠ ᠪᠠᠨ ᠡᠬᠢᠯᠡᠵᠦ ᠴᠡᠪᠡᠷᠰᠢᠨᠡ
ᠲᠣᠩᠭᠠᠯᠠᠭ ᠲᠡᠭᠷᠢ ᠶᠢᠨ ᠡᠳᠦᠷ
ᠲᠣᠷᠠᠰᠢᠯ ᠳᠤ ᠲᠠᠲᠠᠭᠳᠠᠵᠣ ᠢᠷᠡᠨᠡ ᠃
ᠴᠠᠰᠣ ᠮᠢᠨᠢ
ᠰᠠᠯᠬᠢ ᠵᠢᠪᠠᠷ ᠤᠨ ᠲᠣᠮᠳᠠᠭᠣᠷ
ᠰᠣᠮᠣᠳᠠᠨ ᠰᠣᠮᠣᠳᠠᠨ ᠯᠠᠪᠰᠠᠨᠠ
ᠰᠠᠢᠷ ᠪᠣᠷᠳᠠᠭ ᠢ ᠴᠡᠪᠡᠷᠯᠡᠭᠡᠳ
ᠰᠢᠭᠣᠷᠠᠨ ᠰᠢᠭᠣᠷᠠᠨ ᠬᠣᠢᠯᠠᠷᠠᠨᠠ ᠃
ᠵᠣᠨ ᠤ ᠴᠠᠭ ᠴᠠᠰᠣ ᠶᠢ ᠡᠷᠭᠢᠴᠡᠭᠦᠯᠦᠭᠰᠡᠨ ᠨᠢ
ᠵᠣᠬᠢᠶᠠᠭᠴᠢ ᠮᠢᠨᠤ ᠡᠨᠳᠡᠭᠦᠷᠡᠯ ᠭᠡᠵᠢ ᠦᠦ ︖
ᠵᠢᠷᠭᠠᠯᠲᠣ ᠪᠠᠢᠭᠠᠯᠢ ᠶᠢᠨ ᠭᠠᠢᠬᠠᠮᠰᠢᠭ ᠨᠢ
ᠵᠢᠶᠠᠭᠠᠲᠤ ᠨᠠᠢᠵᠢ ᠨᠠᠷ ᠤᠨ ᠰᠡᠳᠭᠢᠮᠵᠢ ᠭᠡᠵᠢ ᠦᠦ ︖
10 0